Dard Ka Naam Ishq

Chapter 20

Flashback Series Part 12

Darkhaast

Abhijeet, Raj, Vishal aur Rohan university ki canteen mein bethe hue samoson aur pakoron se lutf utha rahe the. Khaane peene ke doraan halki phulki baat cheet aur gappe bhi chal rahi theen.

"Mera to pait hi nahi bhar raha" Rohan apni ungliyaan chaatate hue bola. Aik samosa abhi bhi us ke mun mein tha.

"Kabhi bhara bhi hai?" Vishal hanste hue sawaal karta hai.

"Pait to bhar jaata hai tumhara lekin dil nahi bharta" Raj ne bhi mazaaq uraaya tha. Woh teenon hi baatein kar rahe the, magar Abhijeet zyaada tar khamosh hi tha. Pata nahi kis soch mein tha. Teenon doston ne kuch dair tak to is baat ko mamooli samajh kar ignore kar diya. Magar phir tajassus ka izhaar kiya.

"Kin sochon mein gum ho?" Vishal ne halke se Abhijeet ke chehre ke saamne haath hilaaya to Abhijeet ki woh halki si muskurahat simat gayi aur us ne chounk ke Vishal ko dekha.

"Kya matlab? Kahin bhi nahi" Abhijeet garbarate hue bola tha.

"To phir itne chup chup kyun ho?" Vishal ke sawaal the ke khatam hone ka naam hi na lete the. Woh aik baar agar kisi cheez ke peeche par jaaye, to phir mushkil se hi peecha chodta tha.

"Khaane ke doraan baatein karna sehat ke liye acha nahi hota. Mein tum teenon ki tarhan duffer nahi hun. Mujhe apni sehat ka poora poora khayaal hai" Abhijeet ne Vishal ko aankhein dikhayein aur saath hi saath un teenon pe tanz ka teer bhi phainka.

"Yeh sehat ka khayaal tumhe aaj hi aaya hai kya? Aj se pehle to kabhi nahi aaya" Vishal ne us pe waar kiya. Use us ki pichli harkatein yaad dilaana chaahein. Vishal ko sab yaad rehta tha. Kaise kisi baat ko doosre ke khilaaf istemaal karna hai.

"Fazool baatein karne mein to PHD ki hui hai tum ne" Abhijeet ne us ki baat ka asar zaail karne ki koshish ki. Vishal ne us ki baat pe aik zor ka kehkaha lagaya tha.

"Koi shak" Vishal yun bola jaise Abhijeet ne us ki tareef ki ho ya phir us ki koi khoobi beyaan ki ho.

"Sharam karo kuch" Abhijeet hanste hue bola. Raj aur Rohan bhi hans diye.

Kuch dair tak woh yunhi baatein karte rahe. Ya phir Abhijeet ke mutaabiq bakwaas karte rahe. Woh teenon hi dost bakwaas ke shoqeen the. Magar Abhijeet bas yunhi kabhi kabhi shoq shoq mein un ki is bakwaas ka saath de deta tha ke chaara bhi to na tha koi. Abhijeet gair mehsoos andaaz mein thodi thodi dair baad apne mobile ki screen ko on kar ke kuch dekhne lagta tha. Kuch is tarah ke use khud bhi ahsaas na ho paya. Magar un kameene doston ka kya kiya jaaye jinhe har cheez ka ahsaas waqt se pehle ho jaata tha.

"Yeh tum apne phone ko baar baar on kar ke kya dekh rahe ho?" Vishal nazron ka taiz tha isi liye woh koi bhi gair mamooli cheez sab se pehle mehsoos kar leta tha.

"Kisi ke phone ka intezaar hai kya?" Vishal ka jumla mukammal hote hi Rohan ki bhi rag e tajassus pharak gayi. Abhijeet ne thoda garbada ke unhe dekha. Use to maloom bhi nahi tha ke woh gair mehsoos andaaz mein har do minute baad apne phone ki taraf lapak raha tha. Pata nahi, kon si tarap thi. Kya use waqaie kisi ke phone ka intizaar tha. Han, shayad yahi sach tha. Dimaag tha to sirf usi ki sehar angaiz awaaz ko baar baar dohra raha tha aur jab us ki awaaz us ke dimaag pe ghalib aati to jaise baaki saari awaazein dab si jaatein, madham si parh jaatein.

"Nahi to, mujhe to kisi ke bhi phone ka intizaar nahi hai. Tum kyun pooch rahe ho?" Abhijeet ne apni awaaz mein hairat ka ansar paida karne ki koshish ki.

"Nahi, woh tum baar baar apne phone ko dekh rahe the is liye.." Rohan dheemi awaaz mein bola magar abhi us ne apne jumle ka ikhtitaam bhi na kiya tha ke achanak hi waqaie Abhijeet ka phone baj utha. Teenon dost chounk ke apni kursiyon se zara oonche hue the magar jaise hi Abhijeet ki phone screen pe chamakte Geet ka naam Abhijeet ki nazron ke saamne aaya, us ne apne kisi bhi dost ki bhi nazar apne phone pe na parne dene ki poori koshish ki.

"Phone baj raha hai. Kon call kar raha hai? Utha lo" Vishal tanziya andaaz mein bola.

