Hi, Im back. Enjoy the read.

Dard Ka Naam Ishq

Chapter 11

Flashback Series Part 3

Shart

Aik larki ghaas pe udaasi aur ghussa liye bethi hui thi. Ye university ka sab se weeran hissa tha. Zyada shagirdon ka yahan se guzr nahi hota tha. Neele aasman ko badal ghaire hue the aur phoolon ki khoobsurat khushboo bhi us ka ghussa kam nahi kar pa rahi thi.

"Tum yahan bethi ho Nisha, mein tumhe poori university mein dhoondti hui a rahi hun" Geet ne jab us larki ko ghaas pe bethe dekha to dod kar us ke paas ayi aur us ke qareeb hi ghaas pe phail kar chokadi maar kar beth gayi.

"Aj mood kuch acha nahi lag raha. Itni udaas kyun bethi ho" Jab Nisha ki taraf se musalsal koi jawaab mosool na hua to Geet ne apni sochon ko sawaal mein dhaal diya.

"Mein waqaie bohat udaas hun aur bohat ghusse mein bhi. Pata nahi woh apne ap ko samajhta kya hai?" Nisha ka ghussa kam hoke hi nahi de raha tha.

"Kya hua? Kis ki baat kar rahi ho?" Geet ne achnabe se Nisha ki taraf dekha aur us ke jawab ki muntazir rahi.

"Abhijeet ki baat kar rahi hun. Woh mera classmate hai. Kya tum nahi jaanti usko?"

"Naam to suna hua hai par shayad agar dekha bhi hai to maloom nahi hoga ke woh Abhijeet tha. Kyun kya kar diya usne?" Geet ke andaaz mein mamool se hat kar kuch nahi tha. Woh bohat araamdeh aur tahamul ka izhaar karti nazar a rahi thi jaise ye sab roz ka mamool ho.

"Maine use propose kiya aur usne mujhe reject kar diya. Can you believe it? Mujhe yakeen nahi ata ke us mein itni akad kese hai. Woh behekta kyun nahi hai. College ki saari larkiyan us pe marti hain magar woh hai ke..pathar ka pathar hai. Dil chahta hai ke us ka saara guroor mitti mein mila dun" Nisha ghusse se bharpoor lehje mein beyaan kar rahi thi.

"Mein nahi manti ke woh behek nahi sakta. Duniya mein koi aisa aadmi nahi jo behak na sakta ho" Geet atal lehje mein befikri se jawaab deti hai. Use Nisha ki baat pe na hi kuch khaas dukh hua, na hi koi khaas dhachka laga kyunke yeh to woh bhi jaanti thi ke uski dost pasand se zyaada apne thukraye jaane pe ghussa hai, apni ana ko thais lag jaane ki wajah se. Is tarhan ke waqiye university mein aam the.

"Kya tum yeh saabit kar sakti ho? Agar kar sako to maan lungi" Nisha ke lafzon mein muqaable ke liye dawat thi jis ne Geet ko pur josh kar diya. Use ghalat saabit hona pasand nahi tha. Jeetna usne apni zindagi ka maqsad bana liya tha. Aur aj bhi woh jeet jana chahti thi. Jo doosre nahi kar sakte, woh cheezein woh kar ke dikhaana chahti thi chahe rah mein zindagiyaan hi kyun na dao pe lag jayein.

"Haan, mein saabit kar sakti hun aur kar ke dikhaungi. Tum batao, tum kya saabit karwana chahti ho mujh se?" Geet jo mun phat, nidar aur dilair thi aik pal ko bhi nahi sochti thi chahe uske faisle baad mein kitne hi pachtaawe layein. Magar woh to shayad un pachtaawon ko bhi jhatak kar hawa mein ura deti thi.

