Dard Ka Naam Ishq
Chapter 28
Flashback Series Part 20
Farewell Party
Kuch din baad Geet university mein mojood thi. Aj final year ka final exam tha. Woh exam de ke bahar a gayi thi. Us ke chehre se ayaan tha ke woh kitni khush thi. Us ki kayi dostein us se kitni baar pooch chukein theen ke kya baat hai magar us ne unhe sabar karne ke liye kaha tha. Woh yeh khabar kisi bomb ki tarah phodna chahti thi ke us ki doston mein halchal mach jaye.
"Kya baat hai Geet, bohat khush lag rahi ho, kahin Abhijeet ne tumhe propose to nahi kar diya?" Geet apni kuch doston ke saath bethi hui thi jin mein Nisha bhi mojood thi. Nisha ne Geet ko itna khush dekha to use yunhi chirhaane ke maqsad se boli thi ke woh jaanti thi ke Abhijeet ka kisi larki ko propose karna koi aam si baat nahi thi aur Geet yeh karne mein yaqeenan nakamiyaab hi thehri hogi.
"Agar mein kahun ke haan yahi baat hai, Abhijeet ne propose kiya hai mujhe" Geet ne Nisha ko aankh maarte hue bola jaise aankhon hi aankhon mein apni jeet ki gawaahi de rahi ho.
"Kya matlab? Nahi..jhoot bol rahi ho tum. Jaanti hun mein tumhe, aik number ki jhooti larki ho" Nisha ne Geet ki baat maane se inkaar kar diya.
"Nahi, mein sach bol rahi hun aur mein apne is sach ko saabit bhi kar sakti hun" Geet ke chehre pe musalsal aik sunehri muskurahat chamak rahi thi.
"To phir karo saabit, kyunke saboot ke beghair to hum mein se koi bhi tumhaari baat pe yaqeen nahi karne waala" Nisha ne doosri larkiyon ko bhi saath mein milaaya aur unhon ne bhi Nisha ki haan mein haan milaayi.
"Theek hai to phir yeh dekho" Geet ne kehte hue purse se apna phone nikaala aur us pe aik video play karne lagi. Woh video dekh ke Nisha aur baaki sab larkiyaan hakka bakka reh gayein. Un ke mun hairat se aik dam se khul gaye. Unhe apni aankhon pe yaqeen nahi a raha tha ke kya woh jo dekh rahi hain woh waqaie sach hai ya phir koi saraab?
"Yeh..yeh kya hai?" Nisha ki aankhein phati ki phati reh gayi theen. Us ne apni aankhein malein ke shayad ab sahi dikhayi par jaaye. Us video mein aik khoobsurat restaurant ka manzar dikh raha tha jo ke phoolon se saja hua tha. Video mein Abhijeet aur Geet ke chehre saaf saaf dikhayi de rahe the. Dekhte hi dekhte Abhijeet apne ghutnon pe beth gaya aur us ne Geet ke saamne anghooti ki jise us ne bohat shouk se pehan liya.
"Aankhein kharab ho gayein hain kya? Eye specialist ka number dun kya? Dikh nahi raha ke Abhijeet ne mujhe propose kiya hai. Woh mujh se pyaar karta hai. Can you believe it?" Geet ne Nisha pe tanz kiya aur saath hi muskurayi.
"I can't believe it. Yeh sab aakhir hua kaise. Kya jaadu chalaya hai tum ne Abhijeet pe?" Geet ne jawaab nahi diya aur woh wahan se chali gayi.
"Zaroor kuch gadbad hai warna Abhijeet jaisa larka ise propose kare ga" Nisha ne apni saathi larkiyon se khayaal zaahir kiya.
"Tumhe waqaie aisa lagta hai" Aik larki Kiran boli.
"Han, aur mein is ka pata bhi laga kar hi rahun gi. Farewell Party pe hi sab ugalwaungi is ke mun se ke kese kiya yeh sab..aur sab se ahem baat yeh dono college mein kabhi aik saath dikhayi kaise nahi diye? Aakhir Geet ne chakkar kya chalaya hai" Nisha ke dimaag jo sab chal raha tha us ne Kiran se kaha.