"Koi khaas nahi. Mein..mein zara call attend kar ke aaya..Tum log yahin rehna" Abhijeet ki awaaz mein jaldi thi. Use dar tha ke kahin Geet us ki taraf se mayoos ho kar call kaat hi na de. Us ka lehja aur us ke dil ki baat us ke lafzon ke bar aks tha. Magar woh abhi yeh baat manne ko shayad tayaar nahi tha ya phir apne doston pe koi taasur nahi daalna chahta tha.

Teenon hi doston ne us ke ooper aankhein ghumayein aur us ko jaldi mein uthte hue dekha. Woh wahan se dorta hua gaya tha. Teenon hi doston ne aik doosre ko achnabhe se dekha tha.

"Aakhir kis ka phone ho sakta hai? Kuch dekha kya?" Raj ne taajub se apne donon doston ki taraf dekha.

"Tum logon ki yaqeenan nazrein nahi pari hongi magar meri aankhein bohat taiz hain. Phone screen pe kisi larki ka naam chamak raha tha" Vishal ki baat sun kar Raj aur Rohan dono ki hi aankhein phail gayein. Unhon ne hairat se Vishal ko dekha jis ki aankhein chamak rahi theen.

"Kya waqaie?" Un dono ne hairat se Vishal ki taraf dekha jaise yaqeen karne mein mushkil paish a rahi ho.

"Han" Vishal fatehana muskurahat ke saath bola.

"Kya naam tha us larki ka?" Rohan ne apni hairat pe qaboo paate hue Vishal se tajasus ki binah pe poocha.

"Naam to mujhe sahi se yaad nahi. Shayad Geeta ya kuch aur. Kuch isi tarah ka naam tha" Vishal ke lafzon aur lehje mein mukammal aitemaad nahi tha.

Us ne dorte hue apne doston se kuch faasla rakhte hue bajte hue phone ko bil aakhir utha liya. Woh aik jaga deewaar ke saath lag ke khada ho gaya. Yeh jagah weeraan si thi. Is hisse mein zyaada logon ko guzar basar nahi hota tha. Yahan pe bheed hamesha hi kam hoti thi. Mahol pursakoon aur khushgawar hota tha. Use apne ap pe ghussa aya ke us ne Geet ko itna inteezar kyun karwaya. Woh kahin us se bhi mayoos na ho gayi ho. Aur woh nahi chahta tha ke woh us se mayoos ho. Kyunke..kyunke, sochte sochte hi us ke ilfaaz khatam ho gaye magar us ne apni un uljhi sochon ko jhatak kar phone utha liya.

"Hello Geet. Sorry, mene tumhara phone dair se uthaya" Use kabhi kisi larki ko to kam az kam wazahat dene ki zaroorat nahi thi padi thi magar aj is larki ko woh wazahat de raha tha jab ke shayad wazahat us se maangi bhi na gayi thi. Woh badal gaya tha. Is larki ne use badal diya tha.

"Abhijeet, mene ap se koi shikayat to nahi ki. Yeh ap ki marzi hai ke ap mera phone uthana bhi chahte hain ya nahi" Purvi dheere se muskurayi thi. Use acha laga tha Abhijeet ka andaaz. Woh us ki qadar kar raha tha. Us ka khayal rakh raha tha. Yeh aik ajeeb sa, anokha sa andaaz tha.

"Tum kar sakti ho shikayat" Abhijeet ki zubaan se beikhtiyaar hi nikla tha aur lehja to mohabbat se poor poor tha. Yeh aik maini khaiz andaaz tha jo Purvi ko choo ke mehsoos hua tha.

"Lekin kyun?" Purvi sab samajh ke bhi samajhna nahi chahti thi. Us ka dil zor se dharka tha.

"Tum dost ho meri aur dost aik doosre se shikwe gille kar sakte hain" Woh jo diwaar se taik lagaye khada tha yeh kehte hue yunhi zameen pe beth gaya jahan naram naram ghaas ugi hui thi.

"Shukriya mujhe yeh haq dene ke liye. Ap bohat ache dost hain" Purvi khule dil se muskurayi. Is mushkil waqt ki ghadi mein yeh khushi aik phuwaar ki si thi jo bohat achi aur meethi lag rahi thi.

"Geet, agar mein tum se aik darkhaast karun to kya poori karo gi?" Abhijeet ne aik dam se hi thoda sa bechain ho kar kaha. Awaaz mein halki si pareshaani jhalak rahi thi.

"Ap kahiye ap jo kehna chahte hain. Agar mere bas mein hua to zaroor poori karungi" Purvi dheeme lehje mein boli.

"Hamari dosti ko 10 din ho chuke hain. Mein apni dost ko dekhna chahta hun, woh kaisi dikhti hai, kaise dekhti hai, kaise chalti hai. Mein ap se milna chahta hun. Apni dost se milna chahta hun agar, agar ap ko aitraaz na ho" Us ne socha bhi nahi tha kuch pal pehle ke woh yeh kehne waala hai. Yeh to jaise khawahishaat aur jazbaat ne use pakar liya aur woh yeh intehayi jurrat ada kar gaya. Us ka dil bohat taizi se dharak raha tha. Kya kahe gi Geet. Kahin naraaz na ho jaaye, aur agar woh naraaz ho gayi to woh to us se phir kabhi baat bhi nahi kare gi. Aur phir woh kya kare ga. Us ne to use aj tak dekha bhi nahi. Magar ab to teer tarkash se nikal chuka tha. Ab waqt ne batana tha ke nishaane pe laga hai ya phir chouk gaya.

To Be Continued