Tere Pyaar Mein
Chapter 13
Recap: Abhijeet and Daya are best friends and they share an apartment. Tarika and Shreya are sisters who live in the neighbourhood. Abhijeet secretly loves Tarika but Tarika only considers him as a friend and gets engaged to a guy named Suraj. Daya and Shreya have likeliness towards each other but they always fight. Abhijeet is heartbroken by Tarika's engagement but accepts it. On the day of Tarika's wedding, Suraj mysteriously falls from the roof. Tarika is heartbroken and Abhijeet is sad seeing Tarika like that. Abhijeet tries to console her
Scene 1
Us waqaiye ko taqreeban aik hafta beet gaya tha. Tarika woh sab bhoolne ki koshish kar rahi thi magar us ke liye yeh karna bohat mushkil tha magar woh himmat nahi haarna chahti thi. Woh himmat nahi khona chahti thi apni maa aur apni behan ke liye. Woh unko ab mazeed apni wajah se dukhi nahi dekh sakti thi. Use aage barhna hi hoga, yeh soch us ne bohat mushkil se apne dimaag mein bithaayi thi. Us ne apne dil aur dimaag ko masroof rakhne ke liye ghar mein zyaada se zyaada kaam mein shaamil hone ka socha tha. Us ka tareeqa kaam bhi kar raha tha. Jab woh masroof hoti to apna gham bhool si jaati. Is waqt bhi woh kitchen mein khadi kuch kaat rahi thi.
"Kya kar rahi hain di?" Shreya ne kitchen mein daakhil ho kar Tarika ko kaam karte dekha to yunhi poocha.
"Aloo kaat rahi hun. Socha ke fries bana leti hun. Tumhe bohat pasand hain na fries" Tarika ne aloo kaatate hue Shreya ki taraf dekh kar halka sa muskuraya ya phir shayad muskuraane ki koshish ki.
"Thank you di. Qasam se bohat dil kar raha tha fries khaane ka. Ap to samjho mere dil ki baat samajh leti ho" Shreya ne pyaar se Tarika ko peeche se gale lagate hue kaha.
"Is mein thank you ki kya baat hai. Teri badi behan hun mein. Teri choti choti khawahishein poori nahi karun gi to phir kis ki karun gi" Tarika ke chehre pe dheemi muskurahat phaili thi.
"Tarika di, kahin baahir ghoom kar aate hain na. Bohat bore ho rahi hun mein ghar par bethe bethe" Shreya mun bana kar boli.
"Nahi Shreya. Mera kahin bhi jaane ka dil nahi" Tarika ki udaas aankhein Shreya saaf saaf dekh sakti thi.
"Lekin di, ap ko acha lage ga agar ap bahar jayein gi" Shreya ne aik baar phir koshish ki. Shayad us ki koshish mein dam hi nahi tha.
"I'm sorry Shreya magar nahi, mujh mein himmat nahi hai. Mujh mein nahi hai utni energy ke mein kahin bhi bahar ja sakun. Mera dam ghutata hai. Baahir ka shor mere andar halchal macha dega jise mein bardaasht nahi kar paun gi" Tarika ne apne baraste aansuon ko bohat mushkil se roka. Woh yeh keh kar kitchen se nikal gayi aur lounge mein be dheyaani se, aankhein neechi kar ke a hi rahi thi ke yakdam kisi se takra gayi.
"Ouch" Tarika ka sar kisi ke seene se thaa kar ke laga tha.
"Tarika, tum theek to ho? I'm so sorry. Mujhe pata hi nahi chala" Abhijeet bhi apne hi dheyaan se Tarika ke ghar mein daakhil hua tha ke saamne se aati Tarika se takra gaya. Abhijeet ke lehje mein Tarika ke liye fikar aur pyaar tha.
"Ye tum ho Abhijeet? Han, its ok. Mein theek hun" Tarika ne apne ap ko Abhijeet ke seene se alag kiya aur sar utha kar us ki taraf do pal ko dekha, phir sar pe haath phairte hue boli.
"Zyaada to nahi lagi na?" Abhijeet ne aik baar phir poochna chaha.
"Bola na Abhijeet ke mein theek hun. Tum aakhir kyun karte ho meri itni fikar" Tarika ko hairat hoti thi Abhijeet ki apne liye itni fikar dekh kar. Woh sochti ke aakhir Abhijeet us ki itni fikar kyun karne laga hai. Abhijeet ki nazron mein use ab kuch dikhne laga tha magar woh us ko koi naam dene se filhaal qaasir thi. Us ke paas apne sawaalon ke koi jawaab nahi the.
