A/N: Hello Everyone!

Joote –chappal mat maarna yaaron. I know, bahut saaari stories update karni hain, lekin kya karoon, ek interesting plot mila toh socha likh hi loon.

This is a joint venture by Me and DivaNims aka Nimisha. Idea credits owned by "Nimisha". This is for some special people out here. Hope they like it.

Enjoyy it Girls ! Happy Reading!

Jaipur, haan bhaiya yahi hai Rajpooton ki basti, the pink city yane ke gulabi sheher ,sab is jagah ko gulaabi sheher ke naam se toh jaante hain kyunki is sheher ki subah bhi gulaabi aur sham bhi gulaabi, lekin yahan kai aise log hain jinhe gulabi mausam se mera matlab hai ki pyaar mohabbat se door door tak inka koi lena dena nahi hai, inke liye maaine rakhta, aaiye milate hain aapko do aise hi parivaron se

SINGHANIA MANSION

"Jee Maa-sa hum aage se dhyan rakhenge aap hume maaf kar deejiye"

Ye hain Ruhana Singhania, Singhania parivar ki sabse badi beti, apne pita Aalok Singhania ki ye sabse chahiti hain ,inke pita ke sheher ke naamchin businessman hain Shakti Jwellers ke M.D Aalok Singhania ki beti Ruhana Singhania, Yun toh Ruhana Aalok ki sabse zyada ladli aur chahiti beti hain, lekin apne usool aur aude ke pakke bhi hain , isliye apna pyaar dikhate nahi, Ruhana bade hi shaant swabhaav ki hai, ab laazmi bhi hai itne zyada sakht vatavaran mein koi bhi hasta khelta insaan murjha jaaye phir toh ye ek nanhi si kali hai, aap khud hi dekh lijiye

"Humne aapko kitni baar samjhaya hai Ruhana, ki hume har kaam samay se chahiye, aap samay se kyun nahi aayin?"

Ye hain Ruhana ji ki Mataji Shalini Singhania,ye kaafi usoolon wali hain ,inke usool todne waale ko sakht se sakht saza milti hai

Ruhana: Wo Maa koi darwaaze pe aa gaya tha isliye hum aadha minute late ho gaye

Shalini ji: Hume mat samjhaiye, sasuraal mein kya naak katwayengi aap humari? Kal aap dono ko ladke waale dekhne aane wale hain, isliye behtar yahi hoga ki aap ab salika sikh lein, Waise wo aapki laadli behen kahan hai? Unhe bula lao kaho ki foran haazir ho, hume kuchh zaroori baat karni hai

Ruhana: Jee Maa sa

Aur Ruhana jaldi jaldi chalke baahar aangan ki taraf badhi, baaghon mein khadi ek pyari si ladki jo titli pakadne ki koshish kar rahi thi

Ruhana: Aap yahan hain, Maa sa aapko kabse bula rahi hain

"Hey bhagwaan, lekin hume toh phool todne they ab?"

Ye hain Aalok Singhania ki chhoti beti Kaira Singhania,Ye bhi apni behen ki tarah shaant aur apni maa sa ke sakht swabhaav se ye bhi acche se parichit hain, isliye na zyada bolti hain aur na zyada kisi ki sunti

Ruhana: Wo sab hum kar lenge,is se pehle ki Maa-sa ka paara sar pe chadhe tum jao

Yahan Dusri Taraf

Gym khaane me kasrat kar rahe ye janaab phone aane par kasrat chhodke kis se baat kar rahe hain aaiye dekhte hain

"Aap yahan ki fikar mat keejiye aap bas wahan man lagakar padhiye aur apna aakhri exam dekar jald se jald yahan aaiye Kaki sa aapki raah dekh rahi hain"

Ye hain Sachin Singhania, Aalok Singhania ke bête yun toh inka man kaafi shaant hai, par ye khus behad khushmijaaz hain kisi ki kisi bhi tarah ki baat ka bura nahi maante

Tabhi inhe ek aawaz sunai deti hai aur ye turant gym khana chhodke ek kamre ki taraf badhte hain

Sachin: Ye dono ladkiyan kisi din marwayengi hume...

Aur aisa kehte huye wo ek kamre mein daakhil hote hain jahan ka rang bilkul badla hua tha, do ladkiyan yahan naach rahi thi

"Engine ki seeti mein mharo bum dole
Engine ki seeti mein mharo bum dole
Le le le...

