Mission: Finding Love Potion

(Mohabbat ki ek anokhi daastan)

Chapter 8

Woh Rasta

"Ise kya hua. Lagta hai fuse urne waala hai" Abhijeet ne chounk kar light ki taraf dekha jo mutawatar jal bujh rahi thi. Phir aik dam se hi bulb band ho gaya aur kamre mein har taraf andhera chaa gaya. Us ne aaj raat yunhi guzaarne ka faisla kiya aur socha ke fuse kal theek karwa de ga.

Isi tarhan poori raat guzar gayi aur sooraj ki kirnein us ke kamre ki khirki se chan chan kar us pe parne lagein. Us ne chounk ke aankhein kholein. Sooraj to poori tarah nikal chuka tha. Use to shayad office se dair ho gayi thi. Us ne ghadi pe waqt dekha to 12 baj chuke the. Us ne hairat se ghadi ko taka aur phir bistar se uthna chaha to uth na paya. Use bohat taiz bukhaar tha.

"Uff, Robin, yahan aana" Abhijeet apne kamre se zor se chillaya taake Robin tak us ki awaaz pahunch jaaye.

"Ji Abhijeet sir" Robin us ke saamne do second mein haazir hua tha.

"Tum ne mujhe office ke liye uthaya kyun nahi jab tumhe pata hai ke mein kabhi bhi office dair se nahi jata" Abhijeet ne bistar se taik laga kar bethne ki koshish karte hue kaha tha.

"Jab ap uthe nahi to mein aaya tha aap ke kamre mein ap ko uthaane magar yeh dekh kar ke ap ko to bohat taiz bukhaar hai, meine socha ke araam hi karne deta hun. Aik din office nahi jayenge to koi qayamat to waise bhi barpa nahi hogi" Robin ne qadar karne waale andaaz mein kaha aur phir dostaana andaaz mein bola kyunke Abhijeet ne bhi Robin ko kabhi mulaazim nahi samjha tha, apna aik dost samjha tha.

"Halka sa hi bukhar hai waise to lekin tumhara shukriya" Abhijeet muskura kar bola.

"Are ap bhi had karte hain Abhijeet sir. Yeh halka sa bukhaar hai? Yakeenan woh jo ap kal baarish mein bheeg gaye the na wahin se yeh bukhaar hua hai. Mein abhi ap ke liye dawaiyaan le kar ata hun. Kuch dair mein hi acha mehsoos karein ge khud ko" Robin pehle Abhijeet se daantne waale andaaz mein kehta hai aur phir wahan se dawaiyaan lene ke liye darwaaza band kar ke chala jaata hai.

Robin ke jaane ke baad Abhijeet ne side table pe pade apne mobile ko haath mein pakra aur us pe Anil sahab ka number milaane lagta hai. Pehli baar mein woh us ki call hi kaat dete hain. Doosri baar mein woh utha lete hain.

"Kya hua Abhijeet? Kyun phone kar rahe ho? Mein is waqt meeting mein masroof hun" Anil Sahab masroof andaaz mein phone uthaate hi bol parte hain. Anil Sahab ke peeche aur bhi awaazein a rahi theen.

"Dad woh, ap mulk chor kar chale gaye aur ap ne mujhe bataya bhi nahi?" Abhijeet ki aankh mein aik aansu a gaya magar us ne bedardi se use ponch diya ke woh kamzor nahi zahir hona chahta tha.

"Abhijeet, bacchon jaisi baatein karna band karo. Koi hamesha ke liye nahi chala gaya. Bas kuch maheenon ki hi baat hai" Anil Sahab ne jhunjhula kar kaha. Woh meeting room se baahir nikal aaye the. Unhe Abhijeet ki yeh baat bachkana lagi. Un ki so masrofiyaat hoti theen aur woh har aik ke baare mein Abhijeet ko mutlaa nahi kar sakte the.