"Kya tum Abhijeet ko propose kar sakti ho? Aur jeetogi tum sirf isi shart pe ke Abhijeet ka jawaab haan mein hona chahiye. Mujhe pata hai yeh nahi hone waala to haarne ke liye tayaar ho jao Geet madam" Nisha ne shart aage rakhi. Use so feesad aitamad tha ke Abhijeet ko Geet naam ki chiriya bhi nahi tod sakti, todna to door ki baat, choone ki bhi haisiat is chiriya mein nahi ho sakti.

"Use mein propose nahi karungi. Woh khud a ke mujhe propose kare ga. Sirf aik mahina, sirf aik maheena de do mujhe. Aur phir tumhari nazrein meri jeet pe hongi. Ye shart bhaari pade gi tumhe. Kitne ki lagaati ho?" Geet ki muskurat mein aitamad aur woh jeet chamak rahi thi jo abhi us ne haasil bhi nahi ki thi.

" 50 hazaar. Manzoor?" Nisha ki aankhein muskurayein theen. Apni haar pe to woh dilbardashta thi magar Geet ki matawaqa haar ne uska dil aur dimaag khush kar diya. Use taskeen hui ke ye haar sirf us ki hi qismat mein to nahi.

"Manzoor. Chalti hun, jeet bahir mera intezaar kar rahi hai" Woh hans di jaise Nisha ko chidana chaha ho.

"Ja kahan rahi ho, tasveer to dekh lo Abhijeet ki. Bahir kya tasavur se ishq ladao gi?" Nisha ne Geet pe tanz bhari nigaah phairte hue mazaqiya andaaz mein kaha tha.

"Dikhao tasveer" Geet hont bhainch kar wapis mudi aur Naina ke paas a gayi jo mobile phone ki gallery khol rahi thi.

"Ye rahi tasveer" Yeh aik aam si tasveer thi shayad Abhijeet ko maloom nahi tha ke uski tasveer kheench li gayi hai. Uni mein khada aik pillar ke saath taik lagaye hue tha aur nazrein apne mobile phone pe theen.

"Are, ise to maine library mein dekha tha abhi abhi yahan aane se pehle" Geet chounk si gayi.

"Chalo acha hua ke tum ne dekh liya" Nisha muskurayi aur apna basta uthati hui wahan se chali gayi Geet ko kisi uljhan mein chod ke.

Kamre ke mahol mein khamoshi ghuli hui thi. Kaafi dair se Geet apne kamre mein bistar ki taik se taik lagaye neeche carpet pe bethi hui. Woh kisi kaafi gehri soch mein mubtala thi. Na jaane kya use pareshaan kar raha tha.

"Maine use library mein dekha tha. Mere tasavur mein bhi nahi tha us waqt ke woh insaan Abhijeet ho sakta hai.." Us ki barbarahat darmiyaani jagah ko ghaire hue kamre mein goonj rahi thi.

"Mera tasavur Abhijeet ke baare mein aur woh asal mein, dono hi kitne mukhtalif hain" Us ne apna sar pakad liya. Use woh library wala manzar yaad a gaya tha jab woh Nisha ko dhoond rahi thi ke use aik larka apne teen doston mein ghira koi baat karte hue sunaayi diya. Na jaane kya baat thi ke woh wahin qareeb mein ruk ke un ki baatein sunne lagi. Use us nojawaan ki soch pe hairat to hui magar us ke lehje se jo sachayi tipak rahi thi us ne use us ki baat pe shuba karne ka mouqa na diya. Ab jab ke us par inkashaaf hua ke woh nojawaan Abhijeet tha to woh uljhan mein phans gayi. Use laga ke woh to baazi chalne se pehle hi haar gayi hai. Us ne apne saamne pade kaagaz ko dekha jis pe Nisha ne Abhijeet ka number likha hua tha jo us ne aik din chupke se chura liya tha magar faida koi nahi hua tha. Geet ne us kaghaz pe aik roothi nazar daali. Ab is kaghaz ka bhi kya faida tha, bilkul bekaar tha. Woh khade ho kar use phaadne hi waali thi ke ruk gayi. Us se yeh haar bardasht nahi ho rahi thi. Woh kyun aise himmat haar rahi hai. Aik koshish kiye bina hi kaise haar jaye. Jeetegi to woh zaroor agar seedhe raaste se nahi to ulte raaste se hi sahi. Use apni hi kahi baat yaad ayi ke behakta har koi hai, magar yeh bhi to hai ke har kisi ke behakne ka andaaz bhi mukhtalif hota hai.