Engine ki seeti mein mharo bum dole
Engine ki seeti mein mharo bum dole
Dauda dauda re...
Dauda dauda re driver chal mat haule haule
Dauda dauda re driver chal mat haule haule
Thoda aur bhaga le
Driver chal mat haule-haule, le le le

Engine ki seeti mein mharo bum dole"

Sachin unko dekhke hairan nahi they lekin pareshan zaroor they, wo turant jaake phone band karte hain

"Kya bhai aapne sara maza kirkira kar diya"

Ye hain Kuki Singhania Aalok Singhania ke chhote bhai Prakash Singhania Ki putri,waise toh ye zyada chanchal nahi hain, par inki chacheri behen ki wajah se ye bhi hasi mazak karti rehti hain

Sachin: Agar yahan aake badi Kaki sa aur chhoti kaki sa ne dekh liya na, aap dono is ghar se bedakhal hongi hi saath mein hum bhi nikaal diye jayenge

"Hum jaante hain na ki aap hain hum dono ko bachane ke liye"

Aap hain Palak Singhania ,Aalok Singhania ke sabse chhote bhai Omkar Singhania ki beti, waise toh aap humesha hi chanchal rehti hain, daudti bhaagti rehti hain aur ghar ki saari ladkiyon me se sabse shararti aap hi hain

"Haan haan fayda utha leejiye, bhai mile hain wo bhi itne sharif"

Aur aap hain Dushyant Singhania Prakash Singhania ke bade bête ye bhi shaant swabhaav ke hain jo thoda bahot chulbulahat hai inme wo inki behen Kuki ki wajah se mila hai inhe...ye apne dil ki baat dil mein hi rakhte hain

Yahan Dusri taraf

Gaadi ka intezar kar raha koi khada tha

"Shyamlal ji itni der lagti hai aapko car lane mein, aapko pata hai ki hume der se pahonchna bilkul nahi pasand fir bhi aap"

Aap hain Kabir Singhania, Omkar Singhania ke bête aur Palak ke bhai, aapne apne bhaiyon ki tarah apna family business nahi chuna, balki apni manmarzi ke hisaab se aapne patrakarita ko apna pasha banaya, aap KKN ke editor in chief hain , halaki aapke is faisle se aapke parivar ke bade buzurg na-khush hain, par fir bhi aapko is se koi farak nahi padta, aapko gussa bahot jald aata hai...

Yahan Dusri Taraf

New York, U.S.A

"India I'm coming soon"

Aap hai Kavin Singhania, Prakash Singhania ke chhote bête aur Kuki aur Dushyant ke bhai, Aap hain toh bade hasmukh, aur hasi mazaak karna aapko bahot acchii tarah aata hai, aapka dil sambhaale nahi sambhalta, kisi na kisi kanya par fisalta hi hai

Aap mil toh chuke hi hain Singhania Parivar se Par kahani abhi baaki hai, ab baari hai inke padosi mane ke saamne waale parivar ki,Ranawat Parivar ke sadasyon ka

RANAWAT MANSION

"Noor, humari coffee deejiye jaldi hum late ho rahe hain"

Ye hain Rajat Singh Ranawat, Kohinoor Group of Hotels ke CEO Sooraj Singh Ranawat ke bête, ye ghar ke iklaute hain jo sharmile hain...aur saath mein shaant bhi

Tabhi koi phone pe baat karte huye wahan aata hai

"Wo sab main nahi janta lekin mujhe is project ki sari details aaj chahiye apne cabin mein, ye nahi janta that how would you do that, but you have to make it anyhow, and at any cost"

Ye hain Arjun Singh Ranawat, Sooraj Singh Ranawat ke chhote bête, ye is ghar ke angry young man hain, koi inse hasi mazak kare ye inhe pasand nahi, inhone zarurat se zyada zimmedariyan le li hain apne upar

Yahan Dusri Taraf

Lawn Mein

"Ye, ye hai Jeet Khanna? Nahi 10-12 companiyan hongi iski haina, 2-4 acche bade bangle honge iske haina? "

Aap hain Akshay Singh Ranawat, Suraj Singh Ranawat ke chhote bhai Ajit Singh Ranawat ke bête peshe se toh aap ek psychiatrist hain lekin log jab aapko dekhte hain toh logon ko lagta haiki aapko dimaag ke ilaaj ki zarurat hai, aap Ranawat parivar ke sabse shararti ladke hain

