Baarish tip tip baras rahi thi. Aasmaan ke rangeen mausam ki hi tarhan Purvi aur Kevin ke dil ki halat bhi mosam se her pher khaati thi. Kuch anjaane jazbe pinap rahe the dono ke hi masoom dilon mein jin ko woh samajhne ko qaasir the. Purvi apne dil ki halat samajh hi nahi pa rahi thi. Wo pyaar pe yakeen rakhti thi par pyaar kaisa hota hai, woh to wohi jaane jis ko pyaar ho jaaye. Ye aisa jazbaatipan tha jise wo samajhne se qasir thi, aik ajeeb si khushi phootati thi apne saamne Kevin ko paa ke. Aakhir aisa kya anokha tha is aam se larke mein jo theek se baat bhi nahi kar sakta tha, jis ne apni poori zindagi mahroomiyon and bebasi mein kaati. Aakhir aisa kya tha usme jis ne Purvi jaisi larki ko us ke itna qareeb kar diya. Purvi to woh larki thi jo aasmanon jaisi uraan rakhti thi, jis ke oonche oonche khawaab the. Purvi jaanti thi ke pyaar shadeed hota hai par itna shadeed hota hai, ye shayad us pe Kevin se milne ke baad aaskhar hua tha. Aur Kevin bhi kya tha, khawaab to us ke bade bade the par shayad itni sakat aur himmat nahi thi ke barh ke unko choo ke poora bhi kar sake. Woh to bas aik aam sa larka tha, sirf khawab dekh hi sakta tha par shayad Purvi ko mil kar usko ahsaas hua ke woh kitna khaas hai, shayad Purvi ke saath ne hi use bhi khaas kar diya tha. Yakdam hi dil ki duniya mein ajeeb si halchal mach gayi thi. Purvi ko dekh ke dil aik ajeeb si khushi paata jisse shayad woh mehsoos kar ke bhi qabool karne ke liye tayaar nahi tha. Woh to wo tha jisne kabhi khawab mein bhi Purvi jaisi larki ka tasawur na kiya tha. Woh jo pariyon jaisi thi, hoor pari, sapnon ki rani.
"Mujhe lagta hai, ab hame chalna chahiye. Baarish ahista hogayi hai, kahin dobara tez na ho jaaye" Kevin ne ahistgi se kaha jab us ne dekha ke baarish ahista ahista halki hoti ja rahi hai.
"Kevin, ye baarish na qudrat ki khoobsurti hoti hai. Qudrat badi waseeh hai par yeh baarish qudrat ki khoobsurti mein se aik hai aur kya hum yeh qudrat ki khoobsurti dekhe begair hi chale jayein. Pata hai, mujhe baarish bohat pasand hai, ye qudrat ka aik haseen nizara hai ke ap aasmaan se pani ke qatre baraste hue dekho. Aur...aur pata nahi aj yeh nizaara pehle se bhi zyaada haseen kyun dikh raha hai. Kya yeh is lake ka kamal hai ya mere dil ka ke har cheez mein hi khoobsurti dikh rahi hai" Purvi ek josh mein kho kar bol jaati hai. Us ke ang ang se ajeeb sa walwala bol raha tha. Jaane use aj kya hogaya tha aur woh kaisi baatein kar rahi thi par sab kuch khud ba khud hi uski zubaan se ada hota ja raha tha aur un khoobsurat lafzon ko ada karne ke baad woh khud bhi hairaan reh gayi ke ye lafz waqayi kya us ne adaa kiye the. Ye lafz bhi to qudrat ki taraf se hi ataa hote hain aur baat mein so rang daal dete hain, ye khayal bhi jaane kaise aur kahan se ikdam hi uske dimaag ko choo gaya.
"Tum bhi kitni philosophical baatein kar rahi ho. Tumhe bhi meri tarhan philosopher bante der nahi lagi. Rang chad gaya hai mera tum pe" Woh khilaaf e mizaaj shokh ho gaya tha halanke ye uske mizaaj ka hissa bilkul nahi tha. Jaane ye kaise fasle the un dono mein jin ko paatne mein unhe zara bhi der nahi lagi thi. Kevin ko baat karte hue yun laga jaise woh Purvi ko barson se jaanta ho.
