Dard Ka Naam Ishq

Chapter 25

Flashback Series Part 17

Pyaar ka Ahsaas

Geet thaki hui university se wapas ghar ayi thi. Woh seedhi apne kamre mein ayi aur apna basta bistar pe phaink ke khud bhi bistar pe beth gayi. Kuch dair baad woh kamre se bahar nikli to lounge mein Purvi par nazar padi jis ke haath mein us ka phone tha aur chehre pe halki si muskaan. Geet chalte hue Purvi ke qareeb a kar sofe pe beth gayi.

"Kisi se baat kar rahi thi kya?" Geet ne Purvi ki taraf muskura kar dekha.

"Tum kab ayi Geet?" Purvi ne chounk kar Geet ki taraf dekha. Shayad woh us ki moujoodgi se bekhabar thi. Use to pata bhi nahi chala tha ke Geet kab us ke saath a kar beth gayi hai. Woh to bas ab Abhijeet ki sochon mein hi kho jati thi.

"Mein abhi kuch dair pehle hi ayi hun"

"Oh acha" Purvi us ki taraf dekh kar dheere se muskurati hai.

"Tum ne bataya nahi, tum baat kar rahi thi kya kisi se?" Geet ne apna sawaal dohraya jab use Purvi ki taraf se koi jawab na mila.

"Han, woh mein Abhijeet se baat kar rahi thi" Abhijeet ka naam lete hi us ke chehre pe chamkahat a gayi thi. Us ka chehra pehle ki tarah berang na raha tha.

"Abhijeet se. Kya kaha us ne?" Geet ne kal ki mulaqaat ko yaad karte hue kaha. Abhijeet ko itne qareeb se us ne kal se pehle nahi dekha tha aur qurbat mein to woh aur bhi jaanleva lagta tha.

"Us ne kaha ke woh mujh se milna chahta hai" Purvi ne khoye hue lehje mein bataya ya phir shayad khud se hi barbarayi.

"Kya? Waqaie? Mein jaanti thi ke woh meri khoobsurti dekh kar beqaraar ho jaaye ga. Meri qurbat ka khawahishmand ho ga" Geet hans kar boli aur saath hi apne lambe lambe baalon ko khoobsurti se lehraya jaise apni khoobsurti pe naaz kar rahi ho. Purvi ne Geet ki baat sun ke kuch bhi nahi kaha. Woh chup bethi rahi lekin shayad kisi soch mein thi.

"Phir kab milna hai aur kahan?" Purvi jab khamosh rahi to Geet ne bilaakhir pooch hi liya.

Abeera ne apni almaari se apna naya nikor joda nikaala jo us ne Abhijeet se dobara milne ke liye kharida tha. Sabz rang ka yeh embroidery waala three piece suit tha. Abhijeet ne aik restaurant mein milne ki khawahish zaahir ki thi jo ke yahan se 15 ya 20 minute ki hi drive pe tha. Woh apni gaadi mein bethi aur restaurant pahunchne par gaadi se bahar nikli aur restaurant ka darwaaza dakhailti hui andar dakhil ho gayi. Woh aik bohat hi khoobsurat aur mehnga restaurant lag raha tha. Woh yahan pehle kabhi nahi aayi thi. Aik maiz par use Abhijeet betha dikhayi diya. Us ne safaid shirt ke saath kaali jeans pehni hui theen. Use dakhil hota dekh kar woh us ke liye khada ho gaya tha. Geet sehal qadam chalte hue, muskurati hui us ke paas a gayi aur maiz ke gird doosri kursi ko ghaseet kar us pe beth gayi.

"Umeed hai ke meine ap ko zyada intezar nahi karwaya" Geet Abhijeet ki aankhon mein muskurate hue dekhti hai.

"Nahi, bilkul nahi. Ap bilkul waqt par hain" Abhijeet ne bhi muskurate hue jawab diya.

Waiter ke aane tak woh kuch sarsari si baatein karte rahe. Waiter aya to us ne order ke baare mein poocha.

"Kya khao gi tum Geet?" Abhijeet ne muskura kar Geet se poocha jo ke menu ko parh rahi thi. Menu mein aik se barh aik dishes ke naam the.

"Jo tum khao ge, mein bhi wohi khaun gi" Geet ne menu side pe rakha aur sharmeeli muskaan chehre pe saja kar Abhijeet se boli.

"Tum meri pasand ka khana khao gi?"

"Han, sirf dost kaha nahi hai, mana bhi hai aur dost ki pasand mein hi apni pasand bhi dhoondni chahiye. Aj mein tumhari pasand mein apni pasand dhoond leti hun, kal tum meri pasand mein apni pasand dhoond lena" Geet ne Abhijeet ko impress karne ki koshish ki.

"Kya baat kahi hai tum ne. Kitna hi acha ho ke duniya ke saare insaan aik doosre ki pasand mein hi apni pasand bhi dhoond lein. Kitni haseen ho jaaye gi na yeh zindagi aur yeh dunya" Abhijeet udaas muskurahat Geet pe uchaalte hue bola.

