Dard Ka Naam Ishq

Chapter 13

Flashback Series Part 5

Phone Call

Abhijeet kursi se taik lagaye bezaar sa betha lounge mein tv dekh raha tha. Aj chutti ka din tha aur un doston ka hamesha ki hi tarhaan aj bhi baahir ghoomne ka faisla tha magar ain waqt par hi unka plan kharaab ho gaya. Ab woh tha aur uski bezariyat magar ye bezariyat to sirf kuch pal ki hi thi. Phone ki achanak ghanti ne use chounka diya. Woh uth kar beth gaya aur screen pe aate number ko ghor se dekhne laga jis se use pehle kabhi call nahi ayi thi. Aam tor pe woh aise hi koi unknown call utha nahi liya karta tha magar aaj bezaariyat ke maare us ka dil chaaha, harj hi kya hai. Shayad isi bahane yeh bezariyat bhi jo uspe qabza jamaa ke bethi thi, shayad rafaa ho jaye. Us ne haath barha kar call le li.

"Hello?" Us ne shuruwaat ki aur doosri taraf intezaar karne laga jahan se sirf gehri gehri saanson ki hi halki halki awaaz a rahi thi. Us ne kuch dair intizaar kiya aur phir pukaara.

"Hello, kon bol raha hai?" Woh phir se bola magar doosri taraf se koi jawaab na aaya. Us ne dekha ke call cut gayi thi.

"Ajeeb" Woh begair wajah hi hansa.

"Hello, kon bol raha hai?" Aik baar phir woh seharzada awaaz goonji thi jisme woh aik pal ko doob si gayi thi. Us ki awaaz kahin gale mein phans ke reh gayi. Woh aik bhi lafz kehne se qaasir thi. Bokhlahat mein phone us ke haath se neeche gir gaya aur woh foran neeche jhuki ke usko utha le magar tarah zameen se ragad khane ke baad call cut ho chuki thi.

"Yeh kya kiya Pagli Diwaani?" Geet cheenkh ke boli thi aur phone Purvi se kheench liya.

"Tum bhi na niri pagal ho Purvi, itna bhi bhoklaane ki kya zaroorat thi? Pehli baar baat kar rahi ho kya kisi larke se?" Geet ka mood taqreeban off ho chuka tha.

"I'm sorry Geet, Pata nahi mujhe kya ho gaya tha? Uske saath aise karna acha nahi lag raha. Dil jhoot ka saath dene pe hichkicha raha hai aur yeh dil khud ba khud maanta nahi hai, ise manana parta hai" Woh khoyi khoyi si boli. Dil aik ajeeb kaifiat se guzar raha tha.

"To samjhao apne is dil ko, manao is ko please aur yeh lo phone. Number dobara dial kar lo aur please is baar koi gadbad na karna" Geet dheet aur apne faisle pe atal khadi thi. Apni khawahish ke aage us ne Purvi ke dil ko qaid kar daala tha ke ab dharakta bhi mushkil se tha.

Purvi aur kar hi kya sakti thi, aik hi to behan thi uski, uske liye apna aap bhi qurbaan kar pad jaaye to woh hichkichati nahi magar ye faisla jaane kyun us ke liye bohat kathan tha kyunke shayad woh jaanti thi ke ye kisi ke liye bhi theek nahi hai. Magar use wohi karna tha jo uski qismat mein likha ja chuka tha to phir woh wohi kar rahi thi jo use karna chahiye tha. Usne dobara number dial kiya aur doosri taraf se jawaab ka intezaar karne lagi. Khilaaf e tawaqa call paanch ya das second baad hi le li gayi thi.

"Hello" Use laga jaise uska saans phool raha ho aur bolna dobhar ho raha ho. Woh bamushkil hi bol paayi.

"Kon bol raha hai?" Woh wohi awaaz thi shayad jo use pehle sunayi di thi.

"Mera naam Geet hai, Please..Ra..Ragini ko bula dijiye" Lafz toot toot ke bahir nikal rahe the. Ye uski zindagi ka pehla sab se bada jhoot tha, woh na chahte hue bhi yeh jhoot bolne ko bil aakhir tayaar thi. Aur..lafz jo baahir nikle to usko ahsaas hua ke jhoot ki buniyaad rakhi ja chuki thi.

"Sorry magar ye kisi Ragini ka phone nahi hai, aur na hi mein kisi Ragini ko jaanta hun" Doosri taraf se tahamul bhari narm awaaz ubhri thi jis mein saadgi aur ahtaraam waazeh tha.

"Yeh kaise ho sakta hai, Ragini ne to mujhe yahi number diya tha" Woh bazahir masoomiyat se boli magar us ke chehre pe weerani phir rahi thi. Doosri taraf woh na jaane kyun muskuraya tha.

Do ya teen hi minute guzre honge ke uska phone phir se baj utha. Us ne aankhein ghuma ke number pe ghor kiya jo shayad wohi number tha jis se pehle call ayi thi. Woh jhainp ke hasa aur call le li.

