Hello everyone. I earlier posted an abhivi story but now I'm gonna delete that because I did not liked it that much and in place of that, I thought of this. Another Abhivi which would surely prove to be an emotional roller coaster for readers I hope with some mystery and suspense. After reading please do tell in the review box if you liked it or not.

Dard Ka Naam Ishq

Chapter 1

A new nurse in the house

Woh us aalishaan kothi ke darwaaze pe khadi thi jo aas paas ki kothiyon mein numaya thi, apne khoobsurat aur munfarid andaaz ki wajah se. Us ne do minute ke liye kuch socha aur phir us darwaaze ko dakhailti gayi jo us ke hathon ke zor pe khulta gaya. Andar bilkul saamne use khoobsurat sa baagh dikhayi diya jahan ki sabz ghaas jagmag jagmag kar rahi thi. Baagh mein har jagah kuch jagah chod ke khoobsurat phool lage hue the. Tarhan tarhan ke phool. Gulab, motiya, lily wagera. Har jag mehka hua tha in phoolon ki khushboo se. Par kuch na mukammal tha is manzar mein. Is khoobsurat se ghar ki shadmaniyon mein bohat kuch namukammal tha jis ka pehle pehal andaza nahi ho pata tha par jald hi woh udaasi, woh namukammal pan har jagah ko ghair leta tha. Yeh bagh, ye ghar aur in ki shadmaniyan mukammal kese ho sakti theen is ghar ke malik ke begair. Phoolon ki khushboo mein bhi koi souz koi udaas saaz chira hua tha, kisi ki pukaar, kisi ki aas jo ab mit chuki thi ya shayad ab bhi jaari thi, mili hui thi. Us ne bhi is udaasi ko jald hi bhaanp liya jo har kone se tipak rahi thi. Is udaas mahol ne us par bhi aisa sehar phoonka ke us ko bhi apna har chota bada gam yaad a gaya aur us ka beikhtiyaar hi jee bhar aya. Us ne foran hi apne un do mote mote qatron ko saaf kar ke mun phair liya. Yakeenan, chokidar ne us ko dekh liya tha tabhi woh usi ki taraf a raha tha.

"Ji Madam ji, kon hain ap, kya kaam hai ap ko?" Chokidaar ne qareeb a kar dheemi awaaz mein istafsaar kiya.

"Ji mein Purvi hun, ap ko shayad Dr Sharma ne bataya ho mere baare mein" Us ne halki si muskurahat ke saath jawaab diya.

Chokidaar ne nazar utha kar is Purvi naami larki ko sarsari sa dekha. Woh aik ache kad kaath ki larki thi. Halka sanwala rang us ke purkashish naqoosh pe behad jach raha tha aur us ko bohat dilkash bana raha tha. Halke neele rang ka shalwar kameez pehne woh sada se huliye mein thi. Us ke baal pony tail mein simtay hue the. Woh agar in ko kholti to shayad qayamat lagti. Halki si gulabi surkhi lagaye us ke hont bohat jaazib e kashish the.

"Aap, ap nurse hain na chote sahab ki?" Chokidaar jo uske aane ka maqsad bhaanp gaya tha tasalli karne ke liye pooch raha tha.

"Ji Haan, Ap sahi pehchaane hain. Mein nurse hi hun" Woh dheere se aik baar phir muskuradi, un udaasiyon ko door phainkne ke liye muskuradi, us gham zada souz ko mitaane ke liye, chaahe aik pal ko hi sahi.

"Ji, ap andar a jayein. Dr Sharma bhi yahin hain. Un se mil lijiye. Woh ap ko apki zimmedariyan samjha den ge" Chokidaar ne apna aik farz nibhaane ki koshish ki.

"Ji mujhe maloom hai ke Dr Sharma mojood hain. Bhala mujhe bula kar khud kese gaayab ho sakte hain" Us ne hansne ki koshish ki. Ye dard bhare saaz to us se uski muskurahat ka haq bhi cheene ja rahe the jese is saaz ne is ghar ke makeen aur nokaron ki muskurahat cheen li thi par us ne apne ap se aik daawa kar liya ke woh is souz ko kam az kam khud par asar andaaz nahi hone de gi. Woh ye haq is souz ko nahi degi ke woh us se uski muskurahat cheen le. Woh to is ghar ko is ki muskurahatein lotana chahti thi aur woh tabhi kar sakti thi jab khud na chahte hue bhi muskuraye to shuba na hone de ke ye muskurahat zabardasti chehre pe bithayi gayi hai.

