Zid

Chapter 14

Abhijeet ne gaadi apni university ke saamne park ki aur university ke gate ke zariye andar chala gaya. Woh aj university kaafi jaldi pohanch gaya tha. Us ki aankh subah sawere khul gayi thi. Purvi soyi hui hui thi. Us ne socha ke aaj jaldi chala jaaye jab aankh khul hi gayi hai toh. College abhi taqreeban veeraan tha. ikka dukka larke larkiyaan hi kisi kone mein nazar a rahe the. Woh is sab pe ghor abhi kar hi raha tha ke us ne Kevin ko aik kone mein khamosh sa betha dekha. Woh muskurata hua us ki taraf barha.

"Hi Kevin" Abhijeet muskurate hue Kevin ke qareeb hi beth gaya.

"tum.." Kevin ne hichkichate hue yahan se uthne ki koshish ki.

"Mein Abhijeet..Shayad tumhe yaad na ho. Please uth ke mat jaana. Mein tumhe yahan tang karne nahi aaya, tum se baatein karne aya hun" Abhijeet ne bebasi se Kevin ko rokne ki aik kacchi koshish ki.

"Ap..Ap kyun a jaate hain baar baar mere paas..Meine kya bigada hai ap ka. Please ap jaiye aur please mujhe maaf kar dijiye is badtameezi ke liye" Kevin ne aankhon mein bebasi samo kar kaha. Woh kashmakash mein tha. Woh kisi aise shakhs ko apne qareeb karne ka khatra mol nahi le sakta tha jo bade mehlon jaise gharon mein rehte ho. Use apni auqaat maloom thi aur use dost bhi apni auqaat ke barabar ka hi chahiye.

"Sab aik jaise nahi hote" Abhijeet ne mayoosi bhari aik gehri saans le kar rukh phair liya.

"Kya matlab?" Kevin ne nazar utha kar Abhijeet ko chounk ke dekha.

"Tum kyun mujh se door bhaag rahe ho. Tumhari hi tarhan aik insaan hun mein bhi. Jis tarhan tum akele ho, usi tarah mein bhi akela hun. Dosti karna chahta hun tum se. Karo ge mujh se dosti?" Abhijeet ne thandi saans le kar Kevin ki taraf dekha aur dosti ke liye haath aage barhaya.

"Maaf kijiye ga magar dosti agar barabari mein ho to hi behtar hai. Yeh bejod dostiyaan zyaada der nahi chaltein aur mein kisi aisi bejod dosti ka wajood apne kandhe pe le kar nahi chal sakta" Kevin ne Abhijeet ki aankhon mein aankhein daal kar kaha. Abhijeet ko us ki aankhon mein apne liye bartari dikhi aur khud ke liye kam tari. Yeh soch kar use afsos hua ke kese dostiyaan auqaat aur barabari ke naam pe bat chuki hain.

"Dosti to sirf dosti hoti hai na. Yeh dil ka rishta hota hai. Is mein khoon, zaat, haisiat, rutba, muqaam nahi dekha jata" Abhijeet dukh se Kevin se mukhatib hua. Us ki saari umeedein toot gayein theen. Pehli baar koi use itna acha laga tha ke woh use dost banana chahta tha magar yahan bhi sab se pehle haisiat aur rutba a gaya tha.

"Yeh baatein ap ki samajh mein nahi ayengi. Sach to yahi hai ke is bejod dosti mein na hi mera faida hai aur na hi ap ka" Kevin ne sanjeedgi se kaha aur apni class ki taraf chal pada. Abhi abhi bell baji thi.

Abhijeet hairat aur dukh se Kevin ko jaata dekhta raha. Us ne ghadi pe waqt dekha. Kitni jaldi guzar gaya tha waqt. Woh yeh soch kar aaya tha ke itna waqt hoga class shuru hone se pehle ke woh to bore hi ho jaye ga.

Abhijeet apne kamre mein betha apni aur Kevin ki woh mukhtasar si magar badi talkh guftagoo ko yaad kar raha tha. Reh reh ke aik aik ilfaaz Abhijeet ke dimaag mein baar baar ghoom raha tha. Abhijeet ka dil chaha ke is society ko tabah kar de jis ko in logon ne haisiat, muqaam aur rutbe mein baant diya hai aur mukhtasar kar diya hai.

"Abhijeet Bhai, ap itne chup chup kyun hain aur kab se kamre mein bethe hue hain. Aisa kyun?" Abhijeet ko pata bhi na chala ke kab Purvi us ke kamre mein daakhil hui hai. Woh to jab us ki awaaz kamre mein goonji to us ki moujoodgi ka ahsaas hua.

