Hi everybody, Im back with the next chapter. Thank you Nisha, Mahdia27, Abhirika Jai, PoojaAbhiDeewani, PerfectAbhi, AbhiNidhi, AbhiShikha for your precious reviews.

Ek Ajnabi

Chapter 17

"Kya kaha tum ne? Abhijeet ke maa baap mil gaye hain?" Daya khush gawaar hairat se bola. Us ke chehre ke taasurat hi aik second mein badal ke reh gaye the.

"Haan Daya, Abhijeet ke maa baap mil gaye hain" Rohan ne khushi zaahir karte hue kaha.

"Tum sach keh rahe ho?" Daya ne kuch beyaqeen si khushi ke saath kaha. Woh beyaqeen is liye tha ke Abhijeet ko hospital se discharge hue aik maheena ho gaya tha magar kisi ne us ka poocha tak na tha aur ab achanak se hi. Magar khair jaise bhi ho, Abhijeet ke maa baap to bilaakhir mil hi gaye is baat ki khushi Daya ko thi.

"Haan, mein bilkul sach keh raha hun" Rohan ne Daya ko yaqeen dilaane ki koshish ki jo yaqeenan kamyaab ho gayi thi.

"Theek hai, mein abhi isi waqt a raha hun" Daya ne pur josh ho kar kaha. Woh Abhijeet ke liye bohat khush tha ke Abhijeet ke andaaze ghalat the, us ke apne abhi bhi zinda hain aur us se bohat pyaar karte hain. Pehle to use laga tha ke jis tarah woh akela hai shayad isi tarah Abhijeet bhi akela hai. Use us se door jaane ka dukh bhi tha magar us ke apne mil jaane ki zyaada khushi thi ke woh dukh, woh udaasi chup si gayi thi.

"Mein unhe le kar tumhare ghar ya jahan bhi tum reh rahe ho, wahan a jata hun" Rohan ne paishkash ki ke bijaaye Daya yahan aaye, wohi udhar chale jayein.

"Theek hai, tum hi a jao" Daya ne kuch udaasi se kaha ke woh dil hi dil mein us ke bohat qareeb ho gaya tha aur us se door jaane ka ahsaas use zyaada acha bhi nahi lag raha tha magar Abhijeet ki khushi ke liye to use yeh karna ho ga aur Abhijeet ki khushi use behad azeez ho chuki thi.

"Theek hai, tum apna pata bata do" Rohan ne Daya se pata maanga to Daya ne use pata likhwa diya jis pe Rohan us se kehte hue phone rakh deta hai ke woh log kuch der mein wahan pahunch rahe hain.

Daya phone band karne ke kuch der baad Abhijeet ke kamre mein a gaya jis ka darwaaza khula hua tha. Woh is waqt soya hua tha. Daya ne socha ke aik aakhri baar use dekh le ke phir na maloom kab mulaqaat ho aur woh shayad apni zindagi mein itna masroof na ho jaaye ke Daya ko bhool hi jaaye.

"Kya dekh rahe ho Daya?" Abhijeet ne aankhein khol kar Daya ko chounk ke dekha.

"Tumhe dekh raha hun Abhijeet" Daya ne udaasi se kaha. Abhijeet us ki yeh besabab udaasi samajh na paya. Woh jhatak ke hans diya.

"Mujhe dekh rahe the" Abhijeet hans kar bola.

"Tumhare liye aik khush khabri hai Abhijeet" Daya ne khush hona chaha magar yeh dil kabhi kabhi behak jata hai aur aise logon ko azeez tareen kar leta hai jo ap ki zindagi mein sirf kuch pal ko hi aate hain aur phir lout jaate hain wapis apni zindagi mein.

"Khush khabri hai? Tumhe dekh ke to kuch aur hi lag raha hai. Lagta hai ke pareshaan ho aur udaas bhi" Abhijeet sanjeedgi se bola. Use Daya ke lehje mein yeh na samajh mein aane waali udaasi mehsoos ho rahi thi jis ka woh koi jawaz nahi bana pa raha tha. Ab to sab sahi thi. Ab kya ghalat ho sakta tha. Woh dono aik doosre ke gham baatne ke liye kaafi hain.

"Khush khabri tumhare liye hai, mere liye pata nahi" Daya mun hi mun mein barbaraya jis ki Abhijeet ko kuch samajh mein na aayi.

"Kuch kaha kya tum ne Daya?" Abhijeet ne chounk ke Daya ki aankhon mein dekha.

"Nahi, kuch nahi. Aur tumhe ghalat fehmi ho rahi hai. Mein bilkul bhi udaas nahi hun, mein khush hun, bohat khush aur tum bhi khush hoge jab mein tumhe woh khushi ki khabar bataun ga" Daya ne apni saari udaasi ko jhatakna chaha aur Abhijeet ke liye, Abhijeet ki khushi ke liye khushi zaahir karne laga.

"Aisi bhi kya khush khabri hai Daya?" Abhijeet ne muskura kar poocha.

"Lo a gayi khushi ki khabar" Tabhi darwaaze pe ghanti ki awaaz sunayi di aur Daya ne khush hote hue darwaaze ki taraf ishaara kiya.

