Hi guys, updating after a long time, sorryyyy for that. Thank you Abhinidhi, AbhiShikha, PoojaAbhiDeewani, pooja20, eman, abhii, lucky, Perfect Abhi. Sorry If missing someone.
Daya ne ghar ka darwaaza khola. Kya kya na yaad aya tha use is pal. Maa ki daant, maa ki chashni jaisi meethi awaaz, aur pata nahi kya kya. Daya Abhijeet ka hath pakarta hai aur andar ghuss jata hai. Daya ki aankhon mein aansun a jaate hain woh pal yaad karte hue jo usne yahan apne is jannat jese ghar mein bitaaye the. Us ka ghar ab waisa na raha tha jaisa woh usse chod kar gaya tha, bohat sa naya samaan a gaya tha ghar mein, bohat kuch badal gaya tha, deewaron pe naya rung kiya hua tha par ek cheez jo in saalon mein bhi na badli thi woh thi khushboo apne ghar ki, woh ahsaas gaya nahi tha ke woh yahan reh chuka hai aur apni zindagi ke sab se khoobsurat pal yahan bita chuka hai. Saare furniture mein se ek kaala sofa tha jo ke ab bhi wohi tha, ab bhi waisa tha jaisa woh chod kar gaya tha. Daya us sofe pe beth gaya. Us ne sofe ko apne haathon se mehsoos kiya. Wo lams mehsoos kar ke use laga jaise woh apni maa ka lams mehsoos kar raha ho. Apni maa ko is sofe pe bethe hue mehsoos kar raha ho. Wo kho gaya tha un meethe lamhon mein ke wo chounk gaya jab use Abhijeet ka lams apne kandhe pe mehsoos hua. Us ne chounk kar Abhijeet ko dekha aur is ek pal use yaad a gaya tha ke wo waqt beet chuka jab woh tha aur uski maa thi aur wo dono is ghar mein meethe pal bitate the. Wo sab kuch bohat peeche reh gaya tha, duniya bohat aage badh chuki thi, waqt bohat aage badh chuka tha. Kuch bhi pehle jaisa na tha siwaye is ghar ke khushboo ke
"Daya, mein jaanta hun tum bohat yaad kar rahe hoge apni maa ko, tumhaari yaadein taza ho rahi hain aur aik baar phir tumhe ahsaas dila rahi hain ke tumhaari maa is duniya mein nahi par tumhe sambhalna hoga khud ko. Waqt ke saath bohat kucd badal jaata hai. Tumhe to khuda ka shukar karna chahiye ke waqt ne tumse ye ghar nahi cheena. Haan, tum ne bohat kuch bardasht kiya hoga. Jaisa tum bata rahe the ke tum ne bohat mushkillein uthayi hain to ab dekho na ye ghar un mushkillon ka sila hai jo tum ne us bure waqt mein uthaayi hain. Tumhaare paas tumhaari maa to nahi hai par unki ye nishaani, ye ghar to hai na tumhaare paas. Is ghar ko hamesha sambhaal kar rakhna" Abhijeet se Daya ke chehre pe phaila dukh dekha na gaya. Us ne to hamesha ye chehra hansta khilta hi dekha tha. Aj isko afsurda dekha to andar kahin dil mein tees uthi thi. Jab Abhijeet ka koi pursaan e haal na tha, jab koi uski zimmedaari uthaane ke liye raazi na tha tab, han tab Daya ne use sahara diya tha, us ke liye ek acha dost aur muhafiz saabit hua tha. Aj Daya dukhi tha to us ne ye apni zimmedaari samjhi ke is hanste khilte chehre ko dukhon se azaad kar ke ek baar phir hansta khilta kar de. Daya hairaan hairaan sa Abhijeet ko tak raha tha. Kya ye wohi Abhijeet hai jis ko woh hospital mein us din mila tha. Abhijeet kya tha tab aur Abhijeet kya hai ab. Use yakdam hi ek khushi ki tamaniyat mehsoos hui. Us Abhijeet ko jis din us ne tasalli di woh kaafi mukhtalif tha aur ye Abhijeet jo use tasalli de raha hai lagta tha zameen o aasmaan ka farak ho. Daya ne beikhtiyaar hi Abhijeet ko gale laga liya par khul kar ro diya par farak ye tha ke ye khushi ke aansoo the aj. Jo ho chuka use to woh badal nahi sakta par jo behtar ho sakta hai, us pe kyun na mehnat ki jaaye.
