First of all, so sorry for the very late update. My school has opened and I got busy with it but i will try my best to take time out. Enjoy the chapter. Thank you Nisha, AbhiShikha, AbhiNidhi, PerfectAbhi, PoojaAbhiDeewaani, and wrose8792 for your reviews.

Ek Ajnabi

Chapter 18

Clash

"Kya?" Abhijeet ke mun se beyaqeeni se nikla magar is beyaqeeni mein khushi shamil na thi. Woh is baat ke liye kam az kam is waqt to tayaar nahi tha. Aur yeh log..kya yeh waqaie us ke maa baap hain? Yeh us ke maa baap hain ya nahi magar use un ko dekh kar koi khushi na mehsoos hui.

"Yeh tum kya keh rahe ho Daya?" Abhijeet ne beyaqeeni se Daya ki taraf dekha, jaise pooch raha ho ke kya us se sunne mein koi ghalati hui hai ya phir Daya se bolne mein koi ghalati hui hai. Yeh ilfaaz, yeh lafz sach kaise ho sakte hain. Ab jab woh bhool gaya tha ke shayad koi us ka apna bhi ho sakta hai aur jab use aik ajnabi sa apna mil gaya tha.

"Mein sach keh raha hun Abhijeet. Yeh tumhare maa baap hain, tum in ke bete ho. Tumhe apne apne mil gaye hain. Tumhare apne jo kahin kho gaye the woh bilaakhir tumhe mil gaye hain. Tumhe khush hona chahiye. Khushi hai bhi to kitni badi" Daya Abhijeet ke qareeb a gaya aur us ke kandhe pe dostana aur apnaiyat waale andaaz mein haath rakha.

"Nahi, mujhe yeh khushi nahi chahiye" Abhijeet ne Daya ki aankhon mein gehre andaaz se dekha. Un aankhon mein na jaane kyun aik ajeeb si kaifiat thi. Woh mun mun mein barbaraya tha magar us ki awaaz itni oonchi zaroor thi ki Daya sun sakta. Daya ne hairat se Abhijeet ki aankhon mein dekha.

Mr aur Mrs Ravi aur Rohan kisi tamashayi ki tarhan Abhijeet aur Daya ki yeh halki halki sargoshiyan sun rahe the. Samaan mein aik tajasus aur pareshaani phaili thi ke ab Abhijeet kya aur kahe ga. Abhijeet shayad yeh sab aur bardasht nahi kar pa raha tha isi liye kisi ki bhi parwah na karte hue woh apne kamre mein chala gaya. Yeh us ghar ka kamra tha jo us ka na tha, use laga tha ke yeh ghar shayad us ka bhi hai magar nahi, shayad yeh ghar us ka na tha. Yeh ghar sirf Daya ka tha, sirf aur sirf Daya ka. To phir yeh kamra us ka kaise ho sakta tha. Us ne apne ghutnon pe apna sar rakh liya. Use nahi samajh mein a raha tha ke woh itna bura kyun mehsoos kar raha hai. Woh apne maa baap ko mil kar khush kyun nahi hai. Khushi to door ki baat thi, zara si muskurahat bhi us ke chehre se gayab thi.

"Abhijeet, yeh kya kar rahe ho tum?" Halke se kamre ka darwaaza khula aur use woh awaaz sunaayi di jo kuch hi dinon mein us ke bohat qareeb ho gayi thi, bohat apni ho gayi thi, magar is waqt is awaaz mein pareshaani aur uljhan ka saaf ansar tha.

"Kya kar raha hun mein?" Abhijeet ne chehra upar uthaya to us ki aankh se anjaane mein aik beimaan aasnu tipak para hai.

"Kyun kar rahe ho tum yeh? Kyun tumhe yeh khushi nahi chahiye? Woh tumhare maa baap hain, tumhare apne hain. Tumhe unhe aise dukh nahi dena chahiye. Unhe kitni takleef hui hogi shayad tumhe is waqt is ka andaaza bhi nahi hai" Daya ne Abhijeet ko samjhaane ki koshish ki. Woh Abhijeet ki is na khushi ki wajah nahi jaanta tha magar is waqt use sirf Abhijeet ko samjhana tha kyunke yahi Abhijeet ke liye behtar tha.

"Woh mere maa baap nahi hain" Abhijeet ne surkh aankhon ke saath sipaat lehje ke saath kaha.

"Kya? Kya matlab? tumhe kaise pata hai? Tumhe to kuch yaad nahi hai na to phir yeh kaise yaad hai?" Daya ko aik pal ko jhatka sa laga tha. Abhijeet ke mun se kam az kam is tarhan ke jawab ka muntazir nahi tha woh.

