Hello my lovely readers. I'm back with the update. Have a good time reading.

Dard Ka Naam Ishq

Chapter 6

"Hello Abhijeet, kese ho?"

"Mein theek hun, aur tum?" Purvi ki awaaz us ke kaanon mein goonji to usne kitaab par se nazrein hata kar sar ooper karke Purvi ki taraf dekha aur halki si muskurahat ke saath jawaab diya.

"Mein bhi bilkul theek hun. Aur..kitaab kaisi lagi?" Purvi Abhijeet ke saath waali kursi par kamar taik kar beth gayi aur jawaab dene ke saath saath hi us kitaab ke baare mein bhi pooch bethi jo khudi Purvi ne Abhijeet ko padhne ko di thi chand din pehle.

"Bohat achi hai. Ab tumhare yahan na hote hue bhi is kitaab ke sahare waqt beet hi jata hai" Abhijeet udaas muskurahat chehre pe sajaye bolta hai.

"Waqt to guzar hi jata hai kyunke waqt ne guzarna hi to hota hai. Magar waqt ko yunhi guzaar mat do, waqt ko jeena chahiye, har pal ko bharpoor jeena chahiye" Purvi ki awaaz umeed o lagan se bharpoor thi. Purvi ka bharosa, Purvi ki umeed jaane anjaane us ki bhi kahin bhuji hui umeed ko chupke se dheere se roshan kar deti thi, itne dheere se ke woh jaan bhi na paata aur umeed ka diya us ke kahin aas paas jalta rehta.

"Tum mujhe bohat achi lagti ho" Woh bohat ahista, dheere se bola jaise mun hi mun mein barbara raha ho.

"Kya waqaie?" Purvi ke chehre pe aik gehri muskaan chamak rahi thi. Dil na jaane kyun bhag bhag ho gaya tha. Nigahein khud ba khud hi neeche jhuk gayi theen.

"Tum mujhe jaane kyun us ki yaad dilati ho" Us ka izteraab us ke chehre aur uski gehri kaali aankhon se zaahir tha. Us ki soch, us ki yaad us ko weeraan kar deti thi, use kho dene ka ahsaas us ka dil ghayal kar deta.

"Kon? Tum kis ki baat kar rahe ho? Kon hai woh jo tumhe meri yaad dilati hai?" Us ka sar ooper utha tha. Aankhon mein aankhein daale woh dono hi aik doosre ko aamne saamne dekh rahe the.

"Koi nahi" Us ne foran hi mun phair liya jaise keh kar pachta raha ho. Jaise apne ilfaaz waapis le lena chahta ho. Woh raaz jaise apne seene mein hi chupaye rakhna chahta ho. Us ke dil ka raaz jis ne us ki zindagi bikhair ke rakh di thi. Woh raaz jo shayad raaz hi rehna chahta tha.

Purvi ne dheere se aik saans liya aur muskura di aur kuch kahe, kuch bole bina hi Abhijeet ke kamre se nikal gayi. Peeche Abhijeet reh gaya aur us ki tanhaiyaan jo Purvi ke jaane se aur bhi tanha ho jati theen.

Do minute hi guzre hon ge ke darwaaze pe halki si dastak ke saath Purvi kamre mein daakhil huyi thi.

"Tum kahan chali gayi thi?" Abhijeet bola.

"Tumhe kya laga ke mein tumhe chod ke chali gayi hun. Nahi, mein tumhe kabhi nahi chorungi" Purvi ki awaaz mein chaashniyon ki mithaas mili hui thi. Woh bol rahi thi aur us ke ilfaaz Abhijeet ke dil ke liye kisi jaadu ki tarah asar kar rahe the.

"Apne waade se kabhi mukro gi to nahi na?" Umeed mili thi to saath hi beyakeeni bhi kahin se umad ke chali ayi thi. Dil pe jami be yaqeeni ki gird badi sakht thi jo ahista ahista dhul rahi thi jaise koi girah khul rahi ho.

"Nahi.." Purvi ne do minute ke liye kuch socha aur phir badi ahistagi se, bade dheere se woh boli thi jaise aik dam se hi khud par se aitabaar uth gaya ho. Apne ap pe, apne faisalon pe hi yaqeen na raha ho.

"Tum kahan gayi thi?" Yak dam se hi use yaad a gaya ke uske sawaal ka asal jawab to Purvi ne diya hi nahi tha.

"Tumhari dawaiyaan kitchen se lene gayi thi" Purvi muskura kar boli aur us ko apne haath mein pakre pani ke glass aur doosre hath pe rakhi goli ki taraf ishaara karti hai. Aur tabhi aik dam se Abhijeet ki tawajo Purvi ke haath mein pakre pani ke glass aur dawai pe gayi.

"Mein bimaar nahi hun Purvi, mujhe ye dawaiyaan nahi chahiye. Mein to theek hun, bilkul theek. Tum samajhti kyun nahi ho? In dawaiyon se mujhe wehshat hoti hai. Tum har baar mujhe behla phusla leti ho. Pata nahi kahan se seekha hai ye fan tum ne" Woh zid pe ada tha, jis mein halki si jid o jehad thi magar Purvi ki zid to uski zid se bhi badi aur pakki thi jo apni jagah se aik inch nahi hilti thi.