"Abhijeet, tum bohat ache ho, bohat ache, us Rohan ne kitna zaleel kiya tumhe par tum bohat ache ho, sab kuch nazar andaaz kar dete ho. Aur haan Abhijeet, hamesha aisa hi rehna, hamesha pur aitamaad rehna, tumhe na kisi se darne ki zaroorat nahi, you are a strong man, himmat se muqabala kiya karo har cheez ka. Mein rahun na rahun par tum hamesha sabit qadam rehna, bhatak mat jaana" Daya ne Abhijeet ke gale lag kar kaha. Us ki aankhon se tip tip aanso gir rahe the jinhe Abhijeet apni ungliyon ke lams se saaf karta jaa raha tha. Use gawaara na the Daya ki aankhon mein aansoo. Bhala wo us shaks ke aankhon mein aansoo kaise dekh sakta tha jis ne us ke aansoo saaf kiye hon jab wo bilkul toot chuka ho andar se.
"Nahi Daya, tum kyun nahi raho ge. Dekho, mein..mein tumhe kahin jaane nahi dunga..Yakeen mano..is poori duniya mein mera tumhaare siva koi nahi..mujhe tumhaari bohat zaroorat hai Daya..Waada karo mujhe kabhi chod kar nahi jaoge" Abhijeet Daya ko aur zor se bhainch leta aur toot kar rota hai
"Abhijeet..kya kar rahe ho..Mein kahin nahi ja raha..mujhe bhi tumhaari bohat zaroorat hai. Mera bhi is duniya mein tumhaare siva koi nahi. Ye duniya na bohat matlabi hai. Bazahir to log dost hote par andar se aasteen ka saanp. Sach kahun to poori duniya matlabi ho sakti hai par tum nahi. Ye mera dil kehta hai. Tum jitna masoom shaks to mene apni poori zindagi mein nahi dekha. Mein socha karta tha kya koi itna masoom bhi ho sakta hai. Mein na apne ap ko mazloom samjha karta tha, ghar ganwaya, maa ganwayi, duniya mein kho gaya par ab mujhe pata chala hai ke asal mazloom to tum ho..mein kuch kahun ga nahi. Tumhe dukhi nahi karna chahta. Han mein tumhe kabhi chod ke jaana to nahi chaahunga par waada nahi karunga ke tumhe kabhi chod ke nahi jaunga kyunke ye jo takdeer hoti hai na bohat zaalim hoti hai, kuch pal lagte hain is taqdeer ko ek insaan ko kahin se kahin le jaane mein par ye waada zaroor karunga ke aakhri dam tak tumhe chod ke na jaunga..koshish to meri yahi hogi..aage taqdeer ki marzi par haan wapis aane ki koshish zaroor karunga agar tum waada karo ke hamesha halaat ka muqaabla karo ge, saabit qadam raho ge, apne liye nahi to mere liye. Aur haan dukhi hone ki koi zaroorat nahi, filhaal to kahin nahi ja raha mein" Daya ki baatein sun kar Abhijeet ke aankhon mein aansoo a gaye. Aakhir koi to tha us ke liye bhi. Jo uske liye jee raha hai. Jo usko apna waahid dost maanta hai. Jis ko woh kabhi chodna na chahega.
