"Dr Aditya is coming downstairs. He will talk to you" Receptionist us couple ko aghaa karti hai aur apne kaam mein masroof ho jati hai.
Couple ja ke waiting seats pe beth jata hai aur Dr Aditya ka intezar karne lag jata hai. Chand minute ke hi intezar ke baad Dr Aditya seedhiyan utarte hue dikhte hain. Receptionist Dr Aditya ko ishaara kar batati hai ke ye hai woh couple. Dr Aditya us couple ke paas a jate hain.
"Hello, I'm Dr Aditya. Ap log mere saath mere room mein hi a jaiye. Wahin baat kar lete hain. It would be much better" Dr Aditya bohat hi tahamul aur shaistgi se paish ate hue couple ko apne saath kamre tak jaane ki dawat pesh karte hain.
"Ji Bohat bohat shukriya ap ka. Chaliye" Admi kehta hai jis ki awaaz mein bazahir nami thi aur jo bazahir dil shikasta nazar a raha tha.
Dr Aditya couple ko le kar apne kamre mein a jate hain. Woh wahan couple ko kursi paish karte hain kehte hue "Please have a seat" jis par dono hi apni apni kursiyon pe jam jate hain.
"Ji, ab mujhe poori baat bataiye" Dr Aditya baat ki shuruwaat karte hain. Woh hairaan the ke us larke ke maa baap ne ane mein itni dair kese laga di. Woh to yahi samajh rahe the ke ab koi nahi aye ga.
"Ji mein Mr Ravi aur ye Mrs Ravi. Woh hamara beta hai Abhi Sheikh. Hum dono pichle aik mahine se mulk se bahir the. Hamara beta Abhi Sheikh ghar mein akela tha. Hamare to zehn o guman mein bhi nahi tha ke itna kuch ho jaaye ga hamare peeche se" Mr Ravi ki aankhon se tip tip aansun baras rahe the.
"Kya ap ke ghar mein koi mulazim nahi?" Jaane kyun Dr Aditya ka tajasus aik dam hi tipak pada tha. Wo jaane kyun mutmain nahi the. Kuch tha jo unhe beitminaan kar raha tha aur unhe khatak raha tha par unhon ne is khayaal ko pas e pusht daal diya ye soch kar ke jab asli maa baap mil hi gaye hain to acha hai na.
"Ji, Kya? Umm, Nahi. Humare ghar mein koi mulazim nahi hai. humare ghar mein sabhi ko apne hathon se kaam karne ki aadat hai aur sab hi ko khana banana bhi ata hai" Mr Ravi aik pal ko chaunk gaye the par doosre hi pal wo mutmain the aur bohat saadgi se apna mudaa beyaan kar gaye the.
"Oh, chalein phir to theek hai" Dr Aditya ne kaha.
"Ap hame hamare bete ke bare mein bata kyun nahi rahe? Woh kahan hai?" Aisa lag raha tha ke ab Mr Ravi ke sabar ka paimana labraiz ho gaya hai.
"Actually, Mr Ravi. Ap ke bete ka jab accident hua to unki halat bohat critical thi. And in that condition, he lost his memory. Even though, ye short term memory loss hai but yaadasht poori tarah aate aate bhi mahine lag jaate hain. We were really tensed for him. Mr Daya paid for his operation jin ki gaadi se uska accident hua tha. Phir Mr Daya hi unko apne saath le gaye the because is ke illawa koi option nahi tha" Dr Aditya ne bohat itminaan aur tafseel se poora maamla Mr Ravi ke gosh guzar kar diya.
"Thank you Dr Aditya. Ap please Mr Daya ka cell number ya address note karwa dijiye. hum phir khudi un se contact kar lein ge" Mr Ravi ne apni baat ka ikhitaam kiya.
"Mr Daya ka phone number to mere paas nahi hai par haan woh apna address note karwa gaye the. Ap note kar lein" Dr Aditya keh kar Mr Ravi ko address note karwaane lag jaate hain aur Mr Ravi ki ungliyaan diary ke kaghaz pe address ke shabdon ko qaid kar dete hain.
"Thank you so much Dr Aditya for this convinience" Mr Ravi address ko note karne ke baad bohat ache se Dr Aditya ka shukriya ada karte hain aur apni biwi ke saath Dr Aditya ke cabin se nikal jate hain.