"Ap mujhe aik call to kar hi sakte the" Abhijeet kamzor awaaz mein bola bukhaar ke zeere asar. Us ne shikwa kiya tha magar doosri taraf shayad kisi ko farak hi nahi para tha.

"Yeh sab baatein chodo, mere peeche office mein sab sahi chal raha hai na?" Anil sahab ne Abhijeet ke shikwe ko jhatakne mein do pal na lagaye the. Unhe sirf apne rutbe, haisiat, aur kaam ki fikar thi.

"Woh mein aaj office nahi ja paya, mujhe halka sa bukhaar ho gaya hai"

"Bohat kaam chor aur sust ho gaye ho tum. Halka sa bukhaar hi to hai. Tumhe office se chutti nahi karna chahiye tha" Anil Sahab ko to jaise koi farak hi nahi para tha. Kabhi Kabhi Abhijeet ko mehsoos hota ke Anil Sahab ke seene mein dil nahi koi pathar hai jo kuch mehsoos hi nahi kar pata.

"Agar ap kehte hain to mein chala jata hun office kuch dair mein" Abhijeet yeh na keh saka ke woh bhi un ki tarhan koi paisay bananay waali machine nahi hai. Woh bas itna hi keh paya ke woh un ki baat maan kar office chala jaye ga.

"Theek hai phir bye" Anil Sahab ne kaha aur call kaat di. Woh hamesha hi aise jaldi mein rehte the. Abhijeet aur un ke beech hamesha hi mukhtasar baat cheet hoti thi. Jis ka wahid mozooh hamesha kaam hi hota tha aur woh jab bhi koi doosra mozoo chedne ki koshish karta, Anil Sahab us ki baat ko jhatak dete.

Call kat gayi to Abhijeet ne phone ko ghusse se bistar pe phaink diya aur khud washroom mein ghus gaya. Bahar nikalne ke baad woh apne ap ko behtar mehsoos kar raha tha. Robin ne use dawaiyaan la dein theen jo us ne jaldi jaldi paani ke saath nigal lein.

"Ap phir ghar nahi ruk rahe kya aj?" Robin ne jab Abhijeet ko office ke liye tayaar hote dekha to fikar se poocha.

"Mein apne ap ko behtar mehsoos kar raha hun.Tum fikar na karo" Abhijeet ne sipaat lehje mein jawaab diya.

Abhijeet office pahuncha to taqreeban 2 baj chuke the. Sab ne use dekh ke use mushtarka salaam kiya aur us ka haal chaal bhi poocha kyunke aj woh office dair se aya tha. Us ne ghor kiya ke aaj Tarika office mein nahi thi. Woh us ke baare mein sochne laga aur us ko soch ke muskurata raha. Use woh raat bhi yaad ayi . Baarish mein bheegi raat aur aik weerana aur weeraane mein aik khoobsurat haseena aur ittefaqan woh haseena us ke hi office mein kaam karti hai, us ki hi secretary ke tor pe.

Shaam ko office se faarigh hone ke baad Abhijeet office building se baahir nikla aur apni gaadi mein beth ke apne ghar tak ka safar shuru kar diya, phir achanak hi use Tarika ka khayaal aya, use yaad aya ke woh office nahi ayi, us ne socha ke us ghar chala jaaye aur us ka pata kar le. Use sahi tarhan se to yaad na tha ke woh Tarika ke ghar tak kaise pohncha magar use itna zaroor pata tha ke woh raasta us ke jaane waale raste se hi kahin nikalta. Us ne socha ke woh dhoond hi lega Tarika ka ghar. Aakhir yeh abhi kal hi ki to baat hai. Phir us ne saare raaste chaan maare magar use Tarika ka ghar kahin na mile. Use khud bhi na pata tha ke woh kyun aise apna waqt zaaya kar raha hai, kyun aik ghar dhoondne ke liye bhatak raha hai. Shayad koi tajasus bhi tha.

To Be Continued

Please review if you liked the chapter. Thank you.