Crazy for Abhi: Hi, I appreciate your request but mera likhne ka style ab aisa hi ho chuka hai, mujh se likha hi nahi jayega warna. But I really want to make it easy for you. So mein koshish karungi ke zyaada mushkil words use na karun ya phir bracket mein uska asaan matlab likh dun. Agar phir bhi kisi lafz ki, ya jumle ki samajh na aye to feel free to ask. Btw Thank you for liking the story.

Babli15: Aw, thank you so much for giving so much love to the story. I hope agay bhi story pasand aye gi. And loved your reviewing style. Maza aya padh ke :) ;)

Thank you all the readers and reviewers.

Dard Ka Naam Ishq

Chapter 2

Geet

"Geet..Abhijeet...Geet, Abhijeet...Geet, Abhijeet" Woh thatak gayi. Yeh do naam Geet aur Abhijeet. Us ka dimaag usko kuch bawar kara raha tha. Kuch chan se toota tha uske dil aur dimaag mein par doosre hi pal usko apne is khayaal pe shuba hone laga. Woh zaroor uska weham tha. Dil ko behlaane ko shayad ye khayaal acha tha aur uska dil waqaie behal gaya aur woh mutmain ho gayi.

"Abhijeet...hosh mein ao. Mein..mein Geet nahi hun. Mein Purvi hun, tumhari nayi nurse" Purvi Abhijeet ki aankhon mein aankhein daalti hai aur usko baawar (yakeen) karati hai ke tumhara khayal ghalat hai, tum ghalat ho, mein Purvi hun, Geet nahi. Usko ye to nahi pata chala ke woh usko yakeen dila bhi payi hai ya nahi par apni aik pehli koshish to woh kar hi chuki thi.

"Tum...tum geet nahi..nahi ho?" Woh atak atak ke poochta hai. Shayad use abhi tak yakeen nahi a paya tha ke woh Geet nahi, Purvi hai.

"Haan, mein nahi jaanti ke ye Geet kon hai par itna zaroor jaanti hun ke Mein Geet nahi hun" Purvi kehte hue muskura deti hai. Woh chahti thi ke Abhijeet us ke saath apnaiyat mehsoos kare. Woh ajnabiyat ki tamam diwaarein gira dena chahti thi kyunke aik yahi rasta tha Abhijeet ko behtar haalat mein laane ke liye.

"Tum sach keh rahi ho? Kya tum waqaie Geet nahi?" Uski umeed bohat mazboot thi par shayad ab ye umeed, ye aas toot rahi thi. Us ka yaqeen bhi shayad digmaga (toot) raha tha. Woh soch raha tha kya ye larki jo mere saamne khadi hai waqaie Geet hai ya phir koi saraab (aankhon ka dhoka) jo Geet ki soorat (shakal) mein use nazar a raha hai. Par ab jo yeh aas tooti to woh jaise khud toot gaya, us ke qadam digmaga gaye aur woh kursi pe aada tircha (taida) gir gaya.

"Sambhal ke" Purvi ne jab use yun digmaga kar girte dekha to foran uske qareeb dod ke ayi aur usko theek tarhan se bethne mein madad di.

"Tum theek to ho na?" Woh aik baar phir kursi par betha hua tha aur us ne zor se apni aankhein bhainch (band) leen theen. Najaane kaisa bojh lada hua tha uske dil pe ke uski kaanpti taangon ne to Purvi par bhi aik ajeeb sakta kar diya.

"Hm" Abhijeet ne aankhein band rakhe hi aur bole begair hi apne sar ko zara sa ghuma kar jawab diya jaise koi jawab dene ki bhi sakat (takat)na ho.

"Tum kon ho?" Woh bohat ahista bola jaise mun hi mun mein barbada (bol) raha ho par Purvi ki simaat (sunne ki takat) ne ye sunne mein dair na ki.