Abhijeet sofe par betha hua Tv dekh raha hota hai. Daya kitchen mein Abhijeet ke liye kuch bana raha tha jis ke baare mein Daya ne abhi Abhijeet ko kuch bataya nahi tha aur kaha tha ke surprise hai.
"Daya, mein bore ho raha hun. Tum aur kitni dair lagaoge. Kuch bhi chota mota, asaan sa bana lo na. Mujhe nakhre karne nahi aate" Abhijeet ki awaaz mein so gawaari thi. Koi udaas sa lamha tha woh.
"Kyun ji. Kyun nahi aate nakhre. Mein to tumhe saare nakhre karwa kar chodunga. Samjhe tum" Daya ke lehje mein shokhi thi. Use bohat pyaar ata tha Abhijeet par. Woh uske pyaare pyaare nakhre uthaana chahta tha aur us se bhi uthwaana chahta tha. Ke koi hasrat baaki na reh jaaye.
"Darta hun ke aj nakhre uthwa liye to kal kya karun ga jab halaat ke thaphaire mujhe be sahara kar dein ge" Abhijeet ke lehje mein jaane kitne barson ka dukh samaya hua tha. Abhijeet shayad ye nahi jaanta tha us ka maazi kaisa tha par yeh zaroor janta tha ke uska maazi shayad bohat udaas, sogawaar, aur dard se bharpoor tha. Jaane kyun par ye uska dil, uske dil ki kaifiat kehti thi.
"Abhijeet, itne udaas kyun ho rahe ho. Aur tum mere hote hue be sahara nahi ho sakte. Mujhe poora yakeen hai ke jab ham dono ko aik doosre ka saath mile ga na to ham mukamal ho jayein ge. Mil kar is duniya ka saamna karein ge. Mil kar is maidaan ko fatah karein ge" Daya ne jab Abhijeet ki awaaz ki udaasi aur so gawari mehsoos ki to us ke dil mein kahin tees si uthi thi. Woh hairaan hota tha ke Abhijeet itna kam himmat kyun hai, itni jaldi umeed kyun chod raha hai. Aakhir kya tha Abhijeet ka maazi? Ye sawaal bar bar uske zehan mein umadta tha.
"Tum sach keh raho ho na?" Abhijeet ke aankhon mein umeed ki aas thi. Woh yaktak Daya ki aankhon mein dekh raha tha jaise Daya ki aankhon ke zariye uske andar ka sach janna chah raha ho. Woh is waqt bilkul aik bacha laga tha Daya ko aur Daya ko is pal Abhijeet par toot kar pyaar aya tha.
"Bilkul sach. Pinky promise wala sach" Daya ki aankhon mein do aansun a jate hain. Wo hans kar kehta hai.
"Thank you Daya" Abhijeet ke chehre par aik khalis muskurahat a jati hai aur woh josh mein Daya ko gale laga leta hai.
"Shukriya to mujhe tumhara karna chahiye. Tum itne ache ho ke mujhe ab apne kisi rishte ki kami par dukh hi mehsoos nahi hota. Kyunke tum se jo rishta bandh gaya hai, woh bohat hai mere liye" Daya ne bhi Abhijeet ko gale lagate hue kaha.
"Ohho, mein to hamara surprise kitchen mein pakne ke liye chod gaya tha. Tum yahin wait karo, mein kitchen mein jata hun" Daya ko yakdam hi apna surprise yad ata hai to woh kitchen mein chala jata hai.
"Lo ji, ho gaya surprise tayaar. So yummy. Abhijeet to diwaana hi ho jaaye ga" Daya kitchen mein khada badbada raha tha. Us ne Abhijeet ke liye apni ammi ki special recipe ke zariye sooji ka halwa banaya tha. Ye woh recipe thi uski maa ki jo usne apni maa ke hathon aakhri baar khayi thi aur uske baad maa aur uske haath ke khaane us se bohat door ho chuke the.
Sooji ka halwa tayaar ho chuka tha. Us ne kuch final touches diye aur Sooji ka halwa le kar lounge mein a gaya aur use dining table par rakh diya. Wapis muda to dekha ke Abhijeet sahab to sofe pe lete lete hi so gaye hain. Uska dil na kiya ke Abhijeet ko jaga de. Woh bohat masoom, bohat pyaara lag raha tha is waqt sote hue, bilkul jese masoomiyat ka paikar ho.
