Hate: A Barrier Between You And Me
Chapter 8
"Aaaa" Daya ne Abhijeet ki maiz itni zor se bajayi ke Abhijeet ka dil dharak ke reh gaya aur uske mun se cheekh nikalne ke saath saath uske haath se kitaab bhi choot gayi.
"Kya hai badtameez?" Abhijeet ne kitaab uthaane ke saath hi cheenkh kar ghusse se Daya ko apni laal aankhon se ghoora.
"Woh actually, mujhe aik concept samajh nahi a raha, kya tum samjha do ge Abhijeet?" Daya Abhijeet ko is waqt meethi churi laga kyunke Daya ne bada hi meetha andaaz ikhtiyaar kiya hua tha magar us andaaz mein jo churiyon ki kaat thi woh Abhijeet ki samajh se bahar to nahi thi. Woh sab samajh raha tha.
"Agar mein kahun ke nahi samjhaunga to kya tum baaz a jao ge?" Abhijeet ne ghusse se Daya ko ghoora.
"Nahi, bilkul bhi nahi. Kyunke Raj sir ne tumhe meri zimmedaari di hai. Tumhe meri madad karni hogi. Warna nuksaan tumhara hi hai. Mein ja kar keh dun ga Raj sir se ke ap ka honehaar shahgird itna bhi honehaar aur farmanbardaar nahi hai jitna aap samjhte hain" Daya ne hans kar maza lena chaha. Use jald hi samajh a gaya tha ke college mein Abhijeet ki achi haisiyat hai, woh sab ka pasandeeda hai. Isi liye to Raj sir ne bhi Abhijeet ko Daya ki zimmedaari di thi, kisi aur ko nahi. Kyunke sab hi Abhijeet pe bohat bharosa karte the. College ke larkon larkiyon se le kar Ustaad sab hi Abhijeet ko be inteha pasand karte the. Daya pehle to Abhijeet ki mojoodgi se hichkicha raha tha magar ab use samajh mein a gaya tha ke dushmanon se nazrein churayein nahi jatein, un ki aankhon mein aankhein daal ke unhe shikast di jaati hai.
"Batao, kya masla hai?" Abhijeet ne is baar tahamul aur zarf ka saath na chorte hue araam se Daya se poocha.
"Yeh dekho, in notes mein mujhe is lafz ka matlab nahi samajh mein a raha" Daya ne lachaari aur bebasi chalkaane ki adakari karne ki koshish ki.
"Daya, mein maarunga tumhe, tum ne mujhe is liye disturb kiya hai. Yeh itna asaan sa lafz, is ka matlab nahi pata tumhe. Shame on you Daya." Abhijeet ne ghusse se jhunjhalate hue kaha. Use waqayi yaqeen nahi a raha tha ke Daya aise use disturb kare ga, use tang kare ga. Use to Abhijeet se nazrein churaani chahiye theen. Darna chahiye tha Abhijeet se. Ulta Daya Abhijeet ko hi abhi tak apni ungliyon pe nacha raha tha. Abhijeet ko mouqa hi nahi mil raha tha ke woh bhi koi qadam utha sake.
"Han na, mein tumhari tarah zaheen jo nahi" Daya hans kar tanz karta hai.
"Mein ja raha hun. Yeh notes tumhe inaayat kar raha hun. Samajh lena ke ahsaan kar raha hun tum pe. Sambhal ke rakhna aur wapis karna. Aik aik cheez usi tarhan milni chahiye mujhe. Mein apni cheezon ke maamle mein bohat hasaas hun" Abhijeet aik jitaati nazar Daya pe daalte hue apni kursi se apne baste samait uth gaya.
"Mein bhi tumhare ahsaan ke liye mara nahi ja raha Mr Abhijeet Praduman. Raj Sir ka hukam na hota to thookta bhi na in notes pe" Daya uth kar Abhijeet pe apni haisiat aur apna roub jamaane ki koshish karta hai.
"To phir keh deta hun mein ja kar Raj Sir se ke Daya ko mere ahsaan ki koi zaroorat nahi. apna shahgird khud hi sambhaliye" Yeh aik technique thi Daya ko ghussa dilaane ke liye aur us se peecha churaane ke liye. Use itna ghussa, itni jhunjhalahat apni poori zindagi mein pehle kabhi nahi hui jitna in dinon ho rahi thi. Us ka zabt kinaare pe tha. Kisi bhi dam phatne ko tayaar.
"Tum badtameezi karo ge apne ustaad se? Unki baat ko talo ge and unhe inkaar karo ge? Nahi Abhijeet, tum yeh nahi kar pao ge. Tumhe apni good boy waali haisiat bhi to barqaraar rakhni hai" Daya ne Abhijeet pe tanz kiya. Daya Abhijeet ki kamzori jaan gaya tha aur woh is ka jitna faida utha sakta tha utha raha tha. Ab baari thi Abhijeet ki. Use dhoondni thi Daya ki kamzori, jo Abhijeet ki kamzori ko Daya ke liye be asar bana de.
Abhijeet aage se kuch bhi na keh paaya. Woh bas ghusse se utha aur library se kisi toofan ki tarhan taizi se nikal gaya. Abhijeet ki aankhon mein nafrat ke jalte hue shoule the. Woh is waqt khud ko bohat bebas mehsoos kar raha tha.
Daya apne free period mein college ke lawn mein aik kone mein pade hue bench pe betha hua tha. Abhi tak us ki kisi se bhi dosti nahi hui thi. Sab hi larke use pasand karte the magar kisi se bhi baat cheet zyaada barhi nahi thi. Is waqt bhi woh yunhi betha hua notes hi cover kar raha tha jo Abhijeet ke mutabik Abhijeet ne use inayat kiye the. Achanak hi use apne qareeb hi kisi ki moujoodgi ka ahsaas hua. Koi us ke saath bench pe a kar beth gaya tha. Daya ne nazar utha kar dekha to yeh koi larka tha jise Daya ne pehle nahi dekha tha.
"Hi, Tum Daya Salunkhe ho na?" Us larke ne pur josh andaaz mein Daya se poocha.
"Han, tum theek pehchaane" Daya ne muskura kar jawab diya.
"Mera naam Arun hai. Isi college mein parhta hun. Tumhare saath aik class mein bhi hun. Tum ne shayad ghor nahi kiya" Arun ne mukhtasar ilfaaz mein apna taaruf karwaya.
"Han, abhi naya hun na. Kisi ko bhi zyaada jaanta nahi hun"
"Tumhare baare mein bohat suna hai. College mein aj kal sirf tumhara hi charcha chal raha hai" Arun ne tareefi andaaz mein kaha.
"Acha, yeh to phir college waalon ka shukriya ke itni izzat bakhsh rahe hain woh mujhe. Tum sab ka shukriya" Daya ne pyaar se shukriya ada kiya. Woh apne ap ko khush qismat bhi mehsoos kar raha tha ke sab log use itna pasand karte hain.
To Be Continued