"Tum mujhe kyun nahi samajhte. Tum mujhe samajh jao ge to jaise khud ko samajh jaoge. Tum samajh jao na ke tumhe in dawaiyon ki zaroorat hai aur zaroorat se kabhi mun nahi modte kyunke agar dair ho jaye to zaroorat badh jaati hai aur kabhi kabhi itni shiddat ikhtiyaar kar jaati hai ke is duniya ki koi shay bhi us ki zaroorat khatam nahi kar pati"

"Mujhe jis ki zaroorat thi, shayad use meri zaroorat nahi thi aur woh zaroorat itni shadeed thi ke ab us zaroorat ke aage koi zaroorat dikhti hi nahi ya bilkul be zarar ho jaati hai" Us ka dukh, us ka karb, Purvi ko apna dukh, apna karb mehsoos ho raha tha. Zindagi mein do hi baar woh kisi ke itne qareeb ho payi thi. Aik to maazi ka qissa ban chuka tha aur ab yeh, uska haal.

"Tum in cheezon ke baare mein zyaada mat socha karo. Jitna socho ge, utne hi pareshaan, thake thake se aur beemar raho ge aur tum to beemar nahi rehna chahte na. Bilkul theek hona chahte ho, bharpoor sehat mand. Theek hai na? Acha ab ache bachon ki tarhan ye goli apne mun mein daalo warna mein phir khud hi zabardasti mun mein goli thons dungi. Samjhe" Purvi jumle ke ikhtetaam par dheere se hans di aur waqaie goli us ke mun mein thonsne ke iraade se apna haath badhaya.

"Are, ruko. Mein le to raha hun" Woh dheere se sharma kar hans diya aur uske haathon se goli aur paani ka glass le liya.

"Kitne ache lagte ho yun hanste, khilkhilate, sharmaate hue. Hanste kyun nahi ho. Hansa karo. Hum dono mil kar khoob masti karenge aur phir khoob hansein ge, itna hansein ge ke pait mein dard shuru ho jaye" Us ki aik halki si hansi uske dil ko bohat shiddat se choo gayi thi. Pata nahi kya tha, woh begair kisi garz ke bas is aik insaan ko khush dekhna chahti thi, itna khush ke us insaan ki saari takleefein, saare dard us se yun door ho jayein jaise kabhi the hi nahi. Jaise woh kabhi wajood mein hi nahi aye.

"Tum kehti ho to hans liya karun ga bawajood iske ke hansna, khush rehna mere liye kisi khawaab ki tarah hai, kisi na mumkin target ki tarah" Jise yaqeen aur beyaqeeni ke darmiyaan ki kaifiat kehte hain, woh shayad usi se guzar raha tha. Kuch yaqeen tha to kuch be yaqeeni thi. Ye nahi maloom tha ke yaqeen us pe galib aya ya be yaqeeni. Dono hi is dod mein bhaag rahe the, aik doosre ko peeche chorne ki niyat se. Ab ye dod yaqeen jeete ga ya beyaqeeni, ye to sirf waqt hi bata sakta tha. Kya woh yaqeen ka sahara le kar apne ap ko samait le ga ya phir beyaqeeni ke bhanwar mein phir se phans jaye ga. Han, ye to sirf waqt hi bata sakta hai.

"Na mumkin to is duniya mein kuch nahi hai. Insaan chahe to kya nahi kar sakta. Woh chahe to pahad bhi khod sakta hai. Zindagi mein aik aisa waqt na har insaan ki zindagi mein aata hai jab woh bohat zor se girta hai. Girne mein koi buraayi nahi. Kyunke girna hi to khada hona bhi sikhata hai. Magar jab gir ke saare hosle, saara azam kho do ge to bohat bura karo ge apne saath, tum koshish kar ke to dekhte, tum khade ho sakte the. Magar koi baat nahi, dair to ab bhi nahi hui. Tum to ab bhi khade ho sakte ho. Mein to tasawur mein tumhe gir ke khada hote abhi se dekh rahi hun aur…" Woh dil mein aik azam chupaye bolti chali ja rahi thi aur Abhijeet use badi dilchaspi se dekh raha tha. Abhijeet ko yun mehsoos ho raha tha jaise Purvi ke chehre pe chaya koi anjaana noor us ki be rang, pheeki zindagi mein roshni ki aik nayi kiran phaila raha tha.

"Bas bas...kitna boring lecture hai" Abhijeet beech mein hi bol pada. Us ke chehre pe Purvi ne pehli baar aik shareer si muskurahat dekhi thi.

"Shareer" Woh pyaar se hans di. Us ki aankhon mein pyaar saaf saaf jhalak raha tha magar dil ziddi manne ko tayaar hi nahi tha.

"Chalo kahin ghoomne chalte hain" Purvi boli.

"Nahi. Mera dil nahi chahta" Woh bebasi se muskura diya.

"Tumhara dil to kabhi nahi chaha. Chalo, aj ke liye baksh diya. Abhi bahir garden mein hi chale chalte hain. Bohat acha mousam ho raha hai. Khoob barsein ge aaj badal" Woh keh ke khadi ho gayi aur Abhijeet ki taraf apna haath badhaya. Abhijeet ne narmi se Purvi ka haath thaam liya aur woh dono ham qadam baahir chale aaye.

To Be Continued

How was it? Please give me your precious feedback. I really appreciate it.