"Hello" Is se pehle ke woh kuch bolta, doosri taraf se aik sureeli madhosh zanaana awaaz goonji jis mein ghabrahat ka kuch ansar bhi tha.

"Kon bol raha hai?"

"Mera naam Geet hai, Please..Ra..Ragini ko bula dijiye" Doosri taraf woh larki jiska naam yakeenan Geet tha boli lekin jaise woh bol rahi thi and gehri gehri saansein le rahi thi us se Abhijeet ko yun laga jaise woh koi marathon bhaag ke a rahi ho.

"Sorry, magar ye kisi Ragini ka phone nahi hai, aur na hi mein kisi Ragini ko jaanta hun" Woh halka sa muskura kar bola.

"Yeh kaise ho sakta hai, Ragini ne to mujhe yahi number diya tha" Woh shayad pareshaani se boli thi aur Abhijeet ko najaane kyun us ki pareshaani pe jhunjhalahat nahi ho rahi thi. Warna woh larkiyon ko khud se itni dair tak baat hi nahi karne deta tha.

"Ho sakta hai ke ap ne ghalat number dial kar diya ho, Ragini ne koi aur number diya ho ap ko kyunke yeh Ragini ka number kisi bhi tarah nahi ho sakta kyunke yeh mera number hai" Woh keh ke doosri taraf ka intezaar karne laga.

"Shayad aap theek hi keh rahe hon. Shukriya aap ka apna qeemti waqt mere liye zaaya karne ke liye" Doosri taraf se uski baat sun ke woh muskuraya tha. Pata nahi kyun par is tarah aik ajnabi larki se baat karna use bura nahi lag raha tha. Aik anjaani kashish thi in dono ke beech jo unko na chahte hue bhi qareeb kheench rahi thi.

"Shayad aap theek hi keh rahe hon. Shukriya aap ka apna qeemti waqt mere liye zaaya karne ke liye" Uski aankhein jhuki hui theen. Lagta tha ke kisi bhi pal sharmindagi se baras padein ge. Use Geet ke ishaare bhi nazar nahi rahe the jo use itni jaldi baat khatam karne se rok rahi thi magar us ke hosh use apne ird gird se begana kar rahe the. Dheere se uski aankh ke aik kone se aansun ka aik qatra tipak pada jisse saaf karna ki usne zehmat tak na ki.

"Koi baat nahi, Kabhi kabhi kisi ke liye agar kuch waqt daag bhi dein to bhi koi baat nahi. Aik insaan ka doosre insaan pe haq hota hai" Geet ne sach kaha tha, woh insaan lafzon ko jaadugar lagta tha, jaise woh. Woh bhi to lafzon ki diwaani thi. Agar nurse banne ki khawahish na hoti to zaroor falasfa parhti.

"Ap ka bohat shukriya, ab mein phone rakhti hun. Dekh lun na ke Ragini ke number mein problem kahan se a gayi" Woh is andaaz mein boli jaise dono mein pata nahi kitna purana rishta hai aur jaise woh to usi se baat karna chahti thi ke Ragini ke number ka masla dar paish a gaya. Woh doosri taraf zara zor se hansa tha.

"Theek hai" Woh bola aur shayad uski taraf se call cut gayi.

Purvi ne phone Geet ko pakraya jis pe woh taish zada si phone ko pakad ke uth gayi.

"Yeh tum ne kya kiya Purvi. Aise baat kyun khatam kar di. Us se ladi kyun nahi? Us se behas kyun nahi ki ke ye number har haal mein tumhaari dost Ragini ka hi hai" Geet ko bepanaah ghussa a raha tha Purvi ki bewaqoofi pe. Us ne to jaise sab raahein hi band kar di theen. Dobara agar woh raah chuni bhi jaati to shayad ab darwaaza phir se khula na milta.

"Kyun ke mein aisi nahi hun Geet, mujh se nahi ho sakta yeh" Woh taqreeban dhaari thi. Dhaad jis mein nami ghuli mili thi.

Agle din Purvi apne kamre mein bistar se taik lagaye kisi gehri soch mein gum thi. Us ne aaj kaala shalwar qameez pehna hua tha. Kaale shalwar qameez mein us ka rang khill raha tha. Woh chehra jitna khoobsurat aur masoom tha utna hi weeran aur mayoos bhi tha. Use aise laga jaise woh bohat kuch haar jaye gi. Yeh us se nahi ho paaye ga. Woh Geet ki baat nahi maan sakti thi. Geet ke jazbaat ke liye apne aur kisi aur ke jazbaat ko thais nahi ponhcha sakti. Aur usi waqt us ne woh faisla kar liya. Haan, us ne faisla kar liya ke woh Abhijeet ko phone kar ke bata de gi ke us ne jhoot bola tha. Jhoot ka bojh us se bardasht nahi ho raha tha.

To Be Continued