Hello everybody. Im back with the next chapter. Thank you Guest, AbhiShikha, PoojaAbhiDeewani, PerfectAbhi, AbhiNidhi, and TsT for your reviews.

AbhiShikha: Dont worry, I won't add girls now. I will add them I dont after how many chapters but at least not before 7 or 8 chapters I guess.

TsT: Thank you for liking all of my stories and I think that girls entry will be after a major twist or the turning point of this story hopefully. hehe.

Guys one thing before we start, I just noticed that original name of Abhijeet and Daya's teacher was Mr Rathore which I did not realised and changed it to Raj Sir. So yeh meri funny ghalti ignore kar dena.

Hate: A Barrier Between You And Me

Chapter 10

Raj sir ki class khatam ho chuki thi. Abhijeet aur Rakesh aik saath class se baahir nikle. Daya apne naye dost Arun ke saath bahir nikla. Abhijeet aur Rakesh chalte chalte baatein bhi kiye ja rahe the.

"Aj bilkul acha nahi hua Rakesh. Yeh sila diya hai Raj sir ne mujhe itna acha shahgird hone ka. Kabhi..kabhi mene un ki baat manne se inkaar kiya? Nahi kiya na. Ab agar kar hi liya tha to maan rakh lete meri baat ka" Abhijeet ne apna saara ghussa aur chirchirapan Rakesh pe nikaala. Aaj tak us ne apne ustadon ki har baat kisi chun chura ke bina maani thi. Woh aik nihait farmanbardaar, zaheen, aur laaiq shahgird tha jis se sab ki hi umeedein juri hui theen.

"Abhijeet, tumhe samajhna hoga yeh ke kyunke tum itne ache shahgird ho, sab ne tum se bohat umeedein laga li hain, ab woh nahi chahte ke tum un ki baat ko taal kar un ki umeed ko tor do. Woh aadi ho chuke hain. Jab umeedein bohat zyaada barh jayein to zara si bhi kotaahi us haisiat ko thokar maar ke kharaab kar sakti hai aur phir har qadam phoonk phoonk ke rakhna parta hai. Kisi ne sach hi kaha hai ke had se zyaada bada sitaaish aur muqaam bhi khatarnaak hota hai" Rakesh pur maani lehje mein bola. Woh samjhana chahta tha Abhijeet ko ke us ko apni haisiat isi tarhan bar qaraar rakhni hai kyunke yahi us ke liye faida mand hai.

"Kaisi ajeeb baatein kar rahe ho tum. Yeh sab sach nahi hai. Itni farmanbardaari ke baad agar mujh se koi choti si nafarmaani ho bhi jaaye to faraq nahi parta" Abhijeet Rakesh ki raay se mutafiq nahi tha. Us ka aik alag hi nazariya tha magar kon sa nazariya sahi saabit hoga yeh to waqt hi bata sakta hai.

"Acha bhaiee, theek hai. Interval mein milein ge" Rakesh baat ko khatam karte hue Abhijeet ko haath hilaata hua apni agli class ki taraf rukh kar leta hai.

Arun aur Daya saath saath class se nikle the. Un donon ki hi agli class bhi same thi aur woh donon bhi chalte chalte sarsari baatein bhi karte ja rahe the.

"Yeh kitna acha hua hai na ke meri aur tumhari agli class bhi aik hi hai" Arun ne khushi ka izhaar karte hue Daya se kaha.

"Han, tum sahi keh rahe ho. Mein naya hun na, zyaada kisi ko jaanta bhi nahi. Tum ache lag rahe ho aur yeh bhi achi baat hai ke hamari teen classes same hain" Daya muskura ke Arun se bolta hai. Daya ki Arun se mulaqaat kal interval mein hi hui thi aur usi waqt se hi Arun us pe bicha ja raha tha aur yeh sab Daya ko bohat pasand a raha tha. Apna aap bohat bada aur ooncha mehsoos ho raha tha aur wese bhi use is naye college mein kisi dost ki zaroorat to thi hi to kyun na Arun hi sahi.

"Han, aur yaar. Mein to chah raha tha ke aj ke project mein tum aur mein saath kaam karein magar Raj Sir ne tumhe us topper Abhijeet ke saath pair up kar diya. Mujhe to bilkul acha nahi lagta woh. Teachers ka chamcha" Arun pehle Raj sir se un ki gairmojoodgi mein shikwe aur gile karta hai aur phir aik dam se hi Abhijeet ka naam beech le aata hai. Daya ki aankhein chamak uthein Arun ke mun se Abhijeet ki burayi sun ke.

"Acha, woh tumhe acha nahi lagta lekin kyun?" Daya ne sarsari lehje mein poocha. Us ne apne lehje aur awaaz se kuch bhi khaas zaahir na hone diya.

