Hello everbody. I'm back. Thank you all the readers.

CID.Obsessed- Thank you so much itni tareef ke liye. I am totally amazed. I dont think ke mein abhi itni achi writer hun. I really appreciate your words.

Babli15- Thank you and here you go. An early update, I guess so ;)

Dard Ka Naam Ishq

Chapter 5

Purvi ko kamre se gaye hue abhi chand minute hi huye the ke us ne ahista se apni aankhein kholein aur mahol se aashna hone mein waqt lene laga. Us ke saamne hi naashte ki tray padi hui thi. Woh gair iraadi tor par kursi se khada hua aur neeche jhuka aur tray apne haath mein utha li. Kuch lamhe yunhi tray ko saakt nazron se ghoorta raha aur phir na jaane kyun magar us ka haath aage barha tha aur woh toast ka aik tukra le kar us se anda todte hue apne mun mein le gaya aur use chabane laga. Do minute baad darwaaze pe halki se dastak hui aur phir Purvi darwaaza khol kar naashte ki aik nayi tray le aayi magar ye dekh kar hairaan aur khush reh gayi ke jo tray naashte ki woh chod ke gayi thi, usi se Abhijeet ne naashta kar liya tha. Phir uski nazar Abhijeet par gayi jo sar takiye se taike apne bistar par aada tircha aankhein khole chat ko ghoorte hue laita hua tha. Purvi dheere se muskurayi aur Abhijeet ki taraf badhi.

"Mein naashta le aayi hun Abhijeet" Woh uske pairon ke qareeb bistar par beth gayi aur naashte ki tray side table par rakh di.

"Wohh..woh" Woh chaunk kar uth betha aur use dekhte hue haklane laga.

"Itna satate kyun ho Abhijeet. Jab naashta usi tray se karna tha to mujh se itni mehnat kyun karwayi" Us ki khilkhilaati hansi us ke kaanon mein goonji aur uska man chaha ke use poori zindagi yun hi muskurate hue, khilkhilate hue, hanste hue dekhta rahe. Woh sahar zada sa use ghoor raha tha.

"Woh woh mujhe bhook lag rahi thi" Woh apni haathon ki ungliyon ko bechaini se marodte hue masoomiyat bhare lehje mein kehta hai.

"Bohat ache lagte ho masoomiyat mein. Ghussa tum pe bilkul bhi acha nahi dikhta hai. Tumhe to hamesha muskurana chahiye. Tumhari muskaan dekhe begair bhi bata sakti hun ke jab bhi muskurate hoge to kitni hi larkiyon ke dil dhak dhak dhadakne shuru ho jate hon ge" Purvi muskurate hue uski aankhon mein dekh kar boli thi.

"Kya waqaie?" Us ka chehra berang sa ho gaya. Woh beyaqeeni aur mayoosi jaise jazbon ke zeere asar bola tha.

"Han" Us ne dheere se sar hila diya.

"Aur agar, koi woh muskaan dekh hi na sake to kya karna chahiye?' Woh na jaane konsi uljhan mein khoya hua tha. Us ki aankhon mein na jaane konsi hasrat thi jo shayad poori nahi ho paayi thi.

"Tum muskurao ge to hi dikhe gi na muskaan" Purvi aik pal ko ulajh si gayi. Woh samajh nahi paayi thi ke Abhijeet kehna kya chahta hai. Phir aik dam si hi sambhal ke dheere se muskurate hue keh payi thi.

"Koi faida nahi hai" Us ki aankhon mein chaayi bebasi maand na pad saki.

"Chodo ye sab, ab ye batao ke mein kya karun...naashta to tum ne kar liya. Ye bohat acha hua magar ab is nayi tray ka kya hoga" Woh bazahir uljhan aur tajassus ke saath boli.

"Kya karna..hai? Mujh..he.. kya..pata.."

Woh jawaab mein chup rahi. Jaise soch rahi ho ke ab kya kiya jaaye.

"Tum..tum keh rahi thi..na.. ke tumh..e bhook...la.gi hai..to.." Abhijeet ki samajh mein na aaya ke woh lafzon ko kaise tarteeb de. Is lamhe us ka dimaag sirf aik hi uljhan pe ghor kar raha tha aur woh tha naashte ke zaaya ho jaane ka masla.

"Oh haan, Shukriya Abhijeet. Warna mein to itni pareshaan ho gayi thi ke ye tak bhool gayi thi ke mein to khud bhi naashta kar ke hi nahi aayi" Woh zor se hansi aur Abhijeet ke chehre ko padhne lagi. Woh use kaafi araam de laga. Usne mussarat ki aik saans li. Abhijeet mein waqaie tabdeeli aani shuru ho chuki thi.

"Please tum bahar ja kar naashta kar lo. Mujhe akela rehna pasand hai aur kisi ki mudakhalat pasand nahi" Woh bezaari se aankhein band karte hue bola aur kursi ki araam de taik par apna sar taik diya.

"Kyun, mein tumhe pasand nahi?" Woh bhi shayad aaj iraada baandh chuki thi ke uski kisi bhi baat par ghutne nahi taike gi.

