Dard Ka Naam Ishq

Chapter 18

Flashback Series Part 10

Vishal, Rohan aur Raj university ke aik kone mein bethe hue Abhijeet ka intezaar kar rahe the. Tabhi unhe Abhijeet aata hua nazar aaya. Woh un ke qareeb hi a ke un ki tarhan khud bhi beth gaya.

"Kitni dair laga di tum ne Abhijeet. Hum kab se tumhara intezaar kar rahe the. Kahan reh gaye the" Vishal bola. Un chaaron doston mein Vishal hi sab se zyaada awaaragard tha aur bolta bhi bohat tha.

"Class mein professor sahab ne lecture kuch zyaada hi lamba kar diya tha is liye aate aate dair ho gayi, magar itne ahtemaam se mera intezaar kyun ho raha hai?" Abhijeet ne apne dair se aane ki tawajeeh di aur phir hanste hue dostana andaaz mein bola.

"Woh is liye ke aaj hamaara bahir jaane ka plan hai. Kab se tumhara intizaar kar rahe the ke kab tum ao ge aur kab hum kahin bahar ja payenge. Ab, batao, kahan jayein?" Vishal ne tawajeeh di.

"Tum log mere begair bhi ja sakte the" Abhijeet shareer andaaz mein tang karne ke liye bola.

"Han, tumhare begair to ja sakte the, magar tumhari gaadi ke begair to nahi ja sakte the na" Vishal ne shareer andaaz mein Abhijeet ko aankh maari. Rohan aur Raj dil hi dil mein hans rahe the. Abhijeet ka mun khula ka khula reh gaya.

"Kya…? Kya matlab.. Bohat kamine ho tum log. Yeh lo chaabi aur dafa ho jao" Abhijeet masnoyi roothe andaaz mein bola. Woh jaanta tha ke is us ke doston ko aisi be tukki baatein aur aise mazaaq karne ki aadat hai.

"Ab aisa bhi nahi hai. Tumhe bhi hamare saath aana chahiye. Yeh chaabi tumhare bina achi nahi lage gi" Rohan ne dostana andaaz mein Abhijeet ko halke se gale se lag kar kaha.

"Mere bina jaa kar to dikhaate. Pooch leta mein. Chalo ab" Abhijeet muskura ke un ki chutayi karne ki koshish karta hai. Na jaane woh kyun itna muskura raha tha, kya woh muskurana be wajah tha? Ya phir kya us ki koi wajah bhi thi kya?

"Abhijeet, itni jaldi wapas aane ki kya zaroorat thi. Abhi ghante tak hum mein se kisi ki bhi koi class nahi hai" Vishal in sab mein sab se zyaada shokha aur nakhreela tha. Janaab ke mizaaj hi nahi milte the. Halanke bohat hi mamooli gharaane se taaluq tha. Abhijeet ke kehne pe woh sab jaldi wapas a gaye the aur Vishal is baat pe sab se zyaada naraaz aur rootha rootha tha.

"Yaar, mere dimaag se na bilkul hi nikal gaya tha. Mein apni angrezi ki assignment karna hi bhool gaya. Class shuru hone mein sirf ghanta reh gaya hai. Mujhe jaldi jaldi yeh assignment banani hogi" Jab woh log bahar phir rahe the to Abhijeet ko achanak hi yaad aaya ke woh to apni assignment hi karna bhool gaya hai aur woh kyun bhool gaya tha? Pata nahi kyun. Woh to apni parhayi ko le kar bohat janooni tha. Kitaabi keera bhi kehna harj na hoga. Phir kal aisa kya ho gaya tha ke woh sab bhool gaya. Woh wajah kya thi. Pata nahi kya thi woh wajah. Magar phir use woh wajah mil gayi. Us ke baare mein sochte sochte use kuch yaad hi na raha tha. Woh apne ghar mein tanha rehta tha aur tanha ghar mein koi rok tok nahi hoti. Na hi koi halchal hoti hai. Aur jab aik dam hi koi chaa jaaye to woh tanhaayi baaki sab kuch bhula deti hai.

"Yeh kaise ho sakta hai? Tum apni assignment karna kaise bhool gaye. Aisa kya hua tha kal?" Raj ne tashweesh ka izhaar kiya. Yeh mamool ke mutaabiq na tha. Vishaal aur Rohan ko bhi Abhijeet ki baat pe hairat hui. Raj ko maamle mein koi garbar dikhi to us ne apna tajasus lafzon mein tabdeel kar diya.

"Kal kya hona tha? Matlab kya hai tumhara? Kuch bhi nahi hua" Abhijeet garbara kar bola. Abhijeet ne apni sharmeeli muskurahat chehre pe haath phair kar laakh chupaani chaahi magar un kameenon ko us muskurahat ki jhalak dikh hi gayi thi.

"Tum muskura kyun rahe ho? Koi to wajah zaroor hai" Vishaal ne Abhijeet ke chehre par phaile taasurat ka tajziya karne ki koshish karte hue jasoosana andaaz mein poocha.

