Dard Ka Naam Ishq
Chapter 16
Flashback Series Part 8
Dosti
"Ap..ap durust keh rahi hain Geet. Meine jhoot bola. Pata nahi kyun. Aur pata nahi meine ap ko phone kyun kiya? Mein yeh beyaan karne se qasir hun. Pata nahi kaise aur kyun, ap ki us din ki baaton ne mere dil pe bohat asar kiya hai, shayad ap ki khariyat poochna chahta tha ke ap theek hain na ya phir...ap ki taraf dosti ka haath barhana chahta tha..mein ap ko akele hi tanhayi mein ghutne nahi dunga. Kya mein ap ki tanhayi baant sakta hun? Shayad mujhe bhi aik achi dost mil jaye aur ap ki tanhayi bhi door ho jaye" Abhijeet ne hichkicha ke Purvi aka Geet ki taraf dosti ka haath barhana chaha. Yeh woh pehle jaisa Abhijeet nahi tha. Kuch badal gaya tha in chand dinon mein. Purvi ki baatein, us ka lehja, us ki awaaz poora din us ke zehan mein goonjti thi. Aur heraangi ki baat to yeh thi ke woh is awaaz se pareshaan nahi tha. Meethi meethi khushi milti jab bhi woh awaaz us ke kaanon mein goonjti. Woh jaanta tha ke is larki mein zaroor kuch khaas hai aur isi liye woh use apna dost banana chahta tha, us ki tanhaiyaan jo shayad us ko jeene na deti theen un ko baatna chahta tha."Abhijeet...Ap ne kuch kaha tha shayad..Mujhe awaaz nahi ayi..awaaz kat rahi hai ap ki" Purvi ko yaqeen nahi a raha tha ke Geet ki baat waqayi sach ho sakti hai ke woh Purvi ko pasand karne lage ga. Lekin ab to kisi shak ki gunjaish hi na thi. Geet ka koi andaza sahi ho ya na ho lekin yeh andaaza zaroor durust tha. Abhijeet to Purvi ko itna samjhne laga tha ke us ko dar sa tha ke woh us ke baare mein sab kuch na bhaanp le. Yeh bhi ke Abhijeet ko phone karna aik socha samjha iraada tha, koi ghalati nahi, ya koi dost dhoondne ka bahana nahi. Purvi ne jab Abhijeet ke mun se dosti ki darkhaast suni to kuch pal ko sun si reh gayi. Phir kuch samajh ayi to bahana bana kar taalne ki koshish ki.
"Jhoot to ap ko bhi bolna nahi aata Geet. Ap kyun chahti hain ke mein woh sab phir se dohraun jo meine itni himmat akhata karne ke baad kaha hai" Abhijeet ne Purvi ka jhoot saaf pakad liya tha. Shayad aise lehjon ki yahi kamzori hoti hai ke koi jhoot un ki zubaan se bola nahi jaata aur agar bol dein to zubaan ki larkharahat aur lehje ka kacha pan sab kuch saaf zaahir kar deta hai.
"Abhijeet..mein" Purvi ko samajh mein nahi a raha tha ke woh kya bole aur kya na bole. Us ka dil kar raha tha ke phone band kar ke bas rona shuru kar de. Apni bebasi pe, apni lachari pe.
"Geet..hichkicha kyun rahi hain. Kya ap nahi chahteen theen ke ap ka koi dost ho. Mein banna chahta hun ap ka dost. Mujhe ap ki shakhsiyat bohat pasand ayi hai. Ap jaisa koi nahi hai meri zindagi mein. Aise hi dost ki tamanna thi mujhe. Lekin agar ap nahi chahteen to phir mein ap ko phone nahi karunga" Abhijeet ko laga ke shayad us ne koi ghalati kar di hai halanke use to laga tha ke woh bhi aik dost ki zaroorat mehsoos karti hai. Aik mukhlis dost ki zaroorat jo kuch pal ko uska dil behla sake.
"Nahi, Aise mat kijiye ga. Mein ap ki dosti ki darkhaast ko thukra nahi sakti kyunke mein bhi to aik acha mukhlis dost chahti hun apni zindagi mein. Aur ap aik bohat ache insaan mehsoos hote hain, doosron ke liye apne dil mein dard rakhne waale" Use jaise foran hi ahsaas hua ke woh aas ki aakhri dor ko bhi apne haath se chootne nahi de sakti. Is mayoosi mein kisi se kuch pal ko dost samajh kar baat kar lena us ki zindagi se mayoosi aur bezaari khatam to nahi kar sakti thi magar kuch pal ko, mita zaroor sakti thi.
"Ap ko kaise pata ke mein doosron ke liye apne dil mein dard rakhta hun?" Us ne muskura kar jawaban kuch shokhi se poocha. Fizaa ko halka karna chaha jo dono taraf hi Purvi ki baaton ke zeere asar kuch kuch bhaari ho gayi thi.
