Hi everybody, I'm back with a new chapter. Thank you AbhiShikha, AbhiNidhi, PoojaAbhiDiwaani, and PerfectAbhi for your reviews.

Ek Ajnabi

Chapter 16

Abhijeet's Parents

"Ji, Ap kon?" Rohan ne sawaliya nazron se dono aurat aur mard ko ghoora.

"Ji, Mera naam Ravi hai aur yeh meri mrs hain" Mard ne jawaab mein apna aur aurat ka taaruf karwaya.

"Meine ap ko pehchaana nahi. Kya hum aik doosre se pehle mil chuke hain?" Rohan ne araam se poocha.

"Ji nahi, Ap mujhe nahi pehchaante. Yeh Daya ji ka hi ghar hai na? Kya ap hi Daya hain?" Mr Ravi ne Rohan ki taraf dekh kar sawaliya nazron se poocha.

"Na hi mein Daya hun aur na hi yeh ghar ab Daya ka hai. Woh yahan se ja chuka hai. Ap ko us se kya kaam tha?" Rohan ko jab Daya ke baare mein yaad aya to us ne ghusse se jhunjhalate hue Mr Ravi ko jawaab diya jis pe Mr Ravi hairaan aur pareshaan dono hi reh gaye. Kuch pal ko unhe kuch samajh hi na aaya. Kahin woh kisi ghalat ghar pe to nahi a gaye.

"Kya matlab ke Daya yahan se ja chuka hai?" Mr Ravi ne hairat se Rohan ki aankhon mein dekh ke poocha. Saath hi unhon ne apni ungliyon ki harkat se bechaini zaahir ki.

"Seedhi si baat hai, Daya yahan par qiraaye pe rehta tha mere saath, ab nahi rehta. Kal hi woh yeh ghar chod kar chala gaya tha. Ab mujhe nahi pata ke woh kahan hai" Rohan ne akarte hue kaha jaise yeh ziqar karna uski shaan ke khilaaf ho.

"Ab bataiye, ap ko kya kaam tha Daya se?" Rohan ne dobara apna sawaal dohraya.

"Woh actually hamare bete AbhiSheikh ki aik accident mein yaadasht chali gayi thi koi 1 mahina pehle. Mein aur meri patni mulk se bahir the aur AbhiSheikh ghar pe akela. Ab wapas ayein hain to pata chala ke us ki yaadasht chali gayi thi aur koi Mr Daya us ko apne saath apne ghar le gaye the. Dr Aditya se meine address maanga to unhon ne is ghar ka pata bataya. Magar ab to aap ne aik ajeeb hi kashmakash mein daal diya hai" Mr Ravi ne saari tafseel mukhtasaran beyaan karne ki koshish ki aur pareshaani se Rohan ki taraf dekha.

"AbhiSheikh? Ap ka matlab Abhijeet se hai kya?" Rohan ne chounk ke poocha. Yeh aik ajeeb hi inkashaaf us ke saamne aaya tha. Koi aik mahine tak Abhijeet ke maa baap gayab the magar aj woh achanak hi namoodaar ho gaye the.

"Abhijeet? Kya matlab?" Mr Ravi ne jab aik naya naam suna to hairaani se poocha.

"Woh hame us ka naam nahi pata tha to Daya ne use aik farzi naam de diya tha. Abhijeet. Yakeenan wohi ap ka beta AbhiSheikh tha" Rohan ne Mr aur Mrs Ravi ki hairaani door karte hue kaha.

"Han, yahi ho sakta hai" Mr Ravi ne sar haan mein hila diya.

"Acha theek hai phir bye" Rohan ne darwaaza taqreeban band karte hue kaha.

"Are yeh kya kar rahe hain ap? Rukiye to sahi?" Mr Ravi ne darwaaze ko pakarte hue kaha ke Rohan darwaaza un ke mun pe band na kar paaye.

"Ji kya masla hai ap ka? Keh diya na ke Daya yahan pe nahi. Woh apne saath Abhijeet yani ke aap ke AbhiSheikh ko bhi saath le gaya tha. Aur kuch bhi poochna hai kya ap ko?" Rohan ne ghusse mein aate hue kaha. Ajeeb museebat bane khade the yeh log us ke ghar ke darwaaze par.

"Ap hum pe kuch to taras khaaiye. Madat kijiye hamari" Itne arse mein Mrs Ravi pehli baar bolein thein. Un ki aankhon mein aansu a gaye the.

"Kya madat kar sakta hun mein ap ki?" Rohan ne sarra hua mun bana ke poocha.

"Ap andar to aane dijiye hume. Khul ke baat kar dene dein. Baat hamare bete ki hai" Mr Ravi ne minnat karne waale andaaz mein Rohan se kaha tha.

