Dard Ka Naam Ishq

Chapter 14

Flashback Series Part 6

Geet is waqt ghar pe nahi thi. Purvi ne haath barha kar takiye ke qareeb rakha hua phone utha liya. Phone us ke haath mein tha aur woh use haath mein liye ghoor rahi thi, kashmakash mein thi ke call milaaye ya na milaaye. Kya sahi hoga or kya ghalat hoga. Aur bilaakhir usne number dial kar hi diya. Uska dil zor zor se dharak raha tha. Use nahi maloom tha ke uske phone uthaane pe woh kaise lafzon ko samait kar kuch bol sake gi. Magar woh aj is marhale se guzar jana chahti thi. Is se pehle ke ghalat fehmiyan paida hon, un ki jad ko hi khatam kar diya jaaye.

Doosri taraf Abhijeet apne kamre mein khada jaldi jaldi tayaar ho raha tha. Woh uni ke liye late ho chuka tha aur ab aur dair nahi karna chahta tha. Us ne phone jaib mein rakha hi tha ke uska phone bajne laga aur uski jaib thapthapane lagi. Us ne na chahte hue bhi phone utha liya.

"Hello" Woh bola tha aur saath mein hi apni juraabein bhi dhoondne ke liye daraaz khol aur band kar raha tha.

Doosri taraf Purvi kashmakash mein phansi thi. Use kya bolna chahiye, yeh sab se badi kashmaksh thi us waqt us ke liye.

"Hello" Us ne apne ap ko sambhaal kar dheemi awaaz mein kaha tha.

"Kon bol raha hai?" Woh ab sofe pe beth chuka tha. Dair se pahunchne ki fikar kuch pal ko simat si gayi thi.

"Mein Pu.. mera matlab hai mein Geet baat kar rahi hun" Us ne dheere se apne hont chabaye the.

"Geet..yani ke Ragini wali Geet?" Use aik dam hi kal ki phone call yaad aayi aur us se judi woh khoobsurat awaaz jo jaane kiski thi magar naam shayad Geet tha.

"Ji haan" Woh bohat dheeme se boli thi, itna dheema ke phone ke paar Abhijeet ko uski awaaz mushkil se hi pahunchi thi.

"Ap ko apki dost ka number mila nahi kya abhi tak?" Us ne yunhi istafsaar kiya. Use samajh nahi a raha tha ke is anjaani larki ne usse phir phone kyun kiya hai, shayad apni dost ke number ke silsile mein hi kiya ho.

"Meine ap se jhoot bola tha. Ragini naam ki koi bhi dost mere paas nahi hai. Mujhe maaf kar dijiye" Doosri taraf uski awaaz bilkul dhae jaane waali thi. Lagta tha ke abhi ro pade gi magar shayad bohat sakhti se un aansuon pe band daalne ki koshish ki gayi thi.

"Kyaa? Kya matlab hai ap ka?" Abhijeet hairat zada reh gaya. Pata nahi kyun magar use ghussa nahi aaya. Purvi ka lehje, us ki awaaz aisi thi hi nahi ke woh us pe ghussa kar pata. Un lafzon mein bebas si sachaayi thi.

"Ap ne jhoot kyun bola Geet?" Jab doosri taraf gehri gehri saanson ke illawa koi awaaz na goonji to Abhijeet ne thandi saans baahir nikaal kar thoog nigal kar araam aur narmi se istafsaar kiya.

"Woh actually..." Shayad is waqt sach bolna bhi bohat bhaari lag raha tha. Woh kaise use yeh bata sakti hai ke uski behan jo ke Abhijeet ke saath hi parhti hai ke kya azaaim hain. Woh apni behan ko uski nazron mein giraana nahi chahti thi.

"Mein bohat tanha hun. Koi dost nahi hai mera aur na hi shayad koi banna chahe ga. Bas aik dost mil jaaye isi umeed ke zariye aik jhoot ka sahaara liya. Magar ab mujhe ahsaas ho gaya hai ke mein ghalat kar rahi thi. Dost jhoot bol ke to nahi banaaye jaate" Woh bolti chali gayi. Aadha sach aur aadha jhoot bolti chali gayi. Kehna to woh sach chahti thi magar ab bohat dair ho chuki thi. Lafz us ke dil se hote zubaan ke zariye baahir a chuke the. Yeh sach hi to tha ke woh apne ap ko bohat akela mehsoos karne lagi thi. Us ke accident ke baad us ke saare dost ahista ahista us se kinara kush hote chale gaye. Pata nahi yeh dil ki baat us ne kese us ajnabi ko beyaan kar daali thi magar ab sochne samajhne ke liye kuch bhi baaki nahi reh gaya.

"Mujhe samajh nahi a raha ke mein kya bolun?" Doosri taraf Abhijeet anokhi si uljhan mein ulajh gaya tha. Us larki ki awaaz mein sacchayi thi, dukh tha, aur shikayat thi. Us ne aj tak tanha hona na seekha tha, aur na hi kabhi apne ap ko tanha mehsoos hone diya tha. Do saal qabal us ke walidain ki wafaat ho gayi thi magar un ke jaane ne bhi use itna tanha na kiya tha, kyunke woh jaanta tha ke use kaise apni zindagi mein halchal mehsoos karni hai. Kaise apni zindagi ko mutaharik karna hai.