"Acha sawaal kiya hai ap ne. Nafsiyaat meri zindagi mein aik aham subject reh chuka hai. Ap ki baaton, ap ke lehje se andaaza lagaya hai. Aur aise bhi ke ap ne mere liye mera dard baatne ki koshish ki, mera dil halka karne ki koshish ki" Purvi apni nafsiyaat ki classes yaad karte hue muskura di. Agar koi use is pal dekh leta to shayad yaqeen kar leta ke us pal us mein puraani waali Purvi ki jhalak thi jo hansti bhi thi, khilti bhi thi, muskura ke baatein karti thi.
"Are wah, kaisa acha ittefaq hai. Nafsiyaat mera bhi favourite subject hai. Mujhe bohat pasand hai nafsiyaat pe baat karna. Aur yeh aik bohat dilchasp subject hai, mushkil bhi hai kyunke lehjon ko samajhna koi asaan baat nahi. Hazaar maani chupe hote hain aik andaaz mein, aik lehje mein. Aur kehne waala kya kehna chahta hai is ko ache se sirf nafsiyaat parhne waale hi samajh sakte hain" Abhijeet ko hairangi aur khushi hui yeh sun kar ke jis nayi dost ke woh itne qareeb ho gaya hai us ke shoq bhi Abhijeet jaise hain aur andaaz bhi. Bas halaat hi mukhtalif hain. Baaki to kuch bhi mukhtalif nahi hai.
"Acha jaise mein ap ke lehje se samajh gayi hun ke ap ko nafsiyaat sacchi mein bohat pasand hai" Purvi is baar dil se muskurayi thi. Yeh khayaal ke koi us pe taras nahi kha raha, us se sirf chand palon ki hamdardi nahi jata raha balke us se aik dost ki tarhaan baatein kar raha hai, us ki tanhaiyaan baant raha hai sohaan e rooh tha.
"Are, yeh to meine khudi kaha hai ke mujhe nafsiyat pasand hai bohat. Bhala is mein samajhne waali aisi kya baat hai" Abhijeet masnooyi naraazgi jata kar bolta hai.
"Samajhne waali baat to hai na. Aksar hi larke khamakhaw ka impression daalne ke liye larkiyon ke saath haan mein haan mila dete hain halanke woh sab jhoot hota hai" Aaj bohat dinon baad woh aik aisi larki ki tarhan baat kar rahi thi jo har gali muhalle mein hansti khilkhilaati hui paayi jaati hain. Kisi ke do meethe bol us ko bhula gaye the ke us ke saath kya hua tha 2 mahine pehle. Accident ke baad woh na sirf jismaani balke zehni mareez bhi ban gayi thi magar is pal use laga ke us ka zehan un saari mayoosi bhari baaton se paak ho gaya hai.
"Are to kya ap ko lagta hai ke mein aise hi keh raha tha ke mujhe nafsiyaat pasand hai. Mein doosre larkon se bohat mukhtalif hun. Mujhe waqayi nafsiyaat bohat pasand hai" Us ne jaise roothne ki koshish ki. Jataane ki koshish ki ke woh bohat mukhtalif hai.
"Are to meine kab kaha hai ke ap jhoot bol rahe hain. Isi liye to kaha tha ke samajh gayi hun ke ap waqayi sach keh rahe hain. Ap ki baaton mein nafsiyaat ki jhalak aati hai. Ap ki sacchayi saabit karna kuch itna mushkil to nahi" Woh khilkhila kar hans di. Aise itne dinon baad woh hansi to shayad andar tak rooh ko sukoon mil gaya. Kamre ki fizaa jis ne ab mustaqil sanjeedgi ke parde ourh liye the is hansi ke jaltarang se khul si gayi thi jaise aik khirki khul gayi ho jahan se taaza thandi hawaa andar a rahi ho. Mahol ko khushgawar bana rahi ho.
"Kitne dinon baad hansi hain ap?" Abhijeet ne aik udaas muskurahat ke saath poocha.
"Kyun aise sawaal poochte hain jin se mera dil ghabrane aur digmagaane lagta hai" Purvi ki aankhon mein dard a samoya tha. Use yaad a gaya tha ke yeh chehra to khilkhilaana hi kab ka bhool chuka tha. Ab to sirf udaasi, mayoosi, bezaari, bebasi, aur lachaari hi is ka muqaddar reh gayi thi.
"Is liye poochta hun taake ap ko apni udaasi, apne dukhon ko shikast dena a jaye. Unhe saamne rakh ke unhe duthkar sakein. Kyunke unki ap ki zindagi mein koi zaroorat nahi" Abhijeet sakht aur atal lehje mein bolta hai. Woh chahta tha ke Purvi ko jo bhi dukh hai woh us ko saamne rakh ke us se nikalne ki koshish kare. Kyunke faraar koi hal nahi.
To Be Continued