Hello everybody. I hope you are good. Enjoy the read :) and dont get confused. Flashback has not ended and will not end for a lot of chapters.

Dard Ka Naam Ishq

Chapter 10

Flashback Series Part 2

Lafzon ka husan

Abhijeet ki gadi ka stearing wheel Vishal ke haath mein tha aur Abhijeet us ke saath hi aage waali seat pe betha hua tha. Pichli seaton pe Raj aur Rohan bethe hue the. Abhijeet ki laal feraari sarak pe taiz speed mein dodi ja rahi thi.

"Vishal, maare ga kya? Speed kam kar thodi" Abhijeet apna sar pakar ke jhunjhula kar cheenkhta hai.

"Yaar, ab to is gadi ki speed tab hi kam hogi jab ye race khatam hogi. Vishal Kumar se koi race jeet jaaye, yeh woh hone nahi de sakta. Aakhir teri gadi bhi to kitni cheeti hai. Kis din kaam aye gi?" Vishal josh se bola aur gadi ki speed thodi aur zyaada kar di.

"Acha bhala ham outing karne nikle the, ab to shayad tu khud ko aur hume seedha ooper ponhcha ke hi dam lega. Aakhir kya zaroorat thi un logon ke mun lagne ki aur un ke is racing challenge ko qabool karne ki" Abhijeet narazgi se bola aur mun doosri taraf phair liya. Gadi ke sheeshe khule hue the aur tez raftar mein aati hawa uske baal uraye ja rahi thi.

"Abhijeet mun mat bana. Tu jaanta hai ke koi mujhe challenge kare to mein inkaar kar hi nahi pata. Beizzati ho jati hai yaar" Vishal bolte hue achanak hi dekhta hai ke kaali gadi un ke aage nikal gayi hoti hai, woh jaldi se use peeche chorta hua aage nikalta hai.

"Saara mood barbaad kar diya hai. Ab ye race khatam ho to University ke liye hi nikalte hain" Abhijeet seat se taik lagaate hue apni taangein phailata hua dheemi awaaz mein kehta hai.

Geet sheeshe ke saamne khari hui apne honton pe gulabi surkhi laga rahi thi. Us ke kaale baal khule hue the. Woh gehre rang ka karhai wala shalwar qameez pehne tayaar khadi thi. Us ne apne pair jooton mein ghumaye aur bawarchi khane (kitchen) ki taraf qadam barha diye.

"Madam ji, Ap ka aur Purvi ji ka naashta tayaar hai" bawarchi khane mein kaam karti hui aik udhair umar aurat saada se huliye mein khadi thi.

"Shukriya" Geet muskura kar naashte ki tray maiz se utha kar apne haathon mein sambhal leti hai aur Purvi ke kamre ki taraf qadam barha deti hai.

Purvi ke kamre pe uske qadam ruk jaate hain. Kamre ka darwaaza bhida hua tha. Geet udaas muskurahat liye kamre ke darwaaze ko dakhailti hui andar daakhil ho jati hai. Us ki nazron ke zaviye mein Purvi ayi jo apne bistar par tangain phaila kar bistar ke pathe se taik lagaye hue leti hui thi. Us ka chehra peela pada hua tha. Chehre pe bebasi thi aur aankhon mein karb simat ke a gaya tha. Aankhon ke diye jaise yakdam hi kisi haadse ke nazar ho gaye the. Chehre pe simti shokhi aur chamak bhi jaise kahin simat ke reh gayi thi. Zindagi bejaan si ho gayi thi.

"Purvi, naashta kar lo. Dekho na, kaise tumhara rang peela pad gaya hai. Kuch khati kyun nahi. Khao gi nahi to theek kaise hogi" Geet bistar ke aik kinaare pe simat ke beth chuki thi aur naashte ki tray bistar ke saath lage bed stool pe rakh chuki thi.

"Mujhe nahi lagta ke mein theek ho paungi" Us ke honton ki harkat kisi barbarahat se kam nahi thi.

"Purvi, mayoosi ki baatein mat karo. Mujhe dair ho rahi hai. Mein university ja rahi hun. Naashta kar lena please" Geet Purvi ko halke se ghoorti hai aur darwaaze ke taraf apne qadam barha deti hai.

"Geet, kya tumhe pata hai ke jab yakdam hi achanak se hi aik insaan aasman se zameen pe pathak diya jaye to phir woh wapis uth nahi pata hai. Aur tab to bilkul nahi jab us aasmaan par woh apna keemti asaasa chod aaya ho jo usne saalon ki mehnat ke baad banaya ho" Geet ke darwaaze ki taraf badhte qadam wahin ruk gaye. Purvi ki awaaz mein koi khawab tha jo chiknachoor ho chuka tha, koi mukaam tha jo manzil banne se pehle hi kuchal chuka tha.