"Mein Purvi hun" Woh muskura ke boli aur betakalufi se aik kursi ghaseet kar beth gayi. Us ne Abhijeet ko yeh yaad dilaane ki koshish bhi na ki ke woh us ko bata chuki hai ke woh kon hai. Kyunke woh usko jhunjhalane aur chidchide pan se door rakhna chahti thi.

"Kon Purvi aur tum yahan mere kamre mein kya kar rahi ho? Mujhe bilkul pasand nahi hai ke koi bhi mere kamre mein daakhil ho" Abhijeet ne Purvi ko aankhein dikhayein aur goya jitaya ke woh yahan uski ijazat ke begair ayi bethi hai aur woh is ke liye bilkul raazi nahi hai.

"Mein Purvi hun, tumhari nurse Abhijeet, tumhari dekhbhal ke liye" Purvi pe jaise Abhijeet ke ghusse ka koi asar na hua aur woh wahin bethi hui muskura rahi thi. Use sabit qadam rehne ki zaroorat thi. Darna usne ab chod diya tha.

"Niklo yahan se" Abhijeet ki aankhon mein ghusse ki aag jalne lagi. Woh palak jhapakte Purvi ke qareeb aya aur uska baazu pakad ke kamre se nikaalne ki tag o do (koshish) karne laga.

"Abhijeet, hua kya hai? Mujh se koi ghalti ho gayi hai kya?" Purvi narmi se boli aur apna baazu Abhijeet ke qabze se bahir laane ki tag o do mein jid (lag) gayi jis mein woh jald hi kamyab ho gayi kyunke Abhijeet bohat kamzor ho chuka tha, aur uska koi sahi khoraak ka waqt nahi tha.

"Mujhe kisi nurse ki zaroorat nahi hai. Samjhi tum? Tumhari bhi zaroorat nahi hai mujhe. Is se bada tumhara aur koi qasoor ho hi nahi sakta aur yahi tumhara qasoor hai" Abhijeet ghusse se kaanp raha tha. Us ki cheekhne ki awaazein bahir bhi sunai de rahi theen aur baahir Ram aur Dr Sharma pareshaan ho rahe the.

"Calm down Abhijeet. Betho udhar, mein tum se bas ye poochna chahti hun ke tumhe nurson se itni nafrat kyun hai? Tumhe kya apna khayal rakhwana acha nahi lagta? Har shakhs, har insaan apna khayal rakhna aur rakhwana zaroor chahta hai" Purvi Abhijeet ko behlaane ki aik nakaam si koshish karti hai aur usko zabardasti baazu se pakad ke qareebi sofe pe bitha deti hai aur hans ke Abhijeet se yun sawaal poochti hai jaise woh dono aik doosre ko barson (saalon) se jaante hon.

"Mujhe kisi nurse ki zaroorat nahi hai, samjhi tum. Pagal nahi hun mein, samjhi. Tum sab...tum sab mil kar mujhe pagal saabit karna chahte ho, par mein itni asaani se tum logon ko sahi saabit nahi hone dunga. Tum bhi...tum bhi mujhe yahan pagal saabit karne ayi ho na? Bolo na...pagal saabit karne ayi ho mujhe?" Woh zor zor se cheekh raha tha. Kamre ki diwaarein us ki cheekhon se goonj rahi theen. Woh buri tarah se ladkhada raha tha aur saath hi aansuon ki aik qitaar (lakeer) bhi uski aankhon se behne shuru ho gayi jaise ab us se bardasht na ho paya ho aur woh jo aansu ghusse ke peeche dabe bethe the zabardasti be inteha koshish ke bawajood bahir beh gaye aur us ka sara ghussa us ke aansuon ke peeche jhaag ki tarah beth gaya.

