Mission: Finding Love Potion
(Mohabbat ki ek anokhi daastan)
Chapter 5
Agle kuch dinon mein Abhijeet aur Tarika ke relation mein mazeed betakaluffi a gayi thi. Wese to Abhijeet sab ke saath hi office mein kaafi betakaluf tha par Tarika ke saath us ki betakaluffi kuch badh ke thi aur use dekh ke Abhijeet ko apne andar ek ajeeb si khushi mehsoos hoti thi. Tarika ka bhi saamna kuch aise mehsoosat, jazbat se ho raha tha jo aj se pehle us pe kabhi aashkaar na hue the.
Abhijeet us din office se wapis ghar ja raha hota hai. Aasmaan ko badalon ne ghera hua tha. Abhijeet mehsoos kar raha tha ke jald hi baarish ka imkaan hai isi liye wo gaadi ko tez dodane laga tha. Us ke imkaan ke mutabiq hi jald hi baarish shuru ho gayi thi. Badal kuch zyaada gehre ho gaye the aur andhera na mehsoos tor par badh raha tha. Baarish kuch aisi tez hui ke minton mein hi sab kuch paani paani ho gaya. Ab Abhijeet ko ghar pahunchne ki kuch zyaada hi jaldi ho gayi thi par shayad ye uski badqismati thi ya shayad khushqismati ke gaadi achanak hi jhatka kha ke ruk gayi. Abhijeet ek pal ko hairan hua. Office se nikalte hue to us ne apni gaadi ko achi tarah check kiya tha aur gaadi mein koi kharaabi nahi thi. Abhijeet gaadi se nikal aata hai aur gaadi ko check karta hai. Use kuch samajh nahi aati ke yun achanak hi gaadi ko kya ho gaya. Wo baarish mein bheeg raha tha. Us ka poora jisam secondon mein paani paani ho gaya aur wo sardi se kanpne laga. Us ne apne aas paas nazar dorayi, ye koi veeraan sa ilaaqa tha, siwaye aik khoobsurat bungalow ke, yahan pe abaadi ke koi nishaan na the. Wo hairan hua ke woh yahan kaise pahunch gaya, us ke raaste mein toh koi is tarah ka veeraan ilaka ata hi nahi. Shayad us ne jaldi jaldi mein galat route le liya tha, yahi tha woh pehla andaaza jo us ke dimaag ko barwaqt sooja.
"Najaane ye baarish kab thame gi. Mujhe us ghar mein panah le leni chahiye" Us ne khud kalaami ki aur gaadi ko maqful (lock) kar ke bungalow ki jaanib qadam barhaane laga jo andhere aur veeraniyat mein ghira tha. Us ne paas pahunch ke door bell bajaayi. Kuch der darwaaza khulne ke koi asaar na nazar aye the jaise yahan rehne waala makeen har cheez se bekhabar ho aur ye aik beyakeen si baat ho ke koi us se milne aye. Abhijeet ko jhunjhalahat si mehsoos hui par nazar andaaz kar gaya aur dobara matawatar bell bajayi. Jald hi use qadmon ki awaz ayi aur us ne aik itmeenan ki saans li. Darwaaza khula aur Abhijeet hairaan reh gaya. Darwaaze pe Tarika khadi tha.. Khule curly baal, ligh baby pink nighie, aur slippers pehne wo hairaan hairaan si khadi Abhijeet ko tak rahi thi. Abhijeet ko yun mehsoos hua jaise Tarika jhijak rahi ho Abhijeet ko apne ghar ke saamne dekh kar, jaise koi anhona raaz daba ke bethi ho jiske khulne ka dar ho.
"Abhijeet sir, ap yahan kese?" Us ki awaaz mein beyakeeni thi. Wo kapkapa rahi thi bolte hue par foran hi us ne apne awsaab par qaabo paa liya
"Wo actually, meri gaadi kharaab ho gayi thi aur itni tez baarish ho rahi thiā¦" Abhijeet ne lachaari se apna mudda beyaan kar diya aur baarish ke naam pe Tarika ki nazar pehli baar Abhijeet ke bheegte wajood par gayi aur us ki dharkanein pehle se zyaada tez ho gayein. Abhijeet ke baalon se paani tip tip gir raha aur Tarika ki saanson ko kuch ho raha tha. Tarika ne foran hi apni nazrein chura lein aur phir tab bhi jab Abhijeet ke saraape ko dekhne se aankhein na bharein to kankhiyon se dekhna shuru kar diya. Najaane use is pal kya ho gaya tha
"Aiye ap please andar" Us ne Abhijeet ko andar aane ka raasta diya aur khud bhi andar a gayi Abhijeet ke saath ek muskurahat uchalte hue
"Tarika, tum ne kabhi bataya nahi ke tum yahan rehti ho?" Abhijeet ne ek nazar Tarika ko dekha aur doosri nazar is aali shaan bungalow par daali jis mein ek bada aali shaan living room tha, teen luxury bedrooms, aik lush push kitchen aur chota sa dining area jis ki khoobsurati ko in khoobsurat decorations ne badha diya tha. Abhijeet ne Tarika ki sense of design to dad di
"Kabhi ittefaaq hi nahi hua" Us ne aik jhainpi jhainpi si muskurahat ke saath jawaab diya aur nazrein jhuka lein
"Tarika, why are you living so lonely? Ye aik veeraan se ilaka hai, door door tak koi ghar nazar nahi a raha aur phir tum rehti bhi is itne bade ghar mein akeli ho. Kese? Tumhe dar nahi lagta" Abhijeet ki awaaz mein tajassus tha. Wo soch bhi nahi sakta tha ke Tarika yun zindagi se kat ke rehti hai.
