Hi guys, I'm back with the update. Thank you for reading and reviewing the previous chapter.

Hi Tithi: I appreciate your request but I might not be able to fulfill your request at this time because I already have a lot of pending stories so I can't start a new one on your idea until I have completed a few of my pending stories. I hope you don't mind.

Ek Ajnabi

Chapter 26

Abhijeet's Past Revealed Part 2

"Woh jo seth hai na jis se tum ne juwe ki yeh baazi lagayi thi, us ka na bohat bada karobar hai, aslehon ka. Na sirf asle balke wahan pe woh larkon ko aatankwaadi banane ke liye bhi tayaar karta hai aur un ko bahar ke mulkon mein bhejta hai ke woh wahan ja kar tabaahi machaein. Bohat bada garouh hai uska, tiger naam hai us ke garouh ka. Tum apne larke ko us ke hawaale kar do ge to samjho ke tumhare paise maaf" Us aadmi ne jo ke Abhijeet ka baap ka dost aur hamsaya tha ne Abhijeet ke baap ko tafseel se batana shuru kiya.

"Kya waqaie mere paise is tarah maaf ho sakte hain?" Woh khush ho kar bola. Us ke lehje mein apne bete ke liye zara bhi pyaar ya fikar nahi thi. Use agar kisi ki fikar thi to woh thi sirf apni fikar.

"Han, mein sach keh raha hun"

"Theek hai tum mujhe us seth se milwa do" Abhijeet ka baap us aadmi se kehta hai.

Woh aadmi seth ko Abhijeet ke baap ke ghar le aya. Ghar kya tha do kamre ki kothri hi thi. Abhijeet is waqt ghar pe nahi tha. Woh college gaya hua tha jahan pe woh scholarship ki madad se free parhta tha. Abhijeet ki baap ne seth ko chatayi pe bethne ka kaha aur khud bhi beth gaya.

"Han to phir paise ka intezaam hua kya?" Seth ne poocha.

"Nahi, paise ka intezaam to nahi hua. Ap hi socho mein itni badi raqam kahan se laun ga?" Abhijeet ka baap rone ki adakari karne laga.

"Tumhe yeh sab baazi lagate hue yaad nahi raha kya. Ab mein nahi jaanta, chori karo ya dakaiti magar mujhe mera pesa chahiye warna.." Seth ne yeh sab kehte hue dhamki bhara andaaz apnaya aur apni jaib se pistol nikaal li. Pistol dekh ke Abhijeet ka baap aik dam se bohat dar gaya.

"Please mujhe maaf kar do. Mere dost ne bataya ke ap ka dhanda hai, paise ke badle ap mere larke ko le jao"

"Tumhe pata hai na mere dhande ke baare mein?"

"Han, mere dost ne mujhe sab bata diya hai. Mein paison ke badle apne bete ko ap ke hawaale karne ke liye tayaar hun" Abhijeet ka baap aik dam raazi hi betha tha.

"Theek hai, mujhe tumhari yeh deal manzoor hai magar han apne bete ko bhool jana. Aj se woh meri malkiyat"

Abhijeet college se ghar aya to use us ka baap thoda sa pareshaan dikhayi diya. Woh apne baap ke saamne khada ho gaya.

"Kya baat hai abba? Tum pareshaan lag rahe ho" Abhijeet ke lehje mein fikar thi. Us ka baap jaisa bhi tha par us ke liye to us ka wahid rishta tha isi liye bohat azeez tha woh use.

"Sahi pehchana hai beta tum ne. Mein bohat pareshaan hun. Mujhe paise ki sakht zaroorat hai" Abhijeet ke baap ne apni aankhon mein glycerine pehle hi daal liya jis se us ki aankhon mein khud ba khud hi aansu a rahe the.

"Tum ne meri kabhi nahi maani Abba. Mein kehta bhi tha ke yeh juwe ki lat bohat buri cheez hai. Magar tum kabhi samjhe hi nahi" Abhijeet ne aik baar phir apne abba ko samjhane ki koshish ki.

"Aik aakhri baar madad kar do meri" Abhijeet ka baap Abhijeet ke aage apne haath jod leta hai.

"Yeh kya kar rahe ho Abba? Hath mat jodo. Aur mein..kese madad kar sakta hun?"

"Tum hi kar sakte ho meri madad. Woh aik seth hai us ke paas bohat badhiya kaam, tu us ke saath lag ja. Woh mere paise maaf kar de ga"

"Kaisa seth aur kya kaam?" Abhijeet hairaangi se poochta hai.

"Tu us ke saath chala jaa, tujhe sab pata chal jaye ga"

Abhijeet ke baap ki minnaton par bilaakhir Abhijeet seth ke saath jaane ke liye raazi ho gaya yeh na jaante hue ke seth ka kya dhanda hai. Haqeeqat us pe wahan pahunchne pe aashkaar hui aur tab us ke paas faraar ka koi raasta nahi tha. Use shadeed dhoke ka ahsaas hua tha. Woh dhoka jo uske baap ne use diya tha. Pyaar to use kabhi apne baap se mila hi nahi tha magar us ne ye to kabhi nahi socha tha ke us ka baap use itna bada dhoka de ga, apne faide ke liye us ki balli charha de ga. Us ki kahaani mein villain seth nahi us ka apna baap tha. Wahan par us ki tarah aur bhi larke the jinhe training di jaati thi. Maar dhaar aur asleh banane aur chalane ki training. Use is sab mein bilkul bhi lagao nahi tha. Woh to bachpan se hi hinsa ko shadeed na pasand karta tha aur yahan to baat doosre mulkon mein aatankwaad karne ki thi jo ke us ko bilkul bhi qubool nahi tha. Woh itne bade jurm ka hissa harghiz nahi ban sakta tha isi liye us ne bhaagne ka plan banaya. Use is qaid se rihaai chahiye the. Woh yahan pe ghulaam ban ke nahi reh sakta tha. Is se pehle ke woh log use doosre larkon ke saath bahar ke mulk bhejte, us ne bhaagna chaha. Aakhir kaar 2 saal baad use bhaagne ka mouqa mil hi gaya. Woh kisi tarhan se wahan se nikal khada hua. Us ke bhaagne ki khabar pe kuch log us ke peeche bhaage, bhaagte bhaagte woh un logon se lad bhi raha tha. Ladayi mein woh kaafi zakhmi ho gaya tha. Bilaakhir un ko chakma deta hua woh bhagta ja raha tha. Use kisi cheez ki hosh nahi thi. Us ke zehan mein bas aik dod thi aur aik khayaal tha ke agar woh aj nahi bhaag saka to phir kabhi bhaag nahi sake ga. Bhaagte bhaagte woh kab main road par beech o beech a gaya, use pata hi nahi chala. Har cheez ko shor us ke kaanon se door tha. Har cheez dhundhli thi. Aur phir na jaane kya hua shayad woh kisi gaadi se takra gaya tha aur us ke sar pe shadeed chot lagi thi aur khoon behne laga tha.

To Be Continued

Please tell me how was it? I would like to know your thoughts as it motivates me to write better.