Sorry guys for the late update. My school has started and I got busy with it.
Zid
Chapter 16
"Kaha tha na ke phir mulaqaat hogi" Abhijeet ne Tarika ki aankhon mein aankhein daal kar pyaar ki aisi shiddat se kaha jo Tarika ne aj se pehle kabhi mehsoos na ki thi.
"Mujhe pata nahi tha ke ap apne waade ke itne pakke niklein ge" Tarika sar jhuka kar kehti hai. Pata nahi use Abhijeet ke saamne kya ho jata tha. Woh to bas us mein hi kho jaati thi.
"Ab pata chal gaya?" Abhijeet ne pyaar lafzon mein samo kar sawaal kiya. Woh sawaal to sirf aik bahaana tha us se baat karte rehne ka, ke woh ab bas us ki hi awaaz sunna chahta tha. Tarika ab bhi darwaaze pe khadi thi. Us ke pair wahin jam gaye the aur aankhein sirf aik hi chehre pe theen, aur woh tha Abhijeet.
"Kon aaya hai Abhijeet beta?" Is se pehle ke Tarika Abhijeet ki baat ka koi jawaab deti, Abhijeet ki khala ki awaaz qareeb hoti mehsoos hoti hai. Tarika beikhtiyaar hi sar pe apna duppata theek karti hai aur Abhijeet seedhi tarhan khada ho jata hai.
"Tarika Ji ayein hain" Woh keh khala se raha tha magar us ki aankhein to musalsal Tarika pe atki theen.
"Tumhe yaad thi ye Abhijeet?" Abhijeet ki khala bhi ab darwaaze pe a gayein theen aur khushgawar hairat se Abhijeet se pooch rahi theen.
"Inhe koi bhool sakta hai kya?" Abhijeet maani khaiz lehje mein bola aur Tarika ko Abhijeet ko beikhtiyaar hi aankhein dikhaani par gayein magar lagta tha ke Abhijeet pe to koi asar hi nahi hua.
"Kya matlab Abhijeet beta" Abhijeet ki khala ne na samjhi se kaha.
"Mera matlab tha ke mujhe yeh yaad hain, bohat khush ikhlaak hain isi liye mujhe yaad reh gayein. Kya mein inhe yaad hun. Kya mein ap ko yaad hun Tarika ji?" Abhijeet ke chehre pe ab bhi muskurahat aur shararat raks kar rahi thi aur Tarika apna mun chupaana chahti thi magar chahne se kuch ho thodi na jata hai.
"Ji, mujhe ap yaad hain Abhijeet ji" Tarika ba mushkil hi apni sharmahat ko apne andar dabaati hai aur masnooyi sanjeeda andaaz mein kehti hai.
"Yeh kya tum log yahan par khade ho kar yaad ho yaad ho waala khail khail rahe ho. Chalo, andar to ao Tarika bitiya. Tum bhi na Abhijeet, us bichaari ko andar bhi nahi aane de rahe the" Abhijeet ki khala jhunjhulahat se kehti hain aur Tarika ko le kar andar ki taraf chali jaati hain.
"Are, meine kya kiya hai?" Abhijeet ka jumla bolte bolte sargoshi mein tabdeel ho gaya kyunke Khala aur Tarika andar chali gayi theen aur Abhijeet ab bhi wahin khada tha.
Woh bhi darwaaze se hat kar andar ki taraf lounge mein chala aaya. Bil aakhir us ki muraad poori ho hi gayi thi. Woh chehra bil aakhir jhalak dikha hi gaya tha.
"Kaise aana hua Tarika bitiya" Abhijeet andar lounge mein aaya to Khala aur Tarika ko sofon pe betha paaya. Khala Tarika se pyaar se pooch rahi theen.
"Samajh lijiye ke khuda ne Tarika ke dil mein yahaan aane ka khayaal daal kar meri muraad poori kar di hai. Bas yahi sabab kaafi hai" Abhijeet ne dil mein socha. Zaroor yeh us ki us dua ka hi asar tha ke woh khud chal kar yahan us ke paas a gayi thi.
"Ap se milne ke liye kisi wajah ki zaroorat thodi hai Khala. Ap meri maa jaisi hain. Meri maa is duniya mein nahi hai, mujhe is ka afsos hai magar ap mil gayein hain is baat ki shukar guzaar hun. Aur betiyaan apni maaon se milne ke liye kisi wajah ko nahi dhoondtein" Tarika ne sacche dil se kaha. Maa baap ka saath us ke haath se bohat jaldi chut gaya tha. Magar jab jab woh Abhijeet ki khala ko dekhti to use apni maa yaad aati aur khala se apni maa ki khushboo aati.
"Meri pyaari beti. Haan, mein tumhari maa hun. Kabhi apne ap ko akela mat samajhna" Abhijeet ki khala ne Tarika ka sar apni god mein rakh liya aur us ke sar pe narmi se haath phairne lagein.
