Hello, sorry for being late. Here is the update. Enjoy.

Dard Ka Naam Ishq

Chapter 12

Flashback Series Part 4

Kashmakash

"Purvi, baat yeh hai ke.." Geet hichkichaa ke ruk gayi.

"Kya baat hai?"

"Mera aik classmate hai jise mein propose karna chahti hun magar..magar mein jaanti hun ke woh mujhe kabhi haan nahi kahe ga. Mein us ki type ki hun hi nahi. Use to kisi aur hi type ki larkiyaan pasand hain. Magar mein koshish kiye bina hi haar jaana apni hatak mehsoos karti hun" Geet bolti chali ja rahi thi aur Purvi ki samajh mein nahi a raha tha ke woh kya samjhe, aur kya bole.

"Tum kehna kya chahti ho Geet? Meri kuch samajh mein nahi a rahi. Agar woh larka tumhe pasand hi nahi karta to kyun us ke dukhre ko le kar yahan bethi ho aur..aur kis type ki larkiyaan pasand hain use?" Purvi ko nahi maloom tha aakhir woh yeh baatein Geet se kar bhi kyun rahi thi. Use Geet ki baatein, us ki pareshaani samajh mein a ke hi nahi de rahi thi. Na jaane woh yeh baatein us se kyun karne chali ayi thi. Us larke ke maamle mein aakhir woh Geet ki kya madad kar sakti thi.

"Use bilkul tumhaare type ki larkiyaan pasand hain. Dheeme mizaaj rakhne waali larki jo lafzon ke hair phair se achi tarah waaqif ho. Use dekh ke mujhe yakeen ho gaya ke us ki pasand ko badalna mumkin nahi hai aur mein us ki pasand kabhi ban nahi sakti. Mujhe yeh aata hi nahi. Yeh to sirf tumhe aata hai. Mein us ki pasand badal to nahi sakti magar.." Geet beech mein ruk ke Purvi ke chehre pe aate taasuraat pe ghor karne lagi.

"Magar...magar kya Geet?" Purvi ki saans jaise ruk ruk ke chal rahi thi. Dharkan aik dam hi taiz ho gayi thi. Dil dhak dhak kar raha tha.

"Magar mere paas aik hal hai" Geet muskura ke baat jaari rakhti hai.

"Kaisa hal?"

"Woh mujh se kabhi face to face nahi mila. Mere paas uska phone number hai. Kyun na..kyun na tum Geet ban ke mere naam se us se kisi bahaane se phone pe dosti karlo. Jab tum dono ki achi khaasi dosti ho jayegi aur jab woh tumse baahir kahin milna chahta ho to mein us se milne chali jaun aur is tarah chutki mein hamari dosti ho jayegi aur phir shayad woh mujhe propose bhi kar de" Geet bolti chali ja rahi thi aur Purvi ke chehre pe kayi tasuraat aur jazbaat aik saath aa aur jaa rahe the. Geet apni baat ke ikhtetaam pe dheere se sharma ke muskura gayi aur Purvi pe to jaise kisi ne bhaari pathar phaink diya tha jis ke bojh tale woh dab gayi thi.

"Kyaa? Yeh..yeh kya keh rahi ho Geet?" Jab Geet apni baat tafseel se beyaan kar ke faarigh hui to Purvi ko laga use jaise current laga ho. Woh do lamhe ko saakt ki saakt reh gayi. Yeh kya karne ko keh rahi thi use us ki behan.

"Purvi please na. Behan nahi ho?" Geet ne pyaar se Purvi ko gale lagaya jab ke Purvi ki aankhon mein koi haijaan dod raha tha.

"Geet, ye ghalat hai. Mein ye kaise kar sakti hun. Ye to dokha hua na" Purvi pareshaani se keh kar aankhein band kar leti hai.

"Ye dokha nahi hai. Sirf aik khail hai. Sirf aik shararat. Baad mein mein use bata doongi ke phone pe baat karne wali larki mein nahi thi aur mujhe poora yakeen hai ke woh naraaz nahi hoga" Geet ne Purvi ko ram karne ki koshish mein jo bhi wazaahat uske zehan mein aayi de daali aur Purvi ko dekhne lagi jo kisi gehri soch mein thi.

"Zyaada mat socho Purvi. Zyaada sochne se uljhaawe paida hote hain. Kya kabhi...kya kabhi mene tumse aj tak kuch maanga ho? Nahi na. Aj pehli baar tum se kuch maang rahi hun. Kya do gi nahi? Agar tum sochti ho ke mein khud garz ho ke sirf apne liye soch rahi hun to ye ghalat hai, mein tumhaare liye bhi soch rahi hun. Mein jaanti hun ke tum kitni akeli ho gayi ho. Tumhe kisi ache dost ki kitni zaroorat hai aur Abhijeet tumhaare liye woh acha dost saabit ho sakta hai. Tumhari zindagi phir se zinda ho sakti hai. Aur phir tum apne pairon pe khada hona bhi seekh logi" Geet ki baatein Purvi saakt si sun rahi thi. Woh nahi jaanti thi ke Geet ke haq mein faisala theek hoga ya bura. Woh kisi bohat badi kashmakash mein phans gayi thi. Behen ki mohabbat aday a gayi thi aur woh khud bhi shayad kuch khud garz si ho gayi aik pal, kisi dost ka wajood uski berang zindagi mein koi anokhe rang bhar raha tha.