Aj farewell party thi, is din ke baad us ne is university ko kabhi nahi dekhna tha. Yeh us ki university ke saathiyon se university mein aakhri mulaqaat thi. Phir un sab ne hi apni apni alag raahon pe jana tha. Kisi ka kuch sapna tha to kisi ka kuch, par Abhijeet ka zehan bilkul saaf tha. Use apne maa baap ke business ko hi aage barhaana tha. Woh farewell ki party ke liye apne kapre decide kar raha tha. Use aik black pant coat dikha to us ne woh pehan liya. Saath mein us ne red tie bhi baandhi jo ke us pe bohat jach rahi thi. Use tie bandhne mein thodi dikkat paish aayi to use Geet yaad a gayi aur us ne soch ke aik baar Geet us ki zindagi mein shamil ho gayi to phir to wohi us ki tie bandhe gi aur is khayaal se hi uska chehre pe sharmeeli muskaan a gayi. Woh abhi tayaar hi ho raha hota hai ke use bahar se kuch awaazein sunayi deen aur use samajh a gaya ke bahar kon ho sakta hai.
"A gaye tum log, bohat ache lag rahe ho" Abhijeet bahar aya aur apne teenon doston ko ache se tayaar hue dekha.
"Ache to lagein gi hi, aakhir farewell party roz roz thodi na aati hai. Bhaisahab, mujhe to yaqeen hi nahi a raha ke university se hamaari finally jaan chut gayi hai. No more khich khich of professors. Azaadi ke din shuru ho rahe hain hamaare" Raj khushi se kehta hai.
"Chalo phir chalte hain, mein bhi ready ho gaya hun"
Geet laal frouq pehan kar farewell party mein daakhil hui. Us ne apni doston ko dhoondne ki koshish ki. Woh use saamne hi dikh gayein. Woh un ke saath khadi ho gayi. Kuch dair baad Abhijeet aur us ke teenon dost bhi farewell party mein daakhil hue.
"Yaar kuch peene ka dil kar raha hai. Kuch drink le kar aate hain. Kya piyo ge tum sab?" Vishaal ne teenon se poocha.
"Mein orange juice lun ga" Abhijeet bola.
"Mein aur Raj tumhare saath hi chalte hain. Wahin pe decide kar lenge" Rohan ne kaha to Vishal, woh, aur Raj teenon hi drinks lene chale gaye. Abhijeet ab wahan pe akela khada tha ke achanak hi use hairat ka saamna karna pada. Use laal jode mein Geet khadi dikhayi di. Woh kuch larkiyon se baat kar rahi thi.
"Geet aur yahan..Us ne mujhe kabhi bataya kyun nahi. Lekin meine bhi to use nahi bataya ke mein is university mein parhta hun to shayad use bhi batana yaad na raha ho" Abhijeet ke zehan mein aik shuba sa paida hua par us ne use jhatak diya. Woh Geet ko yahan dekh kar bohat khush tha.
"Geet, mere saath kamre mein ao. Mujhe tum se kuch baat karni hai" Nisha ne Geet ka haath pakad liya tha aur use kisi kamre mein le jana chahti thi.
"Aakhir baat kya hai Nisha?" Geet ne tajassus ki khatir poocha.
"Ao to sahi mere saath"
Is se pehle ke Abhijeet Geet ko pukaar pata ya us ke paas pahunch pata, aik larki us ke saamne se Geet ka haath pakar ke use kahin le ja rahi thi. Na jaane kya baat thi woh un ke peeche peeche chalne laga. Woh larki Geet ko le kar aik kamre mein chali gayi. Kamre ke darwaaza us ne theek se band nahi kiya tha. Awaazein saaf sunayi de sakti theen. Abhijeet darwaaze ke bahir hi ruk gaya aur kuch sochne laga. Wapis palat jaaye ya Geet ke bahar aane ka intezaar kare.
To Be Continued