"Kya yahi wajah kam hai kya ke woh hum sab ka haq kha raha hai? Sab ka pasandeeda ban kar hamari haisiat to do kori ki kar di hai. Khud to laad sahab bane hote hain. Har koi us ko ahmiyat deta hai" Arun ke lehje se hasad tipak raha tha. Jab use woh sab na mil saka jo Abhijeet ke paas tha to woh jalne kurdhne ke ilawa kar bhi kya sakta tha. Lekin Daya yeh bhaanp na saka ke Arun to Abhijeet se hasad karta hai, us ki haisiat aur us ki khushiyon se jalta hai. Us ke dimaag mein to sirf aur sirf yeh baat thi ke woh Arun ko Abhijeet ke khilaaf istemaal kar sakta hai, kyunke Arun bhi Abhijeet ko nihait na pasand karta hai.

"Tum bilkul theek keh rahe ho Arun. Mujhe bhi us ke saath kaam karna bilkul pasand nahi. par kya kar sakta hun, ab to Raj sir ne faisla kar liya hai aur mein un ki baat nahi taal sakta. Mein Raj sir se kahun ga ke agle project mein to tumhe hi mere saath pair up karein" Daya dostana andaaz mein Arun se bola aur Abhijeet ke haq mein kuch na kaha.

"Yeh to bohat acha ho jaaye ga agar agle project mein tum mere saath kaam karo" Arun ne khushi ka izhaar kiya. Arun Daya se dosti karna chahta tha kyunke woh jaanta tha ke Daya aik bohat bade gharane ka chashm o charaagh hai aur aisi dostiyaan bohat faidamand saabit hoti hain. Jab college ke bache use Daya ke saath dekhein ge to us ka bhi rutba barhe ga. Jab woh is college mein naya naya aya tha to us ne Abhijeet ki shohrat se faida uthaate hue Abhijeet se bhi dosti karna chahi thi magar Abhijeet ne us ki dosti thukra di thi kyunke use bohat kam waqt mein hi pata chal gaya tha ke Arun aik awaara gard hai, parhayi pe to woh kabhi tawajah deta nahi, aur jitni bhi buri aadatein ho sakti hain, woh sab Arun mein theen. Jab Abhijeet ne us ki dosti thukra di to woh use na pasand karna laga aur apni hi jalayi aag mein jalne kurhne laga. Ab aik baar phir use shohrat aur ahmiyat haasil karna ka mouqa mila tha aur woh us mein shayad kamyaab bhi ho gaya tha.

Abhijeet interval ke waqt library mein aik table ke gird aik kursi pe akela betha hua tha. Ird gird bohat si maizein pur theen. Woh is waqt apne project pe ghor kar raha tha. Sab kuch aik taraf, woh apni parhayi pe koi asar nahi parhne de sakta tha. Woh poori tarah samajh gaya tha ke is project ke liye use kya karna hai. Us ka dil to chah raha tha ke saara project khudi tayaar kar le.

"Kya kar rahe ho Abhijeet?" Kuch dair baad Abhijeet ko Rakesh ki awaaz sunayi di jo us ki maiz ke gird lagi dursi kursi pe beth gaya tha.

"Project pe ghor kar raha hun" Abhijeet ne sar utha kar Rakesh ko dekh ke sarsari tor pe jawab diya.

"Han, kaafi dilchasp lag raha hai yeh project" Rakesh ne bhi dilchaspi dikhate hue kaha. Yeh project global warming ke baare mein tha aur unhon ne aik report banane ke saath saath global warming visual way mein represent karni thi.

Abhijeet abhi bhi project ke baare mein sochte hue gum tha ke Rakesh ki nazar Daya aur Arun pe gayi jo ke idhar hi a rahe the. Abhijeet ki nazar abhi wahan nahi gayi thi.

"Acha phir tum se baad mein mulaqaat hoti hai Arun, abhi mujhe Abhijeet ke saath project work karna hai" Rakesh aur Abhijeet donon ke hi kaanon mein Daya ki awaaz goonji qareeb se. Abhijeet ne chounk ke sar moda aur Daya ko dekhne laga. Arun Daya se kuch kehte hue wapis chala gaya.

"Rakesh, tum agar bura na manao to mein aur Abhijeet project ke baare mein discuss kar lein?" Daya ne aik tarah se Rakesh ko uthne ko bola jo ke Rakesh samajh gaya.

"Han, kyun nahi. Acha theek hai Abhijeet phir baad mein hi milein gein. Mein bhi ja kar Jatin ko dekhta hun aur project pe kaam karta hun" Rakesh rasmi muskurahat dono pe hi uchaalte hue wahan se chala jata hai.

"Tumhe Rakesh ko bhejne ki kya zaroorat thi?" Abhijeet chubte hue andaaz mein bola.

To Be Continued

Please share your views about this chapter in the review box. Thank you.