Dard Ka Naam Ishq

Chapter 21

Flashback Series Part 13

"Yeh Geeta hai kon? Aur yeh gaya kahan hai? Kya woh yahan pe call attend nahi kar sakta tha?" Rohan ne tajasus ka izhaar karte hue Raj aur Vishal ki taraf dekha.

"Is sab ki aik hi wajah ho sakti hai" Vishal muskura kar bolte hue jumla adhoora chod deta hai.

"Kaisi wajah?" Raj ne aankhein uthaayein.

"Janaab ko pyaar ho gaya hai" Vishal shareer muskaan chehre pe sajaye dono ko dekhte hue bola.

"Aisa kaise ho sakta hai? Us ne aj tak kabhi kisi larki ki taraf dekha tak bhi nahi hai" Rohan ne Vishal ki baat ko jhatak diya.

"Isi baat ne hi to mere shak ko yaqeen mein badal daala hai. Chalo, zara dekh kar to ayein ke chup chup ke kya baatein ho rahi hain" Vishal ne pakke aitamaad se kaha tha. Jaise us ki baat ghalat hone ke aik feesad bhi chance na hon. Woh khada ho gaya. Us ke peeche peeche Rohan aur Raj bhi khade ho gaye. Woh teenon us taraf a gaye jahan Abhijeet un ke andaaze ke mutaabiq gaya tha.

Purvi ke haath se mobile taqreeban phisalne waala ho gaya tha. To kya yeh waqaie hone ja raha hai. Geet ki baatein sach hoti ja rahi hain. Woh ab khush hoye ya phir roye. Woh us se milna chahti thi magar chah ke bhi mil nahi sakti thi. Yeh dard ki aik alag manzil thi. Woh use dekhna chahti thi magar chah ke bhi dekh nahi sakti thi. Ab woh kya kare, qismat se kaise gila kare. Us ke dukh pehle kya kum the ke ab aik aur dukh, yeh ahsaas ke yeh silsila bohat jald toot jaaye ga use torne ke liye kaafi tha. Woh uska apna ho ke bhi uska apna na tha. Woh to Geet ka tha aur use Geet ka hi hona chahiye tha, us ka nahi. Us ki mulaqaat us se nahi, Geet se hi honi chahiye hai. Kyunke shayad haqeeqat maloom hone pe woh waise hi us se mun phair le to phir itni umeedein aur aas be wajah lagane ka faida bhi kya.

"Kya hua Geet? Ap kuch bol kyun nahi rahi hain? Meri baat..meri baat buri lagi hai kya ap ko?" Abhijeet ne jab doosri taraf lagataar gehri khamoshi mehsoos ki to bechaini se poocha. Dil seene mein zor zor se dharak raha tha. Na jaane woh jawaab mein kya kahe gi. Kya ab woh us ki awaaz kabhi nahi sune ga? Kya yeh silsila ab yunhi khatam ho jaaye ga? Agar aisa ho gaya to us ka kya hoga, us ke is dil ka kya hoga. Yeh kaisa ajeeb sa jazba tha jo dil mein pinap raha tha. Is jazbe ke aage aj tak koi sar nahi utha saka tha.

"Nahi. Mujhe ap ki baat buri nahi lagi hai. Mein bhi ap se milna chahti hun. Jis shakhs ne mujhe is ghair duniya mein apnaiyat ka ahsaas diya hai, us se milna to mein bhi apni khush qismati mehsoos karun gi" Us ki aankhon se na chahte hue bhi woh bedard qatre nikal aaye jinhon ne uski aankhon ko apna mustaqil maskin bana liya tha.

"Ap sach keh rahi hain?" Abhijeet beyaqeen se andaaz mein bola. Bolne se zyaada yeh aik madham si sargoshi thi ya phir jaise woh khud se pooch raha ho. Dil manne ko jaise tayaar na ho ya dil hairaan ho ke dil ne jo khushi chaahi thi woh use waqaie mil rahi thi.

"Han, mein sach keh rahi hun Abhijeet" Purvi ki awaaz madham si par gayi. Awaaz mein halki si udaasi bhi shaamil ho gayi. Magar Abhijeet to khushi se itna behaal tha ke yeh mehsoos hi nahi kar paaya ke doosri taraf koi kashmakash si hai, lafzon ke bar aks lehja aur awaaz kuch aur hi beyaan kar rahe the. Magar najaane yeh us ki khush qismati thi ya bad qismati ke woh yeh mehsoos hi na kar paaya. Nafsiyaat ka maahir dil ki bepanah khushi ke aage us lehje ki udaasi aur kashmakash ko bhaanp hi na saka. Is waqt aur kuch tha hi nahi us ke dimaag mein. Aakhir kaise jaan pata woh. Dil to achon achon ko dhair kar deta hai aur woh to aik kacha khiladi tha.

"Kahan aur kab milein gi ap mujhe" Abhijeet dil e beqaraar ke haathon majboor ho kar sab jaan lena chahta tha. Dil mein kayi sawaal the jo baar baar jawaab ke muntazir dikhayi dete the. Ab yeh dil in sawaalon ko aur daba nahi sakta tha. In baaton aur jazbon ko aur dil mein kisi kone mein chupa nahi sakta tha.