"Ji acha, Ram ap ko andar le jaye ga. Oye Ram, idhar a. Ye madam ji ko zara andar drawing room mein to bitha aur Dr sahab ko khabar kar do ke Nurse ji ayi hain" Chokidaar bhoklaa ke hans diya aur qareebi khade mulazim Ram ko bula ke Purvi ko andar le jaane ka hukam diya.

"Aiye Madam ji" Ram ne chalte chalte Purvi ko andar chalne ko kaha aur woh us ke peeche peeche chal di. Andarooni hisse ka darwaaza khol kar Ram chalta gaya aur Purvi us ke peeche peeche, ghar ka andarooni hissa nafasat se saja hua tha. Ram Purvi ko drawing room mein le aaya jo bohat ache andaaz se saja hua tha. Sofe nihait qeemti aur naram the ke un mein dhunsne ka ahsaas ho. Jagah jagah qeemti numaishi cheezein pari hui theen. Purvi aik sofe pe beth gayi aur Ram Dr Sharma ko bulaane chala gaya. Purvi ne aas paas nazar daalni shuru ki. Deewaron ka halka sabz rang drawing room ki sajawat se bohat mail kha raha tha. Woh isi ghor o fikar mein thi ke Dr Sharma andar daakhil huye.

"Hello sister" Dr Sharma muskura kar aik sofa sambhaal ke beth gaye.

"Hello Dr Sharma" Woh bhi khushdili se muskura di.

"Good to see you Purvi. Yeh tumhare patient ki reports hain jo tumhe uski dekh bhal mein bohat help kar sakti hain. Mukhtasaran to mein tumhe bata hi deta hun ke tumhare patient Abhijeet Kumar apna zehni santulan kho chuke hain. Woh bohat kam normal state mein dikhayi dete hain. Unhe koi bohat gehra sadma laga hai" Dr Sharma udaasi se batate ja rahe the. Aik ghamzada muskurahat is udaasi ke safar mein saath saath thi Dr Sharma ke chehre par bhi aur Purvi ke chehre par bhi.

"Unki is halat ko kitna arsa ho chuka hai?" Purvi ne sarsari sa poocha.

"Qareeb qareeb 2 saal"

"Kya? 2 saal? Kya sadma hai Mr Abhijeet ko?" Purvi ne hairat se poocha. Use andaaza nahi tha.

"Mujhe to kuch zyaada pata nahi. Shayad kisi larki ka chakkar tha. Nokaron ke zariye hi pata chala hai. Aur haan, tumhe apni duty bohat ahtiyaat aur ache se nibhaani hogi. Choti si kotahi bhi bhaari pad sakti hai. Woh kabhi kabhi bohat violent ho jata hai aur use kuch yaad nahi rehta hai" Dr Sharma har choti se choti tafseel bhi bohat tafseel se Purvi ko samjha rahe the. Use us ki zimmedariyan bawar kara rahe the.

"Ap fikar na karein. Mein sab sambhal lungi. Apni poori lagan aur koshish is ghar ki muskurahatein wapas laane mein laga dungi. Ap ki hi tarhan mujhe bhi yeh gamzada mahol bohat kuch keh raha hai. Pata nahi kitne raaz is mahol ne apne andar asaani se daba liye hon kabhi afshan nahi karne ke liye" Woh is sehar se bahir nahi nikal pa rahi thi par is ghamzada sehar ko todna zaroor chahti thi phir chahe woh sehar us ki kisi jhooti muskurahat se hi toote par kitni bewaqoof thi woh ke yeh bhool gayi ke kya sehar bhi kabhi jhoot, kisi saraab se toota hai.

"Mein bohat mutmain hun ab. Mujhe bharosa ho gaya apne chunao par. You are the best girl for this duty" Dr Sharma ne sarsari sa kaha.

"Ao mein tumhe tumhare patient se milwa dun" Dr Sharma guftagoo ka ikhtitaam karte hue kehte hain.

"Is ki zaroorat nahi hai. Ap bas mujhe kamra dikha dijiye. Mein khud mil lungi. Wese bhi, ab to mujhe hi use handle karna hai to sahara lena nahi chahti kyunke agar ab sahara lun gi to dobara bhi zaroorat mehsoos hogi. Apna bharosa tootwana nahi chahti" Purvi hans ke kehti hai. Woh apni zindagi ki kuch badqismatiyan dekh chuki thi. Kayi baar apna bharosa aur himmat tod chuki thi, sahare le le kar jee ke us ne konsa apni zindagi jee li thi. Phir ab itni mushkil se woh bharosa, woh himmat kisi sahare ke zariye tod kaise sakti thi

"Bohat bahadur aur pur azam ho tum" Dr Sharma sitaishi lehje mein bole.

