Hello guys, I'm back with the update. Thank you to everyone who read and reviewed.

Ek Ajnabi

Chapter 25

Abhijeet's Past Revealed Part 1

"Abhijeet, kya hua hai? Tum cheekhe kyun? Tum theek to ho na. Tum kuch bol kyun nahi rahe" Doosri taraf Daya ne jab Abhijeet ki cheekh ki awaaz suni to woh pal ko sakte mein a gaya. Use samajh hi nahi aya ke kya hua. Woh pareshaani aur dar se phone ke paar baar baar Abhijeet ko awaazein laga raha tha magar doosri taraf achanak hi phone hi off ho gaya.

"Zaroor kuch garbar hai. Mujhe abhi aur isi waqt wapis jana hoga Abhijeet ke ghar, pata nahi woh Abhijeet ka ghar tha bhi ya nahi. Oh god please Abhijeet theek ho, aur yeh jo mein sab soch raha hun woh sab weham ho" Daya ke zehan mein tarhan tarhan ke khayaal a rahe the. Use kuch samajh bhi nahi a raha tha ke woh kya kare, foran hi us ne wapis jaane ki thaan li thi. Woh foran gaadi mein betha aur gaadi ko unhi raaston pe doraane laga jahan se woh abhi abhi wapas aya tha. Kuch 10 minute mein woh wahan wapas pahunch gaya tha. Us ne gaadi se utar kar darwaaze pe lagatar bell bajaani shuru ki, saath hi saath darwaaza bhi khatkataya magar koi darwaaza khol hi nahi raha tha. Us ne ghusse aur pareshaani se bilaakhir darwaaze pe zor se apni taang maar ke use tod hi daala ke ab is ke ilaawa koi chara bhi na tha.

"Abhijeet, Abhijeet, kahan ho tum? Abhijeettt" Daya ghar ke andar ghus gaya tha. Woh har taraf Abhijeet ko hi pukaar raha tha par use ghar mein Abhijeet kya, koi aur bhi na dikha. Woh ghar jo 20 minute pehle itna abaad tha ab achanak se weeraan lag raha tha. Us ne poora ghar chaan maara par use na hi Abhijeet aur na hi Mr aur Mrs Ravi dikhayi diye. Pareshaani se us ne aik baar phir Abhijeet ke number par phone karne ki try kiya par phone abhi bhi band hi pada tha. Use samajh na aya ke woh Abhijeet ko aakhir dhoonde to dhoonde kese. Pata nahi kahan tha Abhijeet. Ab woh use kahan dhoonde ga. Woh bebasi se zameen pe diwaar ke saath taik lagake bethta chala gaya. Use afsos hua ke use Abhijeet ko bhejna hi nahi chahiye tha, rok lena chahiye tha.

"I'm Sorry Abhijeet, mujhe tumhe jaane nahi dena chahiye tha. Bohat badi ghalti ho gayi hai mujh se jis ka khamiyaza mein na jaane kaise bharun ga. Mujhe tumhaari baat usi din maan leni chahiye thi ke woh tumhaare maa baap nahi hain, tum keh rahe the mujh se, tum ne itna kaha mujh se par mein, meine tumhaari baat na maani. Mein tumhe samajh hi nahi paaya. Kaash ke mein tumhari baat usi din maan leta to tum shayad jaane ka faisla na lete. Mein samajh raha tha ke tumhe waqaie yaqeen ho gaya hai ke woh tumhare maa baap hain isi liye tum ne jaane ka faisla kiya hai par mein yeh samajhne se qaasir raha ke shayad meri baaton ne tumhara dil dukha diya hai is tarah ke tum apne ap ko mujh pe bojh samajhne lage aur is sab ki wajah sirf mein hun, sirf mein" Daya bol raha tha magar sunne waala yahaan koi nahi tha. Woh apna dard aur pachtaawe in diwaaron mein utaar raha tha. Woh diwaarein jo kuch keh nahi saktein, bas sun sakti hain.