"Bas dil udaas sa ho raha hai" Abhijeet ne pheeki se muskurahat Purvi ki taraf uchaali.

"Aur aisa kyun hai bhai" Purvi ne pareshaani se poochte hue kaha.

"Jab bhi mein is society aur is ke khokhle asoolon ke baare mein sochta hun to mera dil udaas ho jata hai. Kyun hum logon mein yeh ameer aur gareeb ka complex paida ho gaya hai. Kyun na hum sab ko hi sirf aik insaan samajh lein. Kisi tag se joda na karein jo phir kabhi kabhi poori zindagi ap ki zaat ke saath latka reh jaata hai" Abhijeet un khokhle asoolon ko yaad kar ke bas afsos ki aik lambi saans hi bhar saka. Woh bohat bebas tha. In asoolon ko badalna koi asaan kaam nahi tha. Barson se chale aye asool kahan asaani se badalte hain.

"Ap sahi keh rahe hain Abhijeet Bhai. Magar kya kar sakte hain. Yeh duniya aadi hai in bekaar tags ki. Unhe taskeen milti hai yun insaan ko insaan se judaa karne mein. Itne faasle isi liye to hain" Abhijeet ki baat sun ke Purvi ka dil bhi udaas ho gaya tha aur woh bhi is mouzoo pe sochne lagi thi. Woh jaanti thi ke us ka bhai hamesha se hi rutbe, haisiat, jaisi baaton se kitrata tha.

"Acha Purvi, Mein zara dil halka karne ke liye bahar ja raha hun. Dil bohat bhaari sa ho gaya hai. Kuch dair bahar ki thandi hawa khaun ga to theek ho jaun ga. Aur haan yaad aya. Meine apne aik janne waale se kaha tha ke tumhare liye piano tutor ka bandobast kar de. Us ne intezaam kar diya hai. Tutor aj shaam 5 baje aaye ga. Abhi galban 4 baje hain. Sorry, mujhe pehle batana yaad nahi raha. To tum dekh lena, agar sahi laga to ok warna mein koi aur bandobast karne ki koshish karun ga" Abhijeet ne pehle apne bahar jaane ki wazahat ki aur phir achanak hi use tutor ke baare mein yaad aaya. Use to kal hi pata chal gaya tha tutor ke baare mein magar Purvi ko batana bhool gaya tha.

"Are, ap ko ab batana yaad aaya hai. Chalein, maaf kiya. Waise tutor hai kon?" Purvi ne pehle shikaiti andaaz ikhtiyaar kiya aur phir kuch tafseel lene ke chakkar mein par gayi.

"Are mujhe nahi pata. Mujhe Amar ne bataya to mene bas haan kar di. Tum dekh lena na" Abhijeet ne jaldi jaldi jawaab diya aur phir bahar chala gaya kuch dair ko hawa khaane aur awaara gardi karne.

Purvi lounge mein bethi hui thi. Ghadi 5 baj kar 5 minute baja chuki thi magar abhi tak tutor ka koi ata pata nahi tha. Purvi ko ghussa aya ke janaab tutor sahab pehle din hi late hain.

"Kamaal hai, pehle din to waqt ki zara pabandi karni chahiye thi" Woh piano seekhne ko betaab ho rahi thi ke sirf 5 minute ki bhi dairi bardasht nahi ho rahi thi.

Abhi woh yeh soch hi rahi thi ke darwaaze pe bell hui.

"Lagta hai a gaye janaab" Purvi khushi aur josh se barbarayi.

Is se pehle ke Sakeena baaji aatein darwaaza kholne ke liye. Woh khudi darwaza kholne ke liye dodi dodi chali gayi. Darwaaza khola to aik ajeeb hi hairat darwaaze pe us ki muntazir thi.

"Kevin" Purvi hairat aur beyaqeeni se barbarayi.

Saamne darwaaze pe khada aur koi nahi balke Kevin tha. Wohi Kevin jo Purvi ke dil ke bohat qareeb ho gaya tha. Kevin ne saada si safaid button waali shirt aur saath mein aik aam si pant pehni hui thi. Magar woh pehle se mukhtalif lag raha tha. Lagta tha ke khaas ahtamaam kiya gaya ho tayaari pe.

Kevin ne bhi Purvi ko hairat se dekha. Us ki zubaan sun ho kar reh gayi aur taangein kapkapa ke reh gayein.

"Purvi" Bilaakhir woh dheere se bol paaya tha.

To Be Continued