"Chalo, bas bohat ho gaya rona dhona. Mein jaldi se kuch acha sa banaata hun tumhaare liye. Batao, kya khao ge" Daya Abhijeet se alag hota hai aur kitchen ki taraf jaane lagta hai ek pyaari se muskaan Abhijeet ko dete hue. Abhijeet bhi halka sa muskura deta hai aur Daya ke peeche peeche kitchen mein a jaata hai jahan pe Daya kuch bacchi kuchi grocerry check kar raha hota hai
"Kuch bhi khaa lunga, mere zyaada nakhre nahi" Abhijeet shokhi se kehta hai
"Ji ji, ji han, Ap jaisa sati savitri banda poori duniya mein nahi dekha meine. Kabhi kabhi nakhre dikha bhi dete hain. Sehat ke liye acha hota hai" Daya bhi shararat se kehta hai aur cabinets mein se kuch grocerry items nikaal kar check karta hai
"Kya karein. Rab ne banaya hi esa hai. Saada sa. Zyaada nakhre karne se meri tabiyat pe bura asar parta hai, tum batao kuch katna hai to kaat dun, tumhaari help ho jaaye gi" Abhijeet Daya ki baat par hans deta hai aur aik cabinet se churi nikaalta hai aur Daya ko uski madad karne ki offer karta hai
"Lo ji, ye banda to pehle hi zyaada nakhre nahi karta aur ab, ab tum madad bhi karaoge. Nahi yaar, bethe reh. Nakhre to is bande se hote nahi upar se kaam bhi karein ge. Bethe raho. Mein bohat acha khana banaata hun. Tum araam se beth kar tv dekho. Kitne ache shows aate hain tv pe. Kabhi dekhein hain tum ne" Daya kheench kar Abhijeet ko sofe pe bithaata hai aur tv on kar deta hai. Jis pe Abhijeet sirf hans deta hai. Daya ki ye shokhiyaan, ye shararatein, yahi to Abhijeet ko sab se zyaada pasand theen. Hamesha khush rehta tha. Kaash koi usko bhi Daya ki tarah khush rehna sikha deta
Ye woh hospital tha jis mein Abhijeet ka ilaaj kiya gaya tha. Aj bhi is hospital mein chehel pehel thi. Corridors khicha khich bhare hue the. Kuch log waiting room mein bethe apne apnon ke liye due kar rahe hote hain aur kuch doctors emergency cases ki tayaari karte hue nazar a rahe hote hain. Reception is waqt khaali tha. Reception pe bethi larki irdgird se la talluq apne phone mein lagi hoti hai ke use kisi ke khankharne ki awaaz ati hai. Wo do minute se pehle apna phone side par karti hai aur moddab ho kar khadi ho jaati hai. Us ke saamne ek couple 40 ya 45 saal ka khada hua tha. Dono ke hi chehre se pareshaani ayaan ho rahi thi.
"Ji, mein ap ki kya madad kar sakti hun?" Receptionist ne apne baalon ko ek ada se hilaate hue kaha aur ek pyaar si smile couple pe uchaali
"Ji actually, kuch dinon pehle yahan ek patient aaya tha jis ka memory loss ho gaya tha aur us ki identity reveal nahi ho rahi thi, ham us larke ke maa baap hain. Ham actually mulk se baahir the kisi kaam se wapis aye to apne bete ko ghar mein gair haazir paaya. Ham to bohat pareshaan ho gaye the. Ittefaaq se ek newspaper hamaare haath lag gaya jis mein us ki news picture ke saath thi. Ham foran hi ap ke paas umeed le kar ayein hain. Plzz hamaari madad kar dijiye. Hamaara beta kahan hain" Aurat nihait pareshaani ayaan karte hue bolti hai. Wo musalsal apne haath ko hila rahi hoti hai jaise kisi bechaini mein ho. Receptionist us ki bechaini bakhoobi pehchaan jaati hai aur un ko qareebi seats pe beth kar wait karne ka kehti hai
"Hello, Dr Aditya. You remember that patient from last month who lost his memory and his identity was not revealed to anyone. Yeaa.. His parents are downstairs..Yes doctor..they are saying that they were out of country..ok thank you doctor" Receptionist telephone uthaake us pe Dr Aditya ke room ka no dial karti hai aur Dr Aditya ko saari soortehaal beyaan karti hai aur phir phone rakh deti hai.
"Dr Aditya is coming downstairs. He will talk to you" Receptionist us couple ko aghaa karti hai aur phir apne kaam mein masroof ho jaati hai
To be continued
Plzzzz do reviewwww. Thank you
Abhi's Ira