Recap: Abhijeet is son of Praduman and Aanchal. Daya is son of Sardar Salunkhe and Deepika. Praduman and Salunkhe are brothers just for name. Praduman wanted to marry Aanchal who was out of his family and in his family, there was a system that marriage is only taken place in family but Praduman broke his family rules and married Aanchal. Salunkhe and his dad rejected Praduman to stay in this home anymore. And since that day, Praduman and Salunkhe became enemies. They made their kids also ensure that they hate each other. One day in college Abhijeet saw Daya who was his cousin and he hated him. And there started the cold war. Daya also came to know about Abhijeet. Furthermore, They both got same classes and their teacher gave Abhijeet order to help Daya with studies as Abhijeet is a topper. Abhijeet furthermore shares his inner feelings with his friend Rakesh who tells him that he is overreacting and everything can go back to normal if Abhijeet and Daya tries.
Abhijeet apne college ke bench pe betha hua tha. Us ne is waqt safaid color wali t_shirt ke saath black jeans pehni hui theen. Us ke haath mein aik kitaab thi. Us ne pehle hi physics ke test ki tayaari kar li thi. Is waqt, woh sirf aik fantasy novel parh raha tha apna ap ko shaant karne liye, khud ko pursukoon karne ke liye. Par bohat koshish ke bawajood bhi Daya ke liye uska ghussa aur nafrat umad jati thi, Us ka dushman us ke bohat qareeb tha, hans raha tha, khel raha tha aur woh tha ke kuch kar hi nahi pa raha tha. Abhi use apne ap se ye shikwa hua hi tha ke use Rakesh uski taraf aate dikha. Abhijeet ne berukhi se mun phair liya. Use Rakesh se yeh umeed nahi thi, woh us ke dard, uski tarap ko samajh hi nahi pa raha tha. Woh samajh nahi pa raha tha ke uske lafzon, uske lehje mein aisi konsi tarap, konsa dard nahi tha ke Rakesh us ka college ka sab se acha dost bhi use is kade waqt mein samajh nahi paya.
"Abhijeet, kab tak naraz raho ge?" Rakesh ne dheere se kaha aur Abhijeet ke saath hi bench pe hi beth gaya.
Abhijeet ne Rakesh ki baat ka koi jawaab nahi diya aur mun phairne ke saath saath hi apna novel chehre ke gird rakh liya jaise woh anjaan banne ki koshish kar raha ho, shayad anjaan is baat se ke Rakesh bhi idhar hai ya anjaan us baat se ke woh Rakesh ko janta hai.
"Jeet yaar, ye kya harkat hai? Tu kab tak naraz rahe ga mujh se, apne sab se ache dost se, bachpan ka yaraana hai hamaara, school aur phir school se college. Yaar ye kitaab to hata, mein kehta hun hata isko" Rakesh se jab Abhijeet ki chupi sahi na gayi to usko apni aur uski dosti ke wastein dene lag gaya. Woh jaanta tha ke Abhijeet us se zyaada der tak naraz nahi reh sakta. Us ne dhos jamaate hue Abhijeet ke haath se uska wahid hathiyaar yani kitaab bhi cheen li.
"Dekh Rakesh, tu dost nahi hai mera warna koi samajhta na samajhta par tu to samajhta mere ahsasaat ko, mere jazbaat ko" Abhijeet se jab aur saha na gaya to phat pada ye na khayal karte hue ke uske ilfaaz Rakesh ko kitna dukh poncha rahe hain. Rakesh ko laga jaise ye ilfaaz na hon, koi teer hon. Woh nahi jaanta tha ke Abhijeet itna jazbaati bhi ho sakta hai ke aik chote se ikhtelaaf pe saalon ki dosti ko bhula de.
"Yaar Jeet, kya keh raha hai tu? Mein..mein tera dost nahi. Aisa to mat keh. Yun hamari dosti ko badnaam na karo. Tum bhool gaye ho kya sab kuch aj aik choti si baat ke aage? Doston mein ladaiyan hona itni badi baat nahi hoti, han hamari bhi shayad kayi baar ladayi hui hogi par ... par tune mujhe is tarah duthkara kabhi nahi hai..kabhi hamari dosti ko tana nahi diya...kyunke hum jante the ke jitni bhi ladayi ho jaaye na..wapis to hame aik doosre ke pas ana hi hai par aj..aj tum ne mera ye maan tod diya hai" Rakesh ki awaaz mein dukh jhalak raha tha. Abhijeet aur uski barson ki dosti thi. Use Abhijeet ke ilfaaz ki talkhi ne tod ke rakh diya tha. Ye kaisi be aitabaari thi jis ne saalon ki dosti bhula di.