"Mein ap ko shalimaar baagh mein milun gi. Mein gulaabi kapre pehni hongi. Ap mujhe pehchaan lijiye ga. Kal shaam ko 6 baje. Us waqt zaada log nahi hote wahan. Ap mujhe asaani se pehchaan payein ge" Purvi ne woh sab dohraya jo Geet ne use pehle se hi bata diya tha. Jab bhi Abhijeet us se milne ki khawahish ka izhaar kare to kehna ke shalimaar bhaag mein gulaabi kapron mein shaam 6 baje milun gi. Geet ne use yeh sab itni baar yaad dilaaya tha ke bhoolne ki to soorat na thi magar us ne socha tha ke shayad is ki kabhi nobat hi nahi aaye gi. Bas woh do ajnabi yunhi hamesha ke liye apne ho ke bhi ajnabi bane rahein ge. Magar woh mod to hamesha aata hai jab ajnabi apne banne ke liye raaste dhoondte hain jo unhe ajnabi na rehne dein.

"Theek hai. Mein ap ko kaali shirt aur neeli jeans mein milun ga. Ap bhi mujhe pehchaan lijiye ga" Abhijeet jumle ke ikhtetaam pe ahista se hans diya. Khushi be panah thi, sambhale nahi sambhal pa rahi thi.

"Ap ne agar mujhe na bhi pehchana to bhi mein ap ko zaroor pehchaan lun gi. Is liye is ki to fikar bhi mat kijiye" Us ne yeh jumla jaan boojh ke kaha kyunke woh jaanti thi ke Geet ne Abhijeet ko dekha hua hai aur woh yaqeenan use foran se hi pehchaan le gi.

"Theek hai phir Alvida, kal hogi mulaqaat" Purvi bamushkil hi apne honton pe muskurahat le a saki.

"Alvida phir milne ke liye" Abhijeet chehre pe gehri muskurahat sajaye bola. Doosri taraf call kaat di gayi thi. Us ne ghor na kiya aur kal ke baare mein sochne laga. Us ne socha ke kya woh aj se pehle bhi kabhi itna khush hua tha. Shayad nahi. Yeh khushi bohat mukhtalif thi. Bilkul nayi aur anokhi. Beinteha aur behad. Koi had, koi inteha nahi thi is khushi ki. Kabhi na khatam hone waali khushi. Magar khushi kab zyaada dair theharti hai. Yeh to sab khush fehmiyan hoti hain, sab dil ke khoobsurat jaal hote hain. Khushi kabhi thi bhi ya nahi, is pe bhi gumaan hone lagta hai.

"Woh to phone pe us larki ko keh raha tha ke woh us ki dost hai to pyaar beech mein kahan se a gaya? Tumhe shayad koi ghalat fehmi hui hai" Raj ne jhunjhala kar kaha. Rohan ne us ki baat pe sar haan mein hilaya. Woh dono hi Vishal ki baat manne ko tayaar nahi the. Woh teenon mukhtasar si guftagoo sunne ke baad wapas chale aaye the ke kahin Abhijeet unhe yun chup chup ke us ki baatein sunta hun dekh na le.

"Tum dono ne us ke ilfaaz sune magar us ka andaaz aur us ka lehja nahi suna" Vishal muskura kar bola.

"Kya waqaie?" Rohan hairat se bola.

"Han, jaise us ne kaha ke woh us se shikwa kar sakti hai, us andaaz mein to woh kabhi hum logon se bhi nahi bola. Halanke hum us ke waahid dost hain aj kal"

"Han, tum theek keh rahe ho. Ho sakta hai ke jo tum keh rahe ho woh waqaie sahi ho...Ohoo Abhijeet a raha hai" Raj aur Rohan bilaakhir kuch kuch samajhne ki koshish kar rahe the halanke yaqeen karna bohat mushkil tha. Abhijeet ko peeche ki taraf se aate dekh kar Rohan ne donon ko hi mutlaa kiya aur woh teenon hi seedhe ho kar beth gaye. Abhijeet un ke taqreeban bilkul qareeb a gaya to unhon ne Abhijeet ke chehre pe chaayi woh anokhi khoobsurat khushi mehsoos ki jo aj se pehle kabhi nahi dikhi thi. Ab to un dono ko bhi Vishal ki baat sacchi lagi. Yeh zinda dili, yeh khushi kisi aam si cheez ke liye to nahi ho sakti. Yeh to kuch bohat khaas tha. Us ke chehre pe muskurahat musalsal raqs kar rahi thi.

"A gaye tum? Kis ka phone tha?" Abhijeet wapis apni jagah pe a kar betha to Vishal ne use ghoorte hue us se sawaal kiya.

"Koi khaas nahi" Abhijeet ne taalne ki koshish ki warna us ka chehra to saaf saaf bata raha tha ke call karne waali dil ke kitne khaas hai.

"Mujhe kyun aisa lag raha hai jaise tum jhoot bol rahe ho?" Vishal ne Abhijeet ki aankhon mein jhaanka.

"Are nahi. Mein jhoot kyun bolunga. Aisa kuch bhi nahi hai" Abhijeet ne jaan boojh kar aankhein churayein.

"Bohat khush dikh rahe ho. Kya baat hai?" Vishal ne ab us ki is khushi aur chehre pe chamakti musalsal muskurahat ki taraf ishaara kiya.

"Khush aur mein? Nahi, aisi to koi baat nahi. Mein to hamesha ese hi mood mein hota hun" Abhijeet ne apni un teenon doston se nazrein churayein.

To Be Continued