Hi everybody. Back with the next chapter. Thank you Maya, Nisha and TsT for your beautiful reviews.
Breakup ke baad
Chapter 7
Muskaan apne ghar mein aik sofe pe baithi hui thi. Us ke saath hi Purvi aur Kevin bethe hue the aur sab ki hi nazrein laptop ki screen pe theen jahan Muskaan type kar rahi thi..."Dilchasp shakhs maloom hote hain ap Aditya ji. Mujhe ap ka andaaz pasand aaya"
"Hmm, waqaie Aditya jee to bare dilchasp shakhs maloom hote hain. Aur ap ko to un ka andaaz bhi pasand aya hai Muskaan ji" Purvi ne aik dost hone ka haq ada karte hue jitna Muskaan ko Aditya jee ke naam pe chaid sakti thi, chaira jis pe Muskaan se use musalsal ghonsay raseed ho rahe the.
"Chodo bhi na. Ab mujhe baat bhi to karne do. Bas chedna hi aata hai tumhe. Dekh lo, zyaada cheda to phir mein bhi baaz nahi aane waali tumhe Kevin ke naam se chaidne se. Kya samjhi?" Muskaan ne pehle minnat samajat wala andaaz ikhtiyaar kiya aur phir woh kuch soch kar badla lene ki thaanti hai.
"Acha bhaie. Choda tumhe. Tum to badle pe hi utar ati ho" Purvi ne naroothe pan se sharma kar kaha aur saath hi Kevin ki taraf dekha aur donon hi aik doosre ko dekh kar sharmaane lage. Muskaan ne isi baat ka faida uthaya aur poori tarah se chat ki taraf apna dheyaan muntaqil karti hai.
Aditya: Kya ap sach keh rahi hain?
Muskaan: Ji haan, mein bhala jhoot kyun bolun gi. Ap waqaie aik dilchasp shakhs maloom hote hain
Aditya: Woh bas kuch logon ko mein dilchasp siray se lagta hi nahi (sad emojie)
Muskaan: Are, kaisi baat kar di ap ne. Zaroor us shakhs ka dimaag kharaab hoga jise ap dilchasp nahi lagte. Kon hai woh?
Aditya: Koi thi jise mein bohat khaas samajhta tha par shayad mein ghalat hi samajhta tha
Muskaan: Ji han, woh bilkul khaas nahi. Waise woh thi kon jise ap khaas samajhte the?
Aditya: Meri ex girlfriend
Muskaan: Ohho, sun ke bohat afsos hua par ap fikar na kijiye. Duniya mein aur bhi bohat si larkiyaan hain. Woh to yakeenan ap ke qabil hi na thi. Ap ko zaroor koi us se behtar mil jaye gi
Aditya: Ap madad kar dijiye meri
Muskaan: Kya mein? (laughing emojie)
Aditya: Ji haan ap. Kar dein gi na meri madad aik achi si larki dhoondne mein?
Muskaan: Kyun nahi. Zaroor
"Kya baatein ho rahi hain Aditya jee se?" Kuch dair baad Purvi ne laptop ki screen pe jhaankne ki koshish karte hue pur tajasus wale lehje mein poocha.
"Woh mujhe apni love life ke baare mein bata rahe hain. Un ki ex ke baare mein. Kaise us ki ex ko us ki bilkul qadar nahi thi" Muskaan ne Aditya jee ke dard ko andar tak mehsoos karne ki koshish karte hue kaha.
"Kya keh rahe hain woh apni ex ke baare mein?" Purvi ne dilchaspi lete hue poocha.
"Keh rahe hain ke un ki ex unhe bilkul dilchasp nahi samajhti aur kehti hai ke woh bohat un romantic hai halanke yeh bilkul durust nahi" Purvi ne gamgeen lehje mein Aditya ki himaait ki aur us ki ex ki buraayi ki.
"Are tumhe kese pata ke Aditya ji ne tum se jo kaha woh sach hai? Woh jhoot bhi to bol sakte hain. Tum to un ki ex girlfriend ko jaanti bhi nahi" Purvi ka alag nazariya tha. Woh Muskaan ki raay se mutafiq nahi thi. Har tasveer ke do rukh hote hain aur yaqeenan is tasveer ka bhi doosra rukh zaroor hoga.
"Han, mein Aditya jee ki ex girlfriend ko nahi jaanti par..par itna kaafi hai ke mein Aditya ji ko jaanti hun aur woh jhoot nahi bolte. Samjhi?" Muskaan ne thoda sa ghussa dikhate hue kaha. Woh aise bol rahi thi jaise woh Aditya jee ko sadiyon se jaanti ho aur un ki har baat harf harf sirf sach hi ho sakti ho.
"Tum Aditya jee ko jaanti ho? Are tum ne unhe dekha tak nahi hai aur tum unhe janne ke daawe kar rahi ho. Kyun Kevin, mein sahi keh rahi hun na?" Purvi ne hans kar Muskaan ka mazaaq banana chaha aur us mein Kevin ko bhi shaamil hone ki dawat di.
"Han jaan, tum bilkul theek keh rahi ho. Aise thodi na jaan leta hai koi kisi ko woh bhi facebook chat ke zariye" Kevin ne bhi pate ki baat ki thi. Purvi us ki samajhdaari pe ash ash kiye begair na reh paayi.
"Bas, tum log mujhe Aditya jee ke khilaaf bharkaana band karo aur un ki us kameeni ex girlfriend ki sidein lena band karo" Muskaan sofe se khade ho kar taqreeban ghusse se cheekhi aur laptop apne kamre mein le ja kar darwaaza andar se maqful kar liya.
"Yeh kya likha hai tum ne Abhijeet?" Daya ne uljhe lehje mein poocha.
"Kya likha hai meine?" Abhijeet ne Daya se sarsari tor pe poocha. Saath mein hi woh type bhi karta ja raha tha.
"Koi thi jise mein bohat khaas samajhta tha par shayad mein ghalat hi samajhta tha is ke baare mein pooch raha hun. Tumhe Alka se Muskaan ka ziqar karne ki kya zaroorat thi?" Daya ne text ki taraf haath se ishara karte hue oonchi awaaz mein Abhijeet ka bheja hua text parha.
"Pata nahi yaar. Bas achanak se hi us ki yaad a gayi halanke aani to nahi chahiye the. Us ne mere saath jo kiya tha us ke baad mujhe use yaad to nahi karna chahiye tha par yeh dil kabhi kabhi bebas ho jata hai" Abhijeet udaas lehje mein bola. Pata nahi kyun use Muskaan ki yaad a gayi thi. Woh to samjha tha ke woh use apni zindagi ke saath saath dil se bhi nikaal chuka hai magar shayad woh ghalat tha magar ab use Alka ke saath ko apnana tha aur Muskaan ko bhoolna tha. Yahi tha us ka wahid mission is waqt zindagi mein.
To Be Continued