Hello everyone. I hope you are good. Have a happy reading. Give your reviews in review box plz. I will appreciate.

Dard Ka Naam Ishq

Chapter 9

Flashback Series Part 1

Raaz khule ga

"Mere Sawaalon ke jawaab to sirf usi ke paas hain. Kya woh mera weham thi aur agar nahi to mein use kho nahi sakta, is duniya mein us ke illawa shayad hi kisi ke paas mere sawaalon ke jawab hon" Woh zor zor se apna sar pathar pe maar raha tha aur saath hi barbarate hue ro raha tha.

Us ka chehra dekhte hi dekhte bheeg gaya. Dil tha ke ajeeb andaz mein dhadak raha tha, jaise bohat arse baad kisi sire ke hath lagne ke baad us sire ka yakdam hi haath se choot jana. Ya phir na maloom woh sira tha bhi ya har tarah ki dafah is baar bhi aik saraab.

"Abhijeet..Abhijeet..Tum yahan bahir kya kar rahe ho? Mein tumhe andar dhoond dhoond ke thak gayi aur tum yahan…" Abhijeet ki Purvi ki taraf pusht thi isi liye woh Abhijeet ka bheega chehra aur maathe se behta khoon nazron mein na la payi magar jab doosri hi second woh uske saamne palti to hairat se uske alfaaz uske gale mein hi phans ke reh gaye.

"O mere khuda. Abhijeet, ye..ye kya hua hai tumhe. Uff, kitna khoon beh raha hai. Chalo, ham abhi isi waqt ghar ja rahe hain" Purvi pareshaani se cheekhi aur apne purse se bohat tag o do ke baad aik romaal nikaal ke Abhijeet ke maathe pe baandh diya aur uski taraf haath barhaya jo abhi bhi pathar pe betha hua tha. Abhijeet ne sarsari sa Purvi ko dekha aur phir us haath ko thaam liya jo is waqt us ka wahid sahara tha.

Abhijeet apne kamre ke bistar par betha hua tha. Purvi us ke qareeb hi bistar pe bethi hui band aid ka dabba bistar pe phailaaye hue rakhi thi.

"Kaise lag gayi ye chot?" Purvi ne Abhijeet ki aankhon mein aankhein daal kar sawaal kiya.

"Jaise tumhe nahi pata. Mein pagal hun na aur ye khud ko chot pahunchana koi badi baat to nahi hai kisi pagal ke liye" Wo muskura kar keh raha tha magar woh laakh muskura leta us ke dil mein chuba dard aur aankhon pe chaayi bebasi woh chupa nahi sakta tha. Us muskurahat ke peeche bhi so gham daaghe hue the. Kyunke woh bohat khokli aur tanziya muskurahat thi.

"Tum pagal nahi ho, bas apne ird gird se ghaafil se ho" Purvi pheeki si muskurahat ke saath kehti hai.

"Maine tumhari bandage kardi hai Abhijeet. Apna khayaal rakhna. Zara si bhi pareshaani ho, mujhe yaad kar lena mera matlab hai mujhe bula lena" Woh kehti hui darwaaze ki taraf chal di.

"Ja rahi ho?"

"Han, Abhijeet"

Geet pareshaani se sofe pe bethe hue thi. Use kisi karwat chain nahi a raha tha. Bechaini si bechaini thi. Dimaag kabhi kahin bhatak raha tha to kabhi kahin. Woh abhi tak mehndi ke kapron mein hi thi. Use itna bhi hosh nahi tha ke ja kar araamde kapre pehen leti. Bethe bethe bechaini ko qaraar na aaya to uth kar tehalne lagi.

Do minute hi guzre honge ke ghar ke main darwaaze ke khulne ki awaaz aayi. Geet nange pair hi darwaaze ki taraf dodi aur Purvi ko dekh ke use jhapat liya aur kheench kar use sofe pe le aayi.

"Kya kar rahi ho Geet?" Purvi jhunjhala kar uske saath ghisat rahi thi.

"Mujhe tum se bohat zaroori baat karni hai" Geet pareshaani ka izhaar karti hai.

"Pata nahi tumhe achanak hi konsi zaroori baat yaad a gayi hai. Itni thaki hui hun mein magar phir bhi keh do. Kahe beghair to waise bhi jaan nahi chodo gi" Purvi shayad maamle ki nazaaqat bhaanp nahi paayi thi jo filhal sirf Geet ke ilm mein thi.

"Tumhare saath kon tha aj mehndi pe?" Geet kehne ke saath hi tehalti bhi ja rahi thi.

"Are, bataya to tha tumhe ke mera mareez hai. Itni si baat hai ya kuch aur bhi?" Purvi Geet ke sawaal ko betukka samajh ke jhunjhala rahi thi.

"Tumhe pata hai ke woh kon hai?" Geet ne aik baar phir sawaal dohraya.

