Ek Ajnabi

Chapter 15

"Abhijeettt, uthoo" Jaane ye konsa khawaab tha, konsi yaad thi jo tooti thi. Abhijeet yakdam hi haal mein aaya to aankhein kholein aur apne ap ko us saibaan pe paaya jo uske liye mehfooz tareen sabit hua tha. Abhijeet ne apni aankhein nam payein. Jaane kyun par woh beikhtiyaar hi Daya ke gale lag gaya aur ye aansun jo pata nahi dukh ke the ya khushi ke uski aankhon se behne lage.

"Abhijeet, kya ho gaya hai tumhe?" Daya ki aankhon se bhi aansun behne lage the. Us ne dheere se Abhijeet ko apne ap se alag kiya aur use araam se sofe pe bitha diya.

"Pata nahi Daya, par bohat dar lag raha hai" Abhijeet aankhein zor se bhainch ke kehta hai jaise bohat takleef jo ghup chuki thi andar hi andar bardasht kar raha ho.

"Kaisa dar Abhijeet, mere hote hue to tumhe koi dar nahi hona chahiye, mujhe to laga tha ke meine tumhari zindagi ke sab dukh, dard, aur dar samait liye hain" Daya ne Abhijeet ke haath thaam liye the. Woh uske aankhon mein dekh ke us se gila kar raha tha.

"Pata nahi Daya, yeh kesa dar hai. Kuch bura ho jaane ka dar hai. Koi dar jo koi na gahaani le kar aane waala ho. Kuch dar aise hote hain jo apni moujoodgi ap ko hamesha mehsoos karwana chahte hain magar itna zaroor hai ke tumhara saath se yeh dar kuch kam ho jata magar mitta kabhi nahi" Abhijeet ne aankhein band kar ke taik laga li thi. Uske lehje se aik ajeeb sa dar tipak raha tha. Kuch Yaadein bohat darauni aur khatarnaak hoti hain. Aur woh jo yaad thi ya phir khawaab tha usne use jhanjhod diya tha.

"Pata nahi tum yeh kaisi baatein kar rahe ho Abhijeet. Yeh sab tumhara weham hai. ab tumhe kisi cheez ka bhi dar nahi hona chahiye. Tumhe khush hona chahiye. Bohat jald mein tumhe nokari dilwa dun ga, phir dekhna tum kese busy ho jao ge" Daya ne Abhijeet ko behlaane ki aik koshish ki. Use samajh nahi a raha tha ke Abhijeet ko aakhir kis cheez ka dar hai, kis cheez ka khouf hai. Use shayad Abhijeet se poochna chahiye magar abhi nahi. abhi araam aur sakoon Abhijeet ke liye zaroori hai.

"Tum kehte ho to shayad yahi baat ho" Abhijeet kachi muskurahat ke saath bola. Magar saaf nazar a raha tha ke Abhijeet mutmain nahi ho paaya. Us ki aankhon mein ajeeb dar tha, us ke taasuraat aise the ke bas taal raha ho, baat khatam kar raha ho.

"Meine sooji ka halwa banaya tha magar tum so gaye. Chalo, ab kha lo" Daya muskuraya aur kitchen mein ja kar sooji ka halwa garam kar ke le aaya.

"Oh, I am so sorry Daya, mein so gaya. Mujhe sona nahi chahiye tha. Tumhara surprise kharaab kar diya meine. Lao ab, leta hun. Zaroor, bohat maze ka bana hoga" Abhijeet ko ik dam hi yaad aya tha ke sone se pehle Daya ne Abhijeet ko bataya tha ke woh uske liye surprise dish paka raha hai. kitna khush tha Daya. Daya ki khaatir Abhijeet ne apne sab dar, khauf aur weham kuch pal ko paray rakh diye.

"Are nahi Abhijeet. Aisi koi baat nahi hai. tum ne mera surprise kharaab nahi kiya. Tum to sote hue itne cute lag rahe the ke mujhe khud apna surprise bhool gaya tha" Daya hans diya aur Abhijeet ki plate mein sooji ka halwa daalne laga. Daya sach bol raha tha. Abhijeet ko aise bachon ki tarhan masoomiyat se sote jab us ne dekha to use sab bhool gaya. Yeh dukh bhi na hua ke Abhijeet us ka sooji ka halwa khaaye begair hi so gaya. Abhijeet hans diya aur waqt ba waqt sooji ke halway wala chamach mun mein daalta.

"Ok Abhijeet, ab tum so jao. Bohat raat ho gayi hai" Daya muskura ke kehta aur dono hi apne apne kamron ki taraf chale jaate hain.

