TERE PYAAR MEIN
Chapter 11
"Pooja, yeh kya ho gaya hai meri Tarika di ke saath. Mujhe to abhi bhi yaqeen nahi a raha. Aj Subah ke baare mein yaad karti hun to dikhta hai ke kitni khush thi Tarika di, full of life. Itna khush meine un ko aaj se pehle kabhi nahi dekha tha aur hairat ki baat to yeh hai ke itna toota hua, itna dukhi bhi meine un ko aaj se pehle kabhi nahi dekha. Kaisi sitam zareefi hai na qudrat ki yeh" Shreya ne Pooja ke kaandhe pe sar rakhte hue kaha.
"Shreya sabar karo. Agar tum hi aise himmat haar jao gi to Tarika di ko kon sambhalay ga. Unhe tumhari zaroorat hai. Unhe hum sab ki zaroorat hai" Pooja ne muskurane ki koshish karne ke saath kaha tha magar muskurana bohat mushkil ho gaya tha.
"Tum theek keh rahi ho Pooja. Unhe hamari zaroorat hai. Ab mein himmat nahi harun gi" Shreya ne apne ap ko sambhalne ki koshish karte hue apne andar himmat aur hosla paida kiya.
"Han to batao phir ke Tarika di ko khaane mein sab se zyaada kya pasand hai? Hum banatein hain" Pooja ne muskura kar mahol ko kuch halka karne ki koshish ki.
"Tarika di ko daal chawal bohat pasand hai. Mein abhi banati hun" Shreya ne khush ho kar kaha.
Phir Shreya aur Pooja Tarika ke liye daal chawal banane mein lag gayein. Aik ghante baad jab daal chawal tayaar ho gaye to woh dono hi daal chawal ki plate le kar upar chali gayein jahan saamne hi Tarika ne apni maa ki god mein sar rakh kar aankhein band ki hui theen.
"Tarika di so gayein kya?" Shreya ne apni maa se sawal kiya.
"Han, meri god mein rote rote hi so gayi. Meine bhi rone diya halanke mera dil kat raha tha magar us ka dil halka ho jana chahiye tha is liye us ka rona zaroori tha" Tarika aur Shreya ki maa ne udaasi aur dukh se apni god mein leti Tarika ko dekha jo is waqt aik choti si bacchi lag rahi thi jo rote rote hi apni maa ki god mein so gayi ho.
"Ham to Tarika di ke liye un ka pasandeeda khaana laaye the" Pooja ne janna chaha ke goya Tarika ko uthaya jaaye ya phir use yunhi sone diya jaaye.
"Ise sone do beta. Ise neend ki bohat zaroorat hai. Soe gi to sukoon mile ga, aik naye din ki nayi shuruwaat mile gi. Kuch ghanton ko hi sahi, magar yeh neend use us ke gham to bhula de gi, use un se ghaafil kar de gi" Tarika aur Shreya ki maa ke Pooja ko Tarika ko jakane se rok diya kyunke agar abhi woh us ko utha deti to phir shayad woh dobara se unhi ghamon ko yaad karte hue so na paaye.
"Han Pooja, ammi theek keh rahi hain. Tum yeh khana wapas kitchen mein le jao. Jab Tarika di uthe gi to hum use khila denge. Mein Tarika di ko unke kamre mein le jaati hun" Shreya ne apni maa ki baat mein haan milayi aur Pooja ko kaha jab ke Pooja Shreya ki baat sun kar daal chawal le kar wapas kitchen mein chali gayi aur fridge mein rakh diya.
Abhijeet ki aankh neend se khuli to us ne apne ap ko Tarika aur Shreya ke ghar ke guest room mein paaya. Us ke saath hi bistar par Daya bhi so raha tha. Doosra guest room Pooja ke istemaal mein tha. Use yakdam hi phir woh sab yaad aya jo kal raat hua tha aur us ka dil dehal ke reh gaya. Us ne apne ap ko sambhala aur apni ghadi pe nazar daali. Subah ke 8 baj rahe the. Ghar mein abhi khamoshi phaili hui thi. Lagta nahi tha ke koi utha hua hai abhi tak. Daya bhi aankhein band kiye abhi tak so hi raha tha. Us ne apne pair bistar se utaare aur kamre se baahir nikal gaya. Woh lounge mein a gaya, dekha ke wahan koi bhi na tha. Kisi khayal ke aane pe woh Tarika ke kamre ki taraf rukh kar leta hai. Dekhta hai ke Tarika ke kamre ka darwaaza aadha khula hua hota hai. Tarika apne bistar pe aadi tirchi leti hui thi. Woh apne kapre bhi ab tak tabdeel nahi kar paayi thi. Woh wohi laal lehenga pehne hui thi jo us ke liye ab us ki badqismati ban chuka tha. Us ki aankhein band theen magar chehre ke taasurat se lagta tha ke woh apni neend mein bhi bechain hai. Kisi kashmakash mein phansi hai. Woh kuch dair yunhi bemaqsad khada us ko sirf dekhta hi raha.
Tabhi us ne dekha ke Tarika ne aahista se apni aankhein kholi hain. Magar jab us ne woh kholein to un mein weerani hi weerani bhari padi thi. Tarika ko woh sab dohrane ki bhi zaroorat na thi jo us ke saath hua tha. Woh waqaia to ab us ki rooh mein rach bas gaya tha. Tarika ne aankhein khol kar darwaaze mein khade Abhijeet ko achnabhe se dekha.
"Tumhari fikar ho rahi thi" Abhijeet nazrein churaate hue kamre mein daakhil ho gaya aur bistar par Tarika ke qareeb beth gaya.
Tarika uth kar beth gayi magar kuch na boli. Koi baat na kahi, koi shikwa na kiya, bas yunhi us ko kuch pal ko dekhti rahi.
"Isi liye chala aya tumhe dekhne. Kuch pal aur so leti" Abhijeet ne jab dekha ke Tarika kuch nahi keh rahi to khudi kehta raha bas is liye ke halchal machi rahe warna khamoshi aur veerani to ache bhale aadmi ko bhi kaat ke rakh deti hai. Khamoshi ko apna saathi banane waale log kabhi apne ghamon se bahir nikal nahi pate kyunke woh khamoshi unhe sochne pe majboor karti hai, aur soch har baar usi bure waqaieye ki taraf ishaara karti hai.
"Nahi, mujhe neend nahi a rahi" Tarika ne aankhon mein dard samo kar kaha.
"Tum ne pata nahi kab se kuch khaaya nahi. Mein tumhare liye kuch khaane ko lata hun. Acha mehsoos karo gi" Abhijeet ne muskura kar Tarika se kaha aur bistar se uth gaya.
To Be Continued