"Purvi, tum koshish to karo. Tum theek ho jao gi" Geet dukh aur bebasi ke mujtama jazbaat ke zair e asar Purvi pe nazar daalti hai aur phir wohi apne rookhe peekhe ilfaaz mein tasalli dene ki koshish karti hai. Kabhi kabhi yeh Geet ke liye bohat mushkil ho jata tha, lafzon ka fan to Purvi hi jaanti thi, Geet to bilkul nahi.

"Tumhare lafz mujh pe asar nahi karte, tum ye achi tarah se jaanti ho phir kyun wohi nakaam koshish baar baar karti ho. Mein jaanti hun ke tum meri behen ho aur mujh se bohat pyaar bhi karti ho magar jo hua woh waqaie bohat bura hua aur us mein na hi mera qasoor hai, na hi tumhara magar ab koi raasta wapis nahi jata, mein toot ke reh gayi hun, mera jisam hi nahi, meri rooh bhi toot gayi hai.us accident ne sirf mera jisam hi nahi, meri rooh bhi cheen li hai. Mere khawabon ko kisi kachre ki tarah koode daan mein daal diya hai. Mein woh larki thi jis ka khawab tha aik nurse banna aur mein woh khawaab mukammal karne ke bilkul qareeb khadi thi. Bas do qadam ka faasla tha. Magar, magar sirf aik accident ne faasle hi faasle chod diye hain. Mujhe wheel chair pe la kar rakh diya hai, mein aik nurse ke mustakil sahaare ki mohtaaj ban gayi hun. Mein to khud nurse banna chahti thi balke mein to ban gayi thi. Ye kya ho gaya hai Geet mere saath" Us larki ke chehre pe kayi jazbaat aik saath haawi the. Bekaraar dard se aankhon se aansun bhi beh nikle the. Dukh tha ke chehre se bapanah nazar a raha tha. Talkhi thi jo halaat ki aik sangeeni ki waja se lehje mein mustakil samaa gayi thi. Khawahish ke chan se toot jaane ka beyaqeen sadma tha. Do mahine pehle hone waale accident mein Purvi apni taangon ki taaqat se mehroom ho chuki thi. Doctors ka kehna tha ke ab to mareez khud hi apne ap ko khada karne ki himmat kare to koi umeed ban sakti hai magar Purvi ki to jaise saari umeedein hi toot ke reh gayi theen. Din ba din, talkh se talkh hoti ja rahi thi. Zindagi kabhi shokh hua karti thi magar sirf do mahine mein zindagi banjar ban chuki thi.

Geet bebasi se Purvi ko dekh rahi thi. Us ke paas koi ilfaaz nahi the. Purvi ke ilfaazon ke aage us ke lafzon ki koi haisiat hi nahi reh jaati thi, kyunke lafzon ka fan to Purvi ke liye bana tha, Geet ke liye nahi.

Abhijeet, Vishal, Raj aur Rohan university ki badi si library mein aik saath hi daakhil hue the. Shokh o taraar larkiyon ki nazrein beikhtiyaar hi Abhijeet ki taraf uthi theen aur phir jhukna to jaise bhool hi gayi theen. Vishal jhainpa jhainpa sa hansa tha aur Abhijeet ke kandhe pe aik thapki di thi.

"Chal nikal" Abhijeet ne Vishal ko ghoorte hue us ka haath apne kandhe se uthaya tha.

Teenon hi hanste hanste Abhijeet ke saath maiz kursi tak a rahe the aur phir chaaron hi apni kursiyan sambhaal chuke the.

"Yaar, jo maine suna hai kya woh sach hai?" Raj ne shokhi se maiz ko bajate hue Abhijeet se sawaal kiya tha.

"Han, han. Batao na" Vishal aur Rohan bhi yak awaaz ho kar bole the.

"Ab kya naya shosha chod rahe ho tum log? Mujhe nahi pata ke tum log kis baare mein baat kar rahe ho"

"Are woh waali baat. Acha. Okay. Okay. Kya yeh baat sach hai ke tum ne hazaron proposals reject karne ke baad kal us bechaari larki Nisha ka bhi proposal reject kar diya hai?" Is baar Rohan ki taraf se sawaal hua tha.

"Han, ye sach hai" Abhijeet ne aik sakht nazar apne un teen kameene doston par daali aur kitaab khol ke beth gaya.