"Ap kuch na kahiye. Mein phone rakhti hun" Purvi ki aankhon se aansun be awaaz behte chale ja rahe the. Woh jaldi se boli thi aur call kaatne hi lagi thi ke doosri taraf se us ki pukaar sun ke rukiye.

"Thehriye" Use maloom nahi tha ke us ne us larki ko call kaatne se kyun mana kar diya tha. Bas koi anjaani si kashish thi jo use hadaiyat de rahi thi ke woh us larki ko rok de, us ko andheron mein girne se rok le. Us ki mayoosi bhari awaaz us ke kaanon mein baar baar goonj rahi thi. Jaise us ne kaha ke woh bohat tanha hai to jaise Abhijeet ke dil ko kuch hua tha. Acha nahi laga tha. Dukh mehsoos hua tha us ajnabi larki ke liye.

"Ji boliye" Us ne sar jhuka liya tha aur jo haath call kaatne ke liye barha tha woh waapis neeche gira liya.

"Mujhe nahi maloom ke tum apne ap ko itni tanha kyun mehsoos kar rahi ho magar mujhe tumhaari baat pe yakeen hai. Agar tum keh rahi ho ke tum bohat tanha reh gayi ho to yaqeenan aisa hi hoga. Tum ne jhoot ka sahara liya, is ka dukh zaroor hai. Magar tum ne kyun jhoot bola us ko samjhne ki koshish kar raha hun aur lagta hai ke tum ne yeh qadam bohat majboor ho ke uthaya hai" Itni hamdardi use aj se pehle kabhi kisi larki se mehsoos na hui thi. Us larki ki tanhayi, us larki ka dukh woh mehsoos kar raha tha. Aj pehli baar woh kisi larki ko samajh pa raha tha, samajhne ki koshish kar raha tha kyunke shayad us larki mein kuch mukhtalif tha, jo us ne aj se pehle kabhi kisi larki mein mehsoos nahi kiya tha.

"Mujhe kya bolna chahiye?" Us ne apne aansuon pe band daalne ki beintaha koshish ke baad ahista se kaha.

"Kuch bhi. Bas dil halka kar do. Jo dil chahta hai keh do" Koi jaadoui kashish thi jo use yeh sab bolne pe majboor kar rahi thi aur use yeh bolne ke baad bhi koi pachtawa na hua.

"Yun kisi ajnabi ke saamne dil halka karna kuch mushkil hai. Lekin phir bhi agar ap israar kar hi rahe hain to keh deti hun. Dil chahta hai ke sab pehle jaisa ho jaaye. Sab theek ho jaaye magar umeed ka sira kahin se bhi milta hi nahi" Purvi ki awaaz rundh si gayi.

"Tum agar yeh batana nahi chahti ke tum ne umeed ka sira haath se kyun jaane diya to mein tum se kabhi poochun ga nahi. Honestly, mujhe maloom nahi hai ke tumhe kya kahun. Kyunke meri zindagi mein kabhi kuch bura nahi hua, is liye shayad mujhe yeh bhi pata nahi hai ke yeh umeed achanak se hi kese aur kyun toot jaati hai aur phir is umeed ko dobara kese haasil kiya jaata hai. I know meri baatein tumhein bore kar rahi hain. Mein waqaie tumhaare liye kuch nahi kar sakta. Pata nahi mein tum se yeh sab keh bhi kyun raha hun" Use to kuch khayaal bhi nahi raha tha ke woh university se late ho chuka tha. Woh mukammal kho chuka tha us ke dil ki baatein sunne mein. Use kuch bhi yaad nahi reh gaya tha. Hosh to use us waqt ayi jab us ke phone pe us ke dost Vishal ki call aane lagi.

"Maaf kijiye ga magar mujhe abhi phone band karna hoga. Mere dost ki call a rahi hai" Us ne jaldi se kaha aur call kaat di. Magar 2 pal baad hi ahsaas hua ke aise call nahi kaatni chahiye thi. Us se alvida to le leta.

"Ji theek hai" Us ne pheeke dil se call kaatne ke liye haath barhaya magar call to pehle hi kat chuki thi. Us ne sar jhatka aur phone bistar pe doosri side pe uchaal diya. Abhi use baat khatam kiye huye 20 second bhi na hone paye the ke Geet darwaza dakhail ke andar chali aayi aur Purvi ko zor se gale se laga liya.

"Purvi, pehle to tum ne mujhe dara hi diya tha. Mein samjhi ke tum use sach bataane ja rahi ho. Magar tum to bohat zaheen aur shaatir nikli. Us ko aise apni baaton mein phansaya hai ke agli baar to woh khud hi call milaye ga. Dekh lena" Geet ke chehre pe khushi ki ramak thi.

"Tum to university nahi gayi hui thi?" Purvi ne achnabhe se poocha.

"Han gayi hui to thi, magar phir wapas a gayi kyunke meri koi class nahi thi" Geet ne sarsari tor pe bataya.

To Be Continued