Abhijeet ki aankhein khulein to us ne apne ap ko hathkariyon mein jakra paaya. Us ke dono haath hathkariyon mein jakre the aur aik taang par hathkadi lagi thi jis ki lambayi bas itni thi ke woh bas chaar ya paanch qadam se zyaada chal nahi sakta tha. Us ne apne aas paas nazar dorayi to us ki tarah wahan aur bhi log hathkariyon mein jakre nazar aaye. Woh aik jail numa kamre mein band the jis ka darwaaza sulaakhon jesa tha. Us ke saath jo log band the woh un mein se kayi ko pehchaan pa raha tha. Us ki yaadasht wapas a gayi thi aur use yaad a gaya tha ke woh is jaal mein kaise phansa tha.

Abhijeet ki zindagi bachpan se hi hasraton aur khawahishon ke gird ghoomi thi jo ke kabhi poori na ho paayein. Woh aik ghareeb gharaane se taaluq rakhta tha. Us ki maa us ki paidash pe hi wafaat pa gayi thi aur us ko apna kehne ke liye sirf us ka baap hi reh gaya tha. Par Abhijeet badqismat tha ke us ko baap ka pyaar bhi kabhi naseeb na hua. Baap ne Abhijeet ki kabhi fikar nahi ki. Abhijeet ka baap juwe (betting) ka bohat bada khiladi tha. Ghar ka jo bhi kharcha hota woh Abhijeet ka baap usi tareeqe se intezaam karta tha. Magar waqt guzarne ke saath saath Abhijeet ke baap ki juwe mein qismat kharaab hoti chali gayi. Magar yeh jo juwe ki buri lat thi woh na hi kabhi chooti thi aur na hi kabhi chutni thi. Juwe ki lat se bebas ho kar Abhijeet ke baap ne ghar ki mukhtalif cheezein bechna shuru kar dein, bohat se qarze liye aur bilaakhir un ka ghar jis mein woh rehte the woh bhi bech diya jab Abhijeet 15 ya 16 saal ka tha. Magar is juwe ne abhi bhi in ka peecha na choda tha. Aik din Abhijeet ke baap ne lalach mein a kar aik bohat badi baazi kheli ke agar jeet jata to us ke kayi saal bethe bithayein guzar jaate aur agar haar jata to..to shayad. Magar woh lalach mein itna dooba tha ke use yaqeen tha ke woh yeh baazi jeet jaaye ga aur apna aik naya ghar bhi khareed le ga. Magar us ki bad qismati ke woh yeh baazi bhi haar gaya. Us waqt Abhijeet 18 saal ka ho chuka tha.

"Yeh..yeh kya ho gaya? Mein haar nahi sakta. Nahi..nahi..mein haar nahi sakta" Abhijeet ka baap aik dam sadme mein a gaya tha.

"Tu haar gaya hai. Ab jitni jaldi kar sakta hai, paise ka intezaam kar le. Poore 5 crore" Aik admi ne kaha.

"Mein itne paise kahan se laun ga. Sab bech diya hai. Ghar, samaan, sab kuch bech diya hai. Ab kuch bechne ko bacha hi nahi hai. Ab to mein khud ko ya apne bete ko bech kar hi itne paise ada kar sakta hun" Abhijeet ka baap bohat badi kashkamash mein phans gaya tha. Use samajh nahi a raha tha ke ab kya bech kar paise ada kare.

"Han, ab tere paas yahi raasta reh gaya hai. Tujhe apne bete ko hi bechna pade ga. Itne paise to tabhi mil sakte hain" Us aadmi ne aik anokha mashwara diya jis pe Abhijeet ka baap chokanna reh gaya.

"Kya matlab?" Woh hairaangi se bola.

"Woh jo seth hai na jis se tum ne juwe ki yeh baazi lagayi thi, us ka na bohat bada karobar hai, aslehon ka. Na sirf asle balke wahan pe woh larkon ko aatankwaadi banane ke liye bhi tayaar karta hai aur un ko bahar ke mulkon mein bhejta hai ke woh wahan ja kar tabaahi machaein. Bohat bada garouh hai uska, tiger naam hai us ke garouh ka. Tum apne larke ko us ke hawaale kar do ge to samjho ke tumhare paise maaf"

To be Continued

So How was it? Do tell me your thoughts.