Dard Ka Naam Ishq

Chapter 24

Flashback Series Part 16

Sooraj ki taiz dhoop mein woh darakht aik saaya tha jis ke neeche Geet akeli bethi hui thi. Us ke chehre pe muskurahat aur khushi chaayi hui thi. Nisha ne use door se khushi mein dooba betha dekha to woh qareeb chali ayi.

"Bohat khush lag rahi ho" Nisha darakht ke saath taik laga kar boli.

"Han, khush to hun mein" Us ne jab apne kaanon mein Nisha ki awaaz suni to sar ooper kar ke ooper dekha jahan us ne Nisha ko paaya. Nisha ka saath dene ke liye woh bhi khadi ho gayi. Us ki aankhon mein jeet ki chamak thi.

"Woh kyun?" Nisha ne Geet ki aankhon mein dekh kar sawaal kiya.

"Aik minute, abhi dikhati hun" Woh jab mun khol kar muskurayi to us ke safaid chamkeele daant chamke the. Nisha ne ulajh ke Geet ki taraf dekha jo ke apne bag mein se apna phone nikaal kar kuch kar rahi thi.

"Yeh dekho" Geet ne Nisha ko apne phone ki screen ki taraf mutawaja kiya jahan par aik tasveer chamak rahi thi.

"Yeh..yeh to Abhijeet hai aur us ke saath..tum" Nisha hairaangi se kabhi tasveer ko dekhti to kabhi Geet ki taraf. Use is waqt ghusse se zyaada hairaangi thi. Woh soch rahi thi ke kya yeh sach hai.

"Yeh sach hai Nisha. Tum hallucinate nahi kar rahi ho" Geet tanziya muskurahat chehre pe sajaye boli.

"Mujhe yaqeen nahi a raha hai" Nisha ne beyaqeeni se aik baar phir tasveer ki taraf dekha.

"Behtar yahi hai meri jaan ke ab tum yaqeen kar lo, kyunke yahi sach hai aur sach karwa zaroor hota hai magar jhutlaya nahi ja sakta" Geet ke ang ang se jeet aur bartari ka ahsaas phoot raha tha. Us ke ilfaaz Nisha ko kisi teer ki hi tarah lage the, jese Geet chahti thi.

"Khair, yeh koi itni badi bhi baat nahi. Waise bhi challenge us ke saath tasveer khinchwaane ka nahi tha par use propose karne ka tha..is liye abhi zyaada khush mat ho kyunke sayaane kehte hain ke apni mutawaqa jeet ke nashe mein itna na beh jao ke faramoshi mein sar ke bal giro. Waise aik baat to batao, yeh tasveer university ki to nahi lag rahi, kya tum us se kahin bahar mili ho? Aur agar haan to kese?"

"Tum fikar na karo. Ye sirf shuruwaat thi. Aik trailer tha. Film to abhi baaki hai" Geet aik naaz se apne baalon ko jhatka de kar use tanziya andaaz mein jawaab deti hai.

"Dheyaan karna, tumhari film kahin flop na ho jaaye" Nisha hans kar mun tod jawaab Geet ke mun pe jawaban maarti hai.

"Mera naam Geet hai. Meine kabhi haarna nahi seekha. Samjhi tum?" Geet ghusse se kehti hai aur apna basta utha kar wahan Nisha ko peeche chod kar wahan se chali jaati hai.

Abhijeet university se thaka hara ghar wapas aya tha. Aj us ki classes bohat masroof gayi theen aur bohat sa aisa kaam tha jo mukammal karna tha. Use zyada kuch sochne ka mouqa hi na mila tha. Ghar mein dakhil ho kar woh living room ki taraf a gaya tha aur aik sofe pe beth gaya. Us ne kal ke baare mein socha. Kal woh us se mila tha magar na jaane use us se mil kar utni khushi kyun nahi hui thi jitni honi chahiye thi. Kya us ki saari tarap bekaar thi. Woh baar baar is baat ko jhatakne ki koshish kar raha tha magar dil mutmain nahi ho pa raha tha. Us ke paas dil halka karne ko kuch tha bhi to nahi. Apni tanhayi ka ahsaas aj se pehle kabhi itna nahi hua tha jitna in chand dinon mein hua tha aur woh bhi usi ki badolat, us ne us ke andar ko jaanch liya tha, us ko un baaton ka ahsaas dila diya tha jin ko woh shayad khud kabhi mehsoos na kar pata. Phir us ne socha ke shayad woh kuch zyaada hi soch raha hai aur phir dekhte hi dekhte us ki ungliyaan Geet ke naam ke number ko apne phone pe dial kar rahi theen. Thode se intezaar ke baad phone utha liya gaya tha.