Purvi sirf soch ke hi reh gayi ke waqaie rang chad gaya hai tumhara mujh pe, kya thi aur kya bana diya hai. Rang badal daala hai mera. Zindagi ko aik rangeen bahar banane mein dair nahi lagayi. Purvi kuch na boli, wo muntazir thi ke Kevin aur bhi bole ga. Woh sunna chahti thi use, haan waqaie woh sunna chahti thi use, us ki madhosh awaaz mein madhosh ho jana chahti thi. Woh bohut chulbuli thi, kisi ki sunne ki use aadat kahan thi, woh to bas bolne ka shoq rakhti thi aur aik acha sa samiya jo use sun sake par aj usne woh lazzat mehsoos ki thi jo khamosh reh kar doosre ki awaaz sun kar mehsoos ki jaati hai.
"Aur haan to tum ne baat ki thi ke ye kis cheez ka kamaal hai ke ye baarish tumhe had se zyaada khoobsurat dikh rahi hai to mein samajhta hun ke is mein na hath sirf aur sirf tumhare dil ka hai. Dil ka mausam badi shiddat se aasmaan pe phele mausam pe apna rang chodta hai. Dil ka mausam nasaaz ho to yeh baarish bhi tumhe tumhare gamon pe roti hui dikhe gi, jaise aasman khul ke ro raha ho par choonke tumhare dil ki halat bohat achi hai, ye baarish ka nizaara bhi tumhe had se zyaada haseen aur khoobsurat dikh raha hai" Kevin use sab kuch tafseel mein samjhane mein jut gaya. Us se itni gehri baaton ki umeed rakhna koi ajeeb baat nahi thi. Us ki zindagi mein kayi rang aye the, kayi mushkilein jhelien theen usne, kayi choti choti khushiyon pe dil khol ke hansa tha woh.
"haye rabba, kitni pyaari baatein karte ho tum. Tum jaisa shakhs aj tak kabhi meri nazron se nahi guzra. Itne masoom ho aur tumhaare ye lafzon ke jaal..." Woh shayad bolte rehna chahti thi, bas kehte jana chahti thi par yakdam hi sharam ke maare chup ho gayi. Us ke chehre pe haya amaiz muskurahat a gayi thi aur us ne apne chehre ka rukh zara sa phair liya tha.
" Waise tum ne bataya hi nahi ke tumhare dil ki duniya aj, is waqt itni khush kyun hai ke ek aam si baarish ko bhi bohat khaas bana diya" Use doosre ke mamlon mein interefere karne ki aadat nahi thi par jaane kyun aj kis haq se woh Purvi se itna betakaluf ho gaya tha.
"Achi baat poochi hai tum ne. Yeh dil ki duniya kyun itni khush hai...kyun...shayad tum jaise dost ka sath kaafi hai dil ki is halat ke liye" Purvi ne khuloos e dil se kaha. Kevin ki khoobsurat, masoom, pyaari baatein waqaie kaafi theen ke dil ka mausam yakdam hi badal jaye. Ye larka jo apne ap ko aam sa samajhta hai woh to shayad itna khaas hai ke kisi ki bhi duniya palon mein rangeen kar de. Jaane ye sirf Purvi ka hi khayaal tha ya waqaie aisa tha.
"Mera saath...kya waqaie mera saath itna mazboot hai ke kisi ke bhi dil mein apni jagah bana le" Use apni samat par dhoka hua. Kya waqaie Purvi ne ye ilfaaz kahein hain, kya us ka saath waqaie aisa hai ke kisi anjaan shakhs ke dil mein jagah bana le.
"Beshaktha urvi ne mukhtasaran kaha aur baarish ke baad nikalne waali rainbow ko pyaar se dekhne lagi.
"Wapis chalein Purvi. Mera agla period start hone waala hai"
"Ji chalein" Purvi ne kehte hue narmi se apne haath ko Kevin ke haath par rakh diya jaise woh chahti ho ke Kevin usko mazbooti se thaam le aur kabhi us ka haath na chode, kabhi use apne ap se juda na hone de. Kevin ne kankhiyon se apne haath ko dekha jis pe Purvi ka gora chitta, khoobsurat, narm mulaim haath rakha hua tha. Kevin ke chehre pe na chahte hue aik sharmeeli muskurahat a gayi jis ko woh daant mein daba kar hi reh gaya.