"Ye kitaab ke peeche chehra kya chupa rahe ho? Bhai itna bhi nakhra koi acha nahi hota. Kitne dil todo ge?" Vishal ne Abhijeet ke haathon se kitaab jhapat li aur Abhijeet bas dekhta hi reh gaya.

"Nakhron se kya muraad hai tumhaari. Ye nakhre nahi hain, zindagi hai meri. Marzi bhi meri hai. Har kisi ko apni zindagi ke faislon pe ikhtiyaar hota hai. Mujhe bhi hai. Ab agar ye sab uni ki larkiyaan mujh pe meri achi shakal ki bina pe marti hain na to mera to koi qasoor nahi hai is mein. Meine to aj tak un mein se kisi aik ko bhi aisa koi ishaara nahi diya. Koi waada nahi kiya Aur sach kahun na to mein aise kisi jazbaati lamhe mein beh kar apni aur us larki ki zindagi barbaad nahi karna chahta. Yeh jo larke aur larki ke beech faasla hota hai na, is mein maqnateesi kashish hoti hai aur mein nahi chahta ke mein bhi kisi jazbaati lamhe mein beh jauhai. Sirf shaklon se mohabbat ho jana mumkin nahi, mohabbat to rooh ka rishta hai aur yeh bewaqoof larkiyan ye samajhti hi nahi. Are bhaie, na hi woh mujhe jaanti hai, na hi mein use jaanta hun. Shaklon se itna mutasir ho jana to na sarasar bewaqoofi aur aik waqti lagan hai jo shuru shuru mein to bohat achi lagti hai magar waqt ke saath saath rookhi peekhi ho jati hai" Abhijeet ki itni lambi taqreer ne waqaie Vishal, Raj aur Rohan ko sannate mein la khada kar diya tha. Woh teenon bade dheyaan se Abhijeet ki aik aik baat ko sun kar jaanch rahe the.

"Yaar baat to tu ne waqaie kaafi high standard waali ki hai. Acha ise chod, in bekaar larkiyon ko chod. Tu ye bata ke teri pasand kya hai?" Rohan apne gaal pe haath rakhe hue kaafi sandjeedgi chehre pe sajaye pooch raha tha.

"Meri pasand? Kaisi pasand?" Woh jhainp kar muskurata hai aur zabardasti apne chehre ko kitaab se chupa leta hai.

"Chal zyaada budhu banne ki zaroorat nahi hai. Seedhi seedhi tarhan bata ke larki kaisi pasand hai?" Vishal Abhijeet pe aik taiz nazar daalte hue bolta hai.

"Chalo, aj bata hi deta hun" Abhijeet muskurata hai.

"Woh larki jo mujhe pasand aye gi woh in sab se mukhtalif hogi. Shaklon pe mit jaane waali to hazaar hongi magar dil pe mit jaane waali hazaar mein se aik hi hoti hai shayad. Jo larki meri pasand hogi woh meri hi tarhan lafzon ke husan se maal a maal hogi. Chehre mutaasir nahi karte, lafz karte hain. Lafzon mein kitni taqat hai ye naqabil e beyaan hai. Lafzon mein jaadu hota hai aur lafzon se bhi zyaada taqat aankhon mein hoti hai. Jo baatein hont kehne mein arsa laga dete hain, wohi baatein aankhein aik pal mein keh jati hain. Woh meri aankhon mein dekhe gi na to mujhe samajh jaye gi aur jab mein uski aankhon mein dekhun ga to mein us ki unkahi baatein samajh jaun ga. Bas yahi hai meri pasand" Abhijeet ka lehja mohabbat se poor poor tha, woh undekhi shakhsiyat, woh larki jo use apni zindagi mein ab tak mili bhi nahi thi, us ke tasawur ne hi us ka dil bagh bagh kar diya tha. Bas aisi hi to larki se mohabbat karna chahta tha woh.

" Wah yaar, teri pasand to waqaie qabil e tareef hai" Raj sitaish liye bola tha.

"Mein nikalta hun. Meri falasfa ki class hai" Abhijeet apna basta uthata hua bola.

"Ap ko falasfa ki class lene ki kya zaroorat hai, ap to pehle se hi poore ke poore falasfi hain" Vishal hans ke kehta hai aur apna basta utha kar apni class ki tarhan rawana ho jata hai.

Abhijeet teenon pe hi muskurahat uchaalta hua apni class ki taraf rawana ho jata hai.

To Be Continued

How was it? Please give your feedback in the review box.