Sooraj ki kirnein Abhijeet ke chehre par parein to us ne aankhein kholein. Us ne dil mein shukar ada kiya ke aaj use koi ajeeb khawaab neend mein nazar nahi aaya. Woh khawaab jo sirf khawaab nahi lagte the, haqeeqat lagte the. Jab woh neend se uthta tha to use un khawaabon ki aik aik tafseel bilkul sahi se yaad hoti thi. Bas yahi yaad na aata tha ke pehle woh 10 saala bacha aur phir 16 saala larka kon tha. Abhijeet ne apne ird gird ka jaiza liya. Phir uth kar beth gaya. Sooraj ki roshni mein Daya ke bachpan ka ghar aur bhi acha aur khoobsurat lag raha tha. Us ne uth kar mun haath dhoya, phir baahir living room mein a gaya. Kitchen se awaazein a rahi theen. Woh yaqeenan Daya tha jo Abhijeet aur apne liye naashta tayaar kar raha tha.

"Daya, kabhi mujhe bhi naashta banane ka mouqa do. Mere haath faarig pade pade thak gaye hain" Abhijeet kitchen mein a kar aik diwaar ke saath lag kar khada ho gaya.

"Nokri dilwa dun ga to phir faarig nahi raho ge. Phir mujh se faarig hone ki minnate karo ge. Bohat tough hota hai nokri karna" Daya omelete pan se utaarte hue Abhijeet ko muskura kar chedta hai.

"Are nokri se yaad aaya tum aaj apni job pe nahi gaye Daya?" Abhijeet ne tashweesh se poocha.

"Han woh Aj Maa ke ghar pe pehla din hai itne baad. Jee bhar ke dekh lena chahta hun isi liye chutti le li hai aaj ki" Daya tarsi nazron se apne ghar ko dekh kar bola. Woh kitna tarsa tha apni maa ke liye, apni maa ke ghar ke liye. Aj use apni maa ka ghar wapas mil gaya tha. Us ka jee hi nahi bhar raha tha. Bas dil kar raha tha ke dekhte hi jaye.

"Han, sahi keh rahe ho. Aj tumhare jashan ka din hai. Aj tumhe tumhara ghar phir se mil gaya" Abhijeet Daya ki khushi mein muskuraya aur woh donon hi naashta le kar living room mein a gaye.

"Aik baat poochun" Jab donon ne hi naashta kar liya to Daya ne Abhijeet ke chehre ke taasurat ache se parakhne ke baad poocha.

"Han poocho Daya" Abhijeet ne han mein sar hilaaya.

"Tum raat ko aise dar ke kyun uth gaye the. Please Abhijeet mujh se nazrein mat churana aur na hi mujh se kuch chupana. Mein tumhara hamdard hun. Tum mujhe bohat azeez ho. Kuch hai jo tumhe bechain kar raha hai" Daya ne hichkicha kar poocha. Use samajh nahi a raha tha ke kya Abhijeet se us ne yeh pooch kar theek kiya ya ghalat.

"Daya" Abhijeet ne nazrein churaani chahein magar chura na saka.

"Han, kuch hai jo mujhe bohat bechain kar raha hai. Mujhe kuch dinon se ajeeb ajeeb khawaab dikh rahe hain, kabhi kisi 10 saala bacche ke to kabhi kisi 16 saala larke ke. Magar samajh mein nahi aata ke woh larka kon hai. Uska chehra kabhi nazar nahi aata. Magar mein sab mehsoos kar pata hun. Woh khawaab nahi lagta. Woh aik haqeeqat lagti hai jis ka kirdaar mein hun" Abhijeet ne bohat mushkil ke baad apne jazbaat Daya ko tafseel se bataye. Us ke mehsoosaat, us ke jazbaat.

"Tum kisi cheez ki fikar na karo Abhijeet. Mein Dr Aditya se baat karunga. Woh ya phir koi aur Doctor a kar tumhe dekhe ga. Everything will be alright" Daya ne aik tasalli dene ki koshish ki. Usne ye poochna bhi munasib na samjha ke Abhijeet un khawaabon mein kya dekhta hai kyunke woh Abhijeet aur kisi uljhan mein mubtala nahi dekh sakta tha.

Rohan apne ghar ke living room mein akela betha hua tha. Abhi tak us ko room mate nahi mila tha. Us ne Daya se jhoot bola tha ke usko room mate mila hua hai bas bulaane ki der hai. Woh jhunjhala raha tha. Use umeed nahi thi ke Daya waqayi chala jaaye ga. Use tashweesh hui ke aakhir woh dono gaye kahan honge. Abhi woh yeh sab soch hi raha tha ke us ke darwaaze ki bell baji.

"Lagta hai ke Daya khat khaa ke wapas a gaya hai" Rohan ne tanziya andaaz mein socha aur darwaaza kholne ke liye khada ho gaya.

Us ne darwaaza khola to Daya ki jagah kisi aur ko hi paaya. Woh in logon ko nahi jaanta tha. Aik aurat aur mard uske darwaaze pe khade the. Dono hi 40 saal ke qareeb honge.

"Ji, Ap kon?" Rohan ne sawaliya nazron se dono aurat aur mard ko ghoora.

"Ji, Mera naam Ravi hai aur yeh meri mrs hain" Mard ne jawaab mein apna aur aurat ka taaruf karwaya.

To Be Continued