Woh wahin Abhijeet ke qareeb hi aik sofe par beth jata hai aur usko dekhne lagta hai aur sochne lag jata hai ke aakhir Abhijeet ke maazi mein aisa kya chupa hai ke woh itna gumsum, itna udaas, aur be umeed rehta hai.
16 saala larka apne college ke aik kone mein gumsum, udaas sa betha hua hota hai. Us ke aankhon mein nami hoti hai, Woh bohat pareshaan dikh raha tha aur qareeb qareeb tha ke uski aankhon se aansun behna shuru ho jaate. Tabhi wahan aik aur larka usi umar ka ata hai aur us larke ke qareeb beth jaata hai.
"Sun, kya baat hai, itne pareshaan kyun dikh rahe ho?" Doosra larka istafsar karta hai.
"Poore teen mahine ho gaye hain college ki fees nahi bhari. Agar ab bhi na bhari to nikaal denge mujhe. Pehle hi meri zindagi mein dukh kam hain kya jo yeh bhi. Itni mushkil se is college mein daakhla liya. Abba ne fees kahan bharni thi, mujhe hi abba se chup kar kaam dhoondna pada. Aur jis cheez ka dar tha na, wohi hua. Abba ko apne bete pe zara bhi reham nahi aaya. Unhe pata chala ke mein job kar raha hun to unhon ne mujh se saare paise cheen liye. Job to mujhe ab bhi karni pad rahi hai par apne liye aik rupeya bhi nahi bachta, sab abba apne juwa mein laga aata hai. Laakh abba se paise chupa lun, abba ko pata chal hi jata hai" Larke ki awaaz mein pata nahi kya kya nahi tha. Bebasi, dukh, aur Udaasi, Pareshaani aur Dard.
"Tumhare abba ki bhi kya hi kehna hai. Pata nahi kaise guzara kar lete ho unke saath. Mene to suna hai ke woh apna ghar bhi bech rahe hain" Doosre larke ke lehje mein kuch bezaari aur kuch hamdardi pinhaan thi par jo agla inkashaf usne kiya tha usne to pehle larke ko hila kar hi rakh diya tha.
"Kyaa?? Ye tum kya keh rahe ho? Abbaa ye kaise kar sakte hain. Aik ghar hi to bacha hai ab. Kyaa abb..." Larke ki awaaz mein tarap thi, bechaini thi. Use yakeen nahi a raha tha. Us pal jo dard aur takleef usne sahi thi uska koi rado badal nahi.
Doosra larka chala gaya pehle larke ko uski sochon ki bhanwar mein chod kar. Us ke qadam khud ba khud hi bahir ki janib barhte gaye.
"Kabhi kabhi mujhe lagta hai ap mere baap nahi. kya koi baap apni aulaad ki taraf se itni befikri, itni berukhi dikha sakta hai. Kaash aj meri maa zinda hoti to ye saibaan chin jaata to bhi mujhe dukh na hota kyunke unka pyaar mere liye kaafi hota" Wo badbada raha tha. Uske qadam be rabt the. Lag raha tha ke kisi bhi pal gir pade ga. Woh nahi jaanta tha ke woh kese sabit qadam rahe. Uske zehan mein bas aik hi sawaal tha ke zindagi is tarah uske saath khail kyun rahi hai? Us ne to kabhi nakhre bhi na kiye. hamesha hi sabar shukar kar liya us cheez pe jo us ko mil gaya phir zindagi uska itna bada imtehaan kyun le rahi thi.
"Abhijeettt, uthoo" Jaane ye konsa khawaab tha, konsi yaad thi jo tooti thi. Abhijeet yakdam hi haal mein aaya to aankhein kholein aur apne ap ko us saibaan pe paaya jo uske liye mehfooz tareen sabit hua tha. Abhijeet ne apni aankhein nam payein. Jaane kyun par woh beikhtiyaar hi Daya ke gale lag gaya aur ye aansun jo pata nahi dukh ke the ya khushi ke uski aankhon se behne lage.
How was it? Did u liked it. Also check new update of "Hate: A barrier between you and me" if you did not already.
Please do review.