Dard Ka Naam Ishq

Chapter 22

Flashback Series Part 14

Mulaqaat

Baahar sooraj nikla hua tha magar Purvi ka kamra andhair sa tha. Saari khirkiyaan aur parde band kar ke wahan din ki roshni mein bhi andhera sa chaa gaya tha. Woh apne bistar pe apna sar apne ghutnon pe rakh ke bethi hui thi. Dil bujha bujha sa tha. Wajah janne se woh qaasir thi ya phir shayad janna hi nahi chahti thi. Aik dam se hi kamre mein chanchanati roshni chamki thi, kamre ka darwaaza dheere se khula tha. Geet saamne hi neele shalwar qameez mein khadi thi.

"Kya hua hai tumhe? Itna andhera kyun karwaya hua hai kamre mein?" Geet ne shikwa karne waale andaaz mein kaha aur saath hi khirkiyon pe pade woh lambe lambe parde peeche hata diye aur khirkiyaan khol dein. Khirkiyon ke pat khulne se taaza taaza hawa ne kamre ka rukh kiya.

"Kuch nahi hua mujhe. Bas dil sa kar raha tha ke andhera sa kar lun" Purvi ne sar utha kar muskurane ki kamzor si koshish ki.

"Apna khayal rakha karo" Geet Purvi ke qareeb a kar us ke saath hi bistar pe beth gayi.

"Theek hai" Purvi ne dheemi awaaz mein kaha.

"Tumhe aik baat batani thi" Purvi ne Geet ki taraf dekh kar sanjeeda andaaz mein kehna shuru kiya.

"Han, kaho. Kya baat hai?" Geet ne poocha.

"Abhijeet tum se milna chahta hai" Purvi ne bilaakhir woh baat keh di. Geet ke chehre ke taasurat pal mein badle the.

"Kya, waqaie? Tum sach bol rahi ho?" Geet khushi se chillayi thi. Woh jaanti thi ke woh jo thaan le phir to woh kar ke hi rehti hai. Magar is baar baat kuch alag thi. Use umeed zaroor thi magar kaam itni jaldi ban jaaye ga is ki umeed nahi thi.

"Han Geet, mein sach bol rahi hun" Purvi zara si muskurahat apne chehre pe saja kar bolti hai.

"Phir tum ne kya kaha Purvi?"

"Wohi jo tum ne mujhe kaha tha" Purvi ne use yaad dilaane ki koshish ki ke woh kitni baar use yaad dehaani kara chuki thi.

"Kaafi achi yaadasht hai tumhari. Acha, mein chalti hun. Zara tayaari kar lun na" Geet ne us ki tareef bhi ki aur phir jaldi jaldi mein kuch bhi soche aur peeche dekhe beghair kamre se baahar nikalti chali gayi. Woh jab apne kamre mein a gayi to us ka dil beikhtiyaar hi jhoomne ko kiya. Aur dil ne kaha ke aakhir harj hi kya hai aur isi tarah woh apne qadmon pe jhoom gayi aasmaan ko choone ki khawahish mein. Jab jhoom jhoom ke thak gayi to bistar pe beth gayi aur phir kal ki tayaari ke baare mein sochne lagi.

Woh is waqt university ke aik kone mein akeli khamosh si sochon mein gum bethi thi. Aashir ki sochon mein. Meethi meethi sochon mein. Abhi 12 baje the. Pata nahi kab 6 bajein ge aur kab sirf wohi us ko nahi dekhe gi balke woh bhi us ko dekhe ga. Woh baar baar apni ghadi ki taraf dekh rahi thi. Dil bohat bechain tha. Dil mein hazaar sochein theen. Woh sab sochein jo Abhijeet ke gird ghoomti theen. Us ka dil kar raha tha ke woh yahan ghanton yunhi aise hi bethi rahe aur sirf aur Abhijeet ke baare mein sochti rahe. Aaj ki shaam yaadgaar hone waali thi.

Us se kuch hi door Abhijeet apne teenon doston ke saath betha hua tha. Woh khamosh tha. Magar yeh udaas khamoshi nahi thi balke yeh kahin khushi se kho jaane waali khamoshi thi. Woh baar baar apni ghadi ko dekh raha tha jo 12 se aage jaane ka naam hi nahi le rahi thi. Kab bajein ge 6 aakhir?

"Kis cheez ka intezaar hai? Kahin jaana hai kya?" Vishal ne bilaakhir us ki khamoshi torne ki koshish ki.

"Nahi to, mujhe..mujhe to kahin nahi jana. Tum kyun pooch rahe ho?" Yak dam se hi jab Vishal ne sawaal kiya to woh pal ko garbara gaya. Woh to kahin aur hi chala gaya tha, kisi aur hi duniya mein. Yahan ki hosh kise thi. Garbarahat mein us ke haath mein pakra hua phone neeche gir gaya jis ko uthaane ke liye woh neeche jhuka.

"Shukar hai kuch hua nahi" Raj ne phone ki taraf ishaara kiya jise khush qismati se girne se koi nuksaan nahi pohncha tha.

Geet chalte chalte us jagah ke qareeb pohanch gayi jidhar Abhijeet aur us ke dost bethe the. Chehre pe beikhtiyaar hi muskurahat a gayi aur woh wahin khadi aik pillar se taik lagaye use dekhti rahi. Ke achanak hi woh aur us ke dost apni jagah se uth gaye, woh pillar ke peeche chali gayi aur woh us ke bilkul qareeb se nikalta chala gaya.