"Bahadur to koi bhi nahi hota Doctor sahab. Halaat bahadur bana dete hain. Kabhi halaat kam asar andaaz hote hain aur kabhi zyaada aur halaat ki sakhti ka har lahma ap ko andar hi andar aik nayi shaksiyat mein ubharta hai jo shayad pehle se zyaada mazboot hoti hai" Purvi muskura ke kehti par us muskurahat mein dukh tha halaat ki sakhti ka par azam tha jo in halaat ne use baksha tha aur use aur bhi mazboot kar diya tha.

"Bohat falasfi maloom hoti hain ap. Ap ki qurbat to ap ke mareez ko jald hi sehtiyaab kar de gi"

"Shukriya. Umeed rakhti hun ke ap ke andaaze sahi saabit hon ge" Purvi hans kar kehti hai. Ab woh pur umeed thi, pur azam thi. Us ke hosle barhaane waale yahan bohat the aur woh khush thi.

" Ram idhar ao" Dr Sharma buland awaaz mein Ram ko bulaate hain jo drawing room ke bahir hi safayi kar raha tha.

"Ji Dr Sahab" Ram adab se poochta hai.

"Ye Purvi Madam hain, tumhare chote sahab ki nurse. Har roz yeh subha se raat tak yahan rukein gi. Ap ne in ka khaas khayaal rakhna hai kyunke in par sab se bhaari zimmedaari hai. Purvi madam ko sahab ke kamre ke bahar tak chod ao" Dr Sharma Ram ko uski saari zimmedariyan Purvi se mataliq samjhate hain aur Purvi ko Abhijeet ke kamre ke bahir chodne ka hukam dete hain.

"Aiye Purvi Madam" Ram Purvi ko mukhatib karta hai aur Purvi Ram ke peeche peeche chal parti hai. Do taweel rahdariyon ko guzaar kar woh aik kamre ke darwaaze pe pahunch gaye. Kamre ka bahar wala hissa bohat nikhra nikhra aur khoobsurat dikh raha tha par andar ke nizaare mein zameen aasmaan ka farak tha. Ram usko chod kar chala gaya to usne dheere se darwaaze ko dhakka diya aur woh khulta chala gaya aur us pe kamre ki asal haalat aashkaar ho gayi. Kamra khula aur bada tha par utna hi bikhra hua aur betarteeb. Usko hairani nahi hui. Yaqeenan jis insaan ko apni hosh nahi, use apne kamre ki hosh kaise ho sakti hai. Kamre mein darmiyaan mein aik bistar rakha hua tha. Side pe aik do kursiyaan rakhi hui theen. Kamre ki deewaron pe kaala rang hua wa tha. Aur phir uski nazar us pe gayi jo har cheez se begana lagta tha, aik kursi pe betha hua, aankhein band kiye pata nahi kya woh itne ghor se soch raha tha. Us ke baal bikhre hue the. Us ki aankhon ke neeche halke pad chuke the aur yakeenan jab woh apni aankhein khole ga to woh laal bhi hongi. Woh aik maila sa libas pehna hua tha jise pata nahi kitne dino se utara nahi gaya tha. Us ne aankhein band kar ke aik gehri saans li aur qadam ba qadam uske bilkul qareeb ho gayi.

"Abhijeet" us ki awaaz mein narmi thi aur aik sureela taasur tha.

Pata nahi kya tha us ki awaaz mein ke woh jisne duniya ki fikar karni chod di thi, apne ap ko duniya se bilkul alaida kar diya tha, woh is awaaz se jaag gaya aur use is pal yun laga ke yahi to woh awaaz thi jiska woh barson se intizaar kar raha tha.

"Geet...Geet ye tum ho na...tum kahan chali gayi thi...mein kab se tumhara intizaar kar raha tha" Woh uchal ke khada ho gaya. Purvi ke andaaze ke mutabiq us ki aankhein waqaie laal ho rahi theen. Woh jab bola to us ka gala rundha hua tha aur lehje mein barson ka dard beh raha tha.

"Geet..Abhijeet...Geet, Abhijeet...Geet, Abhijeet" Woh thatak gayi. Yeh do naam Geet aur Abhijeet. Us ka dimaag usko kuch bawar kara raha tha. Kuch chan se toota tha uske dil aur dimaag mein.

To be continued