Dard Ka Naam Ishq
Chapter 17
Flashback Series Part 9
"Is liye poochta hun taake ap ko apni udaasi, apne dukhon ko shikast dena a jaye. Unhe saamne rakh ke unhe duthkar sakein. Kyunke unki ap ki zindagi mein koi zaroorat nahi" Abhijeet sakht aur atal lehje mein bolta hai. Woh chahta tha ke Purvi ko jo bhi dukh hai woh us ko saamne rakh ke us se nikalne ki koshish kare. Kyunke faraar koi hal nahi."Kehna bohat asaan hai aur karna bohat mushkil" Purvi mayoosi se boli.
"Yahi..yahi mayoosi ki baatein hi to nahi karni hoti hain. Khush raha karo. Agar zindagi ap ko dukhi hone ke so bahaane de to ap dikha do zindagi ko ke haan mere paas bhi khush rehne ke so bahaane hain" Abhijeet ne phone ke paar Purvi ko naseehat karne ki koshish ki.
"Mein khush rehne ki adakaari nahi kar sakti. Yeh to mujhe aur bhi khokla bana dega. Mere paas koi khushi nahi hai is liye kis naam se khushi manaun. Thak gayi hun mein yeh naseehatein sunte sunte. Log khushiyan de nahi sakte magar un ke paas aik hi naseehat hoti hai ke khush raho. Ab ap bhi aisi hi baatein kar rahe hain" Woh sipaat lehje mein boli to Abhijeet ko ahsaas hua ke shayad woh waqaie theek keh rahi hai. Us ko khushiyon ki naseehat karne ki bijaaye us ke waqt ko baant kar use khushi dena zyaada behtar hai.
"Theek keh rahi hain ap Geet. Chalein is sab ko chodiye, kuch bataiye mujhe apne baare mein. Mein apni dost ko janna chahta hun" Abhijeet ne asaani se mozoo ka rukh palat diya aur mahol se woh dukh, woh bebasi, woh dard kahin chala gaya kuch pal ko. Zindagi ne Purvi ko aik nayi lay dikhayi. Ab us ke paas aik aisa dost tha jo use kisi bhi tareeqe se use judge nahi karne wala tha. Koi aik aisa dost jo sirf us se hamdardi na kare balke us ke dukh aur us ki khushiyon ko mil kar baante.
"Zyaada kuch bataane ko hai nahi. Meri zindagi mein kuch aisa khaas jo nahi. Ap pooch lijiye kuch, mein bata dun gi" Purvi boli yeh sochte hue ke us ke liye kya batana sahi rahe ga aur kya batana ghalat rahe ga. Geet ki wajah se woh apne is mukhlis dost ke saamne sahi se khul bhi nahi pa rahi thi.
"Mujhe bhi lagta hai ke meri zindagi mein kuch bhi khaas nahi hai magar kisi ne mujhe ahsaas dilaaya ke Khuda ne hum sab ko hi kisi maksad ke tahat paida kiya hai aur kuch to khaas hoga us maqsad mein jo humein poora karna hai apni zindagi mein. Shayad woh maqsad abhi hamaari aankhon ke aage dhundlaya hua ho magar aik din woh wazeh ho jaaye ga. Isi liye meri khaas dost, apne ap ko itna mamooli samajhna chod do" Abhijeet ko woh bhooli basri yaad ayi jis pe us ne kabhi zyaada ghor na kiya tha magar is pal woh baat use bohat pur maani lagi.
"Agar ap sach keh rahe hain to mein kar leti hun us maqsad ke wazeh hone ka intezaar. Meri zindagi mein agar intezaar karna hi likha hai to mein kar leti hun intezaar, intezaar us maqsad ka, intezaar un khushiyon ka jo mere naseeb mein likhi gayi hain" Abhijeet ki baat se Purvi ko hosla milta hai. Woh udaas muskurahat chehre pe liye boli.
"Acha bataiye, ap ke ghar mein kon kon rehta hai?" Abhijeet ki aik nayi guftagoo ki shuruwaat ki. Woh apni is dost ko janna chahta tha.
"Mere ghar mein mere aur meri behan ke ilawa koi nahi rehta" Purvi aik gehri saans le kar Abhijeet ko batati hai.
"Ap ke maa baap?" Abhijeet ne chounk ke poocha.
"Ab is duniya mein nahi rahe. Chand mahine pehle hi un ka intiqaal ho gaya tha" Purvi ki aankhon mein aansoo a gaye apne maa baap ko yaad kar ke. Agar woh aj zinda hote to Purvi ko yun andheron mein doobne na dete. Use bacha lete in andheron se jahan khamoshi, bebasi, lachari ke siwaye kuch nahi paya jata.
"Mujhe bohat dukh hua sun kar. Khuda ap ko sabar de" Abhijeet ne dukh ka izhaar kiya. Doosri taraf Purvi ki awaaz dhay si gayi thi.
"Aur ap ke ghar mein kon kon rehta hai Abhijeet?" Purvi ne rasmi tor pe poocha.
"Mein akela rehta hun apne ghar mein mulaazimon ko shumaar agar na karein to" Woh khokli hansi ke saath bola tha. Akela pan kabhi kabhi bohat bechain kar deta tha magar us ne seekh liya tha ke yeh akelapan kaise door karna hai.
"Ap akele kyun rehte hain? Ap ke ghar waale nahi rehte kya saath?" Purvi ne chounk kar poocha.
"Ap ki tarhan mere maa baap bhi ab is duniya mein nahi rahe. Behan bhai koi hai hi nahi mera. Bas yahi hai zindagi meri" Abhijeet udaasi se bola. Us ne ab maa baap ke beghair rehne ki aadat khud ko daal li thi magar sach to yeh tha ke aj us ke woh zakham taaza ho gaye the. Purvi ki udaasi use bhi udaas kar rahi thi aur phir apne maa baap ke ziqar pe woh udaas kese na hota.
"Mujhe bohat afsos hua ap ke maa baap ki maut ke baare mein sun ke. Mein samajh sakti hun maa baap ko khone ka matlab" Purvi ko dukh mehsoos hua yeh sun kar. Abhijeet ke paas to woh rishta bhi na tha jo Purvi ke paas tha. Abhijeet ke maa baap ka sun kar use apne maa baap aur bhi shiddat se yaad aye.
"Chalein, mein ap se phir baad mein baat karun ga. Mujhe university jana hai. Apna khayal rakhiye ga" Abhijeet ne phone rakhne se pehle kaha aur saath mein hi use apna khayal rakhne ki bhi tanqeed ki kyunke woh jaanta tha aise logon ko kisi ke pyaar, kisi ki qadar ki kitni zaroorat hoti hai.
"Ap bhi apna khayaal rakhiye ga" Purvi ki zubaan se beikhtiyaar hi bila iraada hi yeh nikal gaya. Use ahsaas bhi na ho paya ke yeh sirf koi rasmi jumla nahi tha balke dil se nikla hua khuloos se bhara jumla tha.
Geet Purvi ke kamre ke darwaazeke paar khadi Purvi ki phone pe ki gayi baatein kab se khadi sun rahi thi. Us ke chehre pe aik chamkeeli muskurahat a gayi apni jeet ke qareeb aane ke baare mein soch kar.
To Be Continued