"Mein..mujhe samajh nahi a raha Geet..Mein tumhe mana nahi karna chahti magar…"

"Magar wagar chodo. Tumhe wohi karna chahiye jo mein keh rahi hun. Ye hum dono ke liye hi faidamand hai" Geet ne Purvi ki baat beech mein hi kaat di aur jaane ke liye khadi ho gayi.

"Geet ruko, agar woh..woh larka..use mein pasand na aayi" Geet ke barhte qadam Purvi ki pukaar pe ruk gayi.

"Pehli baat to yeh ke woh yaqeenan tumhe pasand kar lega. Agar nahi kiya to bhi koi baat nahi. Mein apni haar tasleem kar lungi aur tum jo itni ghabra rahi ho meri madad karne ke naam pe, woh bhi door ho jaayegi" Geet keh ke darwaaza bheedte hue wapis chali gayi aur Purvi ke andar sannate hi sannate phailne lage.

Purvi sofe pe bethi hui thi aur us ke qareeb hi uski wheel chair padi thi. Saamne hi tv pe koi program a raha tha jise woh dekhne mein magan thi magar zehan ke kisi kone mein abhi bhi Geet ki baatein goonj rahi theen. Use samajh nahi a raha tha ke woh yeh sab kaise karegi. Yeh soch kar use kuch tasalli ho gayi ke yaqeenan woh larka uski taraf matawajaa nahi hoga, shayad tang hi a jaye aur is tarah woh ye sab karne se bach jayegi. Abhi woh in hi sochon mein garak thi ke Geet ati dikhi. Us ke haath mein koi kaghaz tha.

"Purvi" Geet muskura ke bolti hai aur Purvi ke saath hi sofe pe beth jati hai.

"Han Geet" Purvi hichkicha kar kehti hai.

"Purvi, ye raha Abhijeet ka phone number. Ab dair mat karo. Use phone karo" Geet Purvi ki aankhon mein aankhein daal kar Purvi ko woh karne ke liye kehti hai jis ke liye us ne na chahte hue bhi haami bhar li thi. Woh kamzor pad gayi thi. Geet ke galat ko sahi karne ke bijaye woh bhi us ke ghalat mein na chahte hue shaamil ho gayi thi.

"Magar mein us se kahun gi kya?" Purvi pareshaani se Geet se sawaal karti hai.

"Are, kuch bhi keh dena. Koi bhi bahana kar dena. Kisi bhi farzi shakhs ka naam le kar keh dena ke yeh to unka number hai aur ap kon hain...unka number apke paas kaise aaya...wagaira wagaira.." Geet ke liye to jaise yeh koi baat hi nahi thi jab ke Purvi ki ghabrahat kam ho ke nahi de rahi thi. Har pal badhti hi ja rahi thi.

"Lekin woh number to uska hi hai..woh mujhe koi aisi waisi larki samjhe ga jo us se baat karne ke liye bahaane dhoond rahi hai" Purvi ki nazrein jhuk gayein.

"Are, baad mein maazrat kar lena ke woh number sunne mein ghalati ho gayi thi. Aik number ghalat tha. Baat khatam, tum bhi mutmain, woh bhi mutmain" Geet jhunjula ke Purvi ko samjhati hai. Usko mutmain karne ki aik baar phir koshish karti hai.

"Acha, theek hai" Purvi ne kaha aur woh kaghaz Geet ke haath se le liya jis pe Abhijeet ka phone number likha tha. Geet ne Purvi ko uska phone diya aur Purvi kaghaz se dekh ke number dial karne lagi.

Usne phone kaan se laga liya. Doosri taraf ghanti baj rahi thi magar abhi tak kisi ne phone uthaya nahi tha. Chand second intezaar karne ke baad Purvi phone rakhne hi waali thi ke doosri taraf kisi ne phone utha liya.

"Hello" Us ke kaanon mein badi khoobsurat bhaari wajahat bhari mardaana awaaz goonji thi. Us ke dil ki dharkan aik dam hi taiz hone lagi.

"Hello, kon bol raha hai?" Aik baar phir woh seharzada awaaz goonji thi jisme woh aik pal ko doob si gayi thi.

To Be Continued

I think ab to samajh gaye hoge ;) I think mene sab se bada secret reveal kar diya is story ka agar ap ne samajh liya hai. Please tell me your response in review box.