Mission: Finding Love Potion

(Mohabbat ki ik anokhi daastan)

Chapter 7


Abhijeet ne gaadi chalayi aur aage barhne laga. Woh soch raha tha ke yeh pata nahi wese kon sa raasta tha. Use yeh bhi fikar thi ke kyunke yeh rasta us ka dekha hua nahi is liye use shayad apne ghar jaane waala raasta dhoondne mein kuch mushkil ho magar us ki sab sochein aur andaaze ghalat saabit ho gaye. Woh inhi sochon mein dooba gaari chala raha tha ke use maloom bhi na tha ke woh kon se raste le raha hai aur jaise hi us ki tawajah wapis raaste pe gayi to us ne dekha ke woh us ka dekha bhala rasta tha. Us ne kuch dair hairat ka izhaar kiya magar phir apni khush qismati ka izhaar khud se hi karte hue gaadi apne ghar ki taraf dorata raha. Abhijeet ne shukar ada kiya ke baarish dobara nahi hui.

Woh ghar ke gate pe pohanch gaya to gaadi se horn maara. Horn ki awaaz sunte hi Robin dodta hua aaya aur gate khol diya. Abhijeet gaadi andar leta gaya. Abhijeet gaadi andar le aaya to Robin ne gate band kar diya.

"Kaise hain ap Abhijeet sir? Aj kuch dair nahi ho gayi ap ko. Koi masla ho gaya tha kya? Ap ke kapre bhi geele hain" Abhijeet gaadi se utra to Robin ne muskurate hue Abhijeet se poocha. Robin Abhijeet ke liye sirf mulaazim nahi tha, woh us ka dost bhi tha. Robin aur baaki mulaazmon ka pyaar aur qadar use achi lagti thi kyunke woh pyaar aur qadar use apne baap ke zariye kabhi mil nahi paya tha. Isi liye woh yeh pyaar doosron mein dhoondne lag gaya tha.

"Mein theek hun Robin. Tum bhi na, kitni fikar karte ho meri. Raaste mein baarish shuru ho gayi thi isi liye gaadi kharaab ho gayi thi phir kuch dair mujhe kisi ke ghar rukna pada baarish se bachne ke liye aur phir jab baarish ruki to meri gaadi moujazana tor pe theek thi. Hairat hai par hamein kya, gaadi to theek thi na, bas yahi chahiye aur usi baarish se yeh mere kapre bhi bheeg gaye" Abhijeet ne dostana andaaz mein araam se saari tafseel Robin ko batayi magar Robin ke chehre pe pata nahi kyun hairaangi ka taasur kyun tha.

"Baarish? Kaisi baarish?" Robin ne yakdam hi chounk kar Abhijeet ki aankhon mein dekh ke poocha.

"Kaisi baarish, kya matlab? Kya kabhi baarish hoti nahi dekhi kya?" Abhijeet ne hairat se Robin ko dekha aur phir hans kar mazaaq uraane waale andaaz mein Robin se bola.

"Nahi, mera matlab yeh nahi tha. Mere kehne ka matlab yeh tha ke aj to baarish hui hi nahi. Ap kis baarish ki baat kar rahe hain. Aj baarish kya honi thi, badalon ne bhi jhaank ke nahi dekha. Kahan pe the ap?" Robin ne hairat se apna mudda beyaan kiya jis pe Abhijeet hairat zada reh gaya. Woh soch raha tha kya Robin us se mazaaq kar raha hai. Aj to itni taiz baarish hui thi jis ka gumaan bhi na tha.

"Kya waqaie Robin? Lekin aise kaise ho sakta hai? Ya phir shayad wahan baarish hui ho magar yahan na hui ho. Tum bhi na, kin baaton mein phansa diya hai mujhe. Yeh bhi koi baat hai karne waali. Chalo, andar chalte hain" Abhijeet ne pehle kuch uljhan ka izhaar kiya aur phir is baat ko jhatak diya. Woh koi choti si baat ko le kar pareshaan nahi hona chahta tha.

"Theek hai Abhijeet sir" Robin ne kaha aur woh donon hi andar a gaye.

Abhijeet ne thak kar apna geela coat utaar ke sofe pe phainka aur khud bhi sofe pe dhay sa gaya.

"Mein ap ke liye khushk kapre laata hun Abhijeet sir. Kahin thand hi na lag jaaye ap ko" Robin ne Abhijeet ko dekha jis ke kapre poori tarah geele the.

"Thank you Robin mera itna khayal rakhne ke liye" Abhijeet ki aankhein sarshaari se nam si ho gayein. Jo Pyaar use apne sagge rishte na de paye, woh pyaar use paraaye de rahe the.

"Yeh mera farz hai Abhijeet sir. Mein abhi kapre lata hun" Robin pyaar se bola aur farmanbardari ka izhaar karte hue kapre lene ke liye chala gaya.

Chand minute ke baad hi Robin Abhijeet ke night suit ke saath haazir tha.

"Yeh lijiye Abhijeet sir. Ja kar kapre badal lijiye" Robin ne Abhijeet ko kapre pakaraye aur Abhijeet muskurata hua Robin se kapre pakarta hua badalne chala gaya.

"Robin, Dad kahan hain. Kahin nazar nahi a rahe" Abhijeet jab kapre badal kar aya to Robin se sawaaliya andaaz mein poocha. Woh taqreeban poore ghar mein dekh chuka tha magar Anil sahab kahin bhi nazar nahi a rahe the.

"Woh..woh shayad ap ko subah batana bhool gaye ke woh aik do mahine ke liye kisi kaam se mulk se baahir ja rahe hain. Unhon ne ap ke jaane ke baad hi hame mutlaa kiya aur phir samaan liya aur chale gaye" Robin ne hichkichaate hue kaha. Woh jaanta tha ke Abhijeet ko apne baap se kitna pyaar hai aur kis tarah woh apne baap ki beqadri par pal pal ghutata hai. Apne ap ko kam tar samajhta hai, jaise usi mein shayad koi kami reh gayi hai.

"Kya, chale gaye? Aise kaise chale gaye. Unhon ne mujhe batana tak gawaara na kiya" Abhijeet ki aankhon mein aansu a gaye. Use acha lagta tha yeh samajhna ke us ke baap ko us se bohat mohabbat hai magar hakeekat har baar ki tarah aj bhi us ki zaat pe kisi kaanch ki tarah chubi thi.

"Abhijeet sir, ap please pareshaan mat hon. Zaroor koi wajah hogi ke unhe ap ko batana yaad nahi raha" Robin ne Abhijeet ka dil halka karne ki koshish ki halanke woh jaanta tha ke yeh aik na kamiyaab koshish hai.

"Han, zaroor koi wajah hogi. Tum jao Robin, apne quarter mein araam karo. Mein theek hun" Abhijeet ne jhooti muskurahat ke saath Robin ko jaane ka kaha. Robin na chahte hue bhi apne quarter ki taraf chala gaya.

Abhijeet Robin ko bhejne ke baad apne kamre mein a gaya. Us ne kamre ki light jalayi aur bistar pe a kar beth gaya. Aik dam hi light jalne bhujne lag gayi.

"Ise kya hua. Lagta hai fuse urne waala hai" Abhijeet ne chounk kar light ki taraf dekha jo mutawatar jal bujh rahi thi.

To Be Continued


Hi guys, Sorry to disappoint you but there won't be lot of horror and supernatural stuff but I will try my best. I kinda lost my vision for this story. But still there will be some horror, supernatural stuff along romance, love and hurt.