"Pagla gayi ho kya. Bata to rahi hun aur tumhe kya ke mere saath kon tha" Purvi ghusse se bawarchi khane (kitchen) mein ghus jati hai aur fridge se thande paani ka aik poora glass apne halaq mein nigal leti hai. Geet ke dorte qadmon ki chaap us ke peeche peeche hi bawarchi khane tak aayi thi.

"Tum samajh nahi rahi ho. Woh..woh Abhijeet tha" Geet apna sar pakar leti hai. Use abhi tak yaqeen nahi a pa raha tha ke woh kiska saamna kar ke aayi hai aur woh wahan kiske saath aaya tha.

"Abhijeet? Tum...he tumhe us ka naam kese pata hai Geet..O mere khuda..kya jo mein soch rahi hun wohi sach hai?" Purvi ko hairat ka shadeed jhatka laga tha. Use laga us ka sar ghoom raha hai aur woh abhi chakra kar gir jaye gi. Haqeeqat badi talkh thi aur woh us haqeeqat ke saamne larkhara gayi thi. Us ke paon zameen pe tikne na pa rahe the. Zameen pe apne wajood ka bojh bhaari sa lag raha tha.

"Haan, yahi sach hai" Geet ne mun phair liya tha.

"Mein kabhi tumhe aur apne ap ko maaf nahi kar paungi. Tumhe to shayad maloom bhi nahi hai ke woh kis tarah jee raha hai. Mein bhi bewaqoof bekhabar hi rahi. Us ki chahat itni shadeed hogi mujhe maloom hi nahi tha" Purvi sofe pe dheh gayi. Us mein itni himmat nahi thi ke dobara se khadi ho sake. Aankhon se barasta paani us ki palkon se ho kar us ke chehre pe behta ja raha tha. Woh aik ghalati aik bohat bada khamiyaza ban chuki thi.

Flashback

(Note: This flashback will continue for a number of chapters)

2 saal pehle

Ye Abhijeet ki kahaani hai, Abhijeet ki barbaadi ki kahani. Woh kahaani jo ab shuru hogi kyunke kahani to waqaie yahin se shuru hoti hai. Ap aksar hi sochte honge ke Abhijeet kon hai? Uski aisi halat kyun hai? Abhijeet bhi ham jaisa hi aik insaan hai. Aik mamooli insaan jis ka wasta ishq se parta hai aur ishq ne use gair mamooli kar diya. Aur woh ishq kaisa hai, kis se hai, ye to ap ko pata chal hi jaye ga. Aiye, zara 2 saal pehle wale Abhijeet ke andar jhaankte hain jo muskurata bhi hai, hansta bhi hai, ghussa bhi karta hai, jiske hazaaron dost bhi hain, jo apni zindagi ko bharpoor tareeqe se jeena bhi janta hai.

Abhijeet us waqt apne kamre mein aaine ke saamne kangi se apne baal samait raha hota hai. Us ki tayaari dekhne waali thi. Button wali shifaf safaid shirt aur neeli jeans pehne hue woh kisi shehzaade se kam nahi lag raha tha. Jazib nazar naqoosh ke bais woh larkiyon mein kafi maqbool tha aur woh larkiyon ka ideal bhi tha. Magar woh tha ke us ke kaan pe joon tak na raingti thi. Larkiyon ko hans kar makhiyon ki tarah urata tha. Us ne phurti se saamne padi jel ki botal utha kar sar pe jel mala aur phir apna pasandeeda perfume khud pe chidka. Kal hi khareedi gayein sunglasses saamne hi padi theen. Abhijeet ne woh bhi utha ke aankhon pe jama liye. Pairon mein kaale boots daal kar woh bahir ki taraf nikla. Us ka ghar waseeh tha aur usi waseeh ghar ke waseeh lounge mein us ke dost qabza jamaye bethe the.

"Tum log yahan kya kar rahe ho? Uni jaane ka plan nahi hai kya? Mein to khud bhi Uni hi ja raha hun. Chalo saath chalte hain" Abhijeet ne jab apne nikamme doston ko apne ghar mein dekha to masnooyi hairat ka izhaar kiya. Yeh koi pehli baar nahi tha. Woh jaanta tha ke aj bhi yeh log Uni bunk karne ka plan bana ke aye hain aur mujhe bhi hamesha ki tarhan saath shaamil karne aye hain.

"Yaar Abhijeet, aj na Uni jane ka na mood nahi hai saare doston ka. Aj bunk karte hain na. Khoob ghoomein ge. Khayein ge, piyein ge. Mast long drive rahe gi" Un mein se aik jis ka naam Vishal tha, sofe pe khoob phail kar bola jaise usi ka to ghar ho, aur yeh sofa bhi usi ka ho.

"Let's go" Abhijeet ne ghari ki chaabi Vishal ki taraf phainki aur muskura kar bola. Halanke woh koi nikamma ya awaara larka nahi tha magar doston ki sohbat ne use bhi kuch kuch na chahte hue bhi un ke rang mein hi rang diya tha. Use apne dost bohat azeez the, isi liye woh inki kisi baat ko inkaar nahi karta tha.

To Be Continued

I hope you guys liked reading it. Bye Bye. Will update soon.