Abhijeet ne ahistagi se aankhein kholein aur Purvi ko aik ghoori de dali. Na jaane kya baat thi ke woh laakh chahne ke bawajood bhi is larki ke aage jhuk jaata tha. Woh use apne qaabo mein kar leti thi aur jakar ke mein muthi mein band kar leti thi. Uska dil na jaane kyun usko do raahein dikhata ja raha tha aur woh aik kashmakash mein phansa tha ke kya sach hai aur kya jhoot. Dono hi raahein use apne sahar mein jakad rahi theen. Woh kis raah pe chale aur kis ko beech rah mein chod de. Yeh dil ki haalat bhi badi ajeeb thi.

Raat ki chaaya dhal rahi thi aur sooraj aasmaan se halka halka aashkaar hona shuru ho chuka tha aur apni tapti tapti kirnein us ke kamre ki khidki ke zariye jo aadhi parde se dhaki hui thi uske ooper daal raha tha. Usne neend mein karwat badli aur sooraj ki taiz shuaon ki bais uth kar beth gaya aur apni aankhein ragarte hue ird gird nazar dodane laga. Uski zindagi mein Purvi ko aaye aik mahina ho chuka tha. Purvi ki wajah se uski zehni haalat kaafi had tak hairat angez taizi ke saath sudhar gayi thi. Usne cheekhna chillana aur ghussa karna kam kar diya tha. Use Purvi ke saath badi apnaiyat mehsoos hoti thi. Purvi use bilkul kisi ache dost ki tarhan rakhti aur use behla phusla kar use waqt par saari dawaiyaan deti. Yeh makaan bhi ab ahista ahista shaadmaan hota ja raha tha, dukh ki lehrein bohat ahista ahista chatati ja rahi theen.

Woh bistar se utar gaya aur ghusal khaane ka rukh kiya. Ghusal khane mein a kar us ne tooti ko khol diya aur apne mun pe paani ki cheentein maarne laga. Us ka chehra ab bhi berang tha, beumeed tha magar Purvi ki moujodgi mein woh behtar mehsoos karta tha. Jaise us ki moujoodgi aik dam hi kuch pal ko sab takleefein, sab dard kam kar dein. Jaise yakdam hi doobne waale ko tinke ka sahara mil jaaye.

Dr Sharma Abhijeet ke ghar ke lounge mein bethe hue the. Purvi wahan se guzri to Dr Sharma ko aik dam hi dekh kar ruk gayi aur muskurahat se un ka istaqbaal kiya. Purvi ne aaj kaali shirt aur safaid jeans pehni hui theen aur gale mein aik safaid scarf dala hua tha. Us ke kandhe pe aik bag latka hua tha. Chehre pe halka sa makeup kiye hue woh bohat khoobsurat aur masoom dikh rahi thi.

"Hello Dr sahab. Kese hain ap? Kaafi dinon baad nazar aaye hain" Purvi muskura ke kehte hue sofe pe Dr Sharma ke saamne beth gayi.

"Bas kya kahein, bohat masroof rehta hun. Waqt hi nahi milta. Ap bataein, ab Abhijeet kesa hai?"

"Pehle se kaafi behtar hai. Ab to itna ghussa bhi nahi karta hai. Meri taqreeban saari baatein manta hai aur kuch kuch apna khayaal bhi rakhne laga hai" Purvi mussarat ka ahsaas karte hue muskurati hai. Uski muskurahat sab kuch keh rahi thi. Woh kitni khush thi aur woh kitna acha mehsoos kar rahi thi Abhijeet ko behtar mehsoos karwa kar. Uske chehre se khushi phooti pad rahi thi. Kaam ki lagan se zyaada insaaniyat ka haq tha shayad. Ya phir kuch aur bhi, jo use bohat apna laga tha.

"Miss Purvi, mein tum pe fakhar mehsoos karta hun. Jo kaam aj tak koi nurse ache se na kar payi, woh tum ne itne ache se aur itni taizi se kar diya. Aisa hi chalta raha to woh din door nahi jab Abhijeet mukamal tor par zehni tor par sehatmand ho jaaye ga" Dr Sharma khushi ka izhaar karte hue bole.

"Kya waqaie Dr Sahab?" Purvi ko na jaane kyun aik sukoon mila, dil ko aik tasali mili. Woh khush thi ke woh is makaan ko aik baar phir ghar bana sakti hai jahan khushiyan hongi, dukh nahi honge.

"Bilkul Purvi. Bas is lagan aur jazbe ko kho mat dena" Dr Sharma muskura diye.

"Shukriya Dr Sahab, phir baad mein mulaqaat hogi ap se, Abhijeet mera intezaar kar raha hoga" Thodi si baat cheet ke baad Purvi ne Dr Sharma se alvida liya aur Abhijeet ke kamre ke taraf rukh kar liya.

Abhijeet ke kamre ke paas pahunch kar woh dheeme se muskurayi aur halki si dastak dene ke baad Abhijeet ke kamre ka darwaaza khol diya. Woh andar dakhil ho gayi. Abhijeet kursi par betha hua aik kitaab parh raha tha.

"Hello Abhijeet, kese ho?"

"Mein theek hun, aur tum?" Purvi ki awaaz us ke kaanon mein goonji to usne kitaab par se nazrein hata kar sar ooper karke Purvi ki taraf dekha aur halki si muskurahat ke saath jawaab diya.

To Be Continued

How was it? Hope you liked it. Please dont forget to review.