Abhijeet aur Tarika Abhijeet ki khala ke ghar ke lounge mein bethe hue the. Tarika ki aankhon se beikhtiyaar hi aansun nikal aaye the apne maa baap ko yaad kar ke jin ke saath woh apni zindagi ke zyaada same bhi na bita saki.
"Ap ki aankhon mein aansun ache nahi lagte Tarika jee. Inhe saaf kar lijiye" Abhijeet ne saath hi maiz pe pade tissue box mein se aik tissue nikaal kar Tarika ko thamaya. Abhijeet se Tarika ke aansun jaane kyun dekhe hi na gaye, woh aansun seedha uske dil pe a kar lag rahe the.
"Shukriya Abhijeet jee" Tarika ne kehte hue Abhijeet ke haath se tissue pakad liya aur apne qeemti aansuon ko saaf karne lagi. Us ki porein nam ho gayein par uske aansun the ke thamne ka naam hi na le rahe the. Shayad ye khushi ke aansun the ke duniya mein abhi bhi ache jane baaki hain warna is se pehle to duniya ne use hamesha uske raaste mein kankar aur pathar phenke the.
"Are bas karo na. Kyun ro rahi ho? Ye aansun itne saste nahi hain ke tum inhe yun hi apni aankh ke raste behne do. Kya samjhi! bohat keemti hain yeh" Abhijeet ke lehje mein bepanah pyaar aur fikar thi. Us ke aansun bhi itne khoobsurat the ke unse bhi pyaar sa hua ja raha tha. Aur itne khoobsurat aansuon ki aisi behurmati ho, ye kaise bardasht ho sakta tha us se.
"Bohat shareer hain ap. Kitna ajeeb hai na yeh ahsaas jab ap khud ko itna ahem mehsoos karte ho kisi ki nazar mein ke khud ba khud hi sarshaari mein aansoun ki rail behne lagti hai" Us ke chehre pe aik chamakti muskurahat a chamki thi. Woh Abhijeet ki aankhon mein aankhein daal kar keh rahi thi. Aj Abhijeet ki zara se fikar aur pyaar ne use kisi aur hi duniya mein bhej diya tha. Us ka sara dar, sari rawayatein jhaag ki tarah beh gayein theen. Ab bas un aankhon ka milan tha.
"Tum isi kabil ho Tarika ke tum har kisi ki nazar mein ahem ban jao, tumhari jaisi larki har kisi ke naseeb mein thodi hoti hai. Tum jiske bhi naseeb mein hogi, woh khush naseeb hoga" Abhijeet ke lehje mein pyaar ka samandar samoya hua tha. Woh nahi jaanta tha kab kaise aur kyun use Tarika se itni shiddat se pyaar ho gaya. Woh keh dena chahta tha, iqraar kar dena chahta tha par shayad dar tha ke woh inkaar na karde. Woh Tarika ko khud ko jaanchne ka waqt dena chahta tha.
"Itna zyaada jaan gaye hain ap mujhe sirf teen mulaqaton mein" Tarika ke lehje mein shiddat thi, pyaar tha aur jaane kya kya.
"Kabhi kabhi janne ke liye to aik mulaqaat bhi kaafi hoti hai aur kabhi to so saal bhi kaafi nahi hote. Samajh lijiye ke meine jo janna tha na woh mein jaan gaya hun. Aur kuch janne ki zaroorat nahi hai mujhe" Abhijeet Tarika ki aankhon mein dekhte hue bola. Tarika Abhijeet ki nazron ki taab na la kar apni nazrein phair gayi par woh lamha us ke chehre pe aik haya amaiz muskurahat chodna na bhoola tha.
"Acha mein chalta hun. University ko dair ho rahi hai." Woh apne haath saaf kar ke utha aur darwaze ki taraf lapka.
"Phir mulaqaat hogi" Isse pehle ke woh ghar ki dehleez paar kar deta, woh ye ilfaaz bolna na bhoola tha goya us pe apna haq jatana chaha.
"Itna yakeen hai apko?" Woh bhi poochna na bhooli thi.
"Bilkul" Woh keh ke jaa chuka tha aur Tarika wahan khadi muskura rahi thi.