"Abhijeet, Abhijeet, calm down. Tum kehte ho to mein chali jati hun. Tum se zyaada azeez nahi hai mera yahan rehna" Purvi ki aankhon se aasuon ki aik qitaar beikhtiyaar hi beh nikli. Woh Abhijeet ki halat se kuch zyaada hi mutasir ho gayi thi par woh kyun bhool gayi ke woh kamzor nahi ho sakti, doosre hi pal us ki ungliyaan be rabtgi (be dheyaani) se apne aansuon ko Abhijeet ki nazar se chupa kar khushk kar rahi theen.

"Kya tum waqaie ja rahi ho?" Woh beyakeen si kaifiat ke zair e asar (asar ke andar) bol raha tha.

"Haan, tum fikar na karo, mein ja rahi hun. Tum apna khayaal rakhna. Apna khayal rakhne se behtar koi kaam nahi hai zindagi mein. Zindagi aik baar hi milti hai. Dukh to milte hi rehte hain, ye zindagi ka rasta hai hi kuch aisa, har sadak pe koi na koi dukh aahon bhare kehkahe (hansi) laga raha hota hai. Par aik baat jo nahi bhoolni chahiye hai woh yeh hai ke dukh ke raste se bhi kahin aage aik aisa rasta hai jahan khile khile phool hi phool hain, rang hi rang hain, khushiyaan hi khushiyaan hain aur wahan har khawab ki tabeer milti hai" Purvi ki ungliyaan darwaaze ke handle ko pakri hui theen, uska aik qadam kamre ke andar tha aur aik kamre ke bahar. Us ki awaaz mein ajeeb qisam ka sehar angaiz jadoo tha.

"Bakwaas band karo apni.Please tum chali jao. Mein jaanta hun ke mere khawaab ki koi tabeer nahi hai. Mujhe mat pareshaan karo. Kyun pareshaan kar rahi ho. Chali jaooo. Aur ab kabhi wapas na aana. Kya karogi is qabristan mein reh ke. Sab murda hai. Sab kuch murda hai yahan. Kisi cheez mein jaan nahi hai. Mein bhi mar chuka hun. Yeh shayad meri bhatki hui rooh hi to hai" Woh achanak hi phir se mushtail (bhadak) ho gaya aur us ke alfaazon ki tarhan us ka zehan bhi doobta gaya. Woh jaane kaisi baatein kar raha tha jin se kahin se bhi zindagi ki koi jhalak na dikhti ho, jahan se murdgi ka dhuaan uthta ho, Purvi zaroor aik nurse thi par zyaada tajurba nahi tha uske paas aur yeh uska pehla mouqa tha kisi zehni mareez ki dekh bhal karne ka. Aik pal ko to Purvi ko waqaie aisa mehsoos hua jaise woh waqaie kisi qabristan mein khadi ho, us ne hairat se idhar udhar nazrein dodayein par woh sirf aankhon ka dokha tha, Woh qabristan mein nahi, Abhijeet ke bejaan se kamre mein hi khadi thi. Us ka aik paon darwaaze se bahir tha. Woh beikhtiyaar hi do qadam peeche le gayi aur wapas jaane ko mud gayi.

"Hahahahaha. Dar ke bhaag gayi. Dar gayi na. Darna bhi chahiye warna tumhari bhi rooh yahan bhatak rahi hoti jaise meri rooh bhatak rahi hai" Purvi ke kaanon mein yeh jumla goonja. Abhijeet apne kamre mein zor zor se kehkahe laga raha tha jo jald hi aahon bhare kehkahon mein tabdeel (badal) ho gaye. Woh siskiyon se rote hue pagalon ki tarah hans raha tha. Purvi ke rongte (goosebumps) khade ho gaye. Us ne apni aankhein sakhti se bhainch leen.

Doctor Sharma aik magazine ka safha (kagaz) palat rahe hote hain ke unhe kuch qadmon ki chaap (awaaz) sunai deti hai. Qareeb hone pe Purvi unhe nazar aati hai. Purvi ke chehre pe aik naqli, bohat bejaan si muskurahat phaili hui thi, aur Purvi ko najaane kyun ye shuba paida hua jaise us kamre ki pur asrariyat (ajeeb si kaifiat) ne us ke chehre pe bhi apni bejaani ka toq phaink dala hai. Par doosre hi pal use apne is khayal par jee bhar kar hansi ayi.