"Jee bhaiya bilkul yahi Jeet Khanna hai, maine khud pata kiya hai apne sources se"

Aap hain Nimisha Ranawat, Ajit Ranawat ki beti aur Akshay ki behen,Ranawat khandaan ki betiyon mein sabse badi hain aap, peshe se aap ek journalist hain aur aap bhi KKN news channel mein senior NEWS reporter hain, aap humesha hasti muskurati rehti hain chaahe situation kitni hi tough kyun na ho aapke paas har situation ka solution hota hai

Akshay: Tumhare sources nakli hain

Nimisha: Bhai aap na please apna kaam karo aur mujhe apna kaam karne do...

Akshay: Main jab keh raha hun na ki ye Jeet Khanna ho hi nahi sakta, iski shakal dekhi hai,ye Jeet Khanna ho hi nahi sakta

Nimisha: Bhai aap na ye dekho...(unhe apne tab mein ek photo dikhate huye)

Akshay: Kya chiz hai yar kya chiz hai

Aur tabhi unke pichey se ek ladki aake wo tab chhin leti hai

"Main bhi toh dekhun, kiski photo dekhi jaa rahi hai"

Ye hain Areej Ranawat Suraj Ranawat ki beti aur Rajat aur Arjun ki behen, is ghar ki sabse natkhat ladki ye,koi aisa din nahi hota jab ye koi shararat na karein,har roz ghar ke kisi na kisi sadasya ka ye naamkaran zarur karti hain,Inhe khud nahi pata hota ki ye agle pal kya karne wali hain

Ke tabhi ek kamre se kuchh phootne ki aawaz aati hai unhe

Akshay: Lo ho gayi subha, jao manao apni bhens ko

Yahan ek kamre mein

"Ye ? Ye coffee banai hai tumne,isey coffee kehte hain? Jao aur dubara banake lao"

Aap hain Shefali Rajawat Suraj aur Ajit Ranawat ki behen Neerja Rajawat ki beti,yun toh aapka ghar Jaisalmer mein hai, aur par ye sara pariwar eksaath rehta hai, is Ranawat Mansion mein, waise toh aap bahot chanchal aur hasmukh hain lekin aap ko gussa bahot aata hai aur aapke gusse se koi nahi bach paya hai aaj tak ...

Tabhi Areej wahan Phone lekar aati hain

Areej: Bhains uska phone aa gaya le jaldi baat kar

"Kaisi ho tum dono"

Aap hain Aisha Rajawat Neerja Rajawat ki dusri beti. aapka bhi kal aakhri imtehaan hai aur aap California mein rehti hain, aap apni padhai puri karke jald waapas Jaipur aane wali hain, Aap bhi humesha hasti muskurati rehti hain, lekin aapne 3 saal se apne pariwar ka chehra nahi dekha, lekin ab aap apne pariwar ke paas lautne wali hain

Shefali: Tujhe yaad nahi aati na hum logon ki

Areej: Haan isiliye toh itne din baad phone kiya

"Arey aap log itmenaan se ladte rahiyega lekin abhi hume apni pyaari behen se baat karne deejiye"

Ye hain Vineet Rajawat Neerja Rajawat ke bête ,inhe har baat ki jaldi hoti hai, ye kisi ki nahi sunte, inka kaam humesha perfect hota hai,inki sirf ek kamzori hai wo hai inka rookhapan ye sirf apne pariwar walon ke liye narm hain, baki sab ke liye sakht, par dil inka behad masoom hai

Ye sab toh they Ranawat aur Singhania pariwar ke sadasya. Yun toh ye dono parivar ek dusre ke saamne rehte hain par in dono ke bich koi meljol nahi hai, balki dono parivar ek dusre ke dushman hain aur ye dushmani pure do peedhi se chalti aa rahi hai,ab aage aage dekhiye hota hai kya...!

A/N: So, i hope , aap sabko ye kahaani pasand aayi hogi. Ab dekhna ye hain ki kya in dono parivaaron mein koi rishta judta hai ya phir ye hamesha ki tarah dushmani hi nibhate rahenge.

Jaanne ke liye jude rahiye...FF par :p

Ab hum chalte hain!

Please R&R!

Love&Regards...

Nimisha&Roohi