"Han mujhe kuch bhi yaad nahi hai lekin mein phir bhi keh raha hun ke yeh mere maa baap nahi hain. Beshak meri yaadein mere paas nahi hain, magar in logon ko dekh kar mujhe woh ahsaas nahi hua jo aik bete ko apne maa baap ko dekh kar hota hai. Isi liye mujhe lagta hai ke yeh mere baap ho hi nahi sakte" Abhijeet ne saaf saaf lafzon mein Mr aur Mrs Ravi ko apna maa baap manne se inkaar kar diya.

"Abhijeet, tum khawmakha mein weham kar rahe ho jab ke iski koi zaroorat nahi hai. Kyun un rishton ko thukrana chahte ho jo tum se kho gaye the" Daya ab bhi apni baat pe data hua tha aur Abhijeet ki kisi bhi aisi baat pe yaqeen nahi kar sakta tha. Abhijeet ke in wehmon ke peeche woh Abhijeet ko yeh rishte to khone nahi de sakta tha na.

"Tum kyun meri baat nahi maan rahe Daya. Meri his pe aitabaar kyun nahi kar rahe. Mera dil hi nahi maan raha" Abhijeet ke lehje mein mayoosi aur udaasi tipak aayi. Use afsos ho raha tha ke Daya kyun nahi use samajh pa raha tha. Use to use samajh jana chahiye tha. Woh to kitna qareeb ho gaya tha us ke. Bhai manne laga tha use, magar shayad bhai manne aur bhai hone mein bohat farak hota hai. Shayad yeh sab kitaabi baatein hoti hain.

"Abhijeet, zid mat karo. Apni zid ke peeche apna nuksaan mat karo" Daya ko laga ke shayad yeh woh pal hai jab woh bhi khud garz ho sakta hai, Abhijeet ki baat mein haan mein haan mila sakta hai magar use is waqt ka fayda nahi uthana tha, use bhi doosron ki tarhan khudgarz nahi banna tha, balke Abhijeet ke liye sochna tha, us ke mustaqbil ke baare mein sochna tha. Abhijeet apne ghar walon ke saath kayi behtar zindagi guzaar sakta tha, yeh zindagi to us ke muqaable mein shayad kuch bhi na thi.

"Kyun kar rahe ho tum yeh? Tum bhi tang a gaye ho mujh se kya. Kya tumhare bhi ghar mein ab mere liye koi jagah nahi hai. kam az kam tum se yeh expect nahi kiya tha meine. Sirf is liye ke mujh se jaan churwa sako, kisi bhi aire ghaire ke saath mujhe bhejna chahte ho. Kya guaranty hai ke woh mere maa baap hain bhi ya nahi?" Abhijeet dukh se bola. Us ke lehje mein shikwa tha, gila tha, ghussa tha, hairat thi.

"Tum mujhe ghalat samajh rahe ho Abhijeet. Mera aisa koi maqsad nahi hai. Mein to tumhe saari zindagi apne ghar mein rakhne ke liye tayaar hun, itne azeez ho gaye ho mujhe tum. Magar tum nahi samajh rahe ke yeh sab tumhari behtari ke liye hai. Mein tumhari behtari chahta hun. Woh tumhaare maa baap hain. Woh agar tumhaare maa baap na hote to unhe kya zaroorat thi yeh jhoot bolne ki" Daya ko Abhijeet ki baat sun kar dukh aur hairat hui thi. Abhijeet aise kaise soch sakta tha. Woh kyun Daya ko ghalat samajh raha tha.

"Nahi, meine tumhe bilkul theek samjha hai Daya. Acha hota ke mein us din mar hi jaata jis din tumhari gaadi se mera accident hua tha. Na hi tum se milta, na hi tumhare itne qareeb ho pata, aur na hi tum mujhe yun apni zindagi se ukhaar kar phaink paate. Lekin tumhara haq hai shayad yeh bhi. Aakhir lagta hi kya hun mein tumhara. Aj bhi ek ajnabi se badh kar nahi hun" Abhijeet ki awaaz mein dukh, takleef aur begumaani shaamil thi. Woh jaane anjaane mein Daya pe apna haq samajhne laga tha magar shayad us ka Daya pe aj bhi koi haq nahi tha. Aakhir ek ajnabi ka haq hi kya ho sakta hai.

To Be Continued

So kaisa laga? I hope ke acha laga ho, wrote it very quickly so not really sure about that. :0