"Acha, a jaaiye andar" Rohan ne narm padte hue kaha.

Rohan ke bulaane pe Mr aur Mrs Ravi ghar ke andar dakhil ho gaye. Rohan ne unhe qareeb pade sofon pe bethne ki daawat di.

"Ap ko kuch to pata hoga ke Daya ji aur AbhiSheikh kahan gaye hain?" Mrs Ravi ne tahamul ke saath poocha.

"Ji nahi, mujhe kuch bhi pata nahi hai" Rohan ka jawaab har baar ki tarah wohi tha jo woh pehle de chuka tha.

"Ap ke paas Daya ka number to hoga na? Ap us se address pooch kar mujhe bata dijiye ga"

"Mein aur Daya aj kal ache terms pe nahi hain. Woh mujhe kabhi nahi bataye ga ke woh kahan reh raha hai" Rohan ne abhi bhi apni dhitayi jaari rakhi jis pe Mr aur Mrs Ravi ko ghussa a raha tha.

"Mr Rohan, Insaan chahe to kya nahi ho sakta, kyun theek kaha na meine begum?" Mr Ravi ne apna batwa kholte hue kaha jis mein dher saare 1000 aur 5000 waale note lehra rahe the aur phir apni patni ki taraf dekh ke ajeeb se andaaz mein muskuraye.

"Ji, ap ne bilkul theek kaha hai. Insaan chaahe to kya nahi ho sakta" Rohan ke taasuraat aik dam hi badal gaye the. Ab woh muskura raha tha. Woh Mr Ravi ka ishaara samajh gaya tha.

"To please kuch kijiye" Mr Ravi ne muskura kar ilteja ki.

"Ap fikar na karein Mr Ravi. Mein abhi Daya ko call karta hun. Ap yahin beth kar intezaar karein.

Rohan apne kamre mein a gaya. Us ne socha ke yeh us ke liye acha hi hoga. Abhijeet ko bhi us ke maa baap mil jayenge, Rohan ko bhi Daya ka saath wapas mil jaaye ga, aur Mr Ravi Rohan ko bohat kuch inaayat bhi karein ge is badle mein.

Us ne apna mobile phone uthaya aur us pe Daya ka number milaya.

Doosri taraf Daya is waqt apne kamre mein betha hua tha. Abhijeet apne kamre mein shayad so raha tha. Daya ka phone us ke qareeb hi pada hua tha. Phone ne achanak hi bajna shuru kar diya to Daya ne phone utha kar dekha aur use hairat bhi hui aur ghussa bhi aaya Rohan ka naam screen pe dekh ke. Kya ab bhi koi qasar baaki reh gayi thi.

"Hello" Daya ne ghusse se phone utha liya.

"Daya, mein Rohan bol raha hun. Mein..mein bohat sharminda hun apni kal waali harkat pe. Meine Abhijeet ke saath bhi bohat zyaadti ki hai. Mein us pe khamakha hi shak karta raha haalanke mujhe yeh nahi karna chahiye tha" Rohan ne sharmindagi zaahir karne ki koshish ki aur shayad woh kamyaab ho gaya tha ke doosri taraf Daya mutaasir nazar ata tha.

"Chalo, acha hua. Tumhe ahsaas to hua" Daya dheemi awaaz mein bola. Woh hairaan zaroor tha magar shukar bhi adaa kar raha tha ke Rohan ko bil aakhir apni ghaltiyon ka ahsaas ho gaya hai.

"Daya, tum kahan ho is waqt? Mujhe maaf kar do ke meine tum donon ko yun ghar se bahir nikaal diya. Yeh bhi ahsaas na kiya ke tum log jao ge kahan" Rohan ne kehte hue rone ki adakaari ki.

"Tum fikar na karo. Hum jahan bhi hain, hifazat se hain" Daya ne muskura kar Rohan ki baat taal di.

"Woh mujhe tumhe aik aur baat bhi batani hai" Rohan ne asal mudde pe aate hue baat shuru ki.

"Kya baat?" Daya ne chounk ke poocha.

"Baahir Abhijeet ke maa baap aye hue hain. Dr Aditya ne hi unhe yahan ka pata diya tha. Un ki aamad ne hi mujhe ahsaas dilaya ke mein Abhijeet ko kitna ghalat samajhta raha tha" Rohan ki baat sun ke doosri taraf Daya heraan reh gaya. Us ne beyakeeni se Rohan ko suna.

"Kya kaha tum ne? Abhijeet ke maa baap mil gaye hain?" Daya khush gawaar hairat se bola. Us ke chehre ke taasurat hi aik second mein badal ke reh gaye the.

To Be Continued

Please Review if you liked it.