Zid

Chapter 15

Kevin ne bhi Purvi ko hairat se dekha. Us ki zubaan sun ho kar reh gayi aur taangein kapkapa ke reh gayein.

"Purvi" Bilaakhir woh dheere se bol paaya tha.

"Tum yahan kaise Kevin?" Purvi ne khush gawaar hairat ke saath poocha. Aik dam hi us ke chehre pe laali chaa gayi thi.

"Mein..mein to yahan tuition parhaane aaya hun. Tum Purvi..Kya tum yahan rehti ho?" Kevin ne apne yahan aane ka maqsad mukhtasaran beyaan kiya aur phir hairat se is aali shaan mahal jaise ghar aur Purvi ko dekha.

"Kya..Tum yahan tuition dene aye ho? Wow..Han Kevin, mein yahin rehti hun, yeh mera ghar hai aur tum yahan mujhe hi piano ki tuition dene aye ho..kisi aur ko nahi" Purvi khushi se taqreeban cheekhti hai. Aise maloom hota tha jaise use us ke pasandeeda shakhs ka kuch saath mil gaya ho woh aise waqt pe jab us ne socha bhi na tha.

"Tum Purvi? Oh..mujhe pata nahi tha ke tum woh larki ho" Kevin ne muskurane ki koshish ki magar shayad muskurana mushkil ho raha tha.

"Kya hua? Tum khush nahi ho kya? Mujhe dekh ke khushi nahi hui tumhe?" Purvi ne sawaaliya andaaz mein Kevin ki aankhon mein dekh ke shikwa kiya. Kuch rooth sa gaya tha us ke chehre ki muskurahat mein.

"Nahi, aisi baat nahi hai Purvi" Kevin ne muskura ke Purvi ki taraf dekha. Woh khush kyun na hota Purvi ko dekh kar. Woh us ke saath jese mehsoos karta tha, waise us ne kabhi kisi ke saath mehsoos na kiya tha magar. Magar shayad use apni auqaat yaad a gayi thi jo is aali shaan ghar ke qaabil na thi. Use maloom tha ke Purvi ameer hai magar woh itni ameer hogi, yeh to us ke wehm o gumaan mein bhi na tha. Purvi ke saath pal bitate bitate woh bhool sa gaya tha un ke beech ke faraq ko jo Kevin ki nazron mein bohat bada tha. Magar aj sab nazron se saamne ayaan tha aur use apni auqaat bhi yaad a gayi thi. Woh is ghar mein aik mulaazim se zyaada ki haisiat na rakhta tha.

"Kevin, tum soch nahi sakte ke mein kitni khush hun tumhe yahan, apne ghar mein dekh kar. Aur mujhe to pata hi nahi tha ke tum piano bhi bajate ho. Sirf bajate hi nahi ho, sikhate bhi ho" Purvi ne Kevin ko andar bulaya. Kevin andar a gaya. Purvi musalsal Kevin se khushi se keh rahi thi.

"Tum yahan betho. Is se pehle ke hum piano bajaana seekhein. Kuch thanda ho jana chahiye. It makes you feel really fresh aur phir hum jis cheez ka bhi agaaz karein ge, woh acha hi hoga.

"Nahi, thande ki zaroorat nahi hai Purvi. Mein theek hun. Aur waise bhi, mein yahan mehmaan to nahi, mulaazim hun" Kevin ne Purvi ko rokne ki koshish ki. Kevin ne chaaha ke woh is waqt aik dost ki bijaaye aik mulaazim ki tarah hi bartao rakhe. Kyunke woh yahan isi haisiat se aya tha aur use yeh bhulana hargiz na tha.

"Khabardaar Kevin. Mujhe nahi pata ke tum yahan mehmaan ho ya mulaazim, mujhe bas yeh pata hai ke tum mujhe bohat azeez ho aur hum dost hain. Please humari dosti ko yun kharaab to mat karo" Purvi ne naraazgi se Kevin ko dekha aur shikwa karna chaha kyunke woh Kevin pe apna jayaz haq samajhti thi, woh haq jo unki dosti use deti thi. Use bohat dukh pahuncha tha Kevin ke aise rawaiye se.

"Mein..Purvi..acha theek hai. Sirf is liye kyunke dost mana hai tumhe" Kevin pehle hichkichaya magar phir us se Purvi ki naraazgi aur shikwa saha na gaya. Us ke shikwe use dil pe kisi teer ki tarah lag rahe the kyunke shayad us ke shikwe itne koi ghalat bhi na the.

"Ab zara muskura bhi do" Purvi muskurati hui us ki aankhon mein dekh ke boli.

"Ab theek hai?" Kevin zara muskura kar Purvi se bola. Purvi ne pyaar se sar haan mein hila diya.