"Dost hun mein tumhara. Tumhari fikar karna mera haq hai. Apni dost ko pareshaan aur udaas nahi dekh sakta" Abhijeet ki aankhon mein pyaar tha aur lehje mein fikar.
"Thank you" Tarika ne apni nazrein Abhijeet se phairte hue bola.
"Yeh kis liye?" Abhijeet chounk kar bola.
"Fikar jo karte ho meri itni. Jaanti hun ke kaho ge ke dost jo hun mein tumhara, fikar karna to farz hai magar aj kal ke zamaane mein to dost kya, apne bhi itni fikar nahi karte. Magar tum, tum ne bohat saath diya mera. Mujhe mere gham se nikaalne mein bohat madad ki tum ne. Agar tum na hote to shayad mein aj bhi apne kamre mein akeli padi hoti. Magar tum, tum ne mujhe ahsaas dilaaya ke yeh sirf meri takleef nahi hai, yeh meri maa aur meri behan ki bhi takleef hai. Woh meri wajah se bohat takleef mein jee rahe the. Mujhe dekh kar rote the woh. Phir un ki takleef kese na kam karti. Sambhalna hi pada mujhe apne ap ko" Tarika ki aankhon mein reh reh kar aansu a rahe the. Us ne socha ke kuch pal ko behne de inko.
"Ap ki aankhon mein aansu ache nahi lagte Tarika. Meine ap ko hamesha hansta khilkilata dekha hai. Meri bas yahi dua hai ke ap apne in aansuon ko jald hi alvida kar dein aur khushiyon aur muskurahaton ko khushamadeed kahein" Abhijeet ne aage barh kar us ke aansu pochna chahe. Na jaane kyun magar Tarika use yeh karne se rok hi nahi paayi. Us ne chaha to tha ke us ka haath pakar kar rok de magar us ke lams ne jaise use gang kar diya tha. Abhijeet ke haath woh apne chehre pe aankhon ke gird mehsoos kar sakti thi.
"Is ki koi zaroorat nahi thi" Abhijeet jab Tarika ke aansu ponch kar peeche hata to Tarika dheere se bolte hue apni aankhein Abhijeet se churati hai.
"Tum kab se khade ho. Beth jao please" Tarika ne jab Abhijeet ko abhi bhi khada paaya to use saamne hi lounge mein pade sofon pe bethne ki darkhaast ki.
"Thank you" Abhijeet ja kar aik sofe pe beth gaya.
"Daya nahi aya tumhare saath?" Tarika ne sarsari tor pe poocha.
"Aaya hai na. Woh darasal mein mujh se pehle hi andar a gaya tha. Par pata nahi, kahan gayab ho gaya hai. Yakeenan, Shreya ko dhoond raha hoga. Us se mil kar use acha lagta hai" Abhijeet ki baat par Tarika aik dam se hi chounki thi.
"Shreya se..." Tarika ne apna jumla adhoora chod diya.
"Han woh, tum hi ne kaha tha na ke Shreya aur Daya aik doosre ko pasand karte hain. Mujhe bhi yeh baat sahi lagne lagi hai. Daya ki nazrein hamesha Shreya ko hi dhoond rahi hoti hain" Abhijeet muskura kar bola. Shreya aur Daya ke ladne mein hi unka pyaar chupa tha. Unhe shayad aik doosre ko ched kar khushi milti thi. Aik doosre ke paas reh kar khushi milti thi.
"Are haan, mein to bhool hi gayi thi. Dimaag mein kuch sochne samajhne ki salahiyat hi nahi reh gayi thi.
Scene 2
Tarika ke jaane ke baad Shreya kitchen mein khadi frying pan mein chamcha hila rahi thi ke achanak hi kuch aisa hua ke woh dar ke yakdam hi peeche hati thi.
"Bhauu" Daya ne kutte ke bhonkne ki awaaz nikaali jis pe Shreya chalang maar ke peeche hati thi.
"Yeh kya badtameezi hai. Koi manners wanners hain bhi ya nahi, tum mein. Gawaar kahein ke" Shreya ne jab apne dar par qaabu paya to dekha ke saamne Daya khada tha apne daant nikaal kar.
To Be Continued
How was it? Review if you liked it.