"Hello"

"Abhijeet, ap?" Us ki awaaz sun kar doosri taraf Purvi ko sukoon mila tha. Woh us waqt tv lounge mein bethi hui thi jab us ka phone baja tha. Khush qismati se us ka phone us ke haath mein hi tha. Abhijeet ka naam screen pe chamakte dekha to dil ko qaraar sa aaya tha. Dil mein jo bechaini thi use chain mila tha. Pehle jab bhi Abhijeet ka phone aata tha to use khushi se zyaada ghabrahat hoti thi lekin jaise jaise din guzar rahe the, us ki yeh jhijak ahista ahista mit rahi thi. Bas kuch baaki reh gaya tha to woh qaraar, woh sukoon jo use Abhijeet se baat kar ke milta tha. Woh sukoon ki mutlaashi thi. Koi aisa din, koi aisi raat na thi jab woh besakoon na hoti thi magar jab se Abhijeet us ki zindagi mein aaya tha, sukoon ne bhi chupke se uski zindagi mein aik chor raasta dhoond liya tha aur woh sukoon ab use bohat azeez ho gaya tha.

"Han, mein" Us ki awaaz us ke kaanon mein goonji to us ne beikhtiyaar hi apni aankhein band kar lein ke woh shayad sirf us ki awaaz ko mehsoos karna chahta tha. Pata nahi, kaisa jaadu tha us ki awaaz mein ke dil us ki awaaz mein doob jana chahta tha.

"Kaise hain ap Abhijeet?" Woh dheere se muskura kar boli.

"Mein theek hun, tum kaisi ho?" Us ki aankhein ab bhi band theen.

"Mein khush hun. Pehli baar..pehli baar itne arse baad koi khushi mili hai mujhe. Yeh khushi chahe kuch waqt ke liye hi ho magar mere liye kaafi hai. Mere liye to yeh bhi bohat hai" Purvi ki aankhon se aansu qatra qatra behte ja rahe the magar pehli baar yeh khushi ke aansu the. Woh jaanti thi ke yeh khushi bhi adhoori hai. Magar dil to bacha hai na, khushi adhoori ho ya poori, khush hone ke bhi bahaane dhoond hi leta hai. Geet ki is baat ne use aik nayi khushi di thi ke us ke aur Abhijeet ke is taaluq ke abhi tootne ka waqt nahi aaya tha. Aur taaluq bhi woh jis ka koi naam nahi tha. Dil to chahta tha ke yeh taaluq kabhi na toote magar ab dil ki har baat to nahi maani jati na.

"Aisi kon si khushi mil gayi?" Abhijeet muskuraya tha. Us ki khushi ne use khush kar diya tha. Dil mein jo kuch dair pehle bechaini thi woh kisi dhuyein ki tarah gayab ho gayi thi. Kisi diwaar, kisi kone khudre se bahar nikal gayi thi ke ab to us ka nishaan bhi nahi bacha tha. Ab use kuch yaad reh gaya tha to woh thi Geet ki khushi jo ke use bohat azeez ho gayi thi. Itni azeez ke shayad woh khud bhi nahi janta tha. Baat ab dosti se aage nikalti ja rahi thi.

"Tum se milne ki khushi. Us se badi khushi nahi hai mere liye is jahan mein"

"Kya tumhe waqaie mujh se mil kar itni khushi hui hai? Lekin kyun. Mein to aik aam sa shakhs hun. Mujh mein to kuch bhi khaas nahi hai" Abhijeet hairaangi ka izhaar karte hue bola. Aj se pehle kabhi kisi ne use itna khaas mehsoos nahi karwaya tha. Aj tak jo bhi log use ahmiyat dete aaye the ya woh uske paison ki waja se use woh ahmiyat dete ya phir uski wajahat aur khoobru pan ki waja se. Aj se pehle kabhi kisi ne use apne aap mein khaas mehsoos nahi karwaya tha. Geet woh pehli larki thi jis ne us ki khoobiyon ki waja se use pasand kiya tha, na ke paison ya shakal ki wajah se.

"Tum kitne khaas ho ye shayad tum khud bhi nahi jaante. Magar tum khaas ho. Tum ne meri zindagi mein a kar meri zindagi badal di hai. Meri zindagi mein khushi ki aik phuwaar si phaila di hai jis ne har taraf rang hi rang phaila diye hain. Woh rang jo meri zindagi se mit gaye the. Un pe zang lag gaya tha. Woh rang wapas karne ke liye shukriya. Woh rang mujhe bohat azeez hain" Baat karte karte us ki aankhon se aansuon ki aik lakeer behti ja rahi thi. Pehli baar woh yun kisi ke saamne apna dil halka karne ko tayaar thi. Woh aj khul ke ro dena chahti thi. Hichkiyan le le kar rona chahti thi. Aik hi baar mein dil ke sab ghubaar nikaal dena chahti thi.

"Geet, please aise rona band karo. Kyunke tum ro gi to mein bhi ro dun ga" Us ki aankh se aik qatra baha tha. Us ne hansne ki koshish.