Abhijeet ne ghar se nikalne ke baad apni gaadi ka rukh kiya tha aur kuch dair woh yunhi apni gaadi ko sarkon pe dorata raha. Aik dam hi woh raasta shanasa laga to use yaad aya ke yeh to wohi raasta hai jis pe us ki khaala ka ghar hai. Us ne kuch sochne ke baad apni khala ke ghar ka rukh kiya. Jab woh un ke ghar ke qareeb pahunch gaya to gaadi se utra aur darwaaze ki bell bajayi. Use dil hi dil mein koi umeed si thi, ke shayad aj bhi wohi chehra darwaaza khole, jise dekh ke woh jeeta hai. Woh jaanta tha ke woh yahan nahi rehti magar woh yahan aati jati to rehti hai. Aur yahi wajah us ki umeed barhaane ke liye kaafi thi. Us ne bell bajate hue dil mein dua ki ke aj bhi woh khala ke ghar pe ho aur darwaza kholne bhi wohi aye. Andar se qadmon ki chaap ki awaaz ayi aur us ne apni saansein qaabo mein kar lein, darwaaza khula aur us ki umeed toot gayi. Darwaza us ki khala ne khola tha, Tarika ne nahi. Us ki muskurahat, us ka josh kuch simat sa gaya.

"Abhijeet beta tum, ao na andar a jao" Abhijeet ki khala ne pyaar se Abhijeet ko andar bulaya aur Abhijeet muskurata hua andar dakhil ho gaya. Us ki nazrein abhi bhi idhar udhar bhatak rahi theen, ke shayad woh yahin kahin ho, sirf darwaaza hi kisi wajah se kholne na ayi ho. Magar woh to kahin bhi nazar nahi a rahi thi. Us ki aankhein udaas ho gayein jo us ke deedaar ke liye machal rahi theen.

"Abhijeet beta, idhar udhar kya dekh rahe ho?" Abhijeet ki khala ne jab Abhijeet ko idhar udhar yunhi kuch dekhte hue paya to chounk ke poocha.

"Kuch nahi khala. Pichli baar aya tha yahan to kuch kho gaya tha mera yahan. Wohi dhoondh raha tha ke shayad mil jaaye" Abhijeet ne maani khaiz lehje mein kaha.

"Kya kho gaya tha Abhijeet beta. Meine shayad sambhal ke rakh diya ho" Abhijeet ki khala ne pareshaani se Abhijeet ko dekha ke kahin gumne waali woh cheez bohat qeemti aur zaroori na ho.

"Khair chorein. Ap nahi samjhein gi" Abhijeet sharmeeli muskurahat ke saath bola jis ka Abhijeet ki khala ko kuch samajh na aya.

"Kya matlab beta?" Abhijeet ki khala ne uljhi nazron se Abhijeet ko taka.

"Kuch nahi khala. Ap bataein, aj khane mein kya banaya ap ne?" Abhijeet ne apni khaala ko taalte hue kaha aur phir mozoo badal diya. Ab Abhijeet ki khala use bata rahi theen ke unhon ne kya banaya hai.

"Bhook lag rahi hogi tumhe. La dun tumhe khana?" Abhijeet ki khala ne pyaar se Abhijeet ko dekha aur phir khane ke baare mein poocha.

"Ji, La dijiye. Bohat bhook lag rahi hai" Abhijeet ne pyaar se kaha.

Abhijeet ki khala ne khaana Abhijeet ke saamne rakh diya. Abhijeet aur Khala ne mil kar pait bhar khana khaya. Phir Abhijeet apni khala se tarhan tarhan ki baatein karne laga. Magar dil mein to ab bhi aik intezaar tha, ke shayad Tarika a jaye. Aur isi liye woh yahan rehne ka zyaada se zyaada bahaana dhoondh raha tha. Ab 7 baj chuke the, magar Abhijeet ki umeedein poori ho ke nahi de rahi theen. Lagta tha ke intezaar raigaan chala gaya. Ab woh uthne hi wala tha ke darwaaze pe ghanti baji. Is se pehle bhi kayi baar darwaaze pe ghanti baj chuki thi magar har baar mayoosi hi qismat mein ati, kyunke darwaaze pe woh na hoti. Us ne bezaari se ghanti suni.

"Mein dekh ke ata hun" Abhijeet ne khala ko kaha aur darwaaza kholne chala gaya. Aur is baar shayad us ki umeedein kaam kar gayein ke darwaaze pe wohi dilruba khadi thi. Abhijeet ne khushi se use takreeban ghoora.

Tarika darwaaze pe khadi hui thi. Us ne peela shalwar qameez pehna hua tha. Saath hi peela dupata sar pe phaila kar liya hua tha. Tarika ne hairat se Abhijeet ko dekha jo takreeban darwaaze ke doosri taraf deewar se taik lagaye sirf use hi dekh raha tha.

"Ap Abhijeet ji" Tarika khush gawar hairat se boli thi.

"Kaha tha na ke phir mulaqaat hogi" Abhijeet ne Tarika ki aankhon mein aankhein daal kar pyaar ki aisi shiddat se kaha jo Tarika ne aj se pehle kabhi mehsoos na ki thi.

To Be Continued