Hello everyone, I'm back with the next update. Enjoy Reading and Thanks everyone who read and liked previous chapter.

Dard Ka Naam Ishq

Chapter 4

A new day

Aj phir aik naye din ki shuruwaat hui thi. Woh din bhi baaki dinon jaisa aik aam sa din tha magar shayad kuch khaas bhi tha jo ab in subhon ki fazaon mein a gaya tha magar jo nazar nahi aata tha, bas dheere se kabhi kabhi anjaane pan mein mehsoos hota tha.

Abhijeet apne kamre mein kursi se taik lagaye aankhein band kiye hue tha. Wohi Abhijeet, wohi andaaz, hameshgi ki bebasi, sada ki bechaini. Us ki zindagi mein kuch reh hi nahi gaya tha. Woh khud se shayad beniyaz (beparwah) ho chuka tha. Us ki zindagi mein ab kisi cheez ki ahmiyat nahi rahi thi. Us ki zindagi ka koi mamool bhi nahi reh gaya tha. Soch aur soch. Woh to bas ab shayad sochta hi rehta tha, na jaane kis baare mein magar soch thi ke kabhi khatam hone ka naam hi na leti thi. Woh is waqt bhi apne aik hi mamool ke mutabiq kursi se taik lagaye bas soche ja raha tha aur soch jo kabhi khatam nahi hoti use aur soche jaane par majboor kar jaati. Us ka ye mamool darwaaze ke dhad se khulne ki wajah se toot gaya. Us ne chaunk kar aankhein kholein. Us ke saamne Ramu naashte ki tray liye chala a raha tha jis mein aik plate tale hue ande ki thi, saath mein hi kuch breads bhi toast hui theen. Aik juice ka jug bhi shaamil tha.

"Abhijeet sahab, ap ka naashta" Ramu dheere se bolta hai aur naashte ki tray maiz par rakh kar wapis jaane ke liye yun muda jaise us ki bus chuti ja rahi ho.

"Le jao ise wapas. Nahi khaunga mein yeh. Mar jaane do mujhe. Jee ke konsa faida ho raha hai. Shayad mar jana hi behtar ho. Ab tak kaise jee raha hun, nahi maloom. Shayad mout bhi mujh par meherbaan nahi hona chahti" Woh bebasi ki intehaon pe pahunch chuka tha. Use bhala kon wapis laye jo khud hi wapis ana na chahta ho.

"Apne saath itni ziyadati nahi karo Abhijeet. Apne aap par thoda reham khao. Tumhari apni zaat ke bhi kuch haq hain jo tum par poora karne ko farz hain. Aankhein chura kar jaan chuda loge to ye na samjho" Achanak hi woh awaaz kamre mein na jaane kahan se goonji thi. Woh kamre ke darwaaze pe khadi hui use kuch aisi naseehatein kar rahi thi jin ke baare mein sochna us ne chod diya tha. Woh lafz bhi ab use sahi se samajh nahi aate the. Sab kuch jaise kahin sar ke ooper se guzar jaata tha. Na jaane woh kahan se a tipki thi aur us par apna haq jamaane lagi thi.

"Tum..tum..kyun a gayi ho?" Woh ladhkarate qadmon se kursi se khada hua tha aur intehayi bebasi se pooch raha tha.

"Kyun meri sipaat zindagi ko mataharik (movement) karna chahti ho? Lagti kya ho meri?" Woh uski aankhon mein aankhein mila kar bolne ki koshish karta hai par jaane kyun khud hi aankhein phair leta hai. Jaane kya dekh liya tha un sunehri chamakti kaali aankhon mein ke nazar milaane ki sakat bhi na rahi thi.

"Tum chali kyun nahi jaati meri zindagi se?" Woh yun hi mun phaire bola tha, awaaz mein bebasi aur karb ki inteha thi. Lafz jaise khud ba khud hi gair iraadi tor par adaa hote ja rahe the. Woh nahi jaanta tha ke kya bol raha hai, agar sochne samajhne ki salahiyat hoti to hazaar baar sochta magar yeh na kehta.

"Abhijeet" Purvi ki aankhon mein bebasi dar ayi. Woh maiz par rakhi hui tray ke paas gayi aur use apne haath mein thaam liya aur Abhijeet ki taraf mud ke us ke bilkul qareeb neeche ghutnon par beth gayi, jab ke woh kursi se taik lagaye betha tha.

"Mere chale jaane se kuch badle ga nahi. Meri jagah shayad koi aur le le. Magar mein nahi chahti ke mein apni jagah chod dun. Ham mil kar doston ki tarhan bhi to waqt bita sakte hain. Tumhe meri aur mujhe tumhari zaroorat hai" Woh uski aankhon mein dheere se boli aur Abhijeet ki aankh se beikhtiyaar hi aansu ka aik qatra beh gaya.

"Kabhi woh bhi yahi bolti thi, woh bhi kehti thi ke use meri aur mujhe uski zaroorat hai. bilkul, bilkul aise hi bolti thi, magar nahi aaj bhi shayad us ki hi awaaz mere kaanon mein goonj rahi hai" Abhijeet ki band aankhon se bhi lapak lapak kar aansu bahir lehraane ko beqaraar the, khadi ki gayi diwaar bhi un aansuon ki taiz aabshaar numa lehar ko sab kuch apne saath dabone se na rok saki.

"Kon hai woh?" Purvi ki awaaz Abhijeet ke kaanon mein goonji thi.

"Koi nahi..ya phir..bohat kuch…" Abhijeet hakla hakla kar bol raha tha. Dard gale mein atka ja raha tha aur lafz doob doob ke ubhar rahe the jaise doobne hi waale hon ke koi sahara mil jaye aur woh sahara phir doobne ke liye chod de aur phir aik aur baar thaam le.

"Abhijeet" Purvi ne gehri saans li aur toast ke aik tukre se anda toda aur Abhijeet ki taraf niwala barhaya.

"Khao ge? Bahut maze ka hai" Woh halke se muskurayi thi. Niwala Abhijeet ki taraf badhaye woh use muntazir nazron se dekh rahi thi. Woh kuch na bola, saakt nazron se yak tak use dekh raha tha. Use laga ab woh uski minatein kare gi magar woh tab shadeed hairaan reh gaya jab Purvi ne wohi niwaala apne mun mein daal liya.

"Waqaie, bohat maze ka tha" Purvi ne niwaale ko chabaane ke baad maza le kar kaha tha.

"Ye to tum meri liye layi thi na" Abhijeet use sirf dekhta hi reh gaya.

"Han magar tum kha bhi to nahi rahe the. Ab har koi yahan itna bhi faarigh nahi hai ke tumhari minatein karta rahe. Isi liye. Waise bhi, meine naashta nahi kiya tha" Purvi be takalufi ki saari hadein paar kar gayi aur chand hi pal mein woh use apne bohat qareeb lagi, bohat apni apni lagi. Magar apne dil ko jhutlana bhi to jaan liya tha us ne.

"Magar tum aise...Lao do mujhe...balke nahi...tumhara jhoota to hargiz nahi khaunga. Jao aur mere liye naya naashta bana kar lao Nurse" Us ne beikhtiyaar tray ki taraf haath badhaya hi tha ke yaad a gayi apni azli dhitayi jo ke ab to uski shaksiyat ka khaasa ban chuki thi.

"Theek hai, jaisa tum kaho" Woh pyaar se muskurati hai aur kamre se bahir nikal jati hai magar woh tray na jaane iraadi ya phir gair iraadi tor par wahin Abhijeet ki kursi ke neeche saamne padi reh gayi thi.

To Be Continued

Please do review and tell how was it?