"Haan, mein sahi thi ke is duniya mein aisa koi aadmi nahi jo behak na sake. Sirf behakne ke tareeqe mukhtalif hote hain. Behakta har koi hai.Woh andaaz jo Abhijeet ke dil ke qareeb hai use bhi behka sakta hai. Aur woh andaaz…." Ab us ke chehre pe aik chamakti hui muskurahat chayi hui thi. Us ne apni jeet ke liye liye jaane waale qadam azbar kar liye. Use ab sirf amal karne ki dair thi. Wohi kaghaz pe likha number ab kisi khazane ki chaabi dikh raha tha. Woh number uski jeet ki gawaahi de raha tha. Woh khush thi magar abhi bhi aik uljhan thi jo usne suljhaane thi aur wohi to is jeet ki raah mein sab se badi kadi saabit hoti. Agar woh uljhan sulajh na paayi to yeh khail to mitti mein mil jaye.

Geet ke qadam Purvi ke kamre ki taraf badh rahe the. Woh yakdam hi ladkhadayi. Ye maamla thoda khatan saabit ho sakta tha magar usne kabhi haar ko qabool karna bhi seekha na tha. Us ne kadam phir se badhaye aur Purvi ke kamre pe halki si dastak de kar andar daakhil ho gayi.

"Kesi ho Purvi?" Geet muskura ke poochti hai aur saamne hi padi kursi pe bechaini se beth jati hai.

"Waisi hi hoon jaise pehle thi" Purvi jo ke bistar se taik lagaye hue thi sipaat lehja liye boli.

"Kitni baar samjhaya hai tumhe, aisi baatein mat kiya karo" Geet ki awaaz mein halki si dhapat thi magar na jaane kyun us ki awaaz mein ladkharahat thi.

"Nahi karun gi. Tum batao?"

"Mujhe tumhari madad ki zaroorat hai. Meri madad karo gi na Purvi?" Geet ki awaaz mein iltijaa thi. Purvi ne chounk ke Geet ko dekha. Aakhir aisi kya baat thi ke Geet uski madad maang rahi thi.

"Mein tumhari kya madad kar sakti hun. Mein to khud apni bhi madad karne se qaasir hun, tumhari kya madad karun gi" Purvi ne mayoosi se Geet ko jhatak diya.

"Yakeen karo mera Purvi. Aik tum hi is poori duniya mein meri madad kar sakti ho. Mujhe nahi lagta ke koi bhi aur meri madad kar sakta hai. Karogi na meri madad?" Geet poore yakeen se boli. Purvi ko hairat hui. Woh aakhir Geet ki kya madad kar sakti thi jis ne aaj tak uski madad nahi maangi aur ab yun, iltijaa ke saath.

"Theek hai. Kya madad chahiye tumhe?" Purvi ne kuch dair soch ke sar sayi mein ghuma diya.

"Purvi, baat yeh hai ke *"* "

"Kyaa? Yeh..yeh kya keh rahi ho Geet?" Jab Geet apni baat tafseel se beyaan kar ke faarigh hui to Purvi ko laga use jaise current laga ho. Woh do lamhe ko saakt ki saakt reh gayi. Yeh kya karne ko keh rahi thi use us ki behan.To Be Continued

So how was it? Sorry, Geet ne jo kaha woh agle chapter mein pata chale ga. Haha ;) Would try to give next soon.