Geet sheeshe ke saamne na jaane kab se khadi thi. Jab se university se wapas ghar pahunchi thi, tab hi se kabhi koi tayaari kar rahi thi to kabhi koi tayaari. Shaam ke 5 baj chuke the. Us ne aik aakhri baar sheeshe mein apne aks ko dekha. Us ne kaamdaar waala bharakta gulaabi rang ka suit pehna tha. Us ne apne baalon ko curl kar liya tha. Chehre pe gulaabi makeup kiya tha. Woh bohat khoobsurat dikh rahi thi. Aik aakhri nazar apne saraape pe daalti hui woh apne kamre se bahir nikal ayi. Phir kuch soch kar us ne Purvi ke kamre ka rukh kiya. Darwaaze ko dheere se dhakka dete hue woh andar daakhil ho gayi. Purvi mamool ke mutaabiq bistar se taik laga ke laiti hui thi.

"Kaisi lag rahi hun mein Purvi?" Geet ki chanakti awaaz Purvi ke kaanon mein goonji to us ne Geet ki taraf dheyaan diya. Geet is waqt intehayi khoobsurat dikh rahi thi. Us ne apni tayaari pe ahtamaam bhi to itna kiya tha ke khoobsurat dikhna to phir banta tha.

"Bohat khoobsurat lag rahi hai meri behan" Purvi apni behan ke liye muskurayi thi.

"Thank you Purvi" Geet ne Purvi ki aankhon mein jhaank ke kaha.

"Kis baat ka shukriya Geet?" Purvi ne apni nazrein churayein.

"Tum ne mere liye itna kuch kiya, is liye. Agar tum na hoti to aj yeh na ho pata, aur mein itni khush na hoti" Geet ne Purvi ke qareeb pohanch ke use dheere se gale laga liya.

"Tumhare liye nahi karti to aur kis ke liye karti" Purvi ki aankh se beikhtiyaar hi aik aanso ka qatra nikal aaya. Geet woh aansu na dekh payi kyunke Purvi ne Geet ko gale lagaya hua tha. Purvi ne bedardi se woh aansu apni narm ungliyon ki poron se poncha.

Shaam ke 5 baj gaye the. Abhijeet kabhi kuch dekh raha tha to kabhi kuch. Us ne kaali shirt aur neeli jeans pehan li theen. Saath mein us ne chamakte kaale boots pehne the. Baalon ko us ne gel laga kar achi tarah se set kiya tha. Saamne padi ghadi pe nazar padi to woh bhi apne baazu mein pehan li. Jab kuch samajh na aya ke aur kya tayaari kare to maiz pe padi perfume ki botal apne upar chirak di. Woh tayaar ho kar bahar nikal aaya to use us ka mulaazim Ram nazar aaya.

"Kahin ja rahe hain kya Abhijeet Bhaiya?" Ram ne Abhijeet ki tayaari pe ghor karte hue sawaaliya andaaz mein kaha.

"Han" Abhijeet ke chehre pe halki si muskurahat namoodaar hui thi jise us ne bamushkil dabaya hua tha.

"Lagta hai ke kisi khaas jagah pe ja rahe hain" Woh bahar nikalne hi waala tha ke Ram ki awaaz us ke kaanon mein goonji. Us ka dil chaha ke kahe ke jagah ka to pata nahi magar woh shakhs bohat khaas hai jis se woh milne ja raha hai. Woh dheere se palta aur Ram ki taraf muskurahat uchaalta hua wapas darwaze ki taraf palat gaya.

Aasmaan pe is waqt badal chaaye hue the. Sooraj badalon ke peeche chup sa gaya tha. Qareeb tha ke shayad baarish hoti, aasmaan ne khoob saman banaya tha aj aur Abhijeet ko lag raha tha ke us hi ke liye aj mosam itna acha aur suhaana hai, kyunke woh bohat khush tha. Us ne apni gaadi shalimaar baagh ke baahir khadi ki aur khud gaadi se utar ke andar chalta chala gaya. Baagh mein is waqt zyaada log nahi the, Geet ka andaaza sahi tha. Chand ikka dukke log hi kahin kahin nazar a rahe the. Us ka dil to har chehre ko jaanch raha tha aur pooch raha tha ke kya yeh Geet ho sakti hai. Har chehre mein woh us ko hi dhoond raha tha. Na jaane in mein se kon sa chehra us ka hai. Us ki ghadi 6 baja chuki thi aur dil be sabra hua ja raha tha.

Geet bhi apni gaadi se utarti hui theek 6 baje shalimaar baagh mein dakhil ho gayi. Yeh talaash taweel saabit na hui. Woh use kuch faasle pe hi kaali shirt aur neeli jeans mein nazar aaya. Woh bhi musalsal idhar udhar dekh raha tha. Us ko dekh kar us ke chehre pe beikhtiyaar hi muskurahat ayi.

"Abhijeet" Woh us ki taraf dekhte hue zor se pukaari.

"Geet?" Us ne us taraf dekha jahan se use woh pukaar sunayi di thi. Kuch faasle pe gulaabi kaamdaar jode mein aik khoobsurat larki khadi thi. Us ne sawaliya andaaz mein pukaara.

Woh taqreeban dorti hui us ke qareeb pahunch ke ruk gayi. Us ki aankhein chamakne lagi theen.

"Haan" Dorte dorte us ki saans phool gayi thi. Us ne pal ko gehri gehri saansein lete hue sar haan mein hilaaya aur saath hi dheemi si awaaz mein sargoshi ke andaaz mein boli.

To Be Continued