"Kya matlab?" Abhijeet ne hans kar poocha. Aj Daya ajeeb ajeeb baatein kar ke use hairaan kiye de raha tha. Use to kuch bhi samajh mein nahi a rahi thi.

"Bas 2 minute intezaar karo" Daya ne pyaar se Abhijeet ke gaal pe haath rakha aur darwaaza kholne ke liye chala gaya.

"Ab yeh darwaaze pe kon hai? Aur yeh kon si khush khabri ki baat kar raha hai. Pehle to sirf mere dimaag pe asar hua tha, ab to lagta hai is ke dimaag pe bhi asar ho gaya hai" Abhijeet hans kar sochta hai magar woh hairaan zaroor tha magar woh yeh nahi jaanta tha ke aane waale chand lamhe use aur bhi hairaan karne waale hain.

Daya ne darwaaza khol diya. Us ke saamne Rohan aur do ajnabi aadmi aur aurat the jo 40 saal ke qareeb qareeb the. Woh foran hi samajh gaya ke yeh hi Abhijeet ke maa baap hain.

"Hello, Ap hi Daya ji ho kya?" Mr Ravi ne Daya se haath milaate hue sarsari aur rasmi tor pe poocha.

"Ji han Mein hi Daya hun. Aur ap log yakeenan Mr aur Mrs Ravi hain Abhijeet ke maa baap" Daya ne muskura ke dono se hi haath milaya.

"Han beta, hum hi us ke woh bad qismat maa baap hain jo use aisi haalat mein akela chore hue the. Hume pata hi kahn tha. Hume pata hota to foran dore chale aate" Mrs Ravi ne rote hue kaha.

"Ap log andar a jayein aur please ap log bura mat manana. Woh ap logon ko pehchaan nahi payega. Yeh ap logon ke liye bohat mushkil hoga magar use dekh ke react mat kijiye ga. Mein use khud sab bataun ga. Woh meri baatein sunta hai" Daya ne Mr aur Mrs Ravi ko samjhaane ki koshish ki jis pe woh sar hilaate hue Rohan ke saath andar a gaye.

Daya ne Mr aur Mrs Ravi ko lounge mein sofon pe bethne ko kaha aur khud Abhijeet ko bulaane chala gaya.

"Bahar kon aya hai?" Abhijeet ne Daya se poocha. Us ne bahar se ati awaazein sun li theen.

"Tum ao mere saath. Mujhe tumhe kisi se milwana hai" Daya ne Abhijeet ka haath pakarte hue kaha aur woh aur Abhijeet bahar a gaye.

Woh log bahar a gaye to Abhijeet ko Rohan ko yahan dekh kar hairat hui. Us ka dhyaan baaki do logon ki taraf gaya hi nahi. Sab zakham taaza ho gaye. Rohan ne us se jo berukhi dikhayi thi, woh sab yaad a gaya tha.

"Kya Daya ne mujhe Rohan se milwana tha, magar kyun?" Abhijeet ne Rohan ko dekhte hue socha.

Doosri taraf Abhijeet ko dekh kar Mr aur Mrs Ravi ki aankhon mein aik ajeeb si chamak a gayi thi.

"Daya, yeh Rohan.." Abhijeet ne Daya ki taraf mudte hue kehna chaha ke Rohan ne use kaat diya.

"Abhijeet, mujhe maaf kar do. Meine tumhare saath bohat bura kiya hai. Mujhe apni ghaltiyon ka ahsaas ho gaya hai" Rohan ne Abhijeet ki baat kaat kar apne lehje mein sharmindagi paida karne ki koshish karte hue kaha.

"Han Abhijeet, Rohan ko ahsaas ho gaya hai. Magar mujhe tumhe kisi aur se milvana hai" Daya ne Abhijeet ka Rohan ki taraf se dil saaf karne ki koshish ki aur phir us baat pe a gaya jo is waqt Abhijeet ki zindagi badal sakti thi. Use apne apnon se milwa sakti thi.

"Kis se?" Abhijeet ne chounk kar kaha aur phir us ki tawajah Mr aur Mrs Ravi ki taraf gayi. Us ne socha ke aakhir in logon se kyun milwana chahta hai Daya use.

"Yeh Mr aur Mrs Ravi hain, Abhijeet" Daya ne taaruf karaane ka kaam kiya.

"Tum mujhe in se kyun milwa rahe ho? Koun hain yeh log" Abhijeet ne chounk kar Daya ki taraf dekha. Jitna use pata tha, us ke mutabiq to Daya ka aisa koi bhi rishtedaar na tha jis se woh aise mile.

"Yeh..yeh tumhare maa baap hain Abhijeet..aur tumhara asli naam Abhijeet nahi AbhiSheikh hai..Yeh bhi inhon ne hi mujhe bataya" Daya ne bohat tahamul aur araam se Abhijeet ko yeh baat batayi thi.

"Kya?" Abhijeet ke mun se beyaqeeni se nikla magar is beyaqeeni mein khushi shamil na thi. Woh is baat ke liye kam az kam is waqt to tayaar nahi tha. Aur yeh log..kya yeh waqaie us ke maa baap hain? Yeh us ke maa baap hain ya nahi magar use un ko dekh kar koi khushi na mehsoos hui.

To Be Continued

Please review if you liked this chapter.