"Kaash magar afsos to yahi hai na ke yeh duniya kabhi in baaton ki parwa nahi karti" Geet woh baatein dohra rahi thi jo woh Purvi se seekh kar ayi thi Abhijeet ko mutawaja karne ke liye.

"Theek kehti ho tum. Duniya kisi ki fikar nahi karti. Aur shayad yeh bhi acha hai kyunke agar duniya waqaie itni khoobsurat hoti jis mein koi gham nahi, koi takleef nahi to phir wahan ahsaas bhi kahan baaki reh jata, aur ache logon ki qadar kahan reh jaati" Abhijeet ab alag nazariye se soch raha tha. Us ki aadat thi kabhi kisi andaaz se sochne ki to kabhi kisi andaaz se. Apne hi khayalon ko bhi muqaabla dene mein aik ajeeb sa maza aata tha. Woh har pal is duniya aur is ki qudrat aur fitrat ke baare mein zyaada jaane ka khawahishmand tha.

"Yeh banda kitni boring baatein karta hai. Koi pyaar ki baat bhi kar le" Geet zahir to yahi kar rahi thi ke woh Abhijeet ki har baat bohat ghor aur dilchaspi se sun rahi hai magar haqeeqat mein use in baaton mein aik feesad bhi dilchaspi nahi thi. Us ne boriyat se Abhijeet ki taraf dekh kar beikhtiyaar hi socha.

"Mujhe lagta hai ke ab hume aik doosre ke baare mein kuch baat karni chahiye" Geet mozooh badalne ki koshish karte hue boli.

"Kyun nahi, zaroor" Abhijeet ne kaha.

Usi doran mein waiter un ke liye khana le kar a gaya tha. Waiter ne saleeqe se khana serve kiya aur chalta bana. Abhijeet ne manchurian noodles aur fried rice mangwaye the.

"Is restaurant ka khana bohat acha hota hai. Tumhe zaroor pasand aye ga. Is restaurant ke manchurian noodles mere favourite hain"

"Ap ki pasand bhala kharaab kese ho sakti hai. Mein bhi to ap ki hi pasand hun na" Geet ne romaani andaaz apnaya tha.

"Han yeh to tum ne bilkul theek kaha. Meri pasand na bilkul top class hoti hai" Abhijeet hanste hue manchurian noodles ki aik bite leta hai.

Kuch din yunhi guzarte gaye. Abhijeet ka phone par Purvi se baat karna aik mamool ban gaya tha jab ke Geet se woh do ya teen se zyaada baar nahi mila tha. Use us se milne se zyaada us se phone pe baat karne ka ishteyaaq tha aur is ki wajah use bohat sochne par bhi samajh nahi aati thi. Woh nahi janta tha ke aisa aakhir kyun hai. Kon si baat us ke zehan se chut rahi hai. Magar jo bhi tha, us ki mohabbat kam hone ke bijaye barhti hi ja rahi thi aur us ko is baat ka ab ahsaas bhi ho gaya tha. Woh jaan gaya tha ke woh Purvi aka Geet se bepannah mohabbat karne laga hai. Ab sirf izhaar karne ki dair thi. Geet ka us se apni shakhsiyat chupana, baatein dil mein chupana bhi us ka ishq kam nahi kar paya. Us ka yaqeen tha ke janne ke liye to poori zindagi baaki hai. Woh jab batana chaahe gi to use bata degi. Magar jo bhi tha ab us ne faisla kar liya tha ke woh Geet pe apne dil ka haal ayaan kar de ga aur use na jaane kyun magar yaqeen tha ke Geet inkaar nahi kare gi. Us ki mohabbat ko apna le gi.

Woh is waqt uni ke cafe mein apne teenon doston Vishal, Raj, aur Rohan ke saath betha hua tha. Magar dil aur dimaag to us ka kahin aur hi tha.

"Yaar, hum kaafi din se dekh rahe hain ke tum na aj kal bohat khoye khoye rehte ho. Aj kal to tumhe parhayi ki bhi fikar nahi rahi jab ke final year ke exams dorte hue humare qareeb a rahe hain. Kahin kisi larki warki se pyaar to nahi ho gaya?" Vishal ne Raj aur Rohan ki taraf se bhi saath mein hi poocha. Us ke lehje mein shararat thi.

"Han, mujhe pyaar ho gaya hai" Abhijeet ke chehre pe gehri chamakti hui muskurahat ayi thi jab ke Vishal, Raj aur Rohan ke chehron pe hairaangi dorne lagi thi. Unhon ne socha nahi tha ke kabhi Abhijeet ke mun se bhi yeh alfaaz sunein ge.

"Kyaa?" Teenon ke mun se aik saath cheekh waale andaaz mein nikla tha

To Be Continued