"Ap rote hue ache nahi lagenge" Purvi phone ke paar halka sa hansi thi. Us ke aansoun ko bundh mila tha.

"Tumhe meri fiqar hai magar apni fiqar nahi hai ke tum rote hue kese dikhogi aur khaas tor pe tumhari awaaz, woh to rote hue bilkul achi nahi lagti. Aise lagta hai jaise kisi ka sureela gana gaate hue gala kharaab ho gaya hai" Abhijeet kehkaha laga kar bola. Use laga tha ke un ki dosti ne use itna to haq de hi diya tha ke woh yun us se mazaaq kar sake. Us ko hansa sake.

"Ap bohat bure hain Abhijeet. Meri awaaz ka mazaq uda raha hain" Purvi ka chehra khil gaya tha. Taras gayi thi woh is hansi mazaaq ke liye. Woh rookhi pheeki si zindagi jee ke woh thak gayi thi. Use apne kamre mein taaza hawa ki ashad zaroorat thi aur lagta tha ke ab bilaakhir kamre ki woh khirki khul gayi thi jis pe taale lage hue the. Aur woh khirki kya khuli thi, taaza hawa ne us ka chehra taaza kar diya tha. Us ke jisam mein taazgi bhar di thi. Abhijeet se baat karti thi to bhool jati thi apni mehroomiyan, apne gham. Us ka taaza wajood us ke wajood mein bhi taazgi bhar deta tha.

"Acha to ab mein bura ho gaya. Abhi thodi dair pehle to mein bohat acha tha, bohat khaas tha aur mere jaisa to koi tha hi nahi" Abhijeet hans kar bola. Us ki hansi bohat khoobsurat thi. Abhijeet ka dil kiya ke woh hamesha hansti rahe. Us ki zindagi mein kabhi koi dukh na aaye. Woh use ab aik pal bhi udaas nahi dekhna chahta tha. Us ki zindagi khushiyon se bhar dena chahta tha. Jo udaasi us ki awaaz mein jhalakti thi, woh use bechain kar deti thi. Woh to us ki awaaz mein sirf hansi aur khushi ki jhil mil sunna chahta tha.

"Abhijeet, ap bhi na. Baat se baat nikaalna to khoob jaante hain ap" Abhijeet ne aik baar phir us ke honton pe muskurahat mehsoos ki thi. Us ki muskurahat use muskurane pe majboor kar deti thi.

"Acha, aik baat kahun?"

"Kahiye, ap ko ijaazat ki zaroorat thodi hai" Purvi ne aik dost hone ke naate kaha.

"Hum milein kal? Actually, tumhe dekhne ka dil kar raha hai. Us din mein sahi tarhan se tumhe apni nazron mein utaar hi nahi saka tha. Pata nahi kon si bechaini lagi hui thi. Magar mein jaanta hun ke woh bechaini koi maini nahi rakhti. Agar kuch maini rakhta hai to woh hai tumhari mojoodgi. Kal sahi se tum se koi baat bhi nahi kar paaya. Shayad beyaqeeni ne mera saath choda hi nahi tha. Tumhe zaroor yeh sab kuch mehsoos bhi hua hoga. I'm Sorry. Pata nahi mujhe kal kya ho gaya tha. Shayad tum se milne ki itni khushi thi ke woh khushi mujh se bardasht hi nahi ho rahi thi. Dil ajeeb wehmon mein mubtala kar raha tha" Abhijeet ko kal ki mulaqaat yaad ayi thi. Apne itne rookhe peekhe rawaiye pe dukh mehsoos hua tha. Us ka dil shayad sirf us ke saath khelne ki koshish kar raha tha aur woh apne dil ko yeh ijaazat nahi dega.

"Mein soch kar batati hun" Purvi ne us ki baat sun kar halka sa waqfa liya aur phir thodi sanjeedgi se boli.

"Is mein itna sochna kya? Tum kya mujh se milna nahi chahti? Kya tumhe mera chehra pasand nahi aaya"

"Mein chehre dekh ke dosti nahi karti. Aur rahi baat milne ki to tum se hi to milna chahti hun magar zaroori nahi hai ke dil ki har khawahish poori ho jaaye" Aakhri jumla us ne kho kar bola tha. Woh chand second ke liye bhool gayi thi ke woh apne ap se nahi, Abhijeet se baat kar rahi hai. Apne lafzon par jab ghor karne ka mouqa mila to tab bohat dair ho chuki thi. Lafz us ki zubaan se adaa hote hue Abhijeet ke kaanon mein goonj rahe the.

"Kya matlab?" Abhijeet ne chounk kar poocha. Woh aik dam se hi seedha ho kar beth gaya tha.

"Kuch nahi, mein mazaaq kar rahi thi. Sirf ap hi nahi, mein bhi kar sakti hun mazaaq" Purvi ne baat raffa dafa karne ki koshish ki.

"Bade jaanleva mazaaq karti ho tum" Woh hans kar bola.