"Pagal hun mein bhi. Us ko uske pagalpan se nikalne ayi hun. Na ke khud bhi pagal hone ke liye. Koi haal nahi hai mera" Ye aik chota sa khayaal uske chehre pe aik nayi muskurahat aur azam le aaya.

"Kya hua Ms Purvi. Ap itni jaldi kyun a gayein?" Dr Sharma ne aankhein uthayein.

"Mein nahi jaanti ke mene wapis a ke sahi kiya ya nahi lekin lagta zaroor hai ke haan shayad ye sahi kiya hai maine. Mein uske kamre mein gayi. Usko observe kiya aur mujhe laga ke mujhe uske saath zabardasti nahi karni chahiye. Zabardasti ka anjaam kabhi acha nahi nikla. Agar is baar bhi wohi hua jo kab se hua ja raha hai to nakaami ki kitaab mein aik aur tick ka izaafa ho jaye ga. Aur ap nurson ke isi gardab (chakkar) mein na jaane kab tak phanse rahenge. Us ka ilaaj zabardasti nahi hai. Mein kal phir aungi. Aur shayad phir se wapis chali jaun agar usne kaha par wapis ana kabhi nahi chodungi, woh zaroor aik din khud mujhe apne kamre mein bulaye ga, aur yahi uska asal ilaaj hai. Bas thoda sa sabar kar lijiye. I hope ap ko meri yeh baat buri nahi lagi. Yakeen maniye meri apni zaat ka to koi faida is mein shaamil nahi, mein to bas uske liye behtar chahti hun, nurse nahi dost bhi banna chahti hun"

"Koi baat nahi Ms Purvi. Balke mere khayal se yahi behtar rahe ga. Ap waqaie bohat samajhdaar hain" Dr Sharma ko yeh tajweez (option) bohat pasand ayi balke unhe apne ap pe ghussa bhi aaya ke are o ahmak, tujhe ye khayaal kyun na aaya.

"Tum itni jaldi kaise wapas a gayi?" Woh sofa cum bed pe taqreeban laiti hui maze se popcorn khate hue apni pasandeeda movie dekh rahi thi ke yakdam hi main gate unlock hone ki awaaz ayi to woh samajh gayi ke kon aya hai.

"Kisi ko bhi kisi se koi raabta (taaluq) qaim karne mein thodi si to dair zaroor lagti hai. Aur phir yeh to mareez aur nurse ka rishta hai. Bohat paicheeda (mushkil) rishta hai yeh" Purvi ko bolte hue Abhijeet yaad a jata hai, uski ajeeb, sehmi hui, bigri hui zehni halat yaad a jati hai. Purvi usko chod ke aana nahi chahti thi par jaanti thi ke agar woh us ko chod ke a rahi hai to woh bhi us ke bhale ke liye hi hai.

"Ghar ki kya halat bana rakhi hai tum ne Geet. Itna bikhra hua" Purvi ne apne saamne bethi hui larki ko sarzanish (daant) ki.

"Kya tum mujh par roub jama rahi ho Purvi. Yeh jo tum achanak se hi badi behen ban jaati ho na, please mat bana karo. Waise bhi yeh sab kaam mere nahi hain. Maid pata nahi aj kahan mar bethi hai" Geet ki zuban tez tez chalti hi chali ja rahi thi.

Purvi ne Geet ko sarsari sa ghoora aur apne kamre mein ghus gayi.

To Be Continued

How was it? I hope pasand aya hoga. Do review, how was Abhijeet's character. Literally, bilkul samajh nahi a raha tha ke kaise likhun uska character. I hope it exceeds expectations.