Zid

Chapter 17

"To phir kaise ana hua?" Abhijeet ki khala kitchen mein chali gayein to lounge mein sirf Abhijeet aur Tarika bach gaye the.

"Kaha to tha meine abhi ke khala se milne aayi hun, yaad a rahi thi un ki to socha ke mil ke a jati hun. Waqt acha guzar jata hai" Tarika ne sawaal ka seedha jawaab diya.

"Acha mujhe to laga ke ap mujh se milne ayi hain" Abhijeet sargoshi jaise madham lehje mein kehta hai par itna ooncha zaroor ke Tarika sun sake.

"Mein bhala ap se milne kyun aun gi. Aur wese bhi ap to yahan rehte bhi nahi hain. Mujhe kese pata ho sakta tha ke ap yahan pe hain"

"Kya pata pehre lagayein ho aap ne" Abhijeet shararati andaaz mein sirf Tarika ko chedne ke liye kehta hai.

"Kya matlab?" Tarika ko yakdam hi Abhijeet ko ghoor ke dekha.

"Sorry, maaf kijiye ga. Mein mazaaq kar raha tha" Abhijeet ne apni hansi dabate hue kaha.

"Kuch zyaada hi mazaaq nahi karte aap?" Tarika ke chehre pe thode si sanjeedgi a gayi.

"Chodiye na, ap bhi to kam nahi. Waise ap ne mere ghar ki baat ki to yunhi khayaal aya ke mere ghar bhi aaiye kabhi. Mehmaanon ka hum khaas ahtemaam karte hain" Abhijeet ne baat badal kar Tarika ko apne ghar aane ki daawat de daali.

"Ap ke ghar. Nahi, is ki zaroorat nahi hai" Tarika kuch ghabra si gayi ke woh abhi Abhijeet ko achi tarah se jaanti bhi nahi thi aur use apne bhai Kevin se bhi dar lagta tha. Woh aise kaise kisi larke ke ghar pe chali jaaye aur woh bhi aik ameer larke ke ghar pe. Us ne faisla kar liya ke woh Abhijeet ke ghar kabhi nahi jaaye gi. Use pachtawa hua ke us ne Abhijeet ko itna mouqa hi kyun diya ke woh is tarah use betakuluffi se ghar ane ki dawatein de raha hai.

"Matlab ap mere ghar nahi ayein gi?" Abhijeet ne udaasi se Tarika ki taraf dekha. Woh Tarika ke lehje se samajh gaya tha ke woh us se door bhagna chahti hai.

"Ji Abhijeet ji. Mein ap ke ghar nahi a sakti aur mein ap ke ghar aun gi bhi kyun. Ap khala ke bhaanje ho isi liye mein ap ki izzat karti hun. Ap se meine isi wajah se baatein bhi kar lein. Lekin please agar aap ko koi umeed hai to please apne qadam rok lijiye. Mein un raston pe chalne ke liye nahi bani. Umeed hai ke ap samajh gaye honge ke mein kya keh rahi hun" Tarika ne intehaai sanjeeda andaaz ikhteyaar kar liya tha. Abhijeet ko is ki umeed nahi thi.

"Aap ye kya keh rahi hain Tarika ji? Mujhe..mujhe kuch samajh nahi a raha?" Abhijeet ne na samajhi se kaha.

"Mein jaanti hun Abhijeet ji ke ap jaante hain ke mein kya keh rahi hun" Tarika ki aankh mein ek aansu a gaya jis ko us ne Abhijeet ki nazar padne se pehle saaf kar liya.

"Theek hai, phir mein chalta hun" Abhijeet veeraan aur khoyi khoyi aankhon se Tarika ko takta hua wahan se uth gaya aur jaane laga.

"Are Abhijeet beta, kahan ja rahe ho? Abhi to aye the tum?" Abhijeet ki khala peeche se pukaari.

"Sorry khala, mujhe aik zaroori kaam yaad a gaya hai to mujhe jaana hoga" Abhijeet ne palte beghair kaha ke abhi agar woh palat jaata to khala pe us ke saare jazbaat zaahir ho jaate.

Purvi aur Kevin dono hi music room mein a gaye. Music room mein tarah tarah ke instruments pade hue the. Purvi aur Kevin dono hi kursiyon pe jake beth gaye.

"Mujhe to pata hi nahi tha Kevin ke tum music bajaane bhi jaante ho" Purvi hairat aur khushi ke mile jule taasurat ke zair e asar boli.

"Mujhe bhi kahan pata tha ke tumhe music seekhne ka shouk hai" Kevin sarsari sa muskurata hai.

"Chalo phir mein tumhe piano bajana sikhata hun" Kevin ne use jab ghoorta hua paya to bola.

"Han, sikhao"

"Acha to yeh ungli na idhar rakho, aur ye waali idhar aur yeh note bajaane ki koshish karo" Jab Purvi ko samajh na aaya to Kevin ne us ka haath pakad ke use samjhana shuru kiya, us ki aik ungli ko us ne piano pe aik jaga rakha to doosri ungli to doosri jaga. Woh us ke saath saath bajaane laga. Purvi bhi us ko follow kar rahi thi. Kevin waqiatan mein bohat acha baja raha tha.

"Tum bohat acha piano bajate ho Kevin" Purvi ne Kevin ki tareef ki.

"Thank you Purvi. Jab koi meri kalaa ki tareef kare to mujhe bohat acha lagta hai" Kevin khushi se bola.

"Kevin, pata nahi par kuch adhoora sa hai. Woh jo vibe hai na woh a nahi rahi yahan pe. Kyun na hum yeh practice ghar pe nahi balke kahin aur karein. Jahan khuli fizaa ho, khoobsurat nizaara ho aur thandi thandi hawaa ho.

"Han, tum theek keh rahi ho. Par kya tumhe kisi aisi jagah ke baare mein pata hai?"

"Han, aik hai aisi jagah. Woh jo tumhari lake hai na usi tarah ki lake hai woh bhi. Han, woh tumhari waali lake ka muqaabla to nahi par yeh bhi kuch kam nahi. Yeh mere ghar ke qareeb hi hai" Purvi ko Kevin ko is doosri lake ke baare mein bataya.

"Theek hai. Jaisi tumhaari marzi" Kevin ne Purvi ki haan mein haan milaayi.

To be Continued