Hello everybody, back with the update. Enjoy

Ek Ajnabi

Chapter 23

Time to say Bye

Yeh din Daya aur Abhijeet dono ke liye aik mushkil din tha. Magar shayad yahi sahi tha un dono ke liye. Yeh woh din tha jab Abhijeet wapas apne ghar ja raha tha. Apne maa baap ke paas. Daya Abhijeet ke jaane pe udaas tha aur apni tanhayi ka soch ke pareshaan bhi tha. Abhijeet bhi udaas tha. Us ne is ghar mein aik acha waqt bitaya tha, Daya ke saath bohat acha waqt guzaara tha par ab jaane ka waqt a gaya tha. Mr aur Mrs Ravi Abhijeet ko lene ke liye aaye the.

"Mein tumhe bata nahi sakti mere bete ke mein kitni khush hun ke tum hamare saath wapas ghar jaane pe raazi ho. We are sorry beta tumhe akela chodne ke liye. Par ab hum tumhe kabhi akela nahi chodein ge. Hamesha apne paas rakhein ge. Tumhe apni nazron se ojhal nahi hone dein ge" Mrs Ravi ki aankhon mein aansu a gaye. Unhon ne aansuon ko kuch dair behne diya.

"Chalo beta, ghar chalte hain" Mr Ravi ne Abhijeet ke kandhe pe haath rakhte hue kaha tha.

"Mein tumhe bohat yaad karun ga Abhijeet. Mujhe phone karte rehna aur waqt mile to kabhi kabhi mil bhi lena" Daya ne aage barh kar Abhijeet ko kas ke gale laga liya ke phir na jaane kab dobara mouqa milta hai. Ke kahin Abhijeet apni nayi zindagi mein kho kar use na bhool jaaye.

"Itni senti kyun ho rahe ho Daya. Hum milte rahein ge. Kisi doosre shehar to nahi ja raha mein. Isi shehar mein hun" Abhijeet ne Daya ke kandhe pe haath rakh ke thapki di aur phir use gale laga liya.

"Chalein Abhi beta" Mr Ravi aik baar phir bole the.

"Daya bhi humare saath jayega mujhe mere ghar chodne. Hum wahan kuch dair bethein ge, mein Daya ko apna ghar dikhaun ga aur phir jab Daya ka dil kare ga to woh wapas a jaaye ga" Abhijeet ki baat ne Mr aur Mrs Ravi ke saath saath Daya ko bhi pal ko hairaan kar diya.

"Daya ko kyun?" Mr Ravi ne chounk kar poocha aur un ke chehre ke taasuraat kuch sanjeeda ho gaye the.

"Han, Abhijeet is ki kya zaroorat hai?" Daya ke lehje mein thodi si jhijak aur hichkichahat thi.

"Are kyun zaroorat nahi hai, tum sirf dost nahi ho mere, bhai maanta hun mein tumhe. Kya aik bhai ka itna haq bhi nahi hai ke woh apne bhai ko apne ghar le ke jaaye, use apna ghar dikha sake" Abhijeet ne naraazgi zaahir karne ki koshish ki halanke us ka Daya se naraaz ho jaana bohat mushkil tha.

"Acha baba, chalun ga tumhare saath tumhe tumhare ghar chodne. Theek hai na, ab khush" Daya ne aakhir muskura kar Abhijeet ki yeh choti si zid maan hi li lekin is saari baat cheet mein Mr aur Mrs Ravi bilkul khamosh khade the. Woh kisi soch mein doobe lag rahe the magar Daya ya Abhijeet ki tawajo filhaal un ki taraf nahi thi.

"Chalein mom dad" Abhijeet Mr aur Mrs Ravi ki taraf palat kar un se sawaali andaaz mein kehta hai.

"Han chalo beta" Dono Mr aur Mrs Ravi aik saath jawaab dete hain magar un ke chehre pe chayi hui muskurahat kahin gayab si ho gayi thi.

Abhijeet, Daya, Mr aur Mrs Ravi ghar se bahir nikal aaye aur saamne khadi gaadi ke saamne a gaye. Mr aur Mrs Ravi aage waali seats par beth gaye, jab ke Abhijeet aur Daya ne pichli seats ka intekhaab kiya. Gaadi chal padi aur woh Abhijeet ke ghar jaane waale raaste par chal pade. Gaadi mein khamoshi thi. Achanak hi Mr Ravi ne drive karte hue apna phone apni jaib se nikaala aur kisi ko message karne lage.

"Uncle please drive karte hue phone ka istemaal na kijiye. Yeh khatarnaak saabit ho sakta hai" Daya ne Mr Ravi ko phone pe kuch type karte hue dekha to fikarmandana lehje mein.

"Oh sorry beta, dheyaan hi nahi rehta. Ainda dheyaan rakhun ga" Mr Ravi jhainpi jhainpi muskurahat apne chehre pe jamate hue Daya se bole.

"Its ok uncle" Daya muskuraya.

Kuch minton baad Mr Ravi ka phone peep peep karne laga. Shayad koi message kar raha tha. Unhon ne foran se pehle phone ko check kiya. Wahan pata nahi kya likha tha magar woh jo bhi tha woh parh kar woh kuch sukoon ki halat mein a gaye the. Jaise un ki koi pareshaani hal ho gayi ho.

Kuch dair baad gaadi aik khoobsurat ghar ke saamne ruk gayi thi. Rohan ne Daya ko bataya tha ke Abhijeet ke maa baap ameer hain. Yeh ghar us ameeri ka mun bolta saboot tha. Woh chaaron gaadi se utar gaye the aur us ghar ki taraf badhne lage the. Mr Ravi ne aage barh kar main gate khola magar hairat ki baat yeh thi ke darwaaza locked nahi tha. Woh pehle se khula hua tha.

"Uncle, ap kya ghar ko aise hi khula chod dete hain ke koi bhi chala aaye" Daya ne hairaangi se aik aur sawaal kiya.

"Are nahi nahi. Aisa nahi hai beta. Bas aate waqt hum darwaaze ko lock lagaana hi bhool gaye. Waise, ghalti to hai. Dheyaan rakhna chahiye tha. Ab halaat bhi kuch aise hain, kab kya ho jaaye kuch pata bhi nahi chalta" Daya ke sawaal ne aik pal ko Mr Ravi ko ghabraane par majboor kar diya par doosre hi pal woh kuch itminaan se jawaab de rahe the.

"Chaliye andar chalte hain" Daya muskura ke bola aur woh sab andar dakhil ho gaye.

Ghar andar se bhi khoobsurat tha. Woh sab living room mein a kar sofon par beth gaye.

"Tumhara ghar to bohat khoobsurat hai Abhijeet" Daya ne sitaaish ki nazron se ird gird dekha aur Abhijeet ke ghar ki tareef ki.

"Thank you Daya. Mujhe to abhi bhi yaqeen nahi ho raha ke yeh mera ghar hai" Abhijeet hanste hue dheemi awaaz mein bolta hai ke sirf Daya hi sun sake.

Thodi dair baad living room mein Mrs Ravi cold drink ke glasses ke saath ayein aur sab ko aik aik glass pakra diya.

"Thank you Aunty" Daya ne cold drink ka sip lete hue shukriya ada kiya.

To Be Continued

Plzz do review if you liked the chapter. Share your feedback and suggestions.