"Are kuch bhi nahi hua. Kyun peeche par gaye ho. Mujhe apni assignment khatam karni hai aur tum log yahan mujh se fazool aur betukke sawaal pooch rahe ho. Chalo library mein" Is baar Abhijeet ne apne chehre se koi taasurat zaahir na hone diya aur jhunjhala kar un teenon ka intezaar kiye beghair hi library mein ghus gaya. Woh teenon bhi darwaaza khol kar peeche peeche a gaye.

Geet ki class khatam hui to woh baahar nikal aayi. Woh Abhijeet ke baare mein soch rahi thi. Us ne kabhi Abhijeet se baat na ki thi magar use dekh kar to koi bhi pasand kar le to woh kyun na karti. Jab Nisha ne us se shart lagayi thi to woh sirf shart ke liye khail rahi thi magar Abhijeet ko dekh kar is shart mein us ke jazbaat bhi shaamil ho gaye the. Aik ahsaas bartari ka bhi tha ke woh larka jis pe poore college ki larkiyan marti theen agar us ka ho gaya to kya woh bada bada sa mehsoos na kare gi. Pehle se zyaada taqatwar.

Chalte chalte woh library ki taraf a gayi. Library ki sheeshon ki diwaar ke paar use Abhijeet apne doston ke saath betha nazar aaya. Woh betha hua shayad university ki koi assignment bana raha tha aur us ke baaki teenon dost bethe hue apni taraf se sargoshiyon mein baat kar rahe the ke Abhijeet beghair kisi shor ke apna kaam kar sake. Magar unhe nahi maloom tha ke un ki sargoshiyan bhi kaafi oonchi theen. Geet ne muskura kar Abhijeet ko sheeshe ke paar dekha. Dil to kiya ke is sheeshe ki diwaar ko paar kar jaaye magar dil ki har baat maani nahi ja sakti. Dil jaldi ke laalach mein thode pe raazi ho jaata hai magar dimaag zyaada ke lalach ke liye intezaar kar leta hai. Aur us ne intezaar karna zyaada munasib samjha.

Abhi Geet ki aankhein anokhi chamak liye use hi tak rahi theen ke use apne peeche kisi ki mojoodgi ka ahsaas hua. Us ne mur ke dekha to use Nisha nazar aayi. Woh Geet ko bohat ghor se dekh rahi thi.

"Tum kab aayi?" Geet ne Nisha ki taraf mur kar us ki aankhon mein aankhein daal kar poocha.

"Jab tum Abhijeet ko dekhne mein masroof thi. Correction to be made. Dekhne nahi takne mein masroof thi" Nisha hans kar boli. Us ki hansi mein tanz ka teer chupa tha aur Geet ko teer pehchaanne aate the.

"Tumhe kya koi masla hai?" Geet ne tanak ke poocha.

"Mujhe kya masla hona hai. Mujhe to koi bhi masla nahi hai. Mein to tumhe dekh rahi hun. Shart liye hue paanch din guzar gaye hain aur tum ab bhi use sirf chup chup ke dekh rahi ho. Maan lo ke tum se nahi ho paye ga. Yeh ghalat fehmi mat paalo ke woh tumhe pasand kar le ga. Woh tumhe kabhi bhi pasand nahi kare ga. Tum se behtar larkiyon ko woh saaf mun pe inkaar kar chuka hai. Meri maano to haar maan lo. Abhi bhi waqt hai. Meri taraf se shart ke pachaas hazaar maaf" Lag hi nahi raha tha ke kuch din pehle tak yeh donon larkiyaan dost theen. Magar yahan dostiyan shayad palon ke liye hi hoti hain aur sirf apne matlab ke garz ke liye hoti hain. Jab dushmani pe utarne ka dil kiya to dushmani pe utar aaye. Kyunke dost to woh kabhi the hi nahi. Dost to dilon se bante hain.

"Bakwaas band karo Nisha. Tum jaanti ho ke mujhe haarne se nafrat hai. Mein kabhi bhi haar nahi manun gi. Aur tum na mere baare mein fikar karna chod do. Sirf paanch din hi hue hain. Abhi bhi poore 25 din baaki hain. Aur mein jaanti hun ke mujhe kya karna hai magar mein tumhe batana zaroori nahi samajhti. Tum bas dekhti jao" Geet ko bhi Nisha ki chubti baaton se shadeed ghussa a gaya. Nisha us ki casual friend se zyaada na thi jis se woh kabhi kabar gossip ke khatir baatein kar liya karti thi. Us ka dil to kiya ke Nisha ke mun pe aik zor ka mukka maare magar bas sabar kar ke reh gayi. Woh koi tamasha nahi banana chahti thi. Isi liye Nisha ke chubte ilfaaz use hi wapas kar diye.

Nisha mun bana kar wahan se chali gayi. Abhi woh yahan se jaane ka faisla hi kar rahi thi ke use Abhijeet aur us ke dost library ka darwaaza khol ke baahar aate hue dikhe. Abhijeet us ke bilkul qareeb se guzar gaya magar us ne to shayad Geet pe aik nazar daalna bhi gawaara na kiya. Geet ne mud kar use jaate dekha. Us ke chehre pe udaasi chaa gayi.

To Be Continued

how was it? Plz review and tell. thank you.