Tere Pyaar Mein
Chapter 12
Kamre ka darwaaza aadha khula hua tha. Abhijeet Tarika ke liye khana lene chala gaya tha. Us ke jaane ke baad kamre mein phir se wohi khamoshi aur weeraani chaa gayi thi. Magar woh khamoshi zyaada dair na rahi. Abhijeet do minute baad hi Tarika ke kamre mein daal chawal ki plate haath mein pakre hue andar dakhil hua."Tarika" Abhijeet ne ahista se pukaara ke use un sochon se nikaal sake jinhon ne us pe kisi jonk ki tarhan qabza jama liya tha.
Abhijeet ki awaaz ne Tarika ne dheere se sar moda. Kuch dair woh yunhi us ko khaali khaali nazron se dekhti rahi.
"Han Abhijeet" Us ki nazrein jhuki hui theen. Awaaz ki nami pe badi mushkil se qaaboo paaya gaya tha.
"Khana kha lo. Tum ne kal raat se kuch khaya nahi hai" Abhijeet bistar ke aik kinaare pe beth gaya. Phir kuch khayaal aane pe qareeb padi maiz ghaseet kar bistar ke saath le aaya.
"Shukriya Abhijeet" Tarika ne dheere se muskuraane ki koshish ki. Woh apne pair zameen pe rakh ke bistar pe beth gayi.
Phir kuch dair ke liye is kamre mein mukammal khamoshi chaayi rahi. Tarika chote chote luqme lene mein masroof thi aur Abhijeet ke paas kehne ke liye koi lafz nahi the, jaise achanak hi kisi ne us ke saare alfaaz chura liye hon aur use goonga kar diya ho. Us ke paas Tarika ko kehne ke liye hamesha hi bohat kuch hota tha, magar aj us ki zubaan gang thi.
"Shukar hai, tum ne khana to khaaya" Tarika ne khana mukammal kiya to Abhijeet ne kaha, ke kehne ke liye koi to bhooli basri baat nikaale, koi to be sabab hi sahi magar mozooh to nikaale.
Shreya ki jab aankh khuli to us ne pehle apni behan ki khabar lena chaahi. Us ne jab Tarika ke adh khule kamre se jhanka to use Tarika uthi hui dikhayi di aur us ke saath Abhijeet betha hua dikhayi diya. Woh Tarika ko khana khilwa raha tha. Kamre mein bilkul khamoshi thi magar Shreya ke liye yeh baat tasalli baksh thi ke Tarika akeli nahi hai aur us ke pait mein bhi ab kuch ja raha hai. Us ne andar daakhil hone ke bijaye neeche ki taraf ka rukh kiya. Woh seedhiyon se utarti hui neeche lounge mein dakhil hui to use Daya aik sofe pe betha hua dikhayi diya. Woh yunhi betha hua tha. Kabhi apne phone pe nazar daal leta to kabhi yunhi khalaa mein ghoor leta. Us ke seedhiyon se utarne ki chaap ne Daya ko apni taraf mutawaja kar liya. Woh seedha ho kar beth gaya aur us ki taraf dekhne laga.
"Tum itni jaldi kese uth gaye. Mujhe laga tha ke tum dair se uthte ho" Shreya ne qareebi sofe pe bethte hue kaha. Yeh us ki is ghamzada mahol ko kuch halka karne ki choti si koshish thi. Woh janti thi ke Daya dair se uthne ka aadi hai.
"Madam, tumhe yeh sab kese pata hai? Mein humesha jaldi hi uthta hun. Tumhe pata nahi tumhari kon si secret service ne yeh khabar di hai" Daya ne bhi chaaha ke mahol ko zara halka kiya jaye. Aur is ke liye woh mamool waali tu tu mein zaroori thi.
"Mujhe Abhijeet bhai bataya karte hain ke tum dair se uthte ho" Shreya shareer andaaz mein muskurayi.
"Kya, Abhijeet? Is ki to mein. Abhi ja ke dekhta hun mein is ko" Daya ko waqaie maloom na tha ke Abhijeet us ki raaz ki baatein ja kar Shreya ko bataya karta hai. Woh to sofe se taqreeban uth chuka tha.
"Kya kar rahe ho. Ruk jao zara. Abhijeet bhai abhi Tarika di ke saath bethe hain. Meine jhaank ke dekha to Tarika di ko khaana khilwa rahe the. Qasam se, Abhijeet bhai bohat ache hain. Unhon ne jaise Tarika di ka khayal rakha hai, woh koi kam hi karta hai. Hum mein se to kisi ki bhi himmat nahi hai ke Tarika di ko is haalat mein dekh sakein" Shreya ne pehle Abhijeet ki taareef ki aur dil hi dil mein Abhijeet ka shukriya adaa kiya. Is waqt mein apnon se badh kar saath diya tha Abhijeet aur Daya ne. Aj kal to aise waqt mein apne bhi haath chod dete hain. Phir woh dukhi si ho gayi ke use sab kuch baar baar yaad ata tha.
"Han, Abhijeet aisa hi hai. Sab ka khayaal rakhne waala aur Tarika to us ki itni achi dost hai aur phir parosi bhi to hain hum" Daya udaas muskurahat chehre pe sajaye hue bola.
"Han, tum ne aur Abhijeet bhai ne hamara bohat saath diya hai. Shukriya" Shreya ki aankhon mein nami a gayi. Us ne kabhi yeh na socha tha ke woh Daya ke saamne roye gi magar halaat kisi ko kuch bata kar thodi aate hain. Woh to achanak hi waarid ho jaate hain apni mojoodgi ke ahsaas ke saath.
"Kaisi baatein kar rahi ho Shreya. Yeh farz tha hamara. Is ghar ko hamesha hi apna samjha hai. Ab tum shukriya keh kar hume paraya to na karo na" Agar koi is waqt in donon ko dekh leta to un ke beech hone waali guftagoo ko sun kar hairaan ho jata aur sochta ke kya yeh woh pehle waale Daya aur Shreya hain jinhe ladne se hi fursat na milti thi. Baat shuru ladayi pe hoti thi aur khatam bhi ladayi pe hoti thi.
"I'm sorry" Shreya dheere se us ki aankhon mein dekh ke boli.
"Koi baat nahi" Woh mun phair ke dheere se hansa.
"hans kyun rahe ho?" Shreya ne masoomiyat se poocha.
"Kuch nahi" Us ne baat ko taal diya magar woh hans is liye raha tha ke Shreya ne pehli baar us se kisi cheez ke liye maafi maangi thi. Us ne kabhi socha na tha ke woh pal bhi aaye ga jab Shreya us se maafi maange gi chaahe woh kisi choti si baat ke liye hi kyun na ho.
To Be Continued