"Bilkul nahi. Mujhe bas adat hai akele aur thoda sa hat ke rehne ki. Is mein bhala darne ki kya baat hai, ye mujhe samajh nahi aati" Wo hans kar boli.
"Ok as u wish. Achi baat hai ke tum nahi darti. Larkiyon ko hona bhi aisa hi chahiye jaisi tum ho" Abhijeet Tarika ki aankhon mein aankhe daal kar bolta hai aur aik khoobsurat si muskurahat Tarika ke chehre pe raksan kar jaati hai jisse dekh kar Abhijeet bhi andar hi andar khoob sarshaar ho jaata hai
"You must be feeling cold Abhijeet. I will get you a towel" Tarika ko ahsaas bhi na hua tha ke kab us ne Abhijeet ko sirf Abhijeet bola na ke Abhijeet sir. Abhijeet ne foran hi ye baat gor ki aur is betakaluffi pe muskura ke reh gaya. Aik apnaiyat si mehsoos hui thi use is lafz mein apne liye, kuch bohat anokha jo pehle kabhi us pe aaskhaar na hua tha
Tarika towel lene aik kamre mein chali gayi aur Abhijeet us ke peeche se ghar pe khoob gor o fiqar karne mein lag gaya. Wo is waqt living room mein betha tha. Wo apni jaga se utha aur pur sataish nazar poore living pe daali jahan dark red sofe pare the aur center mein aik khoobsurat sheeshe ki table jis pe kuch decoration pieces bhi pade the. Us ne musarat se un decoration pieces pe haath phera aur aik mizahiya si hansi hans diya. Achanak hi use bahar kuch girne ki awaaz ayi. Wo jaldi se khirki ke paas aaya aur sunehre sabz parde hata ke dekha. Use door door tak andhere aur veeraniyat ke illawa wahan kuch na dikha. Us ne bahar plant pots pe nazar daali, un mein se aik tircha pada hua tha aur us ka shak yakeen mein badalne laga ke bahar zaroor koi na koi hai
"Abhijeet, kya dekh rahe ho?" Abhijeet ko apne peeche Tarika ki awaaz ayi. Us ne palat kar dekha, Tarika ab aik munasib libaas zebtan kiye hue thi aur us ke haath mein tolia tha jis ko us ne sofe pe hi phela diya aur Abhijeet ke qareeb ayi
"Bahar koi tha Tarika, Mene khud kuch girne ki awaaz suni hai" Abhijeet dheere se bola
"Kon tha bahar Abhijeet, koi bhi nahi hai bahar" Tarika ne khirki se bahar nazrein phairte hue kaha. Us ki awaaz mein wazeh jhunjalahat thi. Ik ajeeb sa khouf tha jo sirf kuch pal ko hi raha aur doosre hi pal befikri ne us ki jaga le li.
"Ye dekho Tarika, plant pot idhar gira hua hai. Kya ab bhi tum yahi kaho gi ke bahar koi nahi. Mein dekh ke aata hun"
"Plant pot shayad pehle ka gira hua hai. Tumhe ghalat fehmi ho rahi hai" Tarika ko najaane kis cheez ki fikar thi par ye wazeh tha ke woh Abhijeet ko is maamle ko nazar andaaz karwa dena chahti thi
"Tarika, you think I lied?" Abhijeet ke chehre par yakdam hi ghusaa a gaya tha. Wo tarika pe chillana nahi chahta tha par na jaane kyun use jhunjhalahat ho rahi thi Tarika ke andaaz se. Jis tarika ko woh office mein milta hai us se to bohat mukhtalif lagti hai ye Tarika
"Okay, as you wish. Dekh lete hain bahir" Tarika ne aik pheekhi si muskurahat ke saath kaha
Abhijeet foran hi ghar ke baahar a jaata hai aur us ke peeche peeche hi Tarika bhi dodi dodi a jaati hai. Abhijeet pichli taraf lawn mein jaata hai. Door door tak kisi charind parind ka bhi nishaan na tha
"See, I said na koi bhi nahi hai baahar. I was right" Tarika ne jhainpi jhainpi si hansi ke saath Abhijeet ko apni baat jata di
To be continued
Abhi's Ira