"Beti mil gayi to kya bete ko bhool gayein" Tarika aur Khala to shayad Abhijeet ki mojoodgi ko hi nazar andaaz kar chuki thi. Abhijeet jab pyaar aur shararat se khala se bola to dono ne hi seedhe ho ke us ko dekha.
"Are nahi, tum bhi mere bete ho. Tarika bhi meri beti hai aur Purvi bhi meri beti hai. Tum sab mere bacche ho" Khala ne pyaar se Tarika aur Abhijeet ko dekhte hue kaha. Abhijeet ne khala ko pyaar se gale laga liya.
"Purvi kon hai?" Tarika ke saamne jab aik naya naam aaya to us ne tajasus ki khatir poocha.
"Purvi meri behan hai, ikhloti" Abhijeet ke chehre pe aik muskurahat chaa gayi Purvi ke baare mein sochte hue. Us ki pyaari behan.
"Oh, acha" Tarika bhi jawaab mein muskuradi.
Kevin aur Purvi aur Purvi ke is aali shaan bade se ghar mein living room mein sofon pe bethe hue the ke tabhi Sakeena baji tray mein do glass juice ke layein. Lagta tha ke glass abhi abhi pehli baar istemaal hue hain. Bilkul naye nikore, jadeed design, aur bilkul saaf aur shifaaf. Kevin ki nazrein to sirf unhi glasson pe chali gayein theen. Aise shahana glass mein us ne kabhi bhi kuch nahi piya tha. Woh to bachpan se steel ke glass istemaal karta aaya tha. Sheeshe ke glass to dikhte bhi mushkil se hi the.
"Kevin, juice lo na" Sakeena baji Kevin ke saamne tray le kar khadi hui theen magar Kevin to shayad kahin kho gaya tha. Kisi gehri soch mein gum tha. Purvi ne jab Kevin ko yun dekha to use pukaara.
"Oh, haan. Shukriya" Purvi ki awaaz Kevin ko wapas is duniya mein le aayi. Us ne Sakeena baji ko apne saamne juice ka glass liye khada dekha. Us ne hichkichate hue ahtiyaat se tray se glass utha liya ke kahin beahtiyaati ki wajah se glass toot hi na jaaye. Glass ka tootna bhi mumkin tha kyunke us ke haath kaanp rahe the.
"Piyo na. Aise kya dekh rahe ho?" Sakeena baji jab lounge se chali gayein to Purvi ne glass se juice ka aik ghoont halaq mein bhara. Magar Kevin ko dekh ke ruk gayi jo abhi bhi glass haath mein liye hue tha.
"Kuch nahi" Kevin ne muskura kar juice ka aik ghoont bhara.
"Kaisa laga juice?" Purvi ne use ghoont bharte dekha to poochna zaroori samjha.
"Bohat acha hai. Itna taazgi bhara juice meine aj se pehle kabhi nahi piya" Kevin ne aik ghoont bhar ke glass side pe padi maiz pe rakh diya. Juice pee ke waqaie us ke jisam mein taazgi a gayi thi.
"Dekha, meine kaha tha na. Mujhe pata nahi tha ke tum a rahe ho warna mein koi intezaam hi kar leti. Pehli baar mere ghar aaye ho" Purvi ne maazrat wale andaaz mein afsos se kaha. Use waqaie bohat afsos tha is baat ka.
"Koi baat nahi Purvi. Tumhe pata thodi na tha ke aj mein achanak hi tumhare ghar a jaun ga. Tumhe kaise pata ho sakta tha jab mujhe bhi nahi pata tha ke mein tumhare ghar aane waala hun" Kevin ne mahol halka karne ki choti si koshish ki jis pe Purvi muskura di. Purvi ko muskurata dekh Kevin ko bohat acha lag raha tha. Us ki muskurahat bohat haseen aur masoom thi.
"Chalo, chodo yeh sab. Mein tumhe apna ghar dikhati hun" Purvi khushi se sofe se uth jaati hai.
"Purvi, ghar kisi aur din dekh loonga. Aj tumhe parhaane aaya hun aur mujhe apni zimmedariyon se peeche hatna ya un ke saath daga karna nahi aata" Kevin ne aankhon mein sanjeedgi samo kar kaha.
"Tum itna ghabra kyun jate ho Kevin. Agar mein tumhe apna ghar bhi dikha dun gi to kya bura ho jaaye ga. Is se tumhaari zimmedari pe koi farak nahi pare ga" Purvi ne naraazgi se gila kiya. Use yeh Kevin pasand na tha jo har baat pe hichkicha jaye, ghabra jaaye. Woh to chahti thi ke woh khul jaaye, jee ke zindagi jiye. Magar woh apne ap ko kamtar hi samajhta tha aur usi zuam mein rehta tha aur shayad rehna chahta tha.
"Tum bohat ziddi ho magar aik baar to meri bhi zid maan lo" Kevin ne apne sar ke baalon mein haath chala kar muskura kar kaha.
"Agar zid hai to theek hai. Maan li. A jao. Music room mein chalein" Purvi muskurati hui music room ki taraf barh gayi. Kevin bhi us ke peeche peeche ata gaya.
To Be Continued