"Yaar, I'm sorryy...Mein..meine shayad tumhe kuch zyada hi keh diya par tum bhi to mere jazbat samjho na..Kya kabhi mein tum se is tarah naraaz hua hun? Nahi na? kyunke baat itni badi nahi hoti thi, woh chote chote masle, choti choti ladaiyaan hoti theen par ab baat itni choti, itni saada aur aam nahi hai jisko mein yunhi nazar andaaz kar dun. Mujhe dukh is baat ka hai ke tum mere jazbaat nahi samajh sake" Abhijeet ki awaaz mein dukh aur sadme ki parchaiyaan theen. Shayad woh bohat jazbaati ho raha tha par woh is baat ko samajh nahi pa raha tha. Woh apne jazbon pe bund maarne mein nakaam ho raha tha. Us ke jazbe, us ke ahsaas khud ba khud hi ayan hote ja rahe the kabhi talkhi ki soorat mein to kabhi bebasi ki shakal mein.
"Koi baat nahi Abhijeet. Mein shayad waqaie tumhare jazbon ko samajhne mein nakaam ho raha hun par koshish zaroor kar raha hun aur please ab hamari dosti pe shak mat karna. Mein hamesha tumhare sath hun" Rakesh aakhir Abhijeet ke aage ghutne taik hi diye the. Woh nahi chahta tha ke Abhijeet us ki taraf se na umeed ho jaaye aur use bhula de.
"Pinky Promise? Aur haan us Daya Praduman ko na tum ne mun bhi nahi lagana. Mein bata raha hun warna woh chalak kahin tumhe bhi mere khilaaf na kar de. Waise bhi Bade chalak hote hain ye Sardaar" Abhijeet ne narm lehje mein kaha par us ke lehje mein hi kahin woh nafrat bhi chupi thi Daya aur us ke khandaan walon ke liye.
"Ok baba. Bilkul 100 feet dur rahunga us Daya se aur haan, tumhare khilaf na mujhe koi nahi kar sakta is liye chill aur ab chalo, class ko dair ho rahi hai" Rakesh ne hami bharte hue kaha aur class ki taraf jaane ke liye qadam barha diye.
"Ok chalo" Aur bilakhir Abhijeet ke chehre par bhi halki si muskan a hi gayi thi Rakesh ke saath qadam barhate hue.
Daya class mein daakhil hua to kuch larke larkiyan pehle se hi apni kursiyon par bethe hue the. Daya class shuru hone se pehle hi a gaya tha. Us ki ye aadat thi ke har kaam ko us ke waqt se pehle hi nipta liya jaaye to zyada acha hota hai. Daya ja ke aik kone wali kursi par beth gaya jis ke saath do kursiyan khali theen. Ahista ahista class larke larkiyon se bharti gayi. Sir apna lecture shuru karne hi waale the unhon ne Abhijeet aur Rakesh ko bhaagte hue class mein dakhil hote dekha. Woh dono waqt par the par ain waqt par aik kaam yaad ane ki wajah se thodi si dair ho gayi thi. Rakesh class mein badhta gaya par use junhi ahsaas hua ke Abhijeet uske humqadam nahi hai to usne peeche mud kar Abhijeet ko dekha jo Daya ki taraf dekh raha tha.
"Kya kar rahe ho Abhijeet? Andar chalo, kyun yahan khada reh ke apna aur mera tamasha bana rahe ho poori class ke saamne" Rakesh ne sambhal ke Abhijeet ke kaan mein sargoshi ki, itne mein woh samajh gaya tha ke poori class mein sirf Daya ke saath hi do kursiyan khali hain aur wahin bethna pade ga aur woh katra raha hai wahan bethne se.
"What's your problem Abhijeet? Why are you standing here like a statue? Any problem?" Ab to poori class aur Sir bhi Abhijeet aur Rakesh ko ghoor ghoor kar dekh rahe the jab ke Daya Abhijeet ki halat se dil hil dil mein hiz utha raha tha aur Abhijeet ko dekh kar bade hi ada se muskura raha tha jo Abhijeet ka ghussa aur badha raha tha.
"Tum jante ho na ke mein wahan nahi bethun ga, is se acha hai mein is class se hi chala jaun" Abhijeet ne sargoshiyana andaz mein Rakesh ko bataya aur phir waqaie class se bahir jane ke liye qadam badha diye par is se pehle ke woh apne amal pe dar amal karta, Sir ki taiz awaaz ne uske pair pakad liye the.
"Abhijeet, kahan ja rahe hain ap? You are leaving my class for no reason? Wapas jaiye aur Daya ke saath waali kursi par beth jayein. Pata nahi, ye kya tamasha lagaya hua hai. Ainda aisi badtameezi bardasht nahi hogi" Sir ki awaaz mein tahakum aur sakhti thi. Unhe samajh nahi a rahi thi ke Abhijeet jesa bright student itna badtameez kese ho gaya hai.
"I'm sorry sir. Mujhe laga ke meri tabiyat kharab ho rahi hai isi liye mein apne locker se tablet lene ja raha tha" Abhijeet ko barwaqt yahi bahana soojh paya.
"Uff, had karte hain ap bhi. Pehle nahi bata sakte the" Sir ki awaaz mein bezari thi.
Abhijeet ne aankhon se sharmindagi ka izhaar kiya aur class se chala gaya